Read Tibetan — པོད་སྐད་Tibetan Old Testament 2011 ལེ་ཝི 14 Bible Online

ལེ་ཝི 14 - Tibetan — པོད་སྐད་Tibetan Old Testament 2011 bible

ལེ་ཝི 14

¹པགས་ནད་དྲག་པོ་འཕོག་པའི་ནད་པ་ཞིག་དྲག་གསོ་བའི་རྗེས་སུ། དེ་ལ་སྲོལ་བཞིན་དག་འབྱངས་བྱེད་ཆོག་སྐོར་གྱི་གཤམ་གསལ་བཀའ་ཁྲིམས་རྣམས་ནི་གཙོ་བོ་དཀོན་མཆོག་གིས་མོ་ཤེ་ལ་གནང་བ་ཡིན་ནོ། མི་དེ་གཙང་མ་ཡིན་ཞེས་ཁྱབ་བསྒྲགས་བྱེད་པའི་ཉིན་མོ་དེ་ལ་ཁོ་བླ་མའི་རྩར་འཁྲིད་ཡོང་དགོས།

³བླ་མས་མི་དེ་སྒར་གྱི་ཕྱི་རོལ་དུ་འཁྲིད་ནས་བརྟག་དཔྱད་བྱེད་དགོས་པ་དང་། ནད་གཞི་དེ་དྲག་གསོ་བ་ཡིན་ན།

⁴སྲོལ་བཞིན་དག་འབྱངས་བྱེད་པའི་བྱ་ཆ་གཅིག་དང་མཉམ་དུ་ཤུག་ཤིང་དུམ་བུ་གཅིག། དེ་བཞིན་སྐུད་པ་དམར་པོ་ཞིག་དང་ཧི་སོབ་ཤིང་གི་ལོ་མ་དང་བཅས་པའི་ཡལ་ག་ཞིག་འཁྱེར་ཡོང་དགོས་ཞེས་བླ་མས་བཀའ་གནང་དགོས།

⁵དེ་ནས་ཆུ་མིག་ནས་ཏོན་པའི་ཆུ་གཙང་མ་བླུགས་ཡོད་པའི་རྫ་སྣོད་གཅིག་གི་སྟེང་དུ་བྱ་དེ་གཉིས་ལས་གཅིག་གསོད་བཅུག་དགོས།

⁶དེ་རྗེས་བླ་མས་བྱ་གཞན་དེ་འཁྱེར་ཡོང་ནས། ཤུག་ཤིང་དང་སྐུད་པ་དམར་པོ་དང་ཧི་སོབ་བཅས་བསད་ཟིན་པའི་བྱ་དེའི་ཁྲག་གི་ནང་དུ་བཅུག་དགོས་སོ།

⁷དེ་ནས་བླ་མས་པགས་ནད་ལས་དྲག་གསོ་བའི་དག་འབྱངས་བྱེད་དགོས། མི་དེའི་ཐོག་ཏུ་ཁྲག་དེ་ལན་བདུན་གཏོར་ནས་མི་འདི་གཙང་མ་ཡིན་ཞེས་ཁྱབ་བསྒྲགས་བྱེད་དགོས། དེ་རྗས་ཁོས་བྱ་གསོན་པོ་དེ་ཐང་ཁར་སློད་དགོས།

⁸མི་དེས་རང་གི་གྱོན་གོས་འཁྲུ་ནས་སྐྲ་གཞར་ནས་གཟུགས་པོ་འཁྲུ་དགོས། དེ་རྗས་ཁོ་སྲོལ་བཞིན་གཙང་བར་འགྱུར་རྒྱུ་ཡིན་པ་དང་། མི་དེ་སྒར་གྱི་ནང་དུ་འཛུལ་ཆོག་གོ། འོན་ཀྱང་ཉིན་ཞག་བདུན་བར་དུ་རང་གི་གུར་གྱི་ཕྱི་རུ་བསྡད་དགོས་སོ།

⁹ཉིན་ཞག་བདུན་པའི་ཐོག་ཁོས་རང་གི་སྐྲ་དང་རྒྱ་དང་དེ་བཞིན་མིག་སྤུ་དང་། གཟུགས་པོའི་སྤུ་ཚང་མ་གཞར་ནས་རང་གི་གོས་འཁྲུ་སྟེ། དེ་བཞིན་གཟུགས་པོ་ཚང་མ་འཁྲུ་དགོས། དེ་རྗེས་ཁོ་སྲོལ་ལྟར་གཙང་མར་འགྱུར་རྒྱུ་ཡིན་ནོ།།

