Read Tibetan — པོད་སྐད་Tibetan Old Testament 2011 ཡེར་མི་ཡཱ 3 Bible Online

ཡེར་མི་ཡཱ 3 - Tibetan — པོད་སྐད་Tibetan Old Testament 2011 bible

ཡེར་མི་ཡཱ 3

¹གཙོ་བོ་དཀོན་མཆོག་གིས་བཀའ་གནང་བ། མི་སུ་ཞིག་གིས་རང་གི་ཆུང་མ་དང་ཁ་བྲལ་ནས་ཆུང་མ་དེས་ཁོ་སྤངས་ནས་མི་གཞན་ཞིག་གི་ཆུང་མར་འགྱུར་བ་ཡིན་ན། ཁོས་མོ་ཕྱིར་ལོག་ལེན་མི་ཐུབ་བོ། དེས་ཡུལ་ཆ་ཚང་མི་གཙང་བར་བཟོའོ། འོན་ཀྱང་ཨིསི་རཱཨེལ་ཁྱོད་ལ་བརྩེ་བ་བྱ་མཁན་མང་པོ་ཡོད་ནའང་ད་ཆ་ཁྱོད་ངའི་ཕྱོགས་སུ་བསྒྱུར་འདོད་ཡོད་དོ།

²རིའི་རྩེ་མོ་ཚོར་ལྟོས་ཤིག། ཁྱོད་ཀྱིས་སྨད་ཚོང་མའི་ལས་ལྟར་མ་གྱིས་པའི་གནས་ཤིག་འདུག་གམ། ཁྱོད་ཀྱིས་ཨ་རབ་པ་ཞིག་གིས་བྱེ་ཐང་དུ་འཕྲོག་ཅོམ་བྱེད་པར་མི་སྒུག་པ་ལྟར་ཁྱོད་ཀྱི་ལམ་གྱི་ཟུར་དུ་རང་གི་སྙིང་སྡུག་ལ་སྒུག་ཡོད་དོ། ཁྱོད་ཀྱི་སྨད་ཚོང་མས་ལས་ཀྱིས་ཡུལ་མི་གཙང་བ་བཟོས་སོ།

³དེའི་རྐྱེན་གྱིས་ཆར་པ་ཆད་པ་དང་། དཔྱིད་ཀའི་ཆར་པ་ཡང་མི་འབབས་པ་དང་། ཁྱོད་སྨད་ཚོང་མ་ལྟར་མཐོང་ནས་ཁྱོད་ལ་ངོ་ཚ་མེད་དོ།

⁴ད་ཁྱོད་ཀྱིས་ང་ལ་བརྗོད་གསལ། ཁྱེད་ངའི་ཡབ་ཡིན་པ་དང་ང་ཕྲུ་གུའི་སྐབས་ནས་ཁྱེད་ཀྱིས་ང་ལ་བྱམས་བརྩེ་གནང་ཡོད་དོ།

⁵ཁྱེད་རྒྱུན་དུ་ཐུགས་མི་ཁྲོ་ཞིང་ང་ལ་རྒྱབ་འགལ་མི་མཛད་དོ་ཅེས་ཨིསི་རཱཨེལ་ཁྱོད་ཀྱིས་དེ་ལྟར་བརྗོད་ན་ཡང་ཁྱོད་ཀྱིས་ཅི་ནུས་ཀྱི་ངན་ལས་གྱིས་ཡོད་དོ༎

⁶ཡོ་ཤི་ཡཱ་རྒྱལ་པོ་བྱེད་སྐབས་གཙོ་བོ་དཀོན་མཆོག་གིས་ང་ལ་བཀའ་གནང་བ། ཁྱོད་ཀྱིས་ཨིསི་རཱཨེལ་དམ་ཚིག་མི་གཙང་བ་བུད་མེད་དེས་ཇི་བྱས་པ་མཐོང་བྱུང་ངམ། མོས་ང་ལས་ཕྱིར་ལོག་ནས་རི་བོ་མཐོ་པོ་ཚང་མའི་སྟེང་དང་། ཤིང་སྡོང་ལྗང་ཁུ་ཚང་མའི་འོག་ཏུ་སྨེ་ཚོང་མ་ལྟར་གྱིས་ཡོད་དོ།

⁷ངའི་བསམ་བློར་མོས་དེ་ལྟར་གྱིས་པའི་རྗེས་ལ་ཏན་ཏན་ངའི་རྩར་ལོག་ཡོང་གི་རེད། འོན་ཀྱང་མོ་ཕྱིར་ལོག་མ་ཡོང་བ་དང་། མོའི་དམ་ཚིག་མེད་པའི་སྲིང་མོ་ཡ་ཧུ་དཱས་དེ་ཚང་མ་མཐོང་ཡོད་དོ།

⁸ཡ་ཧུ་དཱས། ངས་ཨིསི་རཱཨེལ་གྱིས་ང་ལས་ཁ་བསྒྱུར་ཏེ་སྨད་འཚོང་མ་ཞིག་འགྱུར་རྐྱེན་ངས་མོ་དང་ཁ་བྲལ་བ་ཡང་མཐོང་ཡོད། འོན་ཀྱང་ཨིསི་རཱཨེལ་གྱི་དམ་ཚིག་མེད་པའི་སྲིང་མོ་ཡ་ཧུ་དཱ་འཇིགས་མེད་དོ། མོ་ཡང་སྨད་འཚོང་མར་འགྱུར་རོ།

