Read Tibetan — པོད་སྐད་Tibetan Old Testament 2011 སྐྱོ་གླུ 5 Bible Online

སྐྱོ་གླུ 5 - Tibetan — པོད་སྐད་Tibetan Old Testament 2011 bible

སྐྱོ་གླུ 5

¹ང་ཚོའི་ཐོག་ཏུ་གནས་ཚུལ་གང་བྱུང་བར། གཙོ་བོ་ཁྱེད་ཀྱིས་ཐུགས་དྲན་གསོ་བར་མཛོད། ང་ཚོར་དམའ་འབེབ་ཇི་ལྟར་བྱུང་བ་དེར། ཉིད་ཀྱིས་དེ་ལ་ཐུགས་བསམ་བཞེས་པར་མཛོད།

²ང་ཚོའི་རྒྱུ་དངོས་ཕྱི་མིའི་ལག་ཏུ་ཐེབས། ཕྱི་རྒྱལ་བ་རྣམས་ང་ཚོའི་ནང་དུ་གནས།

³ང་ཚོའི་ཕ་རྣམས་དགྲ་བོས་བསད་པས་ན། ང་ཚོའི་མ་རྣམས་ཡུགས་མོར་བཅོས་པར་བྱས།

⁴ང་ཚོས་འཐུང་ཆུར་རིན་པ་སྤྲོད་དགོས་ཏེ། དེ་བཞིན་མེ་ཤིང་སོགས་ཀྱང་ཉོས་དགོས་སོ།

⁵ངེད་རྣམས་བོང་བུ་དང་ནི་རྔ་མོང་བཞིན། ངལ་རྩོལ་བྱས་ཏེ་ལུས་ཐང་ཆད་ནའང་། ངལ་གསོ་རྒྱབ་པའི་དབང་ཆ་ང་ཚོར་མེད།

⁶གསོན་ཕྱིར་མཁོ་བའི་ཁ་ཟས་སློང་བའི་ཆེད། ཨི་ཇིབ་དང་ཨ་སུར་ཡུལ་དུ་ཕྱིན།

⁷མེས་པོས་བསགས་པའི་སྡིག་པའི་འགྲུབ་འབྲས་སུ། ཁོ་ཚོ་མེད་ཀྱང་ད་ལྟ་ང་ཚོས་མྱོང་།

⁸བྲན་འཁོལ་མི་ཚོས་ངེད་རྣམས་ལ། དབང་འགྱུར་བྱེད་ཡོད་པ་དང། དེ་ཚོས་ལག་ནས་སུས་ཀྱང་ང་ཚོར་སྐྱབས་གྲོགས་བྱེད་མི་ཐུབ།

⁹སྲོག་གཅོད་མཁན་རྣམས་གྲོང་གསེབ་ཁུལ་དུ་འགྲུལ། ང་ཚོས་ཁ་ཟས་འཚོལ་བའི་སྐབས། རང་སྲོག་ཉེན་ཁའི་ནང་དུ་བཞག་དགོས་སོ།

¹⁰ལྟོགས་པའི་རྐྱེན་གྱིས་མེ་བཞིན་ཚ་བ་འབར། ང་ཚོའི་པགས་པ་མེ་ཐབ་བཞིན་དུ་དྲོས།

¹¹རི་བོ་ཛི་ཡོན་རང་གི་སའི་སྟེང་དུ། ང་ཚོའི་ཆུང་མ་རྣམས་ལ་དབང་ཡོད་བྱས། ཡ་ཧུ་དཱ་ཡི་གྲོང་ཚོའི་ཕྱོགས་ཀུན་ལ། ང་ཚོའི་ན་ཆུང་བུ་མོ་རྣམས་ལ་དབང་ཡོད་བྱས།

¹²ང་ཚོའི་འགོ་དཔོན་རྣམས་ལ་འཛིན་བཟུང་གིས། སྐེ་ལ་ཐག་པ་བཏགས་ནས་སྲོག་གཅོད་བྱས། དེ་བཞིན་ང་ཚོའི་མི་རྒན་རྣམས་ལ་ནི། སུས་ཀྱང་ཞེ་ས་གུས་བཀུར་མ་བྱས་སོ།

