Read Tibetan — པོད་སྐད་Tibetan Old Testament 2011 ཡེར་མི་ཡཱ 33 Bible Online

ཡེར་མི་ཡཱ 33 - Tibetan — པོད་སྐད་Tibetan Old Testament 2011 bible

ཡེར་མི་ཡཱ 33

¹ང་ཁྱམས་རའི་བཙོན་ཁང་ནང་ཡོད་པའི་སྐབས་སུ། སླར་ཡང་ང་ལ་གཙོ་བོ་དཀོན་མཆོག་གི་གསུང་འཕྲིན་ཞིག་འབྱོར་བྱུང་།

²ས་གཞི་བཀོད་ནས་རང་གནས་སུ་འཇོག་གནང་མཁན་གཅོ་བོ་དཀོན་མཆོག་གིས་ང་ལ་བཀའ་མོལ་གནང་བ། ཁོང་གི་མཚན་གཙོ་བོ་དཀོན་མཆོག་ཡིན་པ་དེས་ང་ལ་འདི་ལྟར་བཀའ་གནང་ངོ་།

³ང་ལ་འབོད་དང་ངས་ཁྱོད་ལ་ལན་འདེབས་བྱེད། ངས་ཁྱོད་ཀྱི་གང་ཡང་མི་ཤེས་པའི་ངོ་མཚར་ཅན་དང་རླབས་ཆེན་གྱི་བྱ་བ་ཁག་བརྗོད་པར་བྱའོ།

⁴ང་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ཡེ་རུ་ཤ་ལེམ་གྱི་ཁང་པ་རྣམས་དང་། ཡ་ཧུ་དཱའི་རྒྱལ་པོའི་ཕོ་བྲང་ལ་མཐའ་སྐོར་བ་དང་འཐབ་རྒོལ་བྱེད་པའི་རྐྱེན་གྱིས་དེ་བཤིགས་པར་འགྱུར་ཟེར་བརྗོད་རྒྱུ་ཡིན་ནོ།

⁵འགའ་ཤས་ཀྱིས་བྷེ་བྷི་ལོ་ནི་ཡ་པ་ཚོ་མཉམ་དུ་འཐབ་རྒོལ་བྱེད་པ་དང་། དེ་ཚོས་ངའི་ཁོང་ཁྲོ་དང་ཁྲོ་བ་དྲག་པོ་ལངས་བཞིན་པའི་སྐབས་སུ་བསད་གྲབ་ཡོད་པའིི་རོས་ཁང་པ་རྣམས་ཁེངས་པར་འགྱུར་རོ། གྲོང་ཁྱེར་འདིའི་མི་མང་ཚོས་ལས་ངན་གྱིས་པའི་རྐྱེན་གྱིས་ངས་གྲོང་ཁྱེར་འདི་ནས་ཁ་བསྒྱུར་བ་ཡིན་ནོ།

⁶འོན་ཀྱང་ངས་གྲོང་ཁྱེར་འདི་དང་འདིའི་མི་མང་ཚོ་གསོ་བར་བྱ་ཞིང་། དེ་ཚོའི་འཕྲོད་བརྟེན་སླར་གསོ་བྱ་རྒྱུ་ཡིན། ངས་དེ་ཚོ་ལ་པག་དུ་མེད་པ་ཞི་བདེ་དང་སྲུང་སྐྱོབ་སྤྲོད་རྒྱུ་ཡིན་ནོ།

⁷ངས་ཡ་ཧུ་དཱ་དང་ཨིསི་རཱཨེལ་གཉིས་ཧ་ཅང་འཕེལ་རྒྱས་བཟོ་བ་དང་དེ་ཚོ་སྔར་ལྟར་སླར་གསོ་བྱ་རྒྱུ་ཡིན།

⁸དེ་ཚོས་ང་ལ་གྱིས་པའི་སྡིག་པ་རྣམས་ངས་གཙང་མ་བཟོ་རྒྱུ་དང་། དེ་ཚོའི་སྡིག་པ་དང་ངོ་ལོག་བཅས་ལ་བཟོད་གསོལ་བྱ་རྒྱུ་ཡིན་ནོ།

⁹ཡེ་རུ་ཤ་ལེམ་དེ་བཞིན་དགའ་བ་དང་གུས་བརྩི་འབྱུང་ཁུངས་དང་ངའི་སྤོབས་པ་བྱ་ཡུལ་དུ་འགྱུར་བ་དང་། འཛམ་གླིང་གི་མི་རིགས་ཚང་མའི་ངས་ཡེ་རུ་ཤ་ལེམ་གྱི་མི་མང་ལ་བཟང་པོ་བྱས་པ་ཁག་དང་། གྲོང་ཁྱེར་དེར་འཕེལ་རྒྱས་བཟོས་ཡོད་པའི་སྐོར་ཐོས་སྐབས་འཇིགས་ཤིང་འདར་བར་འགྱུར་རོ།

