Read Tibetan — པོད་སྐད་Tibetan Old Testament 2011 སྐྱོ་གླུ 4 Bible Online

སྐྱོ་གླུ 4 - Tibetan — པོད་སྐད་Tibetan Old Testament 2011 bible

སྐྱོ་གླུ 4

¹ང་ཚོའི་བཀྲག་མདངས་ལྡན་པའི་གསེར་མདོག་དེ། ད་ལྟ་ཉམ་ནས་འོད་མདངས་མེད་པར་འགྱུར། མཆོད་ཁང་རྩིགས་པའི་རྡོ་རྣམས་ལམ་དུ་འཐོར།

²ཛི་ཡོན་ནང་གི་ན་གཞོན་བུ་རྣམས་ནི། གསེར་བཟང་བཙོམ་བཞིན་དུ་རིན་ཐང་ཆེ། འོན་ཀྱང་ད་ནི་ཛ་སྣོད་དཀྱུས་དང་མཚུངས།

³སྤྱང་ཀི་ཡིན་རུང་རང་གི་ཕྲུ་གུ་སྐྱོང་། འོན་ཀྱང་ང་ཡི་མི་འབངས་འདི་དག་ནི། བྱ་ཆེན་ཨོསི་ཏི་རཅི་ལྟར་དེ་ཚོས་རང་གི་ཕྲུ་གུར་སྡུག་ཙུབ་བྱས།

⁴དེ་ཚོས་རང་གི་བུ་ཕྲུག་རྣམས་ལྟོགས་སྐོམ་དབང་གིས་དེ་དག་ཤི་རུ་འཇུག། ཕྲུ་གུ་དེ་ཚོས་ཁ་ཟས་སློང་ན་ཡང་། སུས་ཀྱང་དེ་ཚོར་གང་ཡང་མི་སྦྱིན་ནོ།

⁵ནམ་ཞིག་ཟས་བཟང་ཁོ་ནར་སྤྱོད་མཁན་རྣམས། ད་ནི་ལམ་ཆེན་ཁུལ་དུ་ལྟོགས་པར་ཤི། དེ་སྔ་སྐྱིད་པོའི་ནང་དུ་འཚར་བ་རྣམས། ད་ནི་བཙོག་སྙིགས་ནང་དུ་ཁ་ཟས་འཚོལ།

⁶སོ་དྷོམ་མིར་ཉེས་ཆད་གང་བྱུང་བ། དེ་ལས་ལྷག་པར་ང་ཡི་མི་འབངས་ལ། ཉེས་ཆད་ཤིན་ཏུ་དྲག་པོ་ཕོག་པ་ཡིན། སོ་དྷོམ་ལ་ནི་དཀོན་མཆོག་གིས་ཉེས་ཆད་བཏང་གནང་སྟེ། བློ་བུར་འཇིག་སྐྱོན་བྱུང་།

⁷ང་ཚོའི་རྒྱལ་སྲས་རྣམས་ནི་གངས་ལས་གཙང་། འོ་མ་ལས་དཀར། དེ་ཚོའི་ལུས་ཁམས་བདེ་ཞིང་སྟོབས་ཤུགས་རྒྱས།

⁸ད་ནི་དེ་ཚོའི་ངོ་གདོང་ནི་དུ་དྲེག་ལས་ནག་པོ་ཆགས་ཡོད། དེ་ཚོར་ལམ་ཆེན་ཁུལ་ནང་དུ་སུས་ཀྱང་ངོ་མི་ཤེས། དེ་ཚོའི་ལུས་ལྤགས་སྐམ་ཞིང་རུས་པར་འབྱར་སྟེ་ཤིང་ལྟར་སྐམ།

⁹གསོན་ཕྱིར་མཁོ་བའི་ཁ་ཟས་མ་འབྱོར་བར། རིམ་བཞིན་དལ་པོར་འཆི་ཁར་ཐུག་པ་ལས། དམག་སར་ཤི་མཁན་རྣམས་ནི་བདེ་བ་ཡིན།

¹⁰ང་ཡི་འབངས་ལ་བྱུང་བའི་རྐྱེན་ངན་དེས། སེམས་ནང་དདངས་སྐྲག་འཇིགས་པ་ཆེན་པོ་སྐྱེད། བྱམས་སེམས་ལྡན་པའི་ཨ་མ་རྣམས་ཀྱིས། རང་གི་བུ་ཕྲུག་བཙོས་ཏེ་ཟས་སུ་བྱས།

¹¹གཙོ་བོ་དཀོན་མཆོག་གིས་ཐུགས་ཁྲོ་དྲག་པོ་བཏོན་གནང། ཛི་ཡོན་དུ་མེ་འབར་བ་དང་། དེ་མེ་ཡིས་ཡོངས་སུ་འཇིག་པར་བྱས།

¹²ཡེ་རུ་ཤ་ལེམ་རྒྱལ་སྒོའི་རྣམས་ནས། བཙན་འཛུལ་བ་རྣམས་འཛུལ་ཐུབ་པ་དེ། ཕྱི་རྒྱལ་ཡུལ་གྱི་སྲིད་སྐྱོང་པ་རྣམས་ཡང་ན་འཛམ་གླིང་གི་སྐྱེ་བོ་སུས་ཀྱང་ཡིད་མི་ཆེས།