⁹རྩ་བ་ནས་ངོ་ཚ་མེད། མོས་རྡོ་དང་ཤིང་སྡོང་ལ་མཆོད་ནས་ས་གཞི་མི་གཙང་བ་བཟོས་པ་དང་ལོག་གཡེམ་གྱིས་ཡོད།

¹⁰དེ་ཚོ་ཚང་མའི་རྗེས་ལ་ཨིསི་རཱཨེལ་གྱི་དམ་ཚིག་མེད་པའི་སྲིང་མོ་དེས་ངའི་སར་ལོག་ཡོང་བའི་གཡོ་སྒྱུ་གྱིས་ཡོད། མོ་དྲང་པོ་མིན། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹¹དེ་ནས་གཙོ་བོ་དཀོན་མཆོག་གིས། ང་ལ་ཨིསི་རཱཨེལ་པ་ཆོས་ཁོང་ལས་ཁ་བསྒྱུར་ན་ཡང་མོ་དམ་ཚིག་མེད་པ་ཡ་ཧུ་དཱ་ལས་ལེགས་པ་ཡོད་པ་མངོན་པ་བྱེད་དོ་གསུངས་བྱུང་།

¹²ཁོང་གིས་ང་ཕྱིན་ནས་ཨིསི་རཱཨེལ་ལ་འདི་ལྟར་སྨྲོས་ཤིག་གསུངས་བྱུང་། དམ་ཚིག་མེད་པའི་ཨིསི་རཱཨེལ་ངའི་སར་ལོག་ཤོག། ང་སྙིང་རྗེ་ཅན་ཡིན་པ་དང་མི་ཁྲོའོ། ང་ཁྱོད་མཉམ་དུ་དུས་རྒྱུན་དུ་ཁྲོ་བར་མི་འགྱུར།

¹³ཁྱོད་ཉེས་ཅན་ཡིན་པ་དང་། ཁྱོད་ཀྱིས་གཙོ་བོ་དཀོན་མཆོག་ཁྱོད་ཀྱི་དཀོན་མཆོག་ལ་ངོ་ལོག་གྱིས་པར་ངོས་ལེན་གྱིས་ཤིག ཁྱོད་ཀྱིས་ཤིང་སྡོང་ལྗང་ཁུའི་འོག་ཏུ་ཁྱོད་ཀྱིས་པྱི་རྒྱལ་གྱི་ལྷ་ཚོར་བརྩེ་བ་གྱིས་པ་དང་། ངའི་བཀའ་ལ་མ་བརྩི་བ་ངོས་ལེན་གྱིས་ཤིག་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁴དམ་ཚིག་མེད་པའི་མི་མང་རྣམས་ཁྱོད་ངའི་ཡིན་པའི་ངའི་རྩར་ཚུར་ལོག་ཤོག ངས་གྲོང་ཁྱེར་རེ་རེ་ནས་ཁྱོད་ཚོ་རེ་རེ་དང་། ཁྱིམ་སྡེ་རེ་རེ་ནས་གཉིས་གཉིས་འཁྲིད་ནས་རི་བོ་ཛི་ཡོོན་དུ་ཕྱིར་འཁྲིད་པར་བྱའོ།

¹⁵ངས་ཁྱོད་ཚོར་ངའི་བཀའ་ལ་ཉན་མཁན་དང་ཤེས་རབ་དང་གོ་སྟོབས་ཅན་གྱི་སྒོ་ནས་ཁྱོད་ཚོའི་སྟེང་དུ་རྒྱལ་སྲིད་སྐྱོངས་མཁན་སྲིད་སྐྱོང་པ་ཞིག་སྤྲོད་རྒྱུ་ཡིན།

¹⁶དེ་ནས་ཁྱོད་ཡུལ་དེར་གྲངས་མང་དུ་འགྱུར་སྐབས་སུ། མི་མང་ཚོའི་ངའི་དམ་བཅའི་སྒྲོམ་གྱི་སྐོར་གླེང་བར་མི་བྱའོ། དེ་ཚོས་དེའི་སྐོར་བསམ་བློ་མི་གཏོང་བ་དང་དེ་མི་དྲན་ནོ། དེ་ཚོ་ལ་དེའི་དགོས་པ་མེད་པ་དང་གཞན་ཞིག་ཡང་མི་བཟོའོ།

¹⁷དུས་སྐབས་དེ་སླེབས་སུ་ཡེ་རུ་ཤ་ལེམ་ལ་གཙོ་བོ་དཀོན་མཆོག་གི་བཞུག་ཁྲི་ཞེས་འབོད་པ་དང་། མི་རིགས་ཚང་མ་དེར་ང་ལ་མཆོད་པར་འཛོམས་པར་བྱའོ། དེ་རྗེས་དེ་ཚོས་སེམས་གྱོང་པོ་དང་བསམ་ངན་གྱི་ལས་མི་བྱེད་དོ།