¹⁰གཙོ་བོ་དཀོན་མཆོག་གིས་བཀའ་གནང་བ། མི་མང་གི་གྲོང་ཁྱེར་འདི་བྱེ་ཐང་ལྟར་མི་དང་སེམས་ཅན་གང་ཡང་གནས་སྡོད་མི་བྱེད་པའི་བྱེ་ཐང་རེད་ཅེས་བརྗོད་པ་དེ་ཚོ་བདེན་པ་ཡིན་ནོ། ཡ་ཧུ་དཱའི་གྲོང་ཁྱེར་དང་ཡེ་རུ་ཤ་ལེམ་གྱི་ཁྲོམ་ལམ་ལ་མི་དང་སེམས་ཅན་གང་ཡང་གནས་སྡོད་བྱ་མཁན་མེད་པ་སྟོང་པ་ཡིན་ནོ། འོན་ཀྱང་ས་གནས་འདིར་ཡང་སྐྱར།

¹¹དགའ་བ་དང་སྤྲོ་བའི་སྐད་དང་ཆང་སའི་ཐུགས་སྤྲོའི་སྒྲ་ཐོས་པར་འགྱུར་རོ། ཁྱོད་ཀྱིས་མི་མང་གི་ངའི་མཆོད་ཁང་དུ་ཐུགས་རྗེའི་མཆོད་པ་འཁྱེར་ཡོང་སྐབས་ལེན་པའི་མགུར་མ་ཐོས་པར་འགྱུར། དེ་ཚོས། ཀུན་དབང་ཅན་གྱི་གཙོ་བོ་དཀོན་མཆོག་ལ་ཐུགས་རྗེ་ཆེ་ཞུས་ཤིག། གང་ལ་ཟེར་ན། ཁོང་ནི་བཟང་པོ་དང་། ཁོང་གི་ཐུགས་བརྩེ་མཐའ་མེད་པ་ཡིན་ཞེས་ཟེར་རོ། ངས་ཡུལ་འདི་སྔར་ལྟར་འཕེལ་རྒྱས་བཟོ་རྒྱུ་ཡིན་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹²ཀུན་དབང་ཅན་གྱི་གཙོ་བོ་དཀོན་མཆོག་གིས་བཀའ་གནང་བ། ས་གནས་འདིར་མི་དང་སེམས་ཅན་གནས་སྡོད་མི་བྱེད་པའི་བྱེ་ཐང་ལྟར་ཡོད་པ་ཡུལ་འདིར་སླར་ཡང་ལུག་རྫི་ཚོས་རང་གི་ལུག་རྣམས་འཁྲིད་ཐུབ་པའི་ཆེད་རྩྭ་ཁ་རྣམས་ཡོང་བར་འགྱུར་རོ།

¹³རི་ཁུལ་གྱི་གྲོང་ཁྱེར་དང་རི་གཤམ་དང་ཡ་ཧུ་དའི་ལྷོ་ཕྱོགས་དང་བྷེན་ཡ་མིན་གྱི་མངའ་ཁུལ་དང་ཡེ་རུ་ཤ་ལེམ་གྱི་མཐའ་འཁོར་གྱི་གྲོང་གསེབ་རྣམས་དང་ཡ་ཧུ་དཱའི་གྲོང་ཁྱེར་བཅས་པའི་ནང་སླར་ཡང་ལུག་རྫི་ཚོས་རང་་གི་ལུག་གྲངས་གཤེར་བྱེད་དོ་ཅེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁴གཙོ་བོ་དཀོན་མཆོག་གིས་བཀའ་གནང་བ། ངས་ཨིསི་རཱཨེལ་དང་ཡ་ཧུ་དཱའི་མི་མང་ལ་ཁས་ལེན་གྱིས་པ་རྣམས་སྒྲུབ་པར་བྱེད་པའི་དུས་ཚོད་དེ་སླེབས་བཞིན་ཡོད།

¹⁵དུས་སྐབས་དེར་ངས་དཱ་བིད་ཀྱི་རིགས་བརྒྱུད་དྲང་བ་ཉིད་ཀྱི་རྒྱལ་པོར་འདམས་རྒྱུ་ཡིན། རྒྱལ་པོ་དེས་ཡུལ་ཡོངས་སུ་དྲང་པོ་དང་བདེན་པ་འབའ་ཞིག་གནང་ངོ་།

¹⁶ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་སྐྱོབས་པ་དང་དེ་ཚོ་བདེ་འཇགས་སུ་གནས་སོ། གྲོང་ཁྱེར་དེར་གཙོ་བོ་དཀོན་མཆོག་ང་ཚོའི་ཐར་པ་ཅེས་འབོད་པར་བྱའོ།

¹⁷ང་གཙོ་བོ་དཀོན་མཆོག་གིས། དུས་རྟག་ཏུ་དཱ་བིད་ཀྱི་མི་བརྒྱུད་ཅིག་ཨིསི་རཱཨེལ་གྱི་རྒྱལ་པོར་འགྱུར་བ་དང་།

