Read Tibetan — པོད་སྐད་Tibetan Old Testament 2011 ཡེ་ཤ་ཡཱ 57 Bible Online

ཡེ་ཤ་ཡཱ 57 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 57

¹མི་བཟང་པོ་འཆི་བ་ལ་སུས་ཀྱང་མི་ཤེས་པ་དང་དོ་སྣང་མི་བྱེད་དོ། འོན་ཀྱང་དེ་ཚོ་འཆི་བའི་སྐབས་སུ་རྐྱེན་ངན་གང་གི་ཀྱང་དེ་ཚོར་གནོད་པར་མི་བྱེད་དོ།

²མི་ཚེ་བཟང་པོའི་ངང་གནས་མཁན་ཚོར་འཆི་བར་ཞི་བདེ་དང་ངལ་གསོ་རྙེད་དོ།

³ཁྱོད་ཚོ་སྡིག་ཅན་ཚོ་ཁྲིམས་ཞིབ་ཡོང་བའི་ཆེད་དུ་འདིར་ཤོག་ཅིག ཁྱོད་ཚོ་ངན་སྔགས་མཁན་དང་ལོག་གཡེམ་པ་དང་སྨད་འཚོང་མ་ལས་བཟང་བ་མེད་དོ།

⁴ཁྱོད་ཚོས་སུ་ལ་འཕྱ་ལས་བརྒྱབ་ཀྱི་ཡོད་དམ། རྫུན་ཅན་ཁྱོད་ཚོ་སུ་ལ་འཕྱ་འམ།

⁵ཁྱོད་ཚོའི་ཤིང་སྡོང་དམ་པ་དེ་ཚོའི་འོག་ཏུ་འཁྲིག་སྤྱོད་བྱས་ནས་ཕྲུ་གུ་བྱིན་མཁན་གྱིི་ལྷ་རྣམས་ལ་མཆོད་དོ། བྲག་ཕུག་ཚོའི་ཆུ་འགྲམ་དུ་རང་གི་ཕྲུ་གུ་རྣམས་ལ་དམར་མཆོད་དུ་ཕུལ་ལོ།

⁶དེ་ནས་ཁྱོད་ཚོས་རྡོ་འཇམ་པོ་བླངས་ནས་ལྷ་ལྟར་དེ་ཚོ་ལ་མཆོད་དོ། ཁྱོད་ཚོས་རྒུན་ཆང་དེ་ཚོ་ལ་མཆོད་འབུལ་གྱི་ཚུལ་དུ་བླུག་པ་དང་དེ་ཚོ་ལ་འབྲུའི་མཆོད་པ་འཁྱེར་ཡོང་ངོ། ཁྱོད་ཚོའི་བསམ་པར་ངས་དེ་ཚོར་དགའ་གི་རེད་བསམ་གྱི་འདུག་གམ།

⁷ཁྱོད་ཚོས་རི་མཐོ་པོའི་སྟེང་དམར་མཆོད་འབུལ་བ་དང་། འཁྲིད་སྤྱོད་བྱེད་པར་ཕྱིན་ནོ།

⁸ཁྱོད་ཀྱི་སྐྱུག་བྲོའི་སྐུ་འདྲ་རྣམས་སྒོའི་མདུན་ནང་ལ་སྒྲིགས་ནས། ཁྱོད་ཀྱིས་ང་ལ་སྤངས་སོ། ཁྱོད་རང་གི་གྱོན་གོས་ཕུད་ནས་ཁྱོད་ཀྱི་སྙིང་སྡུག་དེ་མཉམ་དུ་ཉལ་བའི་ཆེད་དངུལ་སྤྲད་ནས་དེ་མཉམ་དུ་ཉལ་ཁྲི་རྒྱ་ཆེན་པོའི་སྟེང་དུ་འཛེགས་སོ། དེར་ཁྱོད་ཀྱི་འདོད་ཆགས་བློ་ཁེངས་བར་བྱེད་དོ།

⁹ཁྱོད་ཀྱིས་དྲི་ཞིམ་གྱི་སྣུམ་བྱུག་ནས་མོ་ལེག་ལྷ་ལ་མཆོད་པར་འགྲོའོ། མཆོད་པའི་ལྷ་འཚོལ་བའི་ཆེད་ཁྱོད་ཀྱིས་ཐག་རིང་དང་གཤིན་པོའི་གླིང་བཅས་པར་བང་ཆེན་བཏང་ངོ།

¹⁰ལྷ་གཞན་རྣམས་འཚོལ་སྐབས་ཐང་ཆད་པར་འགྱུར་ན་ཡང་ཁྱོད་ཀྱི་རེ་ཐག་བཅད་པར་མི་བྱའོ། ཁྱོད་ཀྱི་བསམ་བློར་སྐྱུག་བྲོའི་སྐུ་འདྲ་ཚོས་ཁྱོད་ལ་སྟོབས་ཤུགས་སྤྲད་ནས་ཁྱོད་སྐྱོ་པོར་འགྱུར་གྱི་མ་རེད་བསམ་མམ།

