Read Tibetan — པོད་སྐད་Tibetan Old Testament 2011 ཨི་ཛི་ཀི་ཨེལ 12 Bible Online

ཨི་ཛི་ཀི་ཨེལ 12 - Tibetan — པོད་སྐད་Tibetan Old Testament 2011 bible

ཨི་ཛི་ཀི་ཨེལ 12

¹གཙོ་བོ་དཀོན་མཆོག་གིས་ང་ལ་བཀའ་གནང་བ།

²ཀྱེ་མི་རྟག་པའི་སྐྱེ་བོ་ཁྱོད་ནི་ངོ་ལོག་པའི་མི་མང་ཁྲོད་དུ་སྡོད་བཞིན་ཡོད། དེ་ཚོ་ལ་མིག་ཡོད་ཀྱང་གང་ཡང་མི་མཐོང་བ་དང་། དེ་ཚོ་ལ་རྣ་བ་ཡོད་རུང་གང་ཡང་མི་ཐོས་སོ། གང་ལ་ཟེར་ན། དེ་དག་ངོ་ལོག་པ་ཡིན་ནོ།

³ཀྱེ་མི་རྟག་པའི་སྐྱེ་བོ་ད་ཁྱོད་ཀྱིས་སྐྱབས་བཅོལ་བ་ཞིག་ལྟར་གོས་སྒྲིལ་ནས་མཚན་མོ་མ་རན་གོང་ཐོན་ཞིག དེ་ཚོ་ཚང་མས་ཁྱོད་ཐོན་པ་དང་ཡུལ་གཞན་དུ་འགྲོ་བ་མཐོང་བར་གྱིས་ཤིག ཕལ་ཆེ་ངོ་ལོག་པ་ཚོས་ཁྱོད་ལ་དོ་སྣང་བྱེད་སྲིད་དོ།

⁴དེ་ཚོས་ཁྱོད་མཐོང་བའི་ཆེད་ཉིན་མོ་འོད་ཡོད་པའི་རིང་ལ་བཙན་བྱོལ་ཆེད་དུ་ཁྱོད་ཀྱི་གོས་སྒྲིལ་ཞིག་དང་། དེ་ནས་བཙན་བྱོལ་དུ་ཐོན་པ་ལྟ་བུ་ཁྱོད་ཕྱི་དྲོར་དེ་ཚོས་མཐོང་སར་སོང་ཞིག

⁵དེ་ཚོས་བལྟ་སྐབས་ཁྱོད་རང་གི་ཁང་པའི་རྩིག་པར་ཨི་ཁུང་ཞིག་འབིགས་ནས་ཁྱོད་ཀྱི་གོས་སྒྲིལ་དེ་འཁྱེར་ནས་དེ་ནས་ཐོན་ཞིག

⁶ཁོ་ཚོས་མཐོང་ཕྱིར་ཁྱོད་ཀྱི་གོས་སྒྲིལ་དེ་གཉའ་བར་བཀལ་ནས་ཁྱོད་གང་དུ་འགྲོ་བའི་གནས་དེམི་མཐོང་བའི་ཆེད་མིག་འགེབས་ནས་ནག་ཁུང་ནང་ཐོན་ཞིག ཁྱོད་ཀྱིས་ཇི་ལྟར་བྱེད་པ་དེ་ཨིསི་རཱཨེལ་པ་ཚོར་ཉེན་བརྡར་འགྱུར་བར་བྱེད་དོ།

⁷ངས་གཙོ་བོ་དཀོན་མཆོག་གིས་བཀའ་གནང་བ་ལྟར་གྱིས་ནས། ཉིན་དེར་སྐྱབས་བཅོལ་བ་ཞིག་ལྟར་ངས་གོས་སྒྲིལ་ནས་ཕྱི་དྲོ་དེར་མུན་པ་ཆག་སྐབས་སུ་ངས་ངའི་ལག་པས་རྩིག་པར་ཨི་ཁུང་ཞིག་འབིགས་ནས་ཕྱིར་ཐོན་པ་ཡིན། ཚང་མས་བལྟ་སྐབས་ངས་གཉའ་བར་གོས་སྒྲིལ་བཀལ་ནས་ཐོན་པ་ཡིན་ནོ།

