Tibetan — པོད་སྐད་Tibetan Old Testament 2011 bible online

ཨི་ཛི་ཀི་ཨེལ 20

¹དེ་ནི་ང་ཚོའི་བཙན་བྱོལ་གྱི་ལོ་བདུན་དང་ཟླ་བ་ལྔ་པའི་ཉིན་བཅུ་པའི་སྐབས་སུ། ཨིསི་རཱཨེལ་གྱི་མི་སྡེའི་འགོ་འཁྲིད་འགའ་ཤས་ངའི་སར་གཙོ་བོ་དཀོན་མཆོག་གི་ཐུགས་དགོངས་སྐོར་གོ་བསྡུར་བྱེད་པར་ཡོང་བ་དང་། དེ་ཚོ་ངའི་མདུན་དུ་མར་བསྡད་དོ།

²དེ་ནས་གཙོ་བོ་དཀོན་མཆོག་གིས་ང་ལ་བཀའ་མོལ་གནང་བ་ནི།

³ཁོང་གིས་ཀྱེ་མི་རྟག་པའི་སྐྱེ་བོ་འདི་ཚོ་ལ་བླ་ན་མེད་པའི་གཙོ་བོ་དཀོན་མཆོག་གིས་ཇི་གསུངས་བཞིན་ཡོད་པ་སྨྲོས་ཤིག ཁྱོད་ཚོ་འདིར་ངའི་འདོད་པ་འདྲི་བར་ཡོང་བར་རེད་དམ། ང་ནི་འཚོ་བཞིན་པའི་དཀོན་མཆོག་དངོས་ཡིན་སྟབས། ངས་ཁྱོད་ཚོར་ང་ལ་སྐད་ཆ་གང་ཡང་འདྲི་རུ་འཇུག་རྒྱུ་མིན་ཞེས། ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

⁴ཀྱེ་མི་རྟག་པའི་སྐྱེ་བོ་ཁྱོད་ཀྱིས་དེ་ཚོ་ལ་ཁྲིམས་གཏོང་རྒྱུར་གྲ་སྒྲིགས་ཡོད་དམ། དེ་བཞིན་བྱོས་ཤིག། དེ་ཚོ་ལ། དེ་ཚོའི་ཕ་མེས་ཚོས་སྐྱུག་བྲོའི་བྱ་བ་བྱས་པ་རྣམས་དྲན་གསོ་བྱོས་ཤིག

⁵དེ་ཚོ་ལ་ངས་ཇི་ལྟར་སྨྲ་བཞིན་ཡོད་པ་བརྗོད་ཅིག། ངས་ཨིསི་རཱཨེལ་ལ་འདམས་པའི་སྐབས་སུ་ངས་དེ་ཚོ་ལ་ཁས་ལེན་ཞིག་གྱིས་ཡོད། ང་རང་གི་དེ་ཚོ་ལ་ཨི་ཇིབ་དུ་གསལ་སྟོན་གྱིས་ནས་ང་ནི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ཡིན་ཞེས་སྨྲས་ཡོད་དོ།

⁶སྐབས་དེར་ངས་དེ་ཚོ་ཨི་ཇིབ་ནས་འདོན་རྒྱུ་དང་དེ་ཚོར་ངས་འདམས་པའི་ཡུལ་ཡོངས་ཀྱི་ནང་ནས་ལེགས་ཤོས་དང་ཕྱུག་པོ་དང་། ས་ལུད་འཛོམས་པོ་དེར་སྣེ་འཁྲིད་བྱ་རྒྱུའི་ཁས་ལེན་གྱིས་ཡོད།

⁷ངས་དེ་ཚོ་ལ་དེ་ཚོས་བརྩེ་བའི་སྐྱུག་བྲོའི་སྐུ་འདྲ་རྣམས་དབྱུགས་དགོས་པ་དང་། ཨི་ཇིབ་ཀྱི་ལྷ་རྫུན་མ་མཉམ་དུ་རང་ཉིད་མི་གཙང་བ་མ་བཟོ་ཞེས་སྨྲས་ཡོད་དོ། གང་ལ་ཟེར་ན། ང་གཙོ་བོ་དཀོན་མཆོག་དེ་ཚོའི་དཀོན་མཆོག་ཡིན་ནོ།