¹³འོན་ཀྱང་དངོས་སུ་གནས་ཚུལ་དེ་ལྟར་བྱུང་། གང་ལ་ཟེར་ན་དེ་ཆོའི་ལུང་སྟོན་པ་རྣམས་ཀྱིས་སྡིག་པ་བྱས་པ་དང་། བླ་མ་རྣམས་ཀྱང་གནོང་ཅན་ཡིན། དེ་ཚོས་སྐྱེ་བོ་གནོང་མེད་ཚོར་སྲོག་གཅོད་དོ།

¹⁴དེ་ཚོའི་འགོ་དཔོན་རྣམས་ཀྱང་ལོང་བ་བཞིན། གཞུང་ལམ་ཁུལ་དུ་ཡར་མར་འགྲུལ་སྐྱོད་བྱེད། དེ་ཚོའི་ལུས་གོས་སོགས་ལ་ཁྲག་བསྒོས་པས། སུས་ཀྱང་དེ་ཚོར་རེག་འཆང་བྱེད་མི་འདོད།

¹⁵ཕར་སོང་ཁྱོད་ཚོ་གྲིབ་བཙོག་ཅན་རྣམས་ནི། ང་ཚོར་རེག་འཆང་མ་བྱེད་ཅེས་ཟེར་ཏེ། མི་རྣམས་སྐད་ཅོར་འདོན་ནས་དེ་ཚོར་སྨྲས། དེས་ན་དེ་ཚོ་ཡུལ་གྲུ་གར་སོང་ཡང་། སུས་ཀྱང་དེ་ཚོར་དགའ་བསུ་མ་བྱས་སོ།

¹⁶གཙོ་བོ་དཀོན་མཆོག་གིས་དེ་ཚོར་ཐུགས་འཁུར་མི་བཞེས་པར། ཉིད་ཀྱིས་དེ་དག་ཡོངས་སུ་ཁ་གཏོར་མཛད། ང་ཚོའི་འགོ་དཔོན་དང་ནི་བླ་མ་རྣམས། ཁོང་གི་སྤྱན་སྔར་སྣང་མེད་མཐོང་ཆུང་འགྱུར།

¹⁷སྐྱབས་གྲོགས་ཞུས་ཕྱིར་དོན་མེད་ཡུན་རིང་སྒུག། ང་ཚོར་མགོན་སྐྱབས་བྱེད་པར་མི་ནུས་པའི། རྒྱལ་ཁབ་ཅིག་ལ་དོན་མེད་རེ་བཅོལ་བྱས།

¹⁸དགྲ་བོས་ང་ཚོར་སྒུག་སྡད་ཡོད། ང་ཚོ་ལམ་དུ་འགྲུལ་སྐྱོད་ཡང་བྱེད་མི་ཐུབ། ང་ཚོའི་ཞག་དུས་ཚང་ཞིང་མཐའ་མར་སླེབས།

¹⁹ནམ་མཁར་འཕུར་བའི་བྱ་གླག་ལས་མྱུར་བར་དེ་ཚོ་ཡིས། ང་ཚོའི་རྗེས་སུ་འདེད་ཅིང་ཡོང་། རི་རྣམས་ལ་དེ་ཚོས་ང་ཚོར་འདེད། འབྲོག་སྟོང་ཁུལ་དུ་ང་ཚོར་བློ་བུར་འཛིན་བཟུང་འཐེབ།

²⁰ཕྱི་མི་བཙན་འཛུལ་མཁན་གྱི་ལག་འོག་ནས། ང་ཚོར་སྲུང་སྐྱོབས་ཆེད་དུ་ང་ཚོས་རེ་བཅོལ་བྱས་པའི་མི། ང་ཚོའི་སྲོག་གི་འབྱུང་གནས་གཙོ་བོ་དཀོན་མཆོག་གིས། འདེམས་བསྐོས་མཛད་པའི་ང་ཚོའི་རྒྱལ་པོ་དེ། དེ་ཚོས་ཁོང་ལ་འཛིན་བཟུང་བྱས་པ་རེད།

²¹ཨུཛ་དང་ནི་ཨེ་དྷོམ་ཡུལ་མི་རིགས། ད་ལྟ་གོ་སྐབས་ཡོད་དུས་གད་མོ་བགད་ཅིང་དགའ་མགུར་སྤྱོད། གང་ལ་ཟེར་ན་ཁྱོད་ཚོའི་ཐོག་ཏུའང་། རྐྱེན་ངན་དྲག་པོ་ཡོང་རྒྱུ་ངེས་ལགས་སོ། ཁྱེད་ཀྱང་གོས་མེད་གཅེར་བུར་འགྱུར་བས་རྐྱེན། ངོ་ཚའི་དབང་གིས་གོམ་པ་འཁྱོར་ཞིང་འགྲུལ།

²²ཛི་ཡོན་གྱིས་ནི་རང་གི་ཉེས་སྡིག་གི། གླུ་རིན་དེ་དག་ཡོངས་སུ་འཇལ་ཟིན་པས། ད་ནི་ང་ཚོར་གཙོ་བོ་དཀོན་མཆོག་གིས། གཞན་ཡུལ་བྱེས་སུ་གནས་སྡོད་བྱེད་དགོས་པའི། གནས་སྟངས་དེ་ལ་ཡུན་རིང་འཇོག་མི་མཛད། འོན་ཀྱང་གཙོ་བོ་དཀོན་མཆོག་གིས་ཨེ་དྷོམ་ཁྱོད་ལ་ནི། སྡིག་པའི་ཆད་པ་གཏོང་གནང་མཛད་རྒྱུ་དང་། སྐྱོན་མཚང་གང་ཡོད་མངོན་པར་མཛད་རྒྱུ་ཡིན༎