¹⁰ཉིན་ཞག་བརྒྱད་པའི་ཐོག་ཁོས་སྐྱོན་མེད་པའི་ལུག་གུ་ཕོ་གཉིས་དང་ལོ་གཅིག་ལོན་པའི་ལུག་གུ་མོ་དེ་འཁྲིད་ཡོང་ནས། དེ་དང་མཉམ་དུ་ཁ་སྐྱུར་པོའི་སྣུམ་ནང་བརྫིས་པའི་གྲོ་ཞིབ་ཀི་ལོ་གསུམ་དང་། ཁ་སྐྱུར་པོའི་སྣུམ་ཀི་ལོ་གང་ཁག་གསུམ་གྱི་གསུམ་ཆ་གཅིག་འཁྱེར་ཡོང་དགོས།

¹¹དེ་ནས་བླ་མས་མི་དེ་འཁྲིད་དེ་ཁོའི་འབུལ་བའི་རྫས་རྣམས་བླངས་ནས་གཙོ་བོ་དཀོན་མཆོག་གནས་པའི་དབུ་གུར་དམ་པའི་གཟིམ་སྒོར་འཁྱེར་ཡོང་དགོས།

¹²དེ་རྗེས་བླ་མས་ལུག་གུ་ཕོ་གཅིག་དང་ཁ་སྐྱུར་པོའི་སྣུམ་ལི་ཊར་གང་གསུམ་ལ་བགོས་པའི་གསུམ་ཆ་གཅིག་བླངས་ནས་ཉེས་ཆད་ཀྱི་འབུལ་བར་མཆོད་འབུལ་བྱེད་དགོས། ཁོས་དེ་རྣམས་དམིགས་བསལ་གྱི་འབུལ་བའི་ཚུལ་དུ་གཙོ་བོ་དཀོན་མཆོག་ལ་བླ་མའི་ཆེད་དུ་འབུལ་དགོས།

¹³སྡིག་སེལ་དང་སྦྱིན་སྲེག་གི་མཆོད་པར་འབུལ་བའི་དུད་འགྲོ་རྣམས་བསད་པའི་གནས་དེ་རང་དུ་ཁོས་ལུག་དེའང་གསོད་དགོས། ཁོས་དེ་ལྟར་བྱེད་དགོས་དོན་ནི། སྡིག་སེལ་གྱི་མཆོད་འབུལ་དང་འདྲ་བར་ཉེས་ཆད་སེལ་བའི་མཆོད་པ་དེའང་བླ་མའི་ཐོབ་སྐལ་ཡིན་པ་དང་། འབུལ་བ་དེ་ནི་ཧ་ཅང་དམ་པ་ཡིན་ནོ།

¹⁴བླ་མས་ལུག་གུའི་ཁྲག་དེ་ལས་ཏོག་ཙམ་ཞིག་བླངས་ནས། དག་འབྱངས་བྱེད་དགོས་པའི་མི་དེའི་རྣ་བ་གཡས་པའི་རྣ་ཤལ་དང་། ལག་པ་གཡས་པའི་མཐེ་བོང་དང་། དེ་བཞིན་རྐང་པ་གཡས་པའི་མཐེ་བོང་ལ་བྱུགས་དགོས།

¹⁵བླ་མས་ཁ་སྐྱུར་པོའི་སྣུམ་དེ་ཏོག་ཙམ་ཞིག་བླངས་ཏེ་རང་གི་ལག་པ་གཡོན་པའི་ལག་མཐིལ་དུ་བླུགས་དགོས།

¹⁶ལག་པ་གཡས་པའི་མཛུབ་མོ་ཞིག་སྣུམ་ནང་བཅུག་ནས་ཐེངས་བདུན་བར་དུ་གཙོ་བོ་དཀོན་མཆོག་གི་མདུན་དུ་གཏོར་དགོས།