⁸སང་ཞོག་དེར་གཙོ་བོ་དཀོན་མཆོག་གིས་ང་ལ་བཀའ་གནང་བར།

⁹ཁོང་གིས་ཀྱེ་མི་རྟག་པའི་སྐྱེ་བོ་ད་ཨིསི་རཱཨེལ་པ་ངོ་ལོག་པ་ཚོས་ཁྱོད་ཀྱིས་ཇི་ལྟར་བྱེད་བཞིན་ཡོད་པར་འདྲི་བར་བྱེད་དོ།

¹⁰དེ་ཚོ་ལ་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ལྟར་བརྗོད་ཅིག འཕྲིན་འདི་ནི་ཡེ་རུ་ཤ་ལེམ་ལ་རྒྱལ་སྲིད་སྐྱོངས་བའི་རྒྱལ་སྲས་དང་དེར་སྡོད་པའི་མི་མང་ཚང་མའི་ཆེད་དུ་ཡིན་ནོ།

¹¹དེ་ཚོ་ཁྱོད་ཀྱིས་ཇི་ལྟར་བྱས་པ་རྣམས་དེ་ཚོ་ལ་ཡོང་རྒྱུའི་སྔོན་རྟགས་ཡིན་ཞེས་སྨྲོས་ཤིག དེ་ཚོ་བཙན་བྱོལ་པ་དང་བཙོན་པར་འགྱུར་བར་བྱའོ།

¹²དེ་ཚོ་ལ་རྒྱལ་སྲིད་སྐྱོངས་མཁན་རྒྱལ་སྲས་ཀྱིས་མཚན་མོར་རང་གི་གོས་སྒྲིལ་དེ་གཉའ་བར་བཀལ་ནས་དེ་ཚོས་ཁོང་གི་ཆེད་དུ་བྲུས་པའི་ཨི་ཁུང་ནས་བྲོས་པར་བྱེད་པ་དང་། ཁོང་གིས་རང་གི་མིག་འགེབ་པ་དང་གང་དུ་འགྲོ་བཞིན་ཡོད་པ་མི་མཐོང་ངོ་།

¹³འོན་ཀྱང་ངས་རྙི་རྒྱབ་རྒྱུ་དང་ཁོ་རྙི་དེར་བཟུང་རྒྱུ་ཡིན་ནོ། དེ་ནས་ཁོ་ལ་བྷེ་བྷི་ལོན་གྱི་གྲོང་ཁྱེར་དུ་འཁྲིད་རྒྱུ་དང་། དེར་ཁོང་གིས་དེ་མ་མཐོང་བར་གྲོངས་བར་འགྱུར་རོ།

¹⁴ངས་ཕྱོགས་ཡོངས་སུ་ཁོང་གི་ཕོ་བྲང་གི་འཐུས་མི་ཚོ་དང་སློབ་སྟོན་པ་ཚོ་དང་སྐུ་སྲུང་བ་བཅས་ཁ་གཏོར་གཏོང་རྒྱུ་དང་། མི་མང་གིས་ཁོང་ཚོ་གསོད་རྒྱུར་འཚོལ་བར་བྱེད་དོ།

¹⁵ངས་དེ་ཚོ་རྒྱལ་ཁབ་གཞན་ཚོ་དང་ཕྱི་རྒྱལ་བའི་ཡུལ་ཁག་ཏུ་ཁ་གཏོར་གཏོང་རྒྱུ་དང་། དེ་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ།

¹⁶ངས་དེ་ཚོ་འགའ་ཤས་དམག་དང་མུ་གེ་དང་ནད་ཡམས་ལས་ཐར་བ་བྱ་རྒྱུ་དང་། དེ་ཚོས་རྒྱལ་ཁབ་གཞན་གྱི་ནང་ཞེན་ལོག་ཅན་གྱི་བྱ་བ་ཇི་བྱས་པར་རྟོགས་པར་འགྱུར་བ་དང་། ང་གཙོ་བོ་དཀོན་མཆོག་ཡིན་པ་ལ་ངོས་ལེན་བྱེད་པར་འགྱུར་རོ༎

¹⁷གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

¹⁸ཁོང་གིས་ཀྱེ་མི་རྟག་པའི་སྐྱེ་བོ་ཁྱོད་ཟ་བའི་སྐབས་སུ་འདར་བ་དང་འཐུང་བའི་སྐབས་སུ་འཇིགས་ནས་འདར་ཞིག

