Read Tibetan — པོད་སྐད་Tibetan Old Testament 2011 ལེ་ཝི 25 Bible Online

ལེ་ཝི 25 - Tibetan — པོད་སྐད་Tibetan Old Testament 2011 bible

ལེ་ཝི 25

¹གཙོ་བོ་དཀོན་མཆོག་གིས་རི་བོ་སི་ནཨེ་ནས་མོ་ཤེ་ལ་གསུང་གླེང་མཛད་དེ།

²ཨིསི་རཱཨེལ་པ་རྣམས་ལ་གཤམ་གསལ་བཀའ་ཁྲིམས་དག་སྤྲོད་ཅིག གཙོ་བོ་དཀོན་མཆོག་གི་ཁྱོད་ཚོར་གནང་བཞིན་པའི་ཡུལ་དུ་ཁྱོད་ཚོ་སླེབས་པ་དང་། གཙོ་བོ་དཀོན་མཆོག་ལ་བཀུར་སྟི་ཞུ་བའི་ཚུལ་དུ་ལོ་བདུན་རེ་བཞིན་ཁྱོད་ཚོས་ཞིང་ཁར་ས་བོན་འདེབས་ལས་མ་བྱེད་ཅིག

³ལོ་དྲུག་པར་ཁྱོད་ཚོས་རང་གི་ཞིང་ཁར་ས་བོན་འདེབས་ལས་བྱེད་པ་དང་། རྒུན་ཤིང་གི་ཡལ་གཅོད་བྱེད་པ་དང་། དེ་བཞིན་སྟོན་ཐོག་སོགས་བསྡུ་སྒྲུག་བྱེད་ཆོག་གོ

⁴འོན་ཀྱང་ལོ་བདུན་པ་དེ་ནི་ས་གཞིའི་ཆེད་དུ་ངལ་གསོའི་ལོ་ཆ་ཚང་ཡིན་པ་དང་། གཙོ་བོ་དཀོན་མཆོག་ལ་བསྔོ་འབུལ་བྱེད་པའི་ལོ་རུ་བརྩི་དགོས། ལོ་དེར་ཞིང་ཁར་ས་བོན་འདེབས་ལས་བྱེད་མི་ཆོག་པ་དང་རྒུན་ཤིང་གི་ཡལ་གཅོད་སོགས་བྱེད་མི་རུང་།

⁵འདེབས་ལས་མ་བྱེད་པར་རང་བཞིན་གྱི་སྐྱེས་པའི་སྙེ་མ་རྣམས་བསྡུ་སྒྲུག་བྱེད་མི་ཆོག ཡལ་གཅོད་མ་བྱས་པའི་རྒུན་ཤིང་ནས་རྒུན་འབྲུམ་སོགས་བསྡུ་སྒྲུག་བྱེད་མི་ཉན། ལོ་དེ་ནི་ས་གཞིའི་ཆེད་དུ་ངལ་གསོའི་ཆ་ཚང་གི་ལོ་རུ་བརྩི་དགོས།

⁶ལོ་དེའི་རིང་ཁྱོད་ཚོས་ཞིང་ཁར་འདེབས་ལས་མ་བྱས་པ་ཡིན་ནའང་། ཞིང་དེ་ལས་ཁྱོད་ཚོ་དང་། ཁྱོད་ཚོའི་བྲན་འཁོལ་རྣམས་དང་། ཁྱོད་ཚོའི་གླ་མི་རྣམས་དང་། ཁྱོད་ཚོའི་ཁྲོད་དུ་གནས་པའི་ཕྱི་རྒྱལ་བ་རྣམས་དང་།

⁷ཁྱོད་ཚོའི་ནང་དུ་གསོས་པའི་སེམས་ཅན་དང་དེ་བཞིན་ཞིང་ཁར་ཡོད་པའི་ནགས་ཀྱི་སེམས་ཅན་ཚོའི་ཆེད་དུ་ཁ་ཟས་སྒྲུབ་པར་འགྱུར། ལོ་དེར་ཞིང་དེ་ལས་སྐྱེས་པའི་འབྲུ་རིགས་ཚང་མ་ཟ་ནའང་ཆོག་པ་ཡིན།

