Read Tibetan — པོད་སྐད་Tibetan Old Testament 2011 སྐྱོ་གླུ 3 Bible Online

སྐྱོ་གླུ 3 - Tibetan — པོད་སྐད་Tibetan Old Testament 2011 bible

སྐྱོ་གླུ 3

¹དཀོན་མཆོག་ནས་ཉེས་ཆད་ཐོབ་རྒྱུ་ནི་གང་ཡིན་པ་ང་ཡི་ཤེས།

²ཁོང་གིས་ང་ལ་མུན་པའི་སྨག་རུམ་གྱི། མཐའ་གཏིང་ཟབ་མོའི་ནང་དུ་འདེད་པར་མཛད།

³ཁོང་གིས་སྙིང་རྗེ་མེད་པར་ང་ལ་ནི། ཡང་ནས་ཡང་དུ་ཕྱག་གིས་ཉེན་བརྡ་མཛད།

⁴ང་ཡི་ཤ་ལྤགས་འཁུམས་པར་མཛད་པ་དང་། ང་ཡི་རུས་པ་དུམ་བུར་བཅག་པར་མཛད།

⁵ཁོང་གིས་ང་ལ་དཀའ་སྡུག་དང་ནི་སྡུག་བསྔལ་གྱི་བཙོན་དུ་བཅུག།

⁶ཁོང་གིས་འཆི་བའི་མུན་པའི་ནང་དུ་ང་ལ་བཅུག།

⁷ཁོང་གིས་ལྕགས་ཐག་ལྗིད་པོས་ང་བཅིངས་པས། ཐར་ཐབས་བྲལ་བའི་བཙོན་པ་བཞིན་དུ་འགྱུར།

⁸ང་ནི་སྐྱབས་གྲོགས་ཞུ་ཕྱིར་སྐད་འབོད་འདོན། འོན་ཀྱང་དཀོན་མཆོག་གིས་དེ་ལ་གསན་མི་མཛད།

⁹ལམ་དུ་འགྲུལ་སྐབས་ང་ཡི་གོམ་པ་འཁྱོར། གང་དུ་ཕྱོགས་ཀྱང་རྡོའི་ལྕགས་རིས་འགྲུལ་ལམ་བཀག།

¹⁰ཁོང་གིས་ང་ལ་དོམ་བཞིན་ལམ་སྒུག་མཛད། སེང་གེ་བཞིན་དུ་ང་ཡི་ཁར་མཚོང་ངོ་།

¹¹ང་ལ་རྗེས་དེད་མཛད་ཅིང་ང་ཡི་ལུས་གཟུགས་དུམ་བུར་བཟོས་ནས་བོར།

¹²ཁོང་གིས་ཉིད་ཀྱི་མདའ་གཞུ་ཚད་མཛད་དེ། ང་ལ་ཉིད་ཀྱི་ཕྱག་མདའི་འབེན་བཞིན་བཅོས།

¹³ཁོང་གིས་སྐྱོན་གནང་མཛད་པའི་ཕྱག་མདའ་ཡིས། ང་ཡི་ལུས་པོར་གཏིང་རིང་བར་དུ་ཟུགས།

¹⁴མི་ཚོས་ཉིན་གང་ང་ལ་འཕྱ་ཞིང་བགད། ང་ནི་དེ་ཚོའི་འཕྱ་ཡུལ་ཞིག་ཏུ་འགྱུར།

¹⁵བཟའ་བཏུང་གི་ཚབ་ལ་རོ་ཁག་ལྟ་བུའི་དཀའ་འཚེ་དྲག་པོ་གནང་།

¹⁶ཁོང་གིས་ང་ཡི་ངོ་གདོང་ས་ཁར་བདར། རྡོ་ཧྲུག་སྟེང་དུ་སོ་རྣམས་རྡབ་སྟེ་བཅག།

¹⁷འཕྲོད་རྟེན་ཞི་བདེ་དང་ནི་བདེ་སྐྱིད་སོགས། དེ་དག་ང་ཡི་སེམས་ནས་ཡོངས་སུ་བརྗེད།

¹⁸ང་ནི་གསོན་པོར་གནས་པའི་ཉིན་ཞག་ཉུང། གཙོ་བོ་དཀོན་མཆོག་གིས་གནང་བའི་རེ་འདུན་ཀུན་དང་བྲལ།