¹⁹ཡུལ་ཡོངས་སུ་ང་བླ་ན་མེད་པའི་གཙོ་བོ་དཀོན་མཆོག་གིས་ཡུལ་དེར་གནས་སྡོད་བྱ་མཁན་ཡེ་རུ་ཤ་ལེམ་གྱི་མི་མང་ཚོར་འཕྲིན་འདི་སྤྲོད་པ་དང་། དེ་ཚོའི་ཡུལ་དེ་སྟོངས་བར་བྱེད་དོ། གང་ལ་ཟེར་ན། དེར་གནས་སྡོད་བྱ་མཁན་རྣམས་ཁྲིམས་འགལ་འབའ་ཞིག་ཡིན་ནོ།

²⁰ད་ལྟ་མིས་ཁེངས་པའི་གྲོང་ཁྱེར་རྣམས་མེད་པར་བཟོ་བ་དང་ཡུལ་རྣམས་མི་མེད་ལུང་སྟོང་བཟོ་བར་བྱེད་དོ། དེ་ནས་དེ་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ༎

²¹གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

²²ཁོང་གིས་ཀྱེ་མི་རྟག་པའི་སྐྱེ་བོ་ཨིསི་རཱཨེལ་གྱི་མི་མང་ཚོས་གཏམ་དཔེ་ནི་དུས་ཚོད་འགྲོ་བ་དང་། མངོན་ཤེས་རྣམས་གང་ཡང་མ་བྱུང་ཞེས་ཡང་ཡང་སྐྱར་བཟློས་ཅི་ལ་བྱེད་དམ།

²³ད་ང་བླ་ན་མེད་པའི་གཙོ་བོ་དཀོན་མཆོག་ལ་དེའི་སྐོར་ཇི་ལྟར་ཡིན་པ་ཤོད་རྒྱུ་ཡོད་པ་དེ་ཚོ་ལ་སྨོས་ཤིག ངས་གཏམ་དཔེ་དེ་མཚམས་འཇོག་བྱ་རྒྱུ་ཡིན། དེ་ཡང་སྐྱར་ཨིསི་རཱཨེལ་དུ་སྐྱར་བཟོས་བྱེད་པར་མི་འགྱུར་རོ། དེའི་ཚབ་ལ་དེ་ཚོ་ལ་དུས་ཚོད་སླེབས་བཞིན་ཡོད་པ་དང་ལུང་བསྟན་རྣམས་སྒྲུབ་པར་འགྱུར་ཞེས་སྨྲོས་ཤིག

²⁴ཨིསི་རཱཨེལ་མི་མང་གི་ཁྲོད་དུ་ཞལ་གཟིགས་རྫུན་མ་དང་ནོར་འཁྲུལ་ཅན་གྱི་ལུང་བསྟན་ཡོང་བར་མི་འགྱུར་རོ།

²⁵ང་བླ་ན་མེད་པའི་གཙོ་བོ་དཀོན་མཆོག་གིས་དེ་ཚོར་སྨྲ་རྒྱུ་དང་ངས་ཇི་ལྟར་སྨྲས་པ་རྣམས་དེ་ཚོས་བྱེད་པར་འགྱུར། ད་ནས་དུས་འགྱངས་མི་ཡོང་། ཁྱོད་ངོ་ལོག་པ་རྣམས་ཁྱོད་ཚོའི་མི་ཚེའི་རིང་རང་ལ་ངས་ཇི་ལྟར་བྱ་རྒྱུའི་ཉེན་བརྡ་བཏང་བ་དེ་བྱ་རྒྱུ་ཡིན་ཞེས་བླ་ན་མེད་པའི་གཙོ་བོ་དཀོན་མཆོག་ངས་སྨྲས་པ་ཡིན་ནོ།

²⁶གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

²⁷ཀྱེ་མི་རྟག་པའི་སྐྱེ་བོ་ཨིསི་རཱཨེལ་པ་ཚོས་ཁྱོད་ཀྱི་མཐོང་བའི་ཞལ་གཟིགས་དང་ལུང་བསྟན་རྣམས་མ་འོངས་པའི་ཐག་རིང་པོའི་སྐོར་རེད་བསམ་གྱི་ཡོད་དོ།

²⁸དེར་བརྟེན་ང་བླ་ན་མེད་པའི་གཙོ་བོ་དཀོན་མཆོག་གིས་ཇི་ལྟར་སྨྲས་པ་དེ་ཚོར་ཤོད་ཅིག ད་དུས་འགྱངས་མི་ཡོང། ངས་ཇི་ལྟར་སྨྲས་པ་བྱེད་པར་འགྱུར་ཞེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ༎