⁸ལོ་བདུན་ལ་བདུན་འགྱུར་བརྩིས་པའི་ལོ་བཞི་བཅུ་ཞེ་དགུ་དང་།

⁹ཟླ་བ་བདུན་པའི་ཚེས་བཅུའི་ཉིན་མོའམ་སྡིག་བཤགས་ཀྱི་ཉིན་མོར་མི་ཞིག་ལ་ཡུལ་ཚང་མར་དུང་འབུད་བཅུག་ཅིག

¹⁰དེ་ལྟར་བྱས་ཏེ་ཁྱོད་ཚོས་ལོ་ལྔ་བཅུ་པ་དེ་ལོགས་སུ་དབྱེ་ནས་ཡུལ་མི་ཚང་མར་དེ་དག་རང་དབང་ཡིན་པའི་ཁྱབ་བསྒྲགས་བྱེད་དགོས། ལོ་དེའི་ནང་མི་གཞན་ལ་བཙོང་ཟིན་པའི་རྒྱུ་དངོས་རྣམས་དོ་བདག་རྙིང་པའམ་ཁོའི་བུ་བརྒྱུད་རྣམས་ལ་ཕྱིར་སློག་བྱེད་དགོས། སུ་ཞིག་བྲན་འཁོལ་དུ་བཙོང་ཟིན་པ་ཞིག་ཡིན་ན། ཁོ་ནི་རང་གི་ཁང་པར་ཕྱིར་ལོག་འགྲོ་བཅུག་དགོས།

¹¹ཁྱོད་ཚོས་རང་གི་ཞིང་ཁར་ས་བོན་འདེབས་ལས་མ་བྱེད་ཅིག དེ་བཞིན་རང་བཞིན་གྱིས་སྐྱེས་པའི་སྙེ་མ་སོགས་བསྡུ་སྒྲུག་བྱེད་མི་ཆོག་པ་དང་། ཡལ་གཅོད་མ་བྱས་པའི་རྒུན་ཤིང་ནས་རྒུན་འགྲུམ་བསྡུ་སྒྲུག་བྱེད་མི་ཆོག

¹²ལོ་དེ་ནི་ཁྱོད་ཚོའི་ཆེད་དུ་དམ་པ་ཡིན་པས། ཞིང་ཁར་རང་བཞིན་གྱིས་སྐྱེས་པའི་འབྲུ་འབའ་ཞིག་ཁྱོད་ཚོས་ཟ་ཆོག་པ་ཡིན་ནོ།

¹³དེ་སྔ་བཙོང་ཟིན་པའི་རྒྱུ་དངོས་ཚང་མ་ལོ་དེའི་ནང་དོ་བདག་རྙིང་པར་སྤྲོད་དགོས།

¹⁴ཁྱོད་ཚོས་ཨིསི་རཱཨེལ་པ་ཞིག་དང་ས་ཞིང་ཉོ་ཚོང་བྱེད་དུས་ཁྲིམས་མེད་མ་བྱེད་ཅིག

¹⁵སྐྱར་གསོའི་ལོ་དུས་རྗེས་མ་བར་དུ་ཞིང་དེའི་ཐོན་སྐྱེད་མང་ཉུང་ལ་གཞིག་སྟེ་གོང་ཚད་རྒྱབ་དགོས།

¹⁶ལོ་དུས་ཀྱི་ཁ་གྲངས་མང་བ་ཡོད་པ་ཡིན་ན། གོང་ཚད་ཆེ་བ་དང་། ཉུང་བ་ཡོད་པ་ཡིན་ན་དེ་བཞིན་གོང་ཚད་ཆུང་བ་ཡིན་པར་དགོས། གང་ལ་ཟེར་ན། ཞིང་ཁའི་ཐོན་སྐྱེད་མང་ཉུང་ལ་གཞིག་པའི་གོང་ཚད་རྒྱབ་དགོས།