¹⁷རང་གི་ལག་མཐིལ་ནང་གི་སྣུམ་དེ་ལས་ཏོག་ཙམ་ཞིག་དང་ལུག་གུའི་ཁྲག་དེ་ལས་ཏོག་ཙམ་ཞིག་བླངས་ནས། དག་འབྱངས་བྱེད་དགོས་པའི་མི་དེའི་རྣ་བ་གཡས་པའི་རྣ་ཤལ་དང་། ལག་པ་གཡས་པའི་མཐེ་བོང་དང་། དེ་བཞིན་རྐང་པ་གཡས་པའི་མཐེ་པོར་བྱུགས་དགོས།

¹⁸དེ་ནས་ལག་མཐིལ་ནང་གི་སྣུམ་ལྷག་འཕྲོས་ལུས་པ་དེ་མི་དེའི་མགོ་ལ་བྱུགས་ནས། བླ་མས་དག་འབྱངས་ཀྱི་ཆོ་ག་ཆ་ཚང་བྱེད་དགོས་སོ།

¹⁹དེ་རྗེས་བླ་མས་སྡིག་སེལ་གྱི་མཆོད་པ་དེ་འབུལ་ནས་དག་འབྱངས་ཀྱི་ཆོ་ག་དེ་ཆ་ཚང་བྱེད་དགོས། སྦྱིན་སྲེག་གི་འབུལ་བའི་དོན་དུ་དམིགས་པའི་དུད་འགྲོ་དེ་བསད་དེ།

²⁰འབྲུ་སྣའི་མཆོད་པ་དང་མཉམ་དུ་མཚོད་ཁྲིའི་ཁར་འབུལ་དགོས། བླ་མས་གོང་གསལ་ལྟར་དག་འབྱངས་ཀྱི་ཆོ་ག་བཤམས་པའི་རྗེས་སུ། མི་དེ་སྲོལ་བཞིན་གཙང་བར་འགྱུར་རྒྱུ་ཡིན།

²¹འོན་ཀྱང་མི་དེ་དབུལ་ཞིང་མཆོད་པའི་རྫས་ཆ་ཚང་སྒྲུབ་མ་ཐུབ་པ་ཞིག་ཡིན་ན། ཁོས་རང་གི་དག་འབྱངས་ཀྱི་མཆོད་པར་ལུག་གུ་ཕོ་ཞིག་རང་གི་ཉེས་པའི་མཆོད་པའི་ཚུལ་དུ་འཁྱེར་ཡོང་དགོས། དེ་ནི་བླ་མའི་ཆེད་དུ་གཙོ་བོ་དཀོན་མཆོག་ལ་དམིགས་བསལ་གྱི་མཆོད་པའི་ཚུལ་དུ་འབུལ་དགོས། དེ་བཞིན་འབྲུ་སྣའི་མཆོད་པའི་དོན་དུ་ཁ་སྐྱུར་པོའི་སྣུམ་ནང་བརྫིས་པའི་གྲོ་ཞིབ་ཀི་ལོ་གང་དང་། ཁ་སྐྱུར་པོའི་སྣུམ་ལི་ཊར་གང་ཆ་གསུམ་ལ་བགོས་པའི་གསུམ་ཆ་གཅིག་འཁྱེར་ཡོང་དགོས།

²²ཁོས་ཕུག་རོན་ནམ་འང་གུ་གཉིས་རེ་འཁྱེར་ཡོང་དགོས། གཅིག་ནི་སྡིག་སེལ་གྱི་འབུལ་བ་དང་གཞན་དེ་སྦྱིན་སྲེག་གི་ཆེད་དུ་ཡིན་ནོ།

²³དག་འབྱངས་ཀྱི་ཉིན་ཞག་བརྒྱད་པར་ཁོས་གོང་གསལ་ལྟར་འབུལ་བའི་རྫས་དེ་དག་དབུ་གུར་དམ་པའི་གཟིམ་སྒོར་བླ་མའི་རྩར་འཁྱེར་ཡོང་དགོས།

²⁴བླ་མས་ལུག་གུ་དེ་དང་ཁ་སྐྱུར་པོའི་སྣུམ་དེ་བླངས་ནས། གཙོ་བོ་དཀོན་མཆོག་ལ་དམིགས་བསལ་གྱི་འབུལ་བར་ཕུལ་དགོས། འབུལ་བ་དེ་དག་ནི་བླ་མའིི་ཐོབ་སྐལ་དུ་རྩིས་དགོས་སོ།