¹¹གཙོ་བོ་དཀོན་མཆོག་གིས་བཀའ་གནང་བ། ཁྱོད་ཀྱིས་ང་ལ་རྫུན་ཤོད་པ་དང་ང་ཆ་ཚང་བརྗེད་པར་འགྱུར་བ་དང་ཁྱོད་འཇིགས་པར་བཟོ་མཁན་ལྷ་འདི་ཚོ་སུ་རེད་དམ། ངས་དུས་ཚོད་རིང་པོའི་བར་ཁུ་སིམ་མེར་བསྡད་སྐབས་ཁྱོད་ཚོས་ང་ལ་གུས་བཀུར་ཞུ་རྒྱུ་མཚམས་འཇོག་བྱེད་པ་རེད་དམ།

¹²ཁྱོད་ཚོས་གང་བྱས་པ་རྣམས་དྲང་བདེན་ཡིན་བསམ་གྱི་ཡོད་ན་ཡང་། ངས་ཁྱོད་ཀྱི་བྱ་སྤྱོད་རྣམས་འཐེར་འདོན་བྱ་རྒྱུ་ཡིན་པ་དང་། ཁྱོད་ཀྱི་སྐུ་འདྲ་ཚོས་ཁྱོད་ལ་རོགས་བྱེད་མི་ཐུབ་བོ།

¹³ཁྱོད་ཀྱིས་རོགས་རམ་གྱི་ཆེད་ངུ་འབོད་སྐབས་སུ་ཁྱོད་ཀྱི་སྐུ་འདྲ་ཚོར་སྐྱོབ་ཏུ་འཇུག་ཅིག དེ་ཚོ་རླུང་འཚུབ་ཡང་པོ་ཞིག་གིས་འཁྱེར་བར་འགྱུར་རོ། འོན་ཀྱང་ང་ལ་བློ་བཀལ་བྱ་མཁན་ཚོ་ཡུལ་དུ་བསྡད་ནས་ངའི་མཆོད་ཁང་དུ་ང་ལ་མཆོད་པར་བྱེད་དོ༎

¹⁴གཙོ་བོ་དཀོན་མཆོག་གིས་བཀའ་གནང་བ། ངའི་མི་མང་རྣམས་ངའི་སར་ལོག་དུ་འཇུག་ཅིག། ལམ་འགོག་རྐྱེན་རྣམས་ཕྱིར་འབུད་ཅིག། ལམ་བཟོས་ནས་དེ་གྲ་སྒྲིགས་བྱོས་ཤིག།

¹⁵ང་རྒྱུན་དུ་གནས་པའི་དཀོན་མཆོག་མཐོ་པོ་དང་དམ་པ་དེ་ཡིན། ང་གནས་མཐོ་པོ་དང་དམ་པར་སྡོད་དོ། འོན་ཀྱང་བློ་སྟོབས་དང་རེ་བ་སླར་གསོ་བྱེད་པའི་ཆེད་དུ་ང་མི་མང་ཉམས་ཆུང་དང་འགྱོད་སེམས་ཅན་ཚོའི་མཉམ་དུ་ཡང་བསྡད་དོ།

¹⁶ངས་ངའི་མི་མང་ལ་སྲོག་སྤྲད་པ་དང་ངས་མུ་མཐུད་ནས་དེ་ཚོ་ལ་སྐྱོན་བརྗོད་དང་དུས་གཏན་དུ་དེ་ཚོ་ལ་མི་ཁྲོའོ།

¹⁷དེ་ཚོའི་སྡིག་པ་དང་འདོད་རྔམ་གྱི་རྐྱེན་གྱི་ངས་དེ་ཚོར་ཁྲོ་བ་དང་ཉེས་ཆད་གཏོང་ནས་སྤངས་བ་ཡིན། འོན་ཀྱང་དེ་ཚོའི་སེམས་གྱོང་པོ་ཡིན་སྟབས་དེ་ཚོ་རང་གི་ལམ་དུ་མུ་མཐུད་ནས་ཕྱིན་ཡོད་དོ།

¹⁸ངས་དེ་ཚོས་ལས་ཇི་བྱས་ཡོད་པ་ཤེས་ཀྱི་ཡོད། འོན་ཀྱང་ངས་དེ་ཚོ་གསོ་བར་བྱེད་དོ། ངས་དེ་ཚོ་ལ་སྣེ་འཁྲིད་དང་རོགས་རམ་བྱེད་པ་དང་། མྱ་ངན་བྱེད་མཁན་རྣམས་ལ་སེམས་གསོ་བྱེད་དོ།

¹⁹ངས་ཉེ་འཁོར་དང་ཐག་རིང་དུ་ཡོད་པ་ཚང་མར་ཞི་བདེ་སྤྲོད་པ་དང་། ངའི་མི་མང་ཚོར་ངས་དྲག་གསོ་བར་བྱེད་དོ།

²⁰འོན་ཀྱང་མི་ངན་པ་རྣམས་རྒྱ་མཚོ་འཁྲུགས་པ་དང་འདྲ་བས་དེའི་རྦ་རླབས་ཀྱིས་བཙོག་པ་དང་འདམ་རྫབ་འཁྱེར་ཡོང་བ་མཚམས་མི་ཆད་དོ།

²¹སྡིག་ཅན་ལ་བརྟན་ཆ་མེད་ཅེས་གཙོ་བོ་དཀོན་མཆོག་གིས་བཀའ་གནང་ཡོད་དོ༎