¹⁷རང་རིགས་གཅིག་པའི་ཨིསི་རཱཨེལ་པ་ཞིག་ལ་མགོ་བསྐོར་མ་གཏོང་ཞིག འོན་ཀྱང་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ལ་འཇིགས་དགོས༎

¹⁸གཙོ་བོ་དཀོན་མཆོག་གི་བཀའ་ཁྲིམས་ཚང་མ་སྲུང་ཞིག་དང་ཁྱོད་ཚོ་རང་ཡུལ་དུ་ཉེན་མེད་སྲུང་སྐྱོབ་ཀྱི་ངང་ནས་འཚོ་བར་འགྱུར།

¹⁹ས་གཞིའི་ཐོན་སྐྱེད་འཕེལ་ཏེ་ཁྱོད་ཚོར་འདོད་མོས་བཞིན་དུ་ཁ་ཟས་འབྱོར་ཞིང་། ཉེན་མེད་སྲུང་སྐྱོབ་ཀྱི་ངང་དུ་གནས་པར་འགྱུར།

²⁰འགའ་ཞིག་ནས་ས་ཞིང་འདེབས་ལས་དང་སྙེ་མ་བསྡུ་སྒྲུག་མ་བྱས་པར་ལོ་བདུན་པའི་ནང་ག་རེ་ཟའམ་ཞེས་དྲིས་ཡོང་།

²¹གཙོ་བོ་དཀོན་མཆོག་གིས་ལོ་དྲུག་པའི་ནང་ས་གཞིར་བྱིན་རླབས་མཛད་པས་ལོ་གཉིས་བར་དུ་ལྡང་བའི་སྟོན་ཐོག་སྐྱེས་པར་འགྱུར།

²²ལོ་བརྒྱད་པར་ཁྱོད་ཚོས་རང་གི་ཞིང་ཁར་ས་བོན་འདེབས་ལས་བྱེད་སྐབས། ལོ་དྲུག་པར་བསྡུ་སྒྲུག་བྱས་པའི་སྟོན་ཐོག་ལས་ཟ་བཞིན་ཡོད་པ་དང་། ལོ་དེར་བཏབ་པའི་སྟོན་ཐོག་མ་བསྡུ་བར་དུ་ཁྱོད་ཚོར་སྟོན་ཐོག་རྙིང་པ་ལྡང་ངེས་བཞིན་ཡོད་པར་འགྱུར༎

²³ཁྱོད་ཚོས་ས་ཞིང་ཚོང་དུས་གཏན་གྱི་ཆེད་དུ་ཐག་གཅོད་བྱས་ཏེ་ཚོང་མི་ཆོག གང་ལ་ཟེར་ན། ས་གཞིའི་བདག་པོ་ངོ་མ་ཁྱོད་མ་ཡིན། དེའི་དོ་བདག་ངོ་མ་ནི་དཀོན་མཆོག་ཡིན་པས་ཕྱིར་རོ། ཁྱོད་ནི་ཕྱི་རྒྱལ་བ་ཞིག་དང་མཚུངས་ཤིང་། ས་ཞིང་བེད་སྤྱོད་བྱེད་ཆོག་པའི་དབང་ཆ་འབའ་ཞིག་ཐོབ་ཡོད་པ་ཡིན་ནོ།

²⁴ས་ཞིང་ཚོང་དུས་རྗེས་སུ་དོ་བདག་རྙིང་པས་ས་ཞིང་དེ་སླར་ཡང་ཉོ་ཆོག་པའི་དབང་ཆ་ཡོད་པ་ཡིན་ནོ།

²⁵གལ་ཏེ་ཨིསི་རཱཨེལ་པ་ཞིག་དབུལ་པོར་འགྱུར་ནས་རང་གི་ཞིང་ཚོང་པ་ཡིན་ན། དེའི་གཉེན་མཚན་ཉེ་བ་ཞིག་གིས་ས་ཞིང་དེ་ཚུར་ཉོ་དགོས།