⁸འོན་ཀྱང་དེ་ཚོས་ང་ལ་ངོ་རྒོལ་བྱས་ནས་ངས་བཤད་པར་ཉན་རྒྱུར་ཁས་ལེན་མ་བྱས་སོ། དེ་ཚོས་སྐྱུག་བྲོའི་སྐུ་འདྲ་ཚོ་ཕར་མ་དབྱུགས་པ་དང། ཡང་ན་ཨི་ཇིབ་པའི་ལྷ་པའི་ལྷ་རྣམས་སྤངས་མེད་དོ། དེར་ཨི་ཇིབ་དུ་ངས་དེ་ཚོ་ལ་ཁྲོ་བའི་ནུས་ཤུགས་ཀྱི་འཚོར་བ་བྱ་རྒྱུའི་གྲ་སྒྲིགས་ཡོད།

⁹འོན་ཀྱང་ངས་དེ་ལྟར་བྱས་མེད། གང་ལ་ཟེར་ན། དེ་ཚོ་གནས་སྡོད་བྱ་ཡུལ་གྱི་མི་མང་ཚོའི་ཁྲོད་དུ་ངས་ཨིསི་རཱཨེལ་པ་ཚོར་ངས་དེ་ཚོ་ཨི་ཇིབ་ནས་ཕྱིར་འདོན་གྱི་ཡིན་ཞེས་གསལ་སྒྲགས་བྱས་ཡོད་སྟབས་ངའི་མིང་ལ་དམའ་འབེབས་ཡོང་རྒྱུ་ཡིན་ནོ།

¹⁰དེར་བརྟེན་ངས་དེ་ཚོ་ཨི་ཇིབ་ནས་བཏོན་ནས་འབྲོག་སྟོང་དུ་སྣེ་འཁྲིད་བྱས་པ་ཡིན།

¹¹ངས་དེ་ཚོ་ལ་བཀའ་བསླབ་ནས་ངའི་བཀའ་ཁྲིམས་སྦྱོང་དར་སྤྲད་ཡོད་པས། དེ་ལ་ཉན་མཁན་རྣམས་ལ་སྲོག་ཐོབ་པར་འགྱུར་རོ།

¹²ང་གཙོ་བོ་དཀོན་མཆོག་དེ་ཚོ་དམ་པ་བཟོ་མཁན་ཡིན་པ་དྲན་གསོ་བྱེད་པའི་ཆེད་ངལ་གསོ་བའི་ཞག་ལ་སྲུང་བརྩི་བྱ་རྒྱུ་དེ་ང་ཚོའི་དབར་གྱི་མཐུན་སྒྲིགས་ཀྱི་རྟག་མཚན་འཇོག་ཡོད་དོ།

¹³འོན་ཀྱང་དེ་ཚོས་འབྲོག་སྟོང་ནང་ང་ལ་ངོ་རྒོལ་བྱས་ཡོད། དེ་ཚོས་ངའི་བཀའ་ཁྲིམས་དང་འགལ་བས་ངའི་བཀའ་ལ་ཁས་ལེན་གྱིས་མེད་དོ། དེ་ཚོ་ལ་སྲུང་བརྩི་བྱ་མཁན་ཚོར་སྲོག་ཐོབ་པར་འགྱུར། དེ་ཚོས་ངལ་གསོ་བའི་ཞག་བརྩི་མེད་ཆ་ཚང་བྱས་ཡོད། འབྲོག་སྟོང་དུ་ངས་དེ་ཚོ་ལ་ང་ཁྲོ་བའི་ནུས་ཤུགས་ཀྱི་འཚོར་བ་ཡོང་བ་བྱ་རྒྱུ་དང་དེ་ཚོ་མེད་པར་བཟོ་རྒྱུའི་གྲ་སྒིགས་ཡོད་དོ།

¹⁴འོན་ཀྱང་ངས་དེ་ལྟར་གྱིས་མེད་དོ། གང་ལ་ཟེར་ན། ངས་དེ་ཚོ་ལ་ཨི་ཇིབ་ནས་སྣེ་འཁྲིད་བྱས་པ་མཐོང་མཁན་གྱི་མི་རིགས་ཚོའི་ཁྲོད་དུ་ངའི་མིང་ལ་དམའ་འབེབས་ཡོང་རྒྱུ་ཡིན་ནོ།

¹⁵དེར་བརྟེན་ངས་འབྲོག་སྟོང་དུ་དེ་ཚོ་ལ་སྤྲད་པའི་ཡུལ་གྱི་ནང་ནས་ལེགས་ཤོས་དང་ཕྱུག་པོ་དང་ས་ལུད་འཛོམས་པའི་ཡུལ་དེར་མ་འཁྲིད་རྒྱུའི་དམ་བཅའ་གྱིས་པ་ཡིན་ནོ།