²⁵ཁོས་ལུག་གུ་དེ་བསད་ནས་ཁྲག་ཏོག་ཙམ་ཞིག་བླངས་ཏེ། མི་དེའི་རྣ་བ་གཡས་པའི་རྣ་ཤལ་དང་ལག་པ་གཡས་པ་དང་རྐང་པ་གཡས་པའི་མཐེ་བོང་ལ་བྱུགས་དགོས།

²⁶བླ་མས་སྣུམ་ཏོག་ཙམ་ཞིག་བླངས་ནས་རང་གི་ལག་པ་གཡོན་པའི་ལག་མཐིལ་ནང་བླུགས་ནས།

²⁷ལག་པ་གཡས་པའི་མཛུབ་མོ་དེའི་ནང་བཅུག་སྟེ་གཙོ་བོ་དཀོན་མཆོག་གི་མདུན་དུ་སྣུམ་དེ་ཐེངས་བདུན་གཏོར་དགོས།

²⁸མི་དེའི་གཟུགས་པོར་ཁྲག་གང་དུ་བྱུགས་ཡོད་སར་ཁ་སྐྱུར་པོའི་སྣུམ་དེ་ལས་ཏོག་ཙམ་ཞིག་བླངས་ཏེ། མི་དེའི་རྣ་བ་གཡས་པའི་རྣ་ཤལ་དང་། ལག་པ་གཡས་པའི་མཐེ་བོང་དང་། དེ་བཞིན་རྐང་པ་གཡས་པའི་མཐེ་པོ་བཅས་ལ་བྱུགས་དགོས།

²⁹དེ་རྗེས་ལག་མཐིལ་ནང་དུ་ལྷག་འཕྲོས་ལུས་པའི་སྣུམ་དེ་མི་དེའི་མགོ་ལ་བྱུགས་ཏེ། དག་འབྱངས་ཀྱི་ཆོ་ག་དེ་བྱེད་དགོས།

³⁰དེ་རྗས་ཁོས་ཕུག་རོན་ནམ་འང་གུ་ལས་གཅིག་བླངས་ཏེ།

³¹སྡིག་སེལ་གྱི་མཆོད་པར་གཅིག་དང་འབྲུ་སྣའི་མཆོད་པ་དང་མཉམ་དུ་བྱ་གཞན་དེའང་སྦྱིན་སྲེག་གི་མཆོད་པའི་ཆེད་དུ་འབུལ་དགོས། བླ་མས་དག་འབྱངས་ཀྱི་འབུལ་བ་ཆ་ཚང་བྱེད་པར་འགྱུར།

³²མི་ཞིག་ལ་པགས་ནད་དྲག་པོ་ཞིག་འཕོག་སྟེ། དེས་དག་འབྱངས་ཀྱི་མཆོད་པར་མཁོ་བའི་རྫས་ཆ་ཚང་ཞིག་སྒྲུབ་མ་ཐུབ་པ་ཡིན་ན། དེ་ལྟ་བུ་སྲུང་དགོས་པའི་ཁྲིམས་སྲོལ་ནི་གོང་གསལ་ལྟར་ཡིན་ནོ༎

³³ཁྱིམ་སོགས་ལ་ཧམ་འབུ་རྒྱབ་ནས་འཕེལ་སྐབས་སུ་སྲུང་དགོས་པའི་གཤམ་གསལ་བཀའ་ཁྲིམས་རྣམས་ནི་གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ་གནང་བ་ཡིན་ནོ། གཙོ་བོ་དཀོན་མཆོག་གིས་དེ་ཚོར་གནང་རྒྱུ་ཡིན་པའི་ཡུལ་ཀ་ནན་དུ་སླེབས་པའི་རྗེས་སུ་ཨིསི་རཱཨེལ་པ་ཚོས་བཀའ་ཁྲིམས་དེ་དག་སྲུང་དགོས་པ་ཡིན་ནོ།

³⁴

³⁵མི་སུ་ཞིག་གིས་ཁྱིམ་དུ་ཧམ་འབུ་རྒྱབ་པ་མཐོང་བ་ཡིན་ན། ཁོས་བླ་མའི་རྩར་ཕྱིན་ནས་དེའི་སྐོར་ལ་ལབ་དགོས།