²⁶ས་ཞིང་ཕྱིར་སློག་ཉོ་བའི་ཕྱིར་རང་ལ་གཉེན་མཚན་ཉེ་བ་ཞིག་མེད་པ་ཡིན་ནའང་། རྗེས་སུ་ཁོས་རྒྱུ་དངོས་མང་པོ་བསོག་ནས་ས་ཞིང་དེ་ཉོ་ཐུབ་འང་སྲིད།

²⁷དེ་ལྟར་བྱུང་བ་ཡིན་ན། ས་ཞིང་ཉོ་མཁན་དེ་ལ་ཁོས་སྐྱར་གསོའི་ལོ་དུས་རྗེས་མ་དེ་མ་རན་བར་གྱི་སྟོན་ཐོག་གི་རིན་གོང་དང་མཚུངས་པའི་རྒྱུ་དངོས་སྤྲད་དགོས། གང་ལྟར་ལོ་དུས་དེའི་ནང་ས་ཞིང་དེ་ཁོ་ལ་ཕྱིར་སློག་ཐོབ་རྒྱུ་ཡིན།

²⁸འོན་ཀྱང་ཁོ་ལ་ས་ཞིང་ཕྱིར་སློག་ཉོ་བའི་རྒྱུ་དངུལ་ལྡང་ངེས་བཞིན་མེད་ན། ས་ཞིང་གི་དབང་ཆ་དེ་སྐྱར་གསོའི་ལོ་དུས་རྗེས་མ་བར་དུ་ས་ཞིང་ཉོ་མཁན་དེའི་ལག་ཏུ་ཡོད་པར་འགྱུར། འོན་ཀྱང་སྐྱར་གསོའི་ལོ་རྗེས་མའི་ནང་ས་ཞིང་དེ་དོ་བདག་རྙིང་པར་ཕྱིར་སློག་བྱེད་དགོས་སོ།

²⁹མི་ཞིག་གིས་ལྕགས་རི་བསྐོར་བའི་གྲོང་ཁྱེར་གྱི་ནང་དུ་ཡོད་པའི་ཁང་པ་ཞིག་བཙོང་པ་ཡིན་ན། ཁང་པ་བཙོང་པའི་ལོ་དང་པོའི་ནང་ཁོངས་སུ་ཁོས་སླར་ཡང་ཁང་པ་དེ་ཕྱིར་སློག་ཉོ་ཆོག་པ་ཡིན་ནོ།

³⁰འོན་ཀྱང་ཁོས་ལོ་དང་པོའི་ནང་ཁོངས་སུ་ཁང་པ་དེ་ཕྱིར་སློག་ཉོ་མ་ཐུབ་ན། སླར་ཡང་ཁང་པ་དེ་ཕྱིར་སློག་ཉོ་ཆོག་པའི་དབང་ཆ་ཤོར་རྒྱུ་ཡིན། ཁང་པ་དེ་ནི་དུས་གཏན་དུ་ཉོ་མཁན་དང་ཁོའི་རིགས་བརྒྱུད་ཚོའི་རྒྱུ་དངོས་སུ་གཏོགས་རྒྱུ་ཡིན་པ་དང་། དེ་ནི་སྐྱར་གསོའི་ལོ་དུས་ཀྱི་སྐབས་སུའང་ཕྱིར་སློག་བྱེད་མི་དགོས།

³¹འོན་ཀྱང་ལྕགས་རི་མ་བསྐོར་བའི་གྲོང་གསེབ་ཁག་ཏུ་ཡོད་པའི་ཁང་པ་དེ་ཚོ་ནི་ས་ཞིང་དང་འདྲ་བར་བརྩི་དགོས། དོ་བདག་རྙིང་པས་ཁང་པ་དེ་སྐྱར་དུ་ཉོ་ཆོག་པའི་དབང་ཆ་ཁོ་ལ་ཡོད་པས། དེ་ནི་སྐྱར་གསོའི་ལོ་དུས་སུ་ཁོ་ལ་ཕྱིར་སློག་བྱེད་དགོས།

