Read Tibetan — པོད་སྐད་Tibetan Old Testament 2011 ཡེ་ཤ་ཡཱ 62 Bible Online

ཡེ་ཤ་ཡཱ 62 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 62

¹ང་ཡིས་ཡེ་རུ་ཤ་ལེམ་དེ་ལ་ནི། སེམས་ཤུགས་འཕར་བའི་ཆེད་དུ་སྨྲ་བར་བྱ། ང་ཡི་མོ་ལ་མ་སྐྱོབ་པ་ཡི་བར། མོ་ཡི་རྒྱལ་ཁ་དེ་ནི་མཚན་གྱི་དཔལ་འབར་ལྟ་བུར་མ་འཚེར་བར། ང་ནི་ཁ་རོགས་མི་སྡོད་དོ།

²མི་རིགས་ཚང་མས་ཡེ་རུ་ཤ་ལེམ་ཁྱོད། རྒྱལ་ཁ་ཐོབ་པ་ཡིན་པར་མཐོང་བར་འགྱུར། དེ་ཚོའི་རྒྱལ་པོ་ཚང་མས་ཁྱོད་ཀྱི་གཟི་བརྗིད་མཐོང་། གཙོ་བོ་དཀོན་མཆོག་ཁོང་གིས་ཁྱོད་ལ་མིང་གསར་ཞིག། གནང་བ་དེ་ནས་ཁྱོད་ལ་འབོད་པར་བྱེད།

³ཁྱོད་ཚོ་ནི་གཙོ་བོ་དཀོན་མཆོག་ཁོང་གི་ཆེད། མཛེས་སྡུག་ཅན་གྱི་ཅོད་པན་ལྟ་བུར་འགྱུར།

⁴སླར་ཡང་ཁྱོད་ལ་སྤངས་བ་ཅེས་འབོད་མི་ཡོང་། ཡང་ན་ཁྱོད་ཀྱི་ཡུལ་ལ་སྤངས་བའི་ཆུང་མ་ཞེས་འབོད་མི་ཡོང། ཁྱོད་མིང་གསར་པ་ནི་དཀོན་མཆོག་མོར་མཉེས་ཟེར། ཁྱོད་ཀྱི་ཡུལ་ལ་དགའ་བའི་སྒོ་ནས་ཆང་ས་བརྒྱབ་བ་ཟེར། གང་ལ་ཟེར་ན་གཙོ་བོ་དཀོན་མཆོག་ཁྱོད་ལ་མཉེས། ཁོང་ནི་ཁྱོད་ཀྱི་ཡུལ་གྱི་ཁྱོ་ལྟར་འགྱུར།

⁵མོ་གསར་ན་གཞོན་མནའ་མར་ལེན་པ་ལྟར། བཀོད་པ་པོ་ཡིས་ཁྱོད་མཉམ་ཆང་ས་བརྒྱབ། མག་པ་རང་གི་མནའ་མར་དགའ་བ་བཞིན། ཁྱོད་ཀྱི་དཀོན་མཆོག་ཁྱོད་ལ་དགའ་བར་འགྱུར།

⁶ཡེ་རུ་ཤ་ལེམ་ཁྱོད་ཀྱི་ལྕགས་རིའི་ཁར། ང་ཡི་སྲུང་བྱ་བཞག་ཡོད་དེ་ཚོ་ཡིས། ཉིན་མཚན་གཉིས་པོར་ཁ་རོག་སྡོད་མི་རུང་། དེ་ཚོས་ཁོང་གི་ཞལ་བཞེས་གནང་བ་ལ། དྲན་བསྐུལ་གྱིས་ནས་དེ་ཚོ་ཁོང་ལ་བརྗེད་བཅུག་མི་རུང་།

⁷ཁོང་གིས་ཡེ་རུ་ཤ་ལེམ་སླར་གསོ་དང་། འཛམ་གླིང་ཡོངས་ཀྱིས་བསྟོད་པའི་གྲོང་ཁྱེར་ལ། མི་མཛད་བར་དུ་ངལ་གསོ་འཇུག་མི་རུང་།

⁸གཙོ་བོ་དཀོན་མཆོག་ཁོང་གིས་དམ་བཅའ་ནན་པོ་གནང་། ཁོང་གི་མཐུ་ཡིས་དེ་ལྟར་སྒྲུབ་པར་མཛད། ཁྱོད་ཀྱི་འབྲུ་ནི་དགྲ་བོས་ཟས་མི་འགྱུར། ཕྱི་རྒྱལ་བ་ཡིས་ཁྱོད་ཀྱི་རྒུན་ཆང་མི་འཐུང་།

⁹འོན་ཀྱང་ཁྱོད་ཚོ་འབྲུ་ནི་འདེབས་མཁན་དང་། རྔ་མཁན་རྣམས་ཀྱིས་བག་ལེབ་དེ་ཟ་ཞིང་། གཙོ་བོ་དཀོན་མཆོག་ཁོང་ལ་བསྟོད་པར་བྱ། ཁྱོད་ཚོ་རྒུན་འབྲུམ་ལ་ཡང་མིག་བལྟ་མཁན་དང་བསྡུ་མཁན་ཚོས། ང་ཡི་མཆོད་ཁང་འཁྱམས་རའི་ནང་དུ་འཐུང་བར་བྱ།

¹⁰ཁྱོད་ཡེ་རུ་ཤ་ལེམ་མི་མང་ཚོ། གྲོང་ཁྱེར་དེ་ནས་ཕྱི་རོལ་སོང་ཞིག་དང་། མི་མང་ཕྱིར་ལོག་ཆེད་དུ་ལམ་བཟོས་ཤིག། གཞུང་ལམ་བཟོས་ནས་རྡོ་རྣམས་ཕྱིར་དབྱུག་ཅིག། རྒྱལ་ཁབ་ཡོངས་ཀྱི་ཤེས་ཕྱིར་རྟགས་རྒྱོབ་ཅིག།

¹¹གཙོ་བོ་དཀོན་མཆོག་ཁོང་གིས་ས་གཞི་ཡོངས་ལ་འདི་གསལ་སྒྲགས་གནང་བཞིན་ཡོད། ཡེ་རུ་ཤ་ལེམ་མི་མང་ཡོངས་རྫོགས་ལ་སྨྲོས་ཤིག གཙོ་བོ་དཀོན་མཆོག་ཁོང་གིས་སྐྱབས་པའི་མི་མང་ལ་རང་མཉམ་དུ། འཁྲིས་ནས་ཁྱོད་ཚོ་སྐྱོབ་ཆེད་ཕེབས་བཞིན་འདུག།

¹²ཁྱོད་ཚོ་དཀོན་མཆོག་ཁོང་གི་མི་མང་དམ་པ་དང་། གཙོ་བོ་དཀོན་མཆོག་ཁོང་གིས་སྐྱབས་པའི་མི་མང་ཅེས་འབོད་དོ། ཡེ་རུ་ཤ་ལེམ་དཀོན་མཆོག་གིས་བརྩེ་བའི་གྲོང་ཁྱེར་དང། དཀོན་མཆོག་གིས་ནམ་ཡང་སྤངས་བར་མཛད་མེད་པའི་གྲོང་ཁྱེར་ཅེས་འབོད་དོ༎