³⁶བླ་མས་ཁྱིམ་དེར་ཧམ་བུ་བརྒྱབ་ཡོད་མེད་བརྟག་དཔྱད་མ་བྱེད་གོང་དུ། དེའི་ནང་གི་འཛིན་ཆས་དངོས་རིགས་ཚང་མ་སྤོ་དགོས་པར་བཀའ་གནང་དགོས། དེ་མིན་ཁང་པ་དེའི་ནང་གི་དངོས་ཆས་ཚང་མ་མི་གཙང་བར་རྩིས་དགོས་རྒྱུ་ཡིན། དེ་རྗེས་ཁོས་ཁྱིམ་དེའི་ནང་ཕྱིན་ནས།

³⁷ཧམ་འབུ་དེར་བརྟག་དཔྱད་བྱེད་དགོས། གལ་ཏེ་ཧམ་འབུ་ལྗང་ཁུའམ་དམར་པོ་ཞིག་བྱུང་སྟེÇ ཁྱིམ་གྱི་རྩིག་པར་སྐྱོན་གཏོང་བཞིན་ཡོད་པ་མཐོང་བ་ཡིན་ན།

³⁸ཁོས་ཁང་པ་དེ་ཉིན་ཞག་བདུན་བར་དུ་སྒོ་ལྕག་རྒྱབ་ནས་བཞག་དགོས།

³⁹ཉིན་ཞག་བདུན་པའི་ཐོག་ཡང་སྐྱར་ཁྱིམ་དེར་བརྟག་དཔྱད་བྱེད་དགོས། སྐབས་དེར་ཧམ་འབུ་དེ་འཕེལ་ཡོད་པ་ཡིན་ན།

⁴⁰ཧམ་འབུ་རྒྱབ་པའི་རྡོ་རྣམས་བཏོན་ནས་གྲོང་ཁྱེར་གྱི་ཕྱི་རོལ་དུ་ས་གནས་རྩོག་པ་ཞིག་ཏུ་དབྱུགས་བཅུག་དགོས།

⁴¹དེ་རྗེས་ཁོས་ཁྱིམ་ནང་གི་རྩིག་པ་ཚང་མ་པགས་པ་བཤུས་ཏེ། ས་དང་བྱེ་མ་སོགས་གྲོང་ཁྱེར་གྱི་ཕྱི་རོལ་དུ་ས་གནས་རྩོག་པ་ཞིག་ཏུ་སྤུང་དགོས།

⁴²དེ་རྗེས་རྡོ་བཏོན་པ་དེ་ཚོའི་ཚབ་ཏུ་རྡོ་གཞན་དག་གིས་རྩིག་པ་རྒྱབ་སྟེ། དེར་གསར་དུ་འདམ་བག་བྱུགས་དགོས།

⁴³ཧམ་འབུ་རྒྱབ་པའི་རྡོ་བཏོན་ནས་རྩིག་པའི་པགས་པ་བཤུས་ཏེ། དེར་འདམ་བག་གསར་པ་བྱུགས་ཟིན་པའི་རྗེས་སུའང་། ཁྱིམ་དེའི་ནང་ཡང་སྐྱར་ཧམ་འབུ་རྒྱབ་པ་ཡིན་ན།

⁴⁴བླ་མ་ཕྱིན་ནས་དེར་བརྟག་དཔྱད་བྱེད་དགོས། གལ་ཏེ་ཧམ་འབུ་དེ་འཕེལ་ཡོད་པ་ཡིན་ན། ཁྱིམ་དེ་མི་གཙང་བར་རྩིས་དགོས།

⁴⁵དེ་རྗེས་ཁྱིམ་དེ་གཏོར་བརློག་བཏང་ནས། དེའི་རྡོ་དང་ཤིང་ཆ་དང་ས་དང་བྱེ་མ་ཚང་མ་གྲོང་ཁྱེར་གྱི་ཕྱི་རོལ་དུ་འཁྱེར་ནས་ས་གནས་རྩོག་པ་ཞིག་ཏུ་དབྱུགས་དགོས།

⁴⁶ཁྱིམ་དེ་སྒོ་ལྕགས་རྒྱབ་པའི་སྐབས་སུ། སུ་ཞིག་དེའི་ནང་དུ་འཛུལ་བ་ཡིན་ན་དེ་ནི་དགོང་དྲོ་བར་དུ་མི་གཙང་བར་གནས་དགོས་རྒྱུ་དང་།