³²འོན་ཀྱང་ལེ་ཝི་པ་རྣམས་ལ་བརྩི་སྤྲོད་པའི་གྲོང་ཁྱེར་ནང་གི་ཁང་པ་དང་ས་ཞིང་སོགས་ཁོ་ཚོར་ཁོ་གནད་བྱུང་ན། དེ་དག་སླར་ཡང་ཚུར་ཉོ་ཆོག་པའི་དབང་ཆ་ཡོད་པ་ཡིན་ནོ།

³³ལེ་ཝི་པ་ཞིག་གིས་གྲོང་ཁྱེར་དེ་ལྟ་བུའི་ནང་ནས་ཁང་པ་ཞིག་བཙོང་སྟེ། ཕྱིར་སློག་བླངས་མེད་པ་ཡིན་ན། ཁང་པ་དེ་སྐྱར་གསོའི་ལོ་དུས་སྐབས་སུ་དེ་ལ་ཕྱིར་སློག་བྱེད་དགོས། གང་ལ་ཟེར་ན། ལེ་ཝི་པ་ཚོའི་གྲོང་ཁྱེར་ནང་དུ་ཡོད་པའི་ཁང་པ་དེ་དག་ནི་ཨིསི་རཱཨེལ་པ་རྣམས་ཀྱི་ཁྲོད་དུ་དེ་ཚོའི་དུས་རྒྱུན་གྱི་ནོར་སྐལ་ཡིན་པས་ཕྱིར་རོ།

³⁴འོན་ཀྱང་ལེ་ཝི་པ་རྣམས་ཀྱི་གྲོང་ཁྱེར་གྱི་མཐའ་བསྐོར་དུ་ཡོད་པའི་སེམས་ཅན་འཚོ་བའི་རྩྭ་ཁ་དེ་དག་ནི་ནམ་ཡང་ཚོང་མི་ཉན། དེ་ནི་དུས་གཏན་གྱི་ཕྱིར་དུ་དེ་ཚོའི་ཐོབ་སྐལ་ཡིན་པས་ཕྱིར་རོ༎

³⁵རང་གི་ཉེ་འགྲམ་དུ་གནས་སྡོད་བྱེད་མཁན་ཁྱིམ་མཚེས་ཨིསི་རཱཨེལ་པ་ཞིག་དབུལ་པོར་འགྱུར་ཏེ། རང་ཉིད་འཚོ་སྐྱོང་བྱེད་མ་ཐུབ་པ་ཡིན་ན། གླ་མི་ཞིག་མཁོ་བྱད་སྤྲད་ནས་ལྟ་སྐྱོང་བྱེད་པ་བཞིན། ཁྱོད་ཚོས་ཁྱིམ་མཚེས་པ་དེ་ལའང་ལྟ་སྐྱོང་བྱེད་དགོས། དེ་ལྟར་བྱས་ན་མི་དེ་ཁྱོད་ཚོའི་ཉེ་འགྲམ་དུ་གནས་སྡོད་བྱེད་ཐུབ་པར་འགྱུར།

³⁶ཁོའི་ལག་ནས་སྐྱེད་ཁ་སོགས་ལེན་མི་ཆོག། འོན་ཀྱང་དཀོན་མཆོག་ལ་འཇིགས་དགོས། དེ་ལྟར་བྱས་པ་ཡིན་ན། ཁྱོད་ཀྱི་ཁྱིམ་མཚེས་ཨིསི་རཱཨེལ་པ་དེ་ཁྱོད་ཀྱི་ཉེ་འགྲམ་དུ་གནས་ཐུབ་པར་འགྱུར།

³⁷ཁྱོད་ཚོས་ཁོ་ལ་དངུལམ་བཟའ་བཅའི་ཚུལ་དུ་བུ་ལོན་བཏང་བ་དེ་ལ་སྐྱེད་ཁ་སོགས་གང་ཡང་མ་བླངས་ཤིག