¹³ང་ཚོའི་གཞོན་ནུ་རྣམས་ལ་དབང་ཡོད་ཀྱིས། བྲན་འཁོལ་བཞིན་དུ་རང་འཐག་བསྐོར་དུ་བཅུག། ཕྲུ་གུ་རྣམས་ཀྱང་ཤིང་ཁུར་ལྗིད་པའི་རྐྱེན། ལམ་དུ་གོམ་པ་འཁྱོར་ནས་འགྲོ་བར་འགྱུར།

¹⁴ད་ནི་སྔར་བཞིན་གྲོང་གི་རྒྱལ་སྒོའི་སར། མི་རྒན་འཛོམས་ནས་སྡོད་པར་མི་བྱེད་དོ། དེ་བཞིན་ཡུལ་གྱི་གཞོན་ནུ་རྣམས་ཀྱིས་ཀྱང་། གླུ་གར་རོལ་དབྱངས་སོགས་ཀྱང་སྤངས་པར་བྱས།

¹⁵ང་ཚོའི་མི་ཚེའི་ཁྲོད་ནས་དགའ་སྐྱིད་ཡལ། ང་ཚོའི་གླུ་གར་ཞབས་གཞས་རྣམས་ཀྱི་ཚབ། སེམས་སྡུག་མྱ་ངན་སོགས་ཀྱིས་གང་བར་བྱས།

¹⁶ང་ཚོས་ང་རྒྱལ་སྤོབས་པ་བྱེད་དགོས་པའི། རྒྱུ་རྐྱེན་གནད་དོན་སོགས་ནི་གང་ཡང་མེད། ང་ཚོས་སྡིག་པ་བྱས་པའི་ཉེས་ལན་དུ། ད་ནི་ངེད་རྣམས་འཇིག་ཅིང་འཕུང་བར་བྱས།

¹⁷ང་ཆོའི་སེམས་ཤུགས་ཉམས་ཤིང་ཡིད་ཐང་ཆད། མིག་ནི་མཆིམས་གང་ཞིང་མཐོང་མི་ཐུབ།

¹⁸རི་བོ་ཛི་ཡོན་ཡོངས་སུ་སྟོངས་པས་རྐྱེན། ནགས་ཀྱི་ཁྱི་སྤྱང་རྣམས་ཕར་ཆུར་འགྲུལ།

¹⁹འོན་ཀྱང་གཙོ་བོ་དཀོན་མཆོག་ཁྱེད་ཉིད་ནི། དུས་ཡུན་གཏན་གྱི་ཆེད་དུ་མངའ་བདག་དང་། དུས་རབས་མཐའ་མེད་བར་དུ་སྲིད་སྐྱོངས་མཛད།

²⁰དུས་ཡུན་རིང་པོ་བར་དུ་ཁྱེད་ཀྱིས་ནི། ཅིའི་ཕྱིར་ང་ཚོ་དེ་བཞིན་བོར་བར་མཛད། ད་ནི་སླར་ཡང་ཁྱེད་ཀྱིས་ང་ཚོ་ལ། ནམ་ཡང་ཐུགས་དྲན་གསོ་བར་མཛད་གནང་ངམ།

²¹ཀྱེ་གཙོ་བོ་དཀོན་མཆོག་ཁྱེད་ཀྱིས་ནི། ངེད་རྣམས་ཁྱེད་ཕྱོགས་བློ་ཁ་བསྒྱུར་བར་མཛོད། ང་ཚོར་སྔར་གྱི་གཟི་བརྗིད་ཕྱིར་ལོག་མཛོད།

²²ཁྱེད་ཀྱིས་ང་ཚོར་དུས་ཡུན་གཏན་གྱི་ཆེད། བདག་འཛིན་མེད་པར་དེ་མུར་བོར་མཛད་དམ། ཁྱེད་ཀྱི་ཐུགས་ཁྲོའི་མཐའ་དང་མཚམས་མེད་དོ༎