¹⁸རྟག་ཏུ་ལེ་ཝའི་སྡེ་རིགས་ཀྱི་བླ་མ་ཚོས་ངའི་ཞབས་ཞུ་དང་སྦྱིན་སྲེག་གི་མཆོད་པ་དང་འབྲུའི་མཆོད་པ་དང་དམར་མཆོད་བཅས་བྱ་མཁན་ཡོང་བའི་དམ་བཅའ་བྱ་རྒྱུ་ཡིན་ནོ།

¹⁹གཙོ་བོ་དཀོན་མཆོག་གིས་བཀའ་གནང་བ།

²⁰དེ་ཚོ་རྟག་ཏུ་རང་རང་གི་དུས་ཐོག་ཡོང་བ་དང་དམ་བཅའ་ནམ་ཡང་མི་འགལ་བའི་ཆེད་ངས་ཉིན་མཚན་གཉིས་ལ་དམ་བཅའ་འཇོག་ཡོད་དོ།

²¹དེ་ལྟར་ངས་ངའི་ཞབས་ཕྱི་དཱ་བིད་ལ་ཁོའི་མི་བརྒྱུད་ཅིག་རྟག་ཏུ་རྒྱལ་པོར་འགྱུར་རྒྱུའི་དམ་བཅའ་དང་ལེ་ཝིའི་རིགས་བརྒྱུད་ཀྱི་བླ་མ་ཚོར་དེ་ཚོས་རྟག་ཏུ་ངའི་ཞབས་ཕྱི་ཞུ་རྒྱུའི་དམ་བཅའ་བཞག་པ་དང་། དམ་བཅའ་དེ་ཚོ་ནམ་ཡང་མི་འགལ་ལོ།

²²ཇི་ལྟར་ནམ་མཁའི་སྐར་ཚོགས་ལ་གྲངས་རྩི་མི་ཐུབ་པ་དང་། རྒྱ་མཚོའི་མཐའའི་བྱེ་མ་གྲངས་ཀ་རྒྱབ་མི་ཐུབ་པ་ལྟར་ངས་ངའི་ཞབས་ཕྱི་དཱ་བིད་ཀྱི་མི་བརྒྱུད་ཀྱི་མི་བརྒྱུད་ཀྱི་མི་འབོར་དང་ལེ་ཝའི་རིགས་བརྒྱུད་ཀྱི་བླ་མ་ཚོའི་གྲངས་འབོར་རྩིས་མི་ཐུབ་པ་འཕར་རྒྱུ་ཡིན་ནོ།

²³གཙོ་བོ་དཀོན་མཆོག་གིས་ང་ལ་བཀའ་གནང་བ།

²⁴ངས་འདམས་པའི་ཁྱིམ་ཚང་གཉིས་པོ་ཨིསི་རཱཨེལ་དང་ཡ་ཧུ་དཱ་ངས་སྤངས་བ་རེད་ཅེས་ཁྱོད་ཀྱིས་མི་མང་གི་བརྗོད་པར་དོ་སྣང་བྱུང་ངམ། དེར་བརྟེན་དེ་ཚོས་ངའི་མི་མང་ལ་དམད་ནས་དེ་ཚོ་མི་རིགས་ཞིག་ལ་ངོས་འཛིན་མི་བྱེད་དོ།

²⁵འོན་ཀྱང་ང་གཙོ་བོ་དཀོན་མཆོག་ལ་ཉིན་མཚན་གཉིས་མཉམ་དུ་དམ་བཅའ་ཡོད་པ་དང་། ངས་ས་གཞི་དང་ནམ་མཁར་དབང་བསྒྱུར་བྱེད་པའི་ཁྲིམས་བཟོས་ཡོད་དོ།

²⁶ངས་དེ་ལྟར་ངེས་བརྟན་བྱས་པ་ལྟར་ཡ་ཀོབ་ཀྱི་མི་བརྒྱུད་དང་ངའི་ཞབས་ཕྱི་དཱ་བིད་ལ་བཞག་པའི་དམ་བཅའ་དེ་ངས་སྲུང་བརྩི་བྱ་རྒྱུ་ཡིན། ངས་དཱ་བིད་ཀྱི་མི་བརྒྱུད་ནང་ནས་གཅིག་འདམས་ནས་ཨབ་ར་ཧམ་དང་ཨི་སཱག་དང་ཡ་ཀོབ་ཀྱི་མི་བརྒྱུད་ཆོའི་སྟེང་དུ་དབང་བསྒྱུར་བྱེད་དུ་འཇུག་རྒྱུ་ཡིན། ངས་ངའི་མི་མང་ལ་སྙིང་རྗེ་བྱས་ནས་དེ་ཚོ་ཡང་སྐྱར་འཕེལ་རྒྱས་བཟོ་རྒྱུ་ཡིན་ཞེས་སོ༎