³⁸དེ་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་གི་བཀའ་རྒྱ་ཡིན་ཞིང་། ཁོང་གིས་ཀ་ནན་ཡུལ་དེ་ཁྱོད་ཚོར་གནང་བའི་ཕྱིར་དང་། ཁོང་རང་ཉིད་ཁྱོད་ཚོའི་དཀོན་མཆོག་ཏུ་འགྱུར་ཕྱིར་ཁོང་གིས་ཁྱོད་ཚོ་ཨི་ཇིབ་ནས་བཏོན་གནང་ངོ་༎

³⁹གལ་ཏེ་ཁྱོད་ཚོའི་ཉེ་འགྲམ་གྱི་ཁྱིམ་མཚེས་ཨིིསི་རཱཨེལ་པ་ཞིག་ཧ་ཅང་དབུལ་ཞིང་། རང་ཉིད་ཁྱོད་ཀྱི་བྲན་གཡོག་བྱེད་ཕྱིར་བཙོང་པ་ཡིན་ན། ཁོ་ལ་བྲན་གཡོག་འདྲ་བའི་གཡོག་མ་བསྐུལ་ཞིག

⁴⁰ཁོ་ནོ་ཁྱོད་ཚོ་དང་མཉམ་དུ་གླ་མི་ཞིག་དང་འདྲ་བར་སྐྱར་གསོའི་ལོ་དུས་ཀྱི་བར་དུ་ཁྱོད་ཚོའི་ཞབས་ཕྱི་ཞུ་ནས་བསྡད་དགོས།

⁴¹དེ་དུས་ཁོ་དང་ཁོའི་བུ་ཕྲུག་ཚོས་ཁྱོད་ཚོ་སྤངས་སྟེ། རང་གི་ནང་མི་དང་མེས་པོའི་ནོར་སྐལ་ཡོད་སར་ཕྱིར་ལོག་བྱེད་རྒྱུ་ཡིན།

⁴²ཨིསི་རཱཨེལ་པ་རྣམས་གཙོ་བོ་དཀོན་མཆོག་གི་བྲན་གཡོག་ཡིན་པས། ཁོང་གིས་དེ་ཚོ་ཨི་ཇིབ་ནས་བཏོན་གནང་བ་ཡིན། དེ་ཚོ་བྲན་འཁོལ་དུ་བཙོང་མི་རུང་།

⁴³དེ་ཚོར་རྩུབ་པོ་བྱེད་མི་ཉན། འོན་ཀྱང་རང་གི་དཀོན་མཆོག་ལ་འཇིགས་དགོས།

⁴⁴ཁྱོད་ཚོར་བྲན་གཡོག་དགོས་པ་ཡིན་ན། མཐའ་འཁོར་དུ་ཡོད་པའི་མི་རིགས་ཚོའི་ཁོངས་ནས་ཉོས་ཤིག

⁴⁵ཁྱོད་ཚོའི་ཁྲོད་དུ་གནས་པའི་ཕྱིར་རྒྱལ་བ་ཚོའི་བུ་ཕྲུག་རྣམས་ཁྱོད་ཚོས་ཉོ་ཆོག ཁྱོད་ཚོའི་ཡུལ་དུ་སྐྱེས་པའི་དེ་ལྟ་བུའི་ཕྲུ་གུ་རྣམས་ནི་ཁྱོད་ཚོའི་རྒྱུ་ནོར་ལྟ་བུ་འགྱུར་སྲིད།

⁴⁶ཕྲུ་གུ་དེ་ཚོ་ནི་ཁྱོད་ཚོའི་བུ་བརྒྱུད་རྣམས་ལ་ནོར་སྐལ་གྱི་ཚུལ་དུ་རྩིས་སྤྲོད་བྱེད་ཆོག དེ་ཚོས་ཚེ་གང་ཁྱོད་ཀྱི་བུ་བརྒྱུད་རྣམས་ཀྱི་ཞབས་ཕྱི་ཞུ་དགོས། འོན་ཀྱང་ཁྱོད་ཚོས་རང་རིགས་གཅིག་པའི་ཨིསི་རཱཨེལ་པ་ཞིག་ལ་རྩུབ་པོ་བྱེད་མི་ཉན།

