Read Tibetan — པོད་སྐད་Tibetan Old Testament 2011 ལེ་ཝི 2 Bible Online

ལེ་ཝི 2 - Tibetan — པོད་སྐད་Tibetan Old Testament 2011 bible

ལེ་ཝི 2

¹སུ་ཞིག་གིས་གཙོ་བོ་དཀོན་མཆོག་ལ་འབྲུའི་མཆོད་པ་འབུལ་འདོད་ན། ཐོག་མར་འབྲུ་དེ་འཐག་ནས་གྲོ་ཞིབ་བཟོས་ཏེ། དེའི་ཐོག་ཁ་སྐྱུར་པོའི་སྣུམ་དང་སྤོས་བླུགས་ནས།

²ཨ་རོན་རིགས་བརྒྱུད་ཀྱི་བླ་མའི་རྩར་སྐྱེལ་དགོས། དེ་ནས་བླ་མས་གྲོ་ཞིབ་དང་སྣུམ་ལག་མཐིལ་གང་བླངས་ནས་བདུག་སྤོས་དང་བཅས་གཙོ་བོ་དཀོན་མཆོག་ལ་མཆོད་པ་འབུལ་བའི་ཚུལ་དུ་མཆོད་ཁྲིའི་ཁར་མེར་སྲེག་གཏོང་དགོས། ཁ་ཟས་ཀྱི་འབུལ་བའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་མཉེས་པར་འགྱུར།

³འབྲུ་སྣའི་མཆོད་འབུལ་གྱི་ལྷག་འཕྲོས་དེ་ནི་བླ་མ་རྣམས་ཀྱི་ཐོབ་སྐལ་ཡིན་ནོ། དེ་ནི་གཙོ་བོ་དཀོན་མཆོག་ལ་ཕུལ་བའི་ཁ་ཟས་ཀྱི་འབུལ་བའི་ཁོངས་ནས་བླངས་པ་ཡིན་པས་དེ་ནི་ཧ་ཅང་དམ་པར་རྩིས་དགོས་སོ།

⁴དེ་བཞིན་མེར་སྲེག་པའི་བག་ལེབ་འབུལ་བར་ཕུལ་བ་ཡིན་ན། དེར་ཆི་མན་བསྲེས་མི་རུང་ཞིང་། གྲོ་ཞིབ་དང་ཁ་སྐྱུར་པོའི་སྣུམ་བསྲེས་ནས་བཟོས་པའི་བག་ལེབ་མཐུག་པོ་ཡིན་དགོས་པ་དང་། ཡང་ན་ཁ་སྐྱུར་པོའི་སྣུམ་བྱུགས་པའི་བག་ལེབ་སྲབ་པོ་ཡིན་པར་དགོས།

⁵ཚལ་སླང་ནང་སྲེག་པའི་བག་ལེབ་འབུལ་འདོད་ན། དེར་ཆི་མན་མ་བསྲེས་པར་གྲོ་ཞིབ་ནང་ཁ་སྐྱུར་པོའི་སྣུམ་བླུགས་ནས་རྫིས་ཏེ་བཟོ་དགོས་སོ།

⁶དེ་ལྟ་བུའི་འབྲུའི་འབུལ་བ་ཕུལ་སྐབས། བག་ལེབ་དེ་དུམ་བུར་བཟོས་ནས་དེ་ལ་སྣུམ་བླུགས་དགོས།

⁷སླ་ངའི་ནང་བཟོས་པའི་བག་ལེབ་འབུལ་བར་འདོད་ན། གྲོ་ཞིབ་ནང་དུ་ཁ་སྐྱུར་པོའི་སྣུམ་བླུགས་ནས་བཟོ་དགོས།

⁸དེ་ནི་འབྲུ་སྣའི་མཆོད་འབུལ་གྱི་ཚུལ་དུ་གཙོ་བོ་དཀོན་མཆོག་གི་སྤྱན་སྔར་འཁྱེར་ནས་བླ་མ་ལ་འབུལ་དགོས། དེ་རྗེས་བླ་མས་འབུལ་བ་དེ་མཆོད་ཁྲིའི་ཁར་འབུལ་དགོས།