¹⁸ཨིསི་རཱཨེལ་གྱིས་ཡ་ཧུ་དཱ་མཉམ་དུ་འཛོམས་ནས། དེ་ཚོ་མཐུན་མོང་ཐོག་བྱང་ཕྱོགས་ཀྱི་ཡུལ་དུ་བཙན་བྱོལ་ནས་ཡོང་བ་དང་། ངས་ཁྱོད་ཀྱི་ཕ་མེས་ཚོར་གཏན་དུ་བདག་ཕྱིར་སྤྲད་པའི་ཡུལ་དེར་ལོག་པར་བྱའོ༎

¹⁹གཙོ་བོ་དཀོན་མཆོག་ཁོང་གིས་བཀའ་གནང་བ། ཨིསི་རཱཨེལ་ཁྱོད་ནི་ང་ཡི་བུ་ལྟར་དུ། ངོས་ལེན་བྱེད་པར་འདོད་པའི་ཐོག་ནས་ནི། འཛམ་གླིང་ཡོངས་ལ་ཤིན་ཏུ་མཛེས་པའི་ཡུལ། དགའ་སྤྲོའི་ཡུལ་ཞིག་ཁྱོད་ལ་སྤྲད་འདོད་ཡོད། ང་ལ་ཁྱོད་ཀྱིས་ཡབ་ཅེས་འབོད་པ་དང་། ཡང་སྐྱར་ང་ནས་ནམ་ཡང་མི་བྲལ་བ་ངས་འདོད་དོ།

²⁰འོན་ཀྱང་དམ་ཚིག་མེད་པའི་ཆུང་མ་བཞིན། ཁྱོད་ནི་ང་ལ་དམ་ལྡན་འགྱུར་མེད་དོ། གཙོ་བོ་དཀོན་མཆོག་ང་ཡིས་སྨྲས་པ་ཡིན།

²¹རི་བོའི་སྟེང་ནས་སྒྲ་ཞིག་ཐོས་བཞིན་དུ། དེ་ནི་ཨིསི་རཱཨེལ་མི་མང་གྱིས། ངུས་འབོད་བྱེད་པའི་སྒྲ་ཡིན་ནོ། གང་ལ་ཟེར་ན་དེ་ཚོས་སྡིག་ཅན་གྱི། ལམ་ནས་མི་ཚེ་བསྐྱེལ་བཞིན་དེ་ཚོ་ཡི། རང་གི་གཙོ་བོ་དཀོན་མཆོག་བརྗེད་ནས་ཡོད།

²²གཙོ་བོ་དཀོན་མཆོག་ཁོང་ནས་ངོ་ལོག་ཐག་རིང་དུ། ཕྱིན་པ་ཁྱོད་ཚོར་ཁོང་རྩར་ཚུར་ལོག་ཤོག། ཁྱོད་རྣམས་དྲག་ཅིང་དམ་ལྡན་བཟོ་བར་བྱ། ཁྱོད་ཀྱིས་སྨྲས་པ། ང་ཚོ་གཙོ་བོ་དཀོན་མཆོག་གི་སར་ལོག་བཞིན་ཡོད། གང་ལ་ཟེར་ན། ཁོང་ནི་ང་ཚོའི་དཀོན་མཆོག་ཡིན་ནོ།

²³ང་ཚོས་རི་བོའི་སྟེང་དུ་ཀླ་ཀློའི་ལྷ་ལ་མཆོད་པས་ཕན་ཐོག་གང་ཡང་བྱུང་མེད་དོ། ང་ཚོའི་དཀོན་མཆོག་གཙོ་བོ་དཀོན་མཆོག་ཁོང་རང་ཉིད་ནས་ཨིསི་རཱཨེལ་ལ་རོགས་རམ་ཐོབ་བོ།

²⁴དུས་རབས་རིང་པོའི་སྔོན་ནས་ང་ཚོའི་ཕ་མེས་ཚོས་གསོག་ཛོགས་བྱེད་པ་ཐམས་ཅད་ཕྱུགས་ཀྱི་ཁྱུ་ཚོགས་དང་། བུ་དང་བུ་མོ་རྣམས་ངོ་ཚ་ཅན་གྱི་ལྷ་བྷལ་གྱི་མཆོད་པས་ང་ཚོ་ནས་བོར་རླག་སོང་བར་འགྱུར་ཡོད་དོ།

²⁵ང་ཚོ་ངོ་ཚའི་ངང་རིལ་ནས་ང་ཚོའི་དམའ་འབེབས་ཀྱིས་ང་ཚོ་ལ་འགེབ་བཅུག་ཅིག ང་ཚོ་དང་ང་ཆོའི་ཕ་མེས་ཚོས་གཏན་དུ་གཙོ་བོ་དཀོན་མཆོག་ང་ཚོའི་དཀོན་མཆོག་གི་སྤྱན་སྔར་སྡིག་པ་གྱིས་པ་མ་ཟད། ང་ཚོས་ཁོང་གི་བཀའ་ལ་ནམ་ཡང་ཉན་མེད་དོ༎