Read Tibetan — པོད་སྐད་Tibetan Old Testament 2011 ཡེར་མི་ཡཱ 40 Bible Online

ཡེར་མི་ཡཱ 40 - Tibetan — པོད་སྐད་Tibetan Old Testament 2011 bible

ཡེར་མི་ཡཱ 40

¹དེ་ནས་གཙོ་བོ་དཀོན་མཆོག་གིས། ང་དམག་སྤྱི་ནེ་བུ་ཛ་ར་དྷན་གྱིས་ར་མཱ་ནས་གློད་བཀྲོལ་བཏང་བའི་རྗེས་ང་ལ་བཀའ་གནང་བ། ང་ལ་ལྕགས་རྒྱབ་ནས་ཡེ་རུ་ཤ་ལེམ་དང་ཡ་ཧུ་དཱའི་མི་རྣམས་དང་མཉམ་དུ་བྷེ་བྷི་ལོ་ནི་ཡ་དུ་བཙོན་དུ་འཁྲིད་དོ།

²དམག་སྤྱི་དེས་ང་ཟུར་དུ་འཁྲིད་ནས་ང་ལ་སྨྲས་པ། ཁྱོད་ཀྱི་དཀོན་མཆོག་གཙོ་བོ་དཀོན་མཆོག་གིས་ཡུལ་འདིར་སྟོར་བཤིགས་གནང་རྒྱུའི་ཉེན་བརྡ་གཏོང་གནང་ཡོད་དོ།

³ད་ལྟའི་རྐྱེན་ངན་འདི་ཁོང་རང་གིས་བཀའ་གནང་བ་ལྟར་མཛད་ཡོད། དེ་ཚོ་ནི་ཁྱོད་ཀྱི་མི་མང་གིས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་པ་དང་ཁོང་གི་བཀའ་ལ་མ་ཉན་པའི་རྐྱེན་གྱིས་བྱུང་བ་ཡིན་ནོ།

⁴ད་ངས་ཁྱོད་ཀྱི་ལག་ནས་ལྕགས་ཐག་བཀྲོལ་ནས་ཁྱོད་རང་དབང་དུ་གཏོང་རྒྱུ་ཡིན། ཁྱོད་ང་དང་མཉམ་དུ་བྷེ་བྷི་ལོ་ནི་ཡ་དུ་འགྲོ་འདོད་ཡོད་ན་དེ་ལྟར་བྱས་ན་འགྲིགས་རྒྱུ་དང་། ངས་ཁྱོད་ལ་བལྟ་རྟོགས་བྱ་རྒྱུ་ཡིན་ནོ། འོན་ཀྱང་ཁྱོད་ང་མཉམ་དུ་འགྲོ་འདོད་མེད་ན་ཡོང་མི་དགོས་སོ། ཁྱོད་ལ་ཡུལ་ཆ་ཚང་འདམས་རྒྱུ་ཡོད་པ་དང་། ཁྱོད་རང་གང་དུ་འགྲོ་དགོས་པ་འགྲོ་ན་འགྲིགས་སོ།

⁵ངས་ལན་འདེབས་གང་ཡང་མ་བྱས་སྟབས། ནེ་བུ་ཛ་ར་དྷན་གྱིས་བྷེ་བྷི་ལོ་ནི་ཡའི་རྒྱལ་པོས་ཡ་ཧུ་དཱའི་གྲོང་ཁྱེར་ཚོའི་སྲིད་སྐྱོངས་པར་བསྐོས་པ་ཤ་ཕན་གྱི་ཚ་བོ་ཨ་ཧི་ཀམ་གྱི་བུ་གྷེ་དལ་ཡཱའི་རྩར་ཕྱིར་སོང་ཞིག ཁྱོད་ཁོ་དང་མཉམ་དུ་མི་མང་གི་ཁྲོད་དུ་བསྡད་ན་སྒྲིགས་པ་དང་། ཡང་ན་ཁྱོད་གང་དུ་འགྲོ་དགོས་བསམ་ན་དེར་སོང་ཞིག་སྨྲས་པ་དང་། དེ་ནས་ཁོས་ང་ལ་རྔན་པ་དང་ཟས་ཕྲན་བུ་སྤྲད་ནས་ང་རང་གི་འདོད་པའི་ལམ་དུ་འགྲོ་རུ་བཅུག་གོ

⁶ངས་མིཛ་པཱའི་གྷེ་དལ་ཡཱའི་སར་སྡོད་པར་སོང་ནས་ཡུལ་དེར་ལྷག་འཕྲོས་ཡོད་པའི་མི་མང་ཚོ་མཉམ་དུ་བསྡད་དོ༎

⁷ཡ་ཧུ་དཱ་པའི་དཔོན་པོ་འགའ་ཞིག་དང་དམག་མི་འགའ་ཞིག་གིས་ཁོ་ལ་མགོ་བཏགས་ཞུས་མེད་དེ། དེ་ཚོས་བྷེ་བྷི་ལོ་ནི་ཡའི་རྒྱལ་པོས་གྷེ་དལ་ཡཱ་ཡུལ་དེའི་མི་མང་སྐྱོ་ཤོས་བྷེ་བྷི་ལོ་ནི་ཡ་དུ་མ་འཁྲིས་པ་ཚོའི་བལྟ་རྟོགས་བྱ་མཁན་བཟོས་པ་ཐོས་སོ།