¹⁶དེ་ཚོས་ངའི་བཀའ་ལ་མ་བརྩི་བ་དང་ངའི་བཀའ་ཁྲིམས་དང་འགལ་བ་དང་ངལ་གསོ་བའི་ཞག་བརྩི་མེད་ཆ་ཚང་བྱས་པ་དང་། དེ་ཚོའི་སྐུ་འདྲར་མཆོད་རྒྱུར་འདམས་པ་ཡིན་སྟབས་དམ་བཅའ་དེ་གྱིས་པ་ཡིན་ནོ།

¹⁷འོན་ཀྱང་དེ་ཚོ་ལ་སྙིང་རྗེ་སྐྱེས་བྱུང་། ངས་དེ་ཚོ་ལ་འབྲོག་སྟོང་དུ་མི་གསོད་རྒྱུའི་ཐག་གཅོད་བྱས་པ་ཡིན།

¹⁸དེའི་ཚབ་ལ་དེ་ཚོའི་ཁྲོད་ཀྱི་སྐྱེ་བོ་ན་གཞོན་ཚོར་ཁྱོད་རང་ཚོའི་ཕ་མེས་ཚོས་བཟོས་པའི་ཁྲིམས་ལ་སྲུང་བརྩི་མ་བྱེད་ཅིག དེ་ཚོའི་ལུགས་སྲོལ་གྱི་རྗེས་སུ་མ་འབྲངས་ཤིག། ཁྱོད་རང་ཚོར་དེ་ཚོའི་སྐུ་འདྲས་མི་གཙང་བ་བཟོ་རུ་མ་འཇུག་ཅིག་ཅེས་ཉེན་བརྡ་བཏང་ཡོད་དོ།

¹⁹ང་ནི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ཡིན་ནོ། ངའི་བཀའ་ཁྲིམས་དང་བཀའ་ལ་ཉོན་ཞིག།

²⁰ངལ་གསོ་བའི་ཞག་དེ་བཞིན་ང་ཚོའི་དབར་བཞག་པའི་དམ་བཅའི་རྟགས་སུ་མཚོན་པ་དང་དེས་ང་གཅོ་བོ་དཀོནམ་ཆོག་ཁྱོད་ཚོའི་དཀོན་མཆོག་ཡིན་པ་ཁྱོད་ཚོ་ལ་དྲན་གསོ་བྱེད་པར་འགྱུར། དེ་རྐྱེན་ངལ་གསོ་བའི་ཞག་དམ་པར་བཞོག་ཅིག།

²¹འོན་ཀྱང་མི་རབས་དེ་ཀྱང་ང་ལ་ངོ་རྒོལ་བྱས་སོ། དེ་ཚོས་ངའི་བཀའ་ཁྲིམས་དང་འགལ་བ་དང་། སུས་ཉན་ཀྱང་སྲོག་ཐོབ་པའི་ངའི་བཀའ་ལ་སྲུང་བརྩི་གྱིས་མེད་པ་དང་། དེ་ཚོས་ངལ་གསོ་བའི་ཞག་བརྩི་མེད་བྱས་པ་དང་། ངས་འབྲོག་སྟོང་དེ་རང་ལ་ང་ཁྲོ་བའི་ནུས་ཤུགས་ཀྱིས་འཚོར་བ་ཡོང་བ་བྱ་རྒྱུ་དང་ཚང་མར་གསོད་རྒྱུར་གྲ་སྒྲིགས་ཡོད་དོ།

²²འོན་ཀྱང་ངས་དེ་ལྟར་བྱས་མེད་དོ། གང་ལ་ཟེར་ན། ངས་ཨིསི་རཱཨེལ་པ་ཚོ་ཨི་ཇིབ་ནས་འཁྲིད་པ་མཐོང་མཁན་གྱི་མི་རིགས་ཚོའི་ཁྲོད་དུ་ངའི་མིང་ལ་དམའ་འབེབས་ཡོང་རྒྱུ་ཡིན་ནོ།

²³དེར་བརྟེན་ངས་འབྲོག་སྟོང་དུ་དམ་བཅའ་གཞན་ཞིག་བཞག་པ་ཡིན། ངས་དེ་ཚོ་ལ་འཛམ་གླིང་ཡོངས་ལ་ཁ་གཏོར་རྒྱུའི་དམ་བཅའ་གྱིས་ཡོད།

