Read Tibetan — པོད་སྐད་Tibetan Old Testament 2011 ལེ་ཝི 1 Bible Online

ལེ་ཝི 1 - Tibetan — པོད་སྐད་Tibetan Old Testament 2011 bible

ལེ་ཝི 1

¹གཙོ་བོ་དཀོན་མཆོག་གིས་མོ་ཤེ་ལ་དབུ་གུར་དམ་པའི་ནང་ནས་བོས་ཏེ།

²ཨིསི་རཱཨེལ་པ་ཚོས་དམར་མཆོད་འབུལ་དུས་སྲུང་དགོས་པའི་གཤམ་གསལ་བཀའ་ཁྲིམས་རྣམས་ཁོང་ལ་གནང་ངོ་། སུ་ཞིག་གིས་དམར་མཆོད་ཀྱི་ཆེད་དུ་དུད་འགྲོ་རྣམས་འབུལ་བར་ཕུལ་བ་ཡིན་ན། གླང་ངམ་ལུག་གམ་ར་གང་རུང་ཞིག་འབུལ་དགོས་པ་དང་།

³དེ་བཞིན་སྦྱིན་སྲེག་གི་མཆོད་པར་གླང་ཞིག་འབུལ་འདོད་ན། གླང་སྐྱོན་མེད་ཞིག་འབུལ་དགོས། གླང་དེ་བཞིན་གཙོ་བོ་དཀོན་མཆོག་གནས་པའི་དབུ་གུར་དམ་པའི་གཟིམས་སྒོའི་མདུན་དུ་འཁྲིད་ཡོང་ནས་ཕུལ་བ་ཡིན་ན་ཁོང་གིས་འབུལ་བ་དེ་བཞེས་པར་འགྱུར།

⁴མི་དེས་གླང་གི་མགོར་ལག་པ་བཞག་པ་ཡིན་ན། དེ་ནི་ཁོའི་སྡིག་སེལ་གྱི་མཆོད་འབུལ་གྱི་ཚུལ་དུ་ངོས་ལེན་བྱེད་རྒྱུ་ཡིན་ནོ།

⁵ཁོས་གླང་དེ་ས་གནས་དེ་རང་ལ་བསད་དགོས། ཨ་རོན་གྱི་རིགས་བརྒྱུད་ཀྱི་བླ་མ་ཚོས་གཙོ་བོ་དཀོན་མཆོག་ལ་ཁྲག་དེ་འབུལ་དགོས་པ་དང་། དབུ་གུར་དམ་པའི་གཟིམས་སྒོའི་རྩར་ཡོད་པའི་མཆོད་ཁྲིའི་ཕྱོགས་བཞི་ལ་གཏོར་དགོས།

⁶དེ་རྗེས་ཁོས་གླང་གི་པགས་པ་བཤུས་ཏེ་ཤ་དེ་དུམ་བུར་བཏུབ་དགོས།

⁷བླ་མ་ཚོས་མཆོད་ཁྲིའི་སྟེང་དུ་ཤིང་སྒྲིག་ནས་མེ་སྤར་དགོས།

⁸དེ་རྗེས་ཁོ་ཚོས་མགོ་དང་ཚིལ་ལུ་བཅད་པའི་དུམ་བུ་རྣམས་མེའི་སྟེང་དུ་བཞག་དགོས།

⁹མི་དེས་དུད་འགྲོ་དེའི་ནང་ཁྲོལ་དང་རྐང་པ་རྣམས་ཆུས་འཁྲུ་དགོས་པ་དང་། དེར་ཞབས་ཏོག་བྱེད་མཁན་བླ་མས་འབུལ་བ་ཡོངས་རྫོགསམཆོད་ཁྲིའི་སྟེང་དུ་མེར་སྲེག་གཏོང་དགོས། ཁ་ཟས་ཀྱི་དྲི་ཞིམ་དེས་གཙོ་བོ་དཀོན་མཆོག་ཐུགས་མཉེས་པར་འགྱུར།

¹⁰གལ་ཏེ་མི་དེས་རང་གི་ལུག་གམ་རའི་ཁོངས་ནས་དུད་འགྲོ་གཅིག་འབུལ་བར་ཕུལ་བ་ཡིན་ན། དེ་ནི་ཕོ་ལུག་གཅིག་གམ་ར་ཕོ་སྐྱོན་མེད་པ་ཞིག་ཡིན་པར་དགོས།

¹¹ཁོས་དུད་འགྲོ་དེ་མཆོད་ཁྲིའི་བྱང་ཕྱོགས་སུ་བསད་དགོས་པ་དང་། བླ་མ་ཚོས་ཁྲག་དེ་མཆོད་ཁྲིའི་ཕྱོགས་བཞི་ལ་གཏོར་དགོས།

¹²དུད་འགྲོ་དེ་དུམ་བུར་བཏུབ་པའི་རྗེས་སུ། བླ་མས་དེའི་མགོ་དང་ཚིལ་ལུ་བཅས་ཆ་ཚང་མེའི་སྟེང་དུ་བཞག་དགོས།

¹³མི་དེས་དུད་འགྲོ་དེའི་ནང་ཁྲོལ་དང་རྐང་པ་བཅས་འཁྲུ་དགོས། བླ་མས་གཙོ་བོ་དཀོན་མཆོག་ལ་སྦྱིན་སྲེག་གི་མཆོད་པ་ཕུལ་སྟེ། དེ་དག་ཡོངས་རྫོགས་མཆོད་ཁྲིའི་ཁར་མེར་སྲེག་གཏོང་དགོས། ཁ་ཟས་ཀྱི་འབུལ་བ་དེའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་མཉེས་པར་འགྱུར།

¹⁴དེ་བཞིན་མི་སུ་ཞིག་གིས་སྦྱིན་སྲེག་གི་ཆེད་དུ་འདབ་ཆགས་ཀྱི་འབུལ་བ་ཞིག་འབུལ་བར་འདོད་ན། དེ་ནི་ཕུག་རོན་ནམ་འང་གུ་ཞིག་ཡིན་པ་དགོས།

¹⁵བླ་མས་དེ་མཆོད་ཁྲིའི་ཁར་འབུལ་དགོས་ཏེ། བྱ་དེའི་སྐེ་གཅུས་རིལ་བརྒྱབ་ནས་མགོ་དེ་མཆོད་ཁྲིའི་ཁར་མེར་སྲེག་གཏོང་དགོས་པ་དང་། དེའི་ཁྲག་དེ་མཆོད་ཁྲིའི་གཞོག་གཅིག་ཏུ་བཙིར་དགོས།

¹⁶དེའི་ཨོག་གསོག་དང་དེའི་ནང་ཡོད་པའི་ནང་ཁྲོལ་ཆང་མར་བཏོན་ནས་མཆོད་ཁྲིའི་ཤར་ཕྱོགས་སུ་གོག་ཐལ་བཞག་སར་དབྱུགས་དགོས།

¹⁷དེའི་ཤོག་པ་མཇུས་ཏེ་གཟུགས་པོའི་དཀྱིལ་ནས་གཤག་དགོས། འོན་ཀྱང་ཤོག་པ་མ་བཅད་པར་བྱས་ནས་གཟུགས་པོ་ཆ་ཚང་མཆོད་ཁྲིའི་ཁར་མེར་སྲེག་གཏོང་དགོས། ཁ་ཟས་ཀྱི་འབུལ་བའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་མཉེས་པར་འགྱུར༎