⁸དེར་བརྟེན་ནེ་ཐན་ཡཱའི་བུ་ཨིཤ་མ་ཨེལ་དང་ཀ་རི་ཨའི་བུ་ཡོ་ཧ་ནན་དང་ཏན་ཧུ་མེད་ཀྱི་བུ་སེ་ར་ཡཱ་དང་ནེ་ཏོ་ཕཱ་ནས་ཨེ་ཕའི་བུ་ཚོ་དང་མ་ཀཱ་ནས་ཡེ་ཡེ་ཛ་ནི་ཡཱ་རང་གི་འཁོར་དང་བཅས་མིཛ་པཱ་རུ་གྷེ་དལ་ཡཱའི་སར་སོང་ངོ་།

⁹གྷེ་དལ་ཡཱས་དེ་ཚོ་ལ་སྨྲས་པ། ཁྱོད་ཚོས་བྷེ་བྷི་ལོ་ནི་ཡ་པ་ཚོར་མགོ་བཏགས་ཞུ་དགོས་པའི་ཆེད་འཇིགས་མི་དགོས་པའི་ངས་ཁས་ལེན་བྱ་རྒྱུ་ཡིན། ཁྱོད་ཚོ་ཡུལ་འདིར་གཞིས་ཆགས་ནས་བྷེ་བྷི་ལོ་ནི་ཡའི་རྒྱལ་པོའི་ཞབས་ཕྱི་ཞུས་ཤིག་དང་ཁྱོད་ཚོར་བྱ་བ་ལམ་འགྲོ་ཡོང་ངོ་།

¹⁰ང་མིཛ་པཱ་རུ་སྡོད་ཅིང་བྷེ་བྷི་ལོ་ནི་ཡ་པ་ཚོར་འདིར་ཡོང་སྐབས་ཁྱོད་ཚོའི་སྐུ་ཚབ་བྱེད་དོ། འོན་ཀྱང་ཁྱོད་ཚོས་རྒུན་ཆང་དང་ཤིང་འབྲས་དང་སྐྱུ་རུའི་སྣུམ་བཅས་པ་བསྡུས་ནས་གསོག་འཇོག་དང་ཁྱོད་ཚོས་དབང་བའི་གྲོང་གསེབ་ནང་གནས་སྡོད་བྱེད་ཆོག་གོ

¹¹སྐབས་དེར་ཨིསི་རཱཨེལ་པ་མོ་ཨབ་ཏུ་ཡོང་བ་རྣམས་དང་ཨམ་མོན་དང་ཨེ་དྷོམ་དང་གཞན་ཡུལ་ཁག་ཏུ་ཡོད་མཁན་ཚང་མས་བྷེ་བྷི་ལོ་ནི་ཡའི་རྒྱལ་པོས་ཨིསི་རཱཨེལ་པ་འགའ་ཤས་ཡ་ཧུ་དཱར་སྡོད་བཅུག་པ་དང་། གྷེ་དལ་ཡཱ་དེ་ཚོའི་སྲིད་སྐྱོངས་པ་བཟོས་པ་བཅས་ཐོས་སོ།

¹²དེ་འདྲ་སོང་ཙང་དེ་ཚོ་ཁ་འཐོར་ནས་གནས་པའི་ས་ཁུལ་ནས་ཐོན་སྟེ་ཡ་ཧུ་དཱར་ཕྱིར་ལོག་གོ དེ་ཚོའི་མིཛ་པཱ་རུ་གྷེ་དལ་ཡཱའི་སར་སླེབས་པ་དང་དེར་རྒུན་ཚལ་དང་ཤིང་འབྲས་ཁྱོན་ཆེ་བསྡུས་སོ༎

¹³དེ་རྗེས་ཡོ་ཧ་ནན་དང་མགོ་བཏགས་མ་ཞུས་པའི་དམག་མིའི་འགོ་འཁྲིད་ཚོ་མིཛ་པཱ་རུ་གྷེ་དལ་ཡཱའི་སར་ཕྱིན་ནས།

¹⁴ཁྱེད་ཀྱིས་ཨམ་མོན་གྱི་རྒྱལ་པོ་བཱ་ལིསི་ཀྱིས་ཁྱེད་གསོད་པར་ཨིཤ་མ་ཨེལ་བཏང་བ་མི་མཁྱེན་ནམ་ཞེས་ཁོང་ལ་ཞུས་སོ། འོན་ཀྱང་གྷེ་དལ་ཡཱས་དེ་ལ་ཡིད་ཆེས་མ་གནང་ངོ་།

¹⁵དེ་ནས་ཡོ་ཧ་ནན་གྱིས་ཁོང་ལ་ལྐིག་ཏུ་ང་ཨིཤ་མ་ཨེལ་གསོད་དུ་གཏོང་རོགས་གནང་། དེ་སུས་ཀྱང་ཤེས་ཀྱི་མ་རེད། ཁོས་ཁྱེད་ལ་གསོད་དུ་ཅི་ལ་འཇུག། དེས་ཁྱེད་ཀྱི་ཉེ་འཁོར་དུ་ཡོད་པའི་ཡ་ཧུ་དཱ་པ་རྣམས་ཁ་འཐོར་ནས་ཡ་ཧུ་དཱར་ལྷག་ལུས་མི་མང་གི་སྟེང་དུ་རྐྱེན་ངན་ཡོང་བར་འགྱུར་ཞེས་ཞུས་སོ།

¹⁶འོན་ཀྱང་གྷེ་དལ་ཡཱས་ལན་དུ། དེ་ལྟར་མ་བྱེད་ཅིག། ཁྱེད་ཀྱིས་ཨིཤ་མ་ཨེལ་སྐོར་ལ་བཤད་པ་དེ་བདེན་པ་ཡིན་པ་མི་སྲིད་ཅེས་གསུངས་སོ༎