⁴⁷ཁྱིམ་དེའི་ནང་ཉལ་མཁན་ནམ་ཁ་ལག་ཟ་མཁན་སུ་ཡིན་རུང་། དེས་རང་གི་གྱོན་གོས་འཁྲུ་དགོས་སོ།

⁴⁸གལ་ཏེ་བླ་མས་ཁྱིམ་དེར་བརྟགས་དཔྱད་བྱེད་སྐབས། འདམ་བག་གསར་དུ་བྱུགས་ཟིན་པའི་རྗེས་སུའང། སླར་ཡང་ཧམ་འབུ་རྒྱབ་མེད་པ་མཐོང་བ་ཡིན་ན། ཁོས་ཁྱིམ་དེ་སྲོལ་བཞིན་གཙང་མ་ཡིན་པའི་ཁྱབ་བསྒྲགས་བྱེད་དགོས། གང་ལ་ཟེར་ན། ཧམ་འབུ་དེ་ཆ་ཚང་ཡལ་ཟིན་པའི་ཕྱིར་རོ།

⁴⁹ཁྱིམ་དེ་ནི་དག་འབྱངས་བྱེད་པའི་ཕྱིར་ཁོས་བྱ་ཆ་གཅིག་དང་། ཤུག་པའི་ཤིང་དང་སྐུད་པ་དམར་པོ་ཞིག་དང་དེ་བཞིན་ཧི་སོབ་ཀྱི་ཡལ་ག་ཞིགའཁྱེར་ཡོང་དགོས།

⁵⁰བྱ་དེ་གཉིས་ལས་གཅིག་ལ་ཆུ་མིག་ནས་ཐོན་པའི་ཆུ་གཙང་མ་བླུགས་ཡོད་པའི་རྫ་སྣོད་གཅིག་གི་སྟེང་དུ་བསད་དགོས།

⁵¹དེ་རྗེས་བྱ་གསོན་པོ་དེ་དང་ཤུག་ཤིང་དང་ཧི་སོབ་དང་སྐུད་པ་དམར་པོ་བཅས་བྱ་བསད་པའི་ཁྲག་དང་ཆུ་གཙང་མ་དེའི་ནང་དུ་བཅུག་ནས་ཁྱིམ་དེར་ཐེངས་བདུན་གཏོར་དགོས།

⁵²དེ་བཞིན་བྱས་ཏེ་ཁོས་བྱའི་ཁྲག་དང་ཆུ་གཙང་མ་དང་། བྱ་གསོན་པོ་དེ་དང་ཤུག་ཤིང་དང་། ཧི་སོབ་དང་། སྐུད་པ་དམར་པོ་བཅས་བེད་སྤྱོད་བཏང་བའི་སྒོ་ནས་ཁྱིམ་དེར་དག་འབྱངས་བྱེད་དགོས།

⁵³དེ་རྗེས་བྱ་གསོན་པོ་དེ་གྲོང་ཁྱེར་གྱི་ཕྱི་རོལ་དུ་ཐང་ཁར་འཕུར་བཅུག་གོ ཁྱིམ་གྱི་དག་འབྱངས་ཀྱི་ཆོ་ག་དེ་བྱས་ཚར་པའི་རྗེས་སུ། ཁྱིམ་དེ་སྲོལ་བཞིན་གཙང་བར་འགྱུར་རྒྱུ་ཡིན་ནོ།

⁵⁴གོང་གསལ་བཀའ་ཁྲིམས་རྣམས་ནི་པགས་ནད་དྲག་པོ་དང་།

⁵⁵རྨ་ཤུལ་དང་གཉན་འབུར་དང་དེ་བཞིན་རྨ་ཁ་སྐྲང་པའི་ནད་གཞིའི་སྐོར་དང་། གྱོན་གོས་དང་ཁྱིམ་སོགས་ལ་ཧམ་འབུ་རྒྱབ་པའི་སྐོར་ལ་ཡིན་ནོ།

⁵⁶

⁵⁷གོང་གསལ་བཀའ་ཁྲིམས་དེའི་སྒོ་ནས་ནད་དང་དངོས་རིགས་གང་ཞིག་གཙང་མ་ཡིན་མིན་ཤེས་རྟོགས་བྱེད་ཐུབ་པ་ཡིན་ནོ༎