¹⁹ང་ཡི་དཀའ་འཚེ་མང་བའི་སེམས་འཁྲལ་དང་། རང་ཡུལ་ཁང་ཁྱིམ་བྲལ་བའི་སྡུག་བསྔལ་སོགས། རོ་ཁག་བཙན་དུག་བཞིན་དུ་སེམས་ལ་འཕེལ།

²⁰གནས་ཚུལ་དེ་ནི་ཡང་ཡང་དྲན་པས་རྐྱེན། ང་ཡི་སེམས་ཉིད་སྨུག་ཅིང་ཡོངས་སུ་འཐིབས།

²¹འོན་ཀྱང་ངས་ནི་གནས་ཚུལ་ཞིག་གི་སྐོར། བསམ་བློ་གཏོང་དུས་རེ་བ་གསར་དུ་སྐྱེས།

²²གཙོ་བོ་དཀོན་མཆོག་གི་བསླུ་བ་མེད་པའི་ཐུགས་བརྩེ་དང་། ཁོང་གི་སྙིང་རྗེའི་ཚད་ནི་ཟད་མེད་ལགས།

²³སྔ་དྲོའི་དུས་བཞིན་སོས་པ་དང་། ཀུན་ཉི་ཤར་བཞིན་དུ་ངེས་གཏན་ལགས།

²⁴གཙོ་བོ་དཀོན་མཆོག་ང་ཡི་ཐམས་ཅད་ཡིན་པས། ང་ནི་ཁོང་ལ་བློ་བརྟན་རེ་བཅོལ་ཞུ།

²⁵གཙོ་བོ་དཀོན་མཆོག་ཁོང་ལ་བློ་བརྟན་རེ་བཅོལ་ཞུ་མཁན་ལ། ཁོང་ནི་ཐུགས་གཤིས་བཟང་པོ་ལགས།

²⁶དེར་བརྟེན་ངེད་རྣམས་ངང་རིང་བཟོད་སྲན་ཐོག། ཁོང་གི་ཐར་ལམ་སྒུག་སྡོད་བྱེད་ན་ལེགས།

²⁷དེ་ལྟར་ངང་རིང་བཟོད་སྲན་བྱེད་རྒྱུ་དེ། གཞོན་ནུའི་དུས་ནས་སྦྱངས་བརྩོན་བྱེད་ན་ལེགས།

²⁸དཀའ་ངལ་དྲག་པོའི་ནང་དུ་ཚུད་པའི་སྐབས། ངང་རིང་བཟོད་སྲན་བྱེད་དེ་ཁུ་སིམ་མེར། རང་ཉིད་གཅིག་པོར་གནས་སྡོད་བྱེད་ན་ལེགས།

