Read Tibetan — པོད་སྐད་Tibetan Old Testament 2011 སྐྱོ་གླུ 2 Bible Online

སྐྱོ་གླུ 2 - Tibetan — པོད་སྐད་Tibetan Old Testament 2011 bible

སྐྱོ་གླུ 2

¹གཙོ་བོ་དཀོན་མཆོག་ཉིད་ཀྱིས་ཐུགས་ཁྲོའི་ངང་། ཛི་ཡོན་མུན་པའི་ནང་དུ་ཡོངས་སུ་བཏུམ། མཐོ་རིས་ལྟ་བུའི་དེ་ཡི་གཟི་བརྗིད་དེ། ཁོང་གིས་གྱང་གོག་དུ་འགྱུར་བར་མཛད། ཁོང་ཉིད་ཐུགས་དགོངས་ཁྲོས་པའི་ཉིན་མོ་དེར། ཉིད་ཀྱི་མཆོད་ཁང་དེའང་དོར་བར་མཛད།

²སྙིང་རྗེ་མེད་པར་གཙོ་བོ་དཀོན་མཆོག་གིས། ཡ་ཧུ་དཱ་ཡི་གྲོང་ཀུན་རློག་པར་མཛད། ཡུལ་གྱི་སྲུང་ཆར་བཟོས་པའི་མཁར་རྗོང་རྣམས། ཁོང་ཉིད་ཀྱིས་དེ་དག་ཡོངས་སུ་སྟོར་བར་མཛད། མངའ་བདག་རྣམས་དང་དེ་ཚོའི་རྒྱལ་ཁམས་ཐོག། གཙོ་བོ་དཀོན་མཆོག་གིས་ནི་དམའ་འབེབས་མཛད།

³ཁོང་ཉིད་ཀྱི་ཐུགས་ཁྲོའི་ངང་། ཨིསི་རཱཨེལ་ཡུལ་གྱི་ནུས་སྟོབས་ཡོངས་སུ་བཅག། དགྲ་བོས་ང་ཚོར་འཐབ་རྒོལ་བྱེད་པའི་སྐབས། ཁོང་གིས་ང་ཚོར་སྐྱབས་གྲོགས་མི་མཛད་དེ། ང་ཚོའི་ཐོག་ཏུ་མེ་བཞིན་ཐུགས་ཁྲོས་ཏེ། ཐམས་ཅད་ཇི་ཡོད་འཇིག་པར་མཛད།

⁴དགྲ་བོར་དམིགས་ཏེ་ཚད་པའི་མདའ་གཞུ་བཞིན། ཁོང་གི་ཕྱག་མདའ་ང་ཚོའི་ཐོག་ཏུ་ཚད། ང་ཚོར་དགའ་བར་འབྱིན་པའི་སྐྱེ་བོ་ཀུན། ཁོང་གིས་དེ་དག་ཡོངས་རྫོགས་ཚར་བཅད་མཛད། མེ་བཞིན་འབར་བའི་ཁོང་གི་ཐུགས་ཁྲོ་དེ། ཡེ་རུ་ཤ་ལེམ་གྲོང་དུ་ང་ཚོས་འཚོར།

⁵དགྲ་བོ་བཞིན་དུ་གཙོ་བོས་ཨིསི་རཱཨེལ་ཚར་བཅད་མཛད། དེ་ཡི་མཁར་ཛོང་ཁག་དང་ཕོ་བྲང་བཅས། ཁོང་གིས་དེ་དག་གྱང་གོག་བཞིན་དུ་འགྱུར་བར་མཛད། ཡ་ཧུ་དཱ་ཡི་ཡུལ་མི་རྣམས་ཀྱི་ཐོག། ཁོང་གིས་མྱ་ངན་མུ་མཐའ་མེད་པར་གནང་།