⁴⁷གལ་ཏེ་ཁྱོད་ཚོའི་ཁྲོད་དུ་གནས་པའི་ཕྱི་རྒྱལ་བ་ཞིག་ཕྱུག་པོ་ཆགས་ཤིང་། ཨིསི་རཱཨེལ་པ་ཞིག་དབུལ་པོར་གྱུར་ནས་ཕྱི་རྒྱལ་བའམ། ཁོའི་ནང་མི་ཞིག་གི་ལག་ཏུ་རང་ཉིད་བྲན་འཁོལ་གྱི་ཚུལ་དུ་ཚོང་བ་ཡིན་ན།

⁴⁸རང་ཉིས་ཚོང་ཟིན་པའི་རྗེས་སུའང་ཚུར་བླུ་ཐུབ་པའི་དབང་ཆ་ཁོ་ལ་ཡོད། ཁོའི་བུ་སྤུན་ཞིག་གམ།

⁴⁹ཨ་ཞང་ངམ་ཨ་ཁུའམ། རང་གི་ཕ་མ་སྤུན་གྱི་བུ་ཕྲུག་གམ། དེ་བཞིན་གཉེན་མཚན་ཉེ་པོ་སོགས་ཀྱིས་ཁོ་ལ་ཚུར་ཉོས་ན་བླུ་ཐུབ་ཡོང་། ཡང་ན་སོ་སོ་རང་གི་རྒྱུ་དངོས་གསོག་ནས་སོ་སོའི་བླུ་རིན་འཛལ་ཏེ་རང་དབང་ཉོ་ཐུབ་པ་ཡིན་ནོ།

⁵⁰ཁོས་རང་ལ་བླུ་མཁན་དེ་དང་མཉམ་དུ་གྲོས་བྱས་ཏེ་རང་ཉིད་ཚོང་བའི་ཉིན་མོ་ནས་སྐྱར་གསོའི་ལོ་དུས་རྗེས་མའི་བར་དུ་བརྩིས་རྒྱབ་ནས། གླ་མིའི་གླ་ཆ་གཞིར་བཟུང་ལྟར་ཁོ་ཐར་བའི་བླུ་རིན་དེ་གཏན་འབེབས་བྱེད་དགོས།

⁵¹ད་དུང་ལོ་གྲངས་ལྷག་འཕྲོས་ལུས་པ་དེའི་ཆེད་དུ་ལོ་དེར་གླ་ཆ་སྤྲད་དེ་གླ་མི་བཞག་པ་དང་འདྲ་བ་བརྩིས་རྒྱབ་ནས། རང་ཉིད་ཉོ་བའི་རིན་གོང་དེའི་ཟུར་ཆ་ཞིག་ཕྱིར་སློག་བྱེད་དགོས། ཁོའི་སྦྱིན་བདག་དེས་ཁོ་ལ་ངན་སྤྱོད་བྱེད་མི་ཆོག

⁵²

⁵³

⁵⁴གོང་གསལ་ཐབས་ལམ་དེ་ཚོའི་སྒོ་ནས་ཁོ་རང་བྲན་འཁོལ་ལས་མ་ཐར་བ་ཡིན་ན། སྐྱར་གསོའི་ལོ་དུས་རྗེས་མར་ཁོ་དང་ཁོའི་བུ་ཕྲུག་བཅས་པ་ཚང་མ་ཐར་བར་བྱེད་དགོས།

⁵⁵ཨིསི་རཱཨེལ་པ་ཞིག་དུས་གཏན་གྱི་ཕྱིར་བྲན་གཡོག་ཏུ་བཞག་མི་ཐུབ། གང་ལ་ཟེར་ན། ཨིསི་རཱཨེལ་པ་རྣམས་ནི་གཙོ་བོ་དཀོན་མཆོག་གི་བྲན་གཡོག་ཡིན་པས། ཁོང་གིས་དེ་ཚོ་ཨི་ཇིབ་ནས་བཏོན་གནང་བ་ཡིན་པ་དང་། ཁོང་ནི་དེ་ཚོའི་དཀོན་མཆོག་གཙོ་བོ་དཀོན་མཆོག་ཡིན་ནོ༎