²⁹ཁོང་གི་ཐུགས་དགོངས་བཞིན་དུ་ངོས་ལེན་དགོས། གང་ལགས་ཟེར་ན་ད་དུང་རེ་བ་ཡོད་སྲིད་དོ།

³⁰ང་ཚོར་ཉེས་བརྡུངས་འཕྱ་སྨད་བྱུང་ནའང་། བཟོད་སྲན་ཆེན་པོས་དེ་དག་ངོས་ལེན་དགོས།

³¹གཙོ་བོ་སྙིང་རྗེ་ཆེན་པོ་ལགས་པས། ཉིད་ཀྱི་ངེད་རྣམས་གཏན་དུ་འདོར་མི་མཛད།

³²ཁོང་གིས་ང་ཚོར་དཀའ་འཚེ་གནང་ནའང། ཉིད་ཀྱི་ཐུགས་བརྩེ་ངེས་ཤིང་ནུས་མཐུ་ཆེ།

³³ང་ཚོར་སྐྱོ་སེམས་དཀའ་སྡུག་བྱུང་བས་ན། ཉིད་ཀྱི་ཐུགས་སུ་དགའ་སྤྲོ་ཅིའང་མེད།

³⁴ང་ཚོའི་སེམས་ཉིད་བཙོན་རར་ཚུད་པའི་སྐབས་གཙོ་བོས་མཁྱེན་པ་དང།

³⁵ཁོང་གིས་ང་ཚོར་གནང་བའི་ཁེ་དབང་རྣམས། ལོངས་སྤྱོད་བྱེད་དབང་མེད་པར་ཁོང་གིས་མཁྱེན།

³⁶ཁྲིམས་རར་ཁྲིམས་གཅོད་དྲང་མིན་ཁོང་གིས་མཁྱེན།

³⁷གཙོ་བོ་ཁོང་གི་ཐུགས་དགོངས་གང་ཡིན་པ། དེ་དག་འབའ་ཞིག་རྒྱུན་དུ་སྒྲུབ་པར་འགྱུར།

³⁸བཟང་ངན་གཉིས་ཀ་ཁོང་གི་བཀའ་ཡིས་མཛད།

³⁹ང་ཚོར་སྡིག་པའི་ཉེས་ཆད་ཕོག་པའི་སྐབས། ཁོང་ལ་སྐྱོན་བརྫོད་ཞུ་བ་ཇི་ལྟར་སྲིད།

⁴⁰ང་ཚོའི་བྱ་སྤྱོད་རྣམས་ལ་བརྟག་དཔྱད་ཀྱིས། ཁོང་གི་ཕྱོགས་སུ་བློ་ཁ་བསྒྱུར་བར་བྱ།

⁴¹མཐོ་རིས་གནས་སུ་བཞུགས་པའི་དཀོན་མཆོག་ལ། རང་གི་སེམས་མ་གསང་བར་སྨོན་ལམ་འདེབས་དགོས་སོ།

⁴²ང་ཚོས་གཙོ་བོར་རྒོལ་ཞིང་སྡིག་པ་བྱས། ཁྱེད་ཀྱིས་ང་ཚོར་སྡིག་སེལ་གནང་མེད་དོ།

⁴³ཁྱེད་ཀྱིས་ང་ཚོར་འདེད་དེ་སྲོག་གཅོད་མཛད། ཁྱེད་ཀྱི་སྙིང་རྗེ་ཁྱེད་ཀྱི་ཁྲོ་བའི་ནང་དུ་གབ།

⁴⁴རང་ཉིད་ཁྲོ་བོའི་སྤྲིན་ཐུག་པོས་བཏུམ་མཛད་པས། ང་ཚོའི་ཞུ་བ་ཁྱེད་དྲུང་མི་སླེབས་སོ།

⁴⁵ཁྱེད་ཀྱིས་ང་ཚོར་འཛམ་གླིང་གི་བཙོག་སྙིགས་སྤུངས་པ་ལྟ་བུར་སྤུངས་མཛད་དོ།

⁴⁶དགྲ་བོ་ཀུན་གྱིས་ང་ཚོར་འཕྱ་ཞིང་སྨད།

⁴⁷ང་ཚོ་འཇིགས་ཤིང་འཕུངས་པའི་གནས་སུ་འགྱུར། ཉེན་དང་འཇིགས་པའི་ངང་དུ་ངེད་རྣམས་གནས།

⁴⁸རང་གི་འབངས་ཀྱིས་འཇིག་པ་མཐོང་ནས། གཙང་པོའི་ཆུ་རྒྱུན་བཞིན་དུ་ང་ཡི་མིག་ཆུ་ཤོར།

⁴⁹མཐོ་རིས་གནས་ནས་གཙོ་བོ་དཀོན་མཆོག་གིས་ང་ཚོར་མ་གཟིགས་བར། ང་ཡི་མིག་ནས་ཆུ་མིག་ཟད་མེད་ལྟར་མིག་ཆུ་འདོན་པར་བྱ།