²⁴ངས་དེ་ལྟར་གྱིས་དགོས་དོན་ནི་དེ་ཚོས་ངའི་བཀའ་ལ་ཁས་ལེན་མ་བྱས་པ་དང་། ངའི་བཀའ་ཁྲིམས་དང་འགལ་ཞིང་ངལ་གསོ་བའི་ཞག་བརྩི་མེད་བྱས་པ་དང་། དེ་ཚོའི་ཕ་མེས་ཚོས་ཞབས་ཞུ་བྱེད་པའི་སྐུ་འདྲ་དེ་ཚོ་རང་ལ་མཆོད་ཀྱི་ཡོད་པའི་རྐྱེན་གྱིས་ཡིན་ནོ།

²⁵དེ་ནས་ངས་དེ་ཚོ་ལ་བཟང་པོ་མེད་པའི་བཀའ་ཁྲིམས་དང་སྲོག་མི་ཐོབ་པའི་བཀའ་རྣམས་སྤྲད་པ་ཡིན།

²⁶ངས་དེ་ཚོའི་རང་གི་འབུལ་བས་དེ་ཚོ་རང་ཉིད་ལ་མི་གཙང་བ་བཟོས་བཙུག་བ་དང་། དེ་ཚོའི་རང་གི་སྔོན་སྐྱེས་ཀྱི་བུ་ཚོ་ཡང་དམར་མཆོད་འབུལ་དུ་འཇུག་གོ དེ་ནི་དེ་ཚོ་ལ་ཉེས་ཆད་དང་ང་གཙོ་བོ་དཀོན་མཆོག་ཡིན་པ་སྟོན་ཆེད་ཡིན་ནོ།

²⁷དེ་བས་ན་ཀྱེ་མི་རྟག་པའི་སྐྱེ་བོ་ཁྱོད་ཀྱིས་ཨིསི་རཱཨེལ་པ་ཚོར་ང་བླ་ན་མེད་པའི་གཙོ་བོ་དཀོན་མཆོག་གིས་ཇི་ལྟར་སྨྲ་བ་རྣམས་ཤོད་ཅིག དེ་ནི་དེ་ཚོའི་ཕ་མེས་ཚོས་དེ་ཚོའི་དམ་ཚིག་མི་གཙང་བའི་ཐོག་ནས་ང་ལ་དམའ་འབེབས་བྱས་པའི་ལམ་གཞན་པ་ཞིག་ཡིན་ནོ།

²⁸ངས་དེ་ཚོ་ལ་སྤྲོད་རྒྱུ་ཁས་ལེན་གྱིས་པའི་ཡུལ་དེར་འཁྲིད་ཡོད་དོ། དེ་ཚོས་རི་མཐོ་པོ་དང་ཤིང་སྡོང་ལྗང་ཁུ་མཐོང་སྐབས་དེ་ཚོ་ཚང་མར་དམར་མཆོད་ཕུལ་ལོ། དེ་ཚོས་སྦྱིན་སྲེག་གི་དམར་མཆོད་དང་འབུལ་བ་ལྟར་འཁྱེར་ཡོང་བའི་རྒུན་ཆང་གིས་ང་ཁྲོ་རུ་འཇུག་གོ

²⁹ངས་དེ་ཚོ་ལ་ཁྱོད་ཚོ་འགྲོ་སའི་ས་གནས་མཐོ་པོ་དེ་ཚོ་ཅི་ཡིན་ཞེས་དྲིས་པ་དང་། དེ་ནས་བཟུང་ད་ལྟ་བར་དེ་ཚོར་ས་ཆ་མཐོ་པོ་ཞེས་གྲགས་སོ།

³⁰ད་ཨིསི་རཱཨེལ་པ་ཚོར་ང་བླ་ན་མེད་པའི་གཙོ་བོ་དཀོན་མཆོག་གིས་ཇི་ལྟར་སྨྲ་བ་ཤོད་ཅིག ཁྱོད་ཚོས་ཅི་ལ་ཁྱོད་ཚོའི་ཕ་མེས་ཚོས་བྱེད་པའི་སྡིག་པ་ད་ག་རང་བྱས་ནས་དེ་ཚོའི་སྐུ་འདྲའི་རྗེས་སུ་ཅི་ལ་རྒྱུགས་པ་ཡིན་ནམ།

³¹དུས་དེ་རིང་གི་བར་ཁྱོད་ཚོས་འབུལ་བ་ད་ག་རང་འབུལ་བ་དང་མེའི་དཀྱིལ་དུ་རང་གི་ཕྲུག་གུ་ཚོ་ལ་མཆོད་པར་ཕུལ་ནས་སྐུ་འདྲ་ད་