⁹འབྲུ་སྣའི་མཆོད་འབུལ་གྱི་རྫས་ཚང་མ་གཙོ་བོ་དཀོན་མཆོག་ལ་ཕུལ་བའི་མཚོན་རྟགས་སུ། བླ་མས་དེ་ལས་ཆ་ཤས་ཤིག་བླངས་ནས་མཆོད་ཁྲིའི་སྟེང་དུ་སྲེག་དགོས། ཁ་ཟས་ཀྱི་འབུལ་བའི་དྲི་ཞིམ་དེས་གཙོ་བོ་དཀོན་མཆོག་ཐུགས་མཉེས་པར་འགྱུར།

¹⁰འབྲུ་སྣའི་མཆོད་འབུལ་གྱི་རྫས་ལྷག་འཕྲོ་རྣམས་བླ་མ་ཚོའི་ཐོབ་སྐལ་ཡིན་ཞིང། དེ་ནི་གཙོ་བོ་དཀོན་མཆོག་ལ་ཕུལ་བའི་འབྲུ་སྣའི་འབུལ་བའི་ཁོངས་ནས་བླངས་པ་ཡིན་པས་དེ་ནི་ཧ་ཅང་དམ་པར་རྩིས་དགོས་སོ།

¹¹ཁྱོད་ཚོས་གཙོ་བོ་དཀོན་མཆོག་ལ་འབྲུ་སྣའི་མཆོད་འབུལ་གང་འདྲཞིག་འབུལ་རུང་དེ་ལ་ཆི་མན་ཡོད་པ་མི་རུང་ཞིང་། གཙོ་བོ་དཀོན་མཆོག་ལ་འབུལ་རྒྱུའི་འབྲུ་སྣའི་མཆོད་པའི་རྫས་ཀྱི་ནང་དུ་ཁྱོད་ཚོས་ནམ་ཡང་ཆི་མན་འམ་སྦྲང་རྩི་བེད་སྤྱོད་བྱེད་མི་རུང་།

¹²ལོ་ལྟར་རེ་བཞིན་སྟོན་ཐོག་གི་ཕུད་དེ་གཙོ་བོ་དཀོན་མཆོག་གི་དྲུང་དུ་འཁྱེར་ཡོང་དགོས། འོན་ཀྱང་དེ་ནི་མཆོད་ཁྲིའི་ཁར་མེར་སྲེག་གཏོང་མི་དགོས་སོ།

¹³འབྲུ་སྣའི་མཆོད་རྫས་ཚང་མར་ཚྭ་འདེབས་དགོས། གང་ལ་ཟེར་ན། ཚྭ་དེས་ཁྱོད་ཚོ་དང་གཙོ་བོ་དཀོན་མཆོག་གི་བར་ལ་ཡོད་པའི་དམ་བཅའ་དེ་བསྟན་པ་ཡིན་ནོ། དེ་བས་ན་ཁྱོད་ཚོས་རང་གི་འབུལ་བའི་རྫས་ཚང་མར་ཚྭ་ངེས་པར་བླུགས་དགོས།

¹⁴ཁྱོད་ཚོས་གཙོ་བོ་དཀོན་མཆོག་གི་དྲུང་དུ་རང་གི་སྟོན་ཐོག་གི་ཕུད་དེ་འཁྱེར་ཡོང་སྐབས། འབྲུ་བརྔོས་པའང་འཐག་ནས་གྲོ་ཞིབ་བཟོས་པ་དེ་འབུལ་དགོས།

¹⁵དེའི་ཁར་ཁ་སྐྱུར་པོའི་སྣུམ་དང་སྤོས་བླུགས་དགོས།

¹⁶དེ་རྗེས་བླ་མས་འབྲུ་དང་སྣུམ་གྱི་ཟུར་ཆ་གཅིག་དང་། དེ་བཞིན་བདུག་སྤོས་ཡོངས་རྫོགས་ཁ་ཟས་ཀྱི་མཆོད་འབུལ་གྱི་ཚུལ་དུ་མེར་སྲེག་བཏང་སྟེ་གཙོ་བོ་དཀོན་མཆོག་ལ་འབུལ་དགོས་སོ༎