⁵⁰

⁵¹གྲོང་གི་བུད་མེད་རྣམས་ཀྱི་དཀའ་ངལ་དག། མཐོང་ནས་ང་ཡི་སེམས་ནང་སྐྱོ་བ་སྐྱེས།

⁵²དོན་མེད་ང་ལ་སྡང་བའི་དགྲ་བོ་ཚོས། ང་ནི་འདབ་ཆགས་བཞིན་དུ་རྙིད་ནང་ཚུད།

⁵³དེ་ཚོས་ང་ལ་གསོན་པོར་དོང་ནང་དབྱུགས། དོང་གི་ཁ་དེ་རྡོ་ཡི་འགེབས་པར་བྱས།

⁵⁴དེ་ཡི་ནང་དུ་ཆུ་ཡང་ཡར་རྒྱས་པས། ང་ཡི་མགོ་བོ་ཆུ་ཡི་ནུབ་པར་བྱེད། སྐབས་དེར་འཆི་བའི་ཉམས་སྣང་ཉེ་བ་བྱུང་།

⁵⁵དོང་གི་སྟིང་ནས་གཙོ་བོ་དཀོན་མཆོག་ངས་ཁྱེད་ལ། ངུ་འབོད་འདོན་ཞིང་ཞུ་བ་འབུལ་བ་དང་།

⁵⁶ང་ཡི་ངུ་འབོད་འདོན་པའི་ཞུ་བ་ལ། གསན་པར་མཛོད་ཅེས་ཞུ་འབུལ་བྱས་པས་ན། ཁྱེད་ཀྱིས་དེ་དག་གསན་པར་མཛད་ལགས་སོ།

⁵⁷ཁྱེད་ཀྱིས་ང་ལ་བཀའ་ལན་མཛད་གནང་སྟེ། འཇིག་སྣང་མ་བྱེད་ཅེས་པའི་སེམས་གསོ་མཛད།

⁵⁸གཙོ་བོ་ཁྱེད་ནི་ངེད་ལ་སྐྱོབས་པར་ཕེབས། ང་ཡི་ལུས་སྲོག་ཁྱེད་ཀྱིས་སྐྱབས་པར་མཛད།

⁵⁹ངའི་ཐོག་ཚུལ་མིན་གང་བྱུང་ཁྱེད་ཀྱིས་མཁྱེན། དེས་ན་ང་ཡི་ཕྱོགས་གཏོགས་མཛད་གནང་ནས། ཁྱེད་ཀྱིས་ཁྲིམས་གཅོད་དྲང་པོ་གནང་བར་མཛོད།

⁶⁰ང་ཡི་དགྲ་བོས་ང་ལ་སྡང་བ་དང་། ཁོ་ཚོའི་ངའི་ཐོག་བྱུས་ངན་བརྩམས་པ་དེ། ཁྱེད་ཀྱིས་དེ་དག་ཡོངས་སུ་མཁྱེན་པར་མཛད།

⁶¹དེ་ཚོས་ང་ལ་འཕྱ་གཏམ་སྨྲ་བ་དེ། གཙོ་བོ་དཀོན་མཆོག་ཁྱེད་ཀྱིས་གསན་གནང་ཡོད། ཁོ་ཚོའི་བྱུས་ངན་རྣམས་ཀྱང་ཁྱེད་ཀྱིས་མཁྱེན།

⁶²ཁོ་ཚོས་ང་ལ་ཉིན་གང་ཁ་བཏང་ཞིང་། དེ་ཚོས་རང་གི་བྱུས་རྣམས་བཙམས་པར་བྱས།

⁶³ཞོག་པ་སྔ་དྲོའི་དུས་ནས་དགོང་དྲོའི་བར། དེ་ཚོས་ངའི་ཁར་འཕྱ་ཞིང་ཁྲེལ་བགད་བྱས།

⁶⁴དེ་ཚོས་ལས་ངན་གང་བྱས་གཞིར་བཟུང་ལྟར། གཙོ་བོས་དེ་ཚོར་ཉེས་ཆད་གནང་བར་མཛོད།

⁶⁵དེ་ཚོར་ཁྱེད་ཀྱིས་དམོད་པ་བོར་བ་དང་། རེ་ཐབས་ཟད་པའི་གནས་སུ་སྐྱུར་བར་མཛོད།

⁶⁶དེ་ཚོར་ཁྲོ་བའི་ངང་རྗེས་འདེད་གནང་རྒྱུ་དང་། འཇིག་རྟེན་ཡོངས་ནས་ཤུལ་མེད་སྟོངས་པར་མཛོད༎