⁶ཁོང་ལ་བསྙེན་བཀུར་ཞུ་བའི་མཆོད་ཁང་དེ། ཁོང་གིས་ཡོངས་སུ་བཅག་སྟེ་དུམ་བུར་བཟོས། དམ་པའི་དུས་སྟོན་དང་ངལ་གསོ་བའི་ཞག་ལ་སོགས་པ། ཁོང་གིས་དེ་དག་ཚང་མ་མེད་པར་མཛད། རྒྱལ་པ་རྣམས་དང་བླ་མ་རྣམས་ཀྱིས། ཁོང་གི་ཐུགས་ཁྲོའི་མཐུ་དང་ནུས་པ་ཚོར།

⁷གཙོོ་བོས་མཆོད་ཁྲིར་ངོས་ལེན་མི་མཛད་པར། དམ་པའི་མཆོད་ཁང་དེ་འདྲ་སྤངས་པར་མཛད། མཆོད་ཁང་དེ་ཡི་རྩིག་པ་རློག་པའི་ཕྱིར། ཁོང་གིས་དགྲ་བོ་རྣམས་ལ་དབང་ཆ་གནང། དུས་སྐབས་ཤིག་ལ་ང་ཚོས་དགའ་ཞིང་བསྙེན་བཀུར་བྱེད་ཡུལ་དེར། དགྲ་བོ་རྣམས་ཀྱིས་རྒྱལ་ཁའི་སྐད་ཅོར་འདོན།

⁸ཛི་ཡོན་ལྕགས་རི་རློག་པར་གཙོ་བོ་དཀོན་མཆོག་ཁོང་གིས་ཐུགས་ཐག་བཅད། དེ་དག་མེད་པར་གཏོང་ཕྱིར་ཁོང་གིས་ཐིག་ཚད་སྐྱོན། ད་ལྟ་དེ་ཡི་མཁར་རྫོང་རྣམས་དང་་ལྕགས་རི་བཅས། ཡོངས་སུ་ཉམ་ནས་གྱང་གོག་བཞིན་དུ་འགྱུར།

⁹དེ་ཡི་རྒྱལ་སྒོ་རྣམས་ནི་རྡོ་ཧྲུག་ནང་དུ་ཚུད། དེ་ཡི་སྒོ་གཏན་རྣམས་ཆག་སྟེ་དུམ་བུར་འགྱུར། རྒྱལ་པོ་དང་ནི་ཡུལ་མི་གཙོ་དྲག་རྣམས། གཞན་གྱི་ཡུལ་དུ་བཙོན་རར་ཚུད་ནས་ཡོད། ཆོས་ཁྲིམས་སྐོར་གྱི་སློབ་སྟོན་མི་བྱེད་དོ། ལུང་སྟོན་པ་རྣམས་ཞལ་གཟིགས་མེད་པར་ལུས།

¹⁰ཡེ་རུ་ཤ་ལེམ་ཡུལ་གྱི་རྒན་པོ་རྣམས། ས་ཐང་སྒང་དུ་ཁ་རོག་བསྡད་པ་དང་། མགོ་ལ་ཐལ་བ་བྱུགས་ཏེ་ལུས་པོར་རྩ་རས་གྱོན། ན་ཆུང་མ་རྣམས་ས་ཁར་མགོ་སྒུར་བསྡད།

¹¹ངུ་བའི་རྐྱེན་གྱིས་ང་ཡི་མིག་ནི་ཚ། ང་ཡི་སྲོག་ནི་སྡུག་བསྔལ་ནང་དུ་ཚུད། ང་ཡི་མི་འབངས་འཇིག་པའི་སྡུག་བསྔལ་གྱིས། ང་ནི་ཡིད་མྱ་ངན་གྱི་ནི་ཐང་ཆད་ཡོད། གྲོང་ཚོའི་ནང་གི་སྲང་ལམ་གང་ཡོད་སར། བུ་ཕྲུག་ཆེ་ཆུང་མང་པོ་དྲན་མེད་འགྱེལ།

¹²དེ་ཚོ་བཀྲེས་ཤིང་སྐོམ་པའི་སྡུག་བསྔལ་གྱིས། རང་གི་མ་ཡི་མདུན་དུ་ངུ་འབོད་བྱས། དེ་ཚོར་རྨས་སྐྱོན་ཆེན་པོ་བྱུང་བ་བཞིན། སྲང་ལམ་ཁུལ་དུ་དྲན་པ་མེད་པར་འགྱེལ། དེ་རྗེས་དལ་བུས་མ་ཡི་པང་དུ་འཆི།

¹³ཀྱེ་ཡེ་རུ་ཤ་ལེམ། ང་ཡིས་གཅེས་པའི་ཡེ་རུ་ཤ་ལེམ་ཁྱོད། ད་ངས་ཁྱོད་ལ་ཅི་ཞིག་སྨྲ་བར་བྱ། ངས་ནི་ཁྱོད་ལ་སེམས་གསོ་ཇི་ལྟར་བྱ། ཁྱོད་ཀྱིས་མྱང་བའི་དཀའ་ངལ་འདི་འདྲ་བ། ད་བར་སུས་ཀྱང་མྱོང་དགོས་བྱུང་མེད་དོ། ཁྱོད་ཀྱི་དཀའ་ངལ་རྒྱ་མཚོ་བཞིན་དུ་ཆེ་བས་རེ་བ་མེད།

¹⁴ཁྱོད་ཀྱི་ལུང་སྟོན་པ་ཚོས་རྫུན་གཏམ་སྨྲས། དེ་ཚོས་ཆོས་བཤད་ཀྱིས་ཁྱོད་ཀྱི་སྡིག་པ་མ་མངོན་པའི་རྐྱེན་གྱིས། ཁྱོད་ནི་བསླུ་ཁྲིད་ནང་དུ་ཚུད་ཡོད་དོ། དེ་ཚོས་ཆོས་བཤད་བྱེད་སྟངས་དེར་བརྟེན་པས། སྡིག་པར་འགྱོད་སེམས་སྐྱེ་པའི་སེམས་དང་བྲལ།

¹⁵གྲོང་ཁྱེར་བརྒྱུད་དེ་སྐྱོད་པའི་མི་རྣམས་ཀྱིས། ཁྱོད་ལ་སྨད་ཅིང་འཕྱ་བའི་མིག་གིས་བལྟ། ཡེ་རུ་ཤ་ལེམ་འཇིག་པའི་གནས་སྟངས་ལ། མགོ་དབྱུགས་ཁྲེལ་བགད་བྱས་ཤིང་འདི་ལྟ་སྟེ། མཛེས་སྤྲོས་ལྡན་པའི་གྲོང་ཁྱེར་འདི་ཡིན་ནམ། ས་གཞིས་སྤོབས་པ་བྱས་ཡུལ་འདི་ཡིན་ནམ།

¹⁶དགྲ་བོ་ཚང་མས་ཁྱོད་ལ་འཕྱ་ཞིང་སྡང་བ་དང་། དམའ་འབེབས་བྱེད་པའི་རྣམ་འགྱུར་སོགས་བསྟན་ཏེ། དེ་ལ་ནི་ང་ཚོས་ཡོངས་སུ་འཇིག་པར་བྱས། ང་ཚོས་སྒུགས་ནས་བསྡད་པའི་ཉིན་མོ་དེ། དེ་རིང་ཡིན་ཞེས་ཁོ་ཚོས་བརྗོད་པར་འགྱུར།

¹⁷གཙོ་བོ་དཀོན་མཆོག་ཁོང་གིས་ཇི་ལྟར་ཟོན་བསྐུལ་གནང་བ་བཞིན། མཐའ་མར་ཁོང་གིས་དེ་དག་བསྒྲུབས་པར་མཛད། ཡུན་རིང་སྔོན་ནས་ཟོན་བསྐུལ་གནང་བ་བཞིན། ཁོང་གི་སྙིང་རྗེ་དགོངས་ཞེས་མ་མཛད་པར། ཁོང་གིས་ང་ཚོར་ཡོངས་སུ་ཚར་བཅད་མཛད། ང་ཚོའི་དགྲ་བོར་རྒྱལ་ཁ་གནང་བ་དང་། ང་ཚོ་ཉམ་ཤིང་རྒུད་པའི་གནས་སྟངས་ཐོག། དགྲ་བོ་རྣམས་ལ་ཁོང་གིས་དགའ་ཚོར་འབྱིན།

¹⁸ཀྱེ་ཡེ་རུ་ཤ་ལེམ་ཁྱོད་ཀྱི་ལྕགས་རི་ཚོས་གཙོ་བོ་ལ་ནི་ཞུ་འབོད་བྱོས། ཉིན་མཚན་མེད་པར་ཁྱོད་ཀྱི་མིག་གཉིས་ནས། མིག་མཆུ་གཙང་པོ་བཞིན་དུ་འབབ་པར་ཤོག། མྱ་ངན་དང་ནི་སྨྲེ་ངག་རྐྱེན་གྱིས་ནི། ཁྱོད་ནི་ངལ་ཞིང་ཡིད་ཐང་ཆད་པར་ཤོག།

¹⁹མཚན་མོར་ཡང་ནས་ཡང་དུ་གཉིད་སད་དེ། གཙོ་བོ་ལ་ནི་ཞུ་འབོད་བྱེད། ཁོང་གི་སྙིང་རྗེ་དེ་རང་གི་བུ་ཕྲུག་རྣམས་ལ་ཐོབ་པའི་ཕྱིར། གདུང་ཤུགས་དྲག་པོས་ཁོང་ལ་གསོལ་བ་འདེབས། གང་ལགས་ཟེར་ན་བུ་ཕྲུག་དེ་དག་ནི། ལྟོགས་ནས་ལམ་སྲང་ཁག་ཏུ་འཆི་ཁར་ཐུག།

²⁰ཐུགས་རྗེ་གཟིགས་ཀྱེ་གཙོ་བོ་དཀོན་མཆོག། ཁྱེད་ཀྱིས་ང་ཚོར་ཅི་ཕྱིར་དེ་ལྟར་ཆད་པ་གཏོང་བཞིན་ཡོད་དམ། བུད་མེད་ཚོས་རང་གིས་གཅེས་པའི་བུ་ཕྲུག་ཀྱང་ཟ་བཞིན་འདུག། དེ་བཞིན་ལུང་སྟོན་པ་དང་བླ་མ་རྣམས། མཆོད་ཁང་ནང་དུ་གསོད་བཞིན་ཡོད།

²¹སྐྱེ་བོ་རྒན་གཞོན་མེད་པའི་རོ་རྣམས་ནི་གཞུང་ལམ་ཁག་ཏུ་ལུས། དགྲ་བོའི་རལ་གྲིས་ཕོ་མོ་ན་གཞོན་བསད། ཉིད་ཀྱི་ཐུགས་ཁྲོ་བཞེས་པའི་ཉིན་མོ་ལ། སྙིང་རྗེ་མེད་པར་དེ་ཚོ་བསྡེབས་གསོད་མཛད།

²²དདངས་སྐྲག་འཇིགས་སྣང་ལྡན་པའི་དགའ་སྟོན་བྱེད་པའི་ཕྱིར། ཁྱེད་ཉིད་ཀྱིས་ང་ཡི་དགྲ་བོ་རྣམས་ལ་འབོད་མཛད་དེ། དེ་ཚོས་ང་ཡི་ཕྱོགས་བཞིར་མཐའ་བསྐོར་རོ། ཁྱེད་ཀྱི་ཐུགས་ཁྲོ་དྲག་པོའི་ཉིན་མོ་ནས། སུའང་བྲོས་ནས་ཐར་བར་མི་བྱས་སོ། ང་ཡིས་གཅེས་སྐྱོང་བྱས་པའི་བུ་ཕྲུག་རྣམས། དེ་ཚོས་སྲོག་གཅོད་བཏང་སྟེ་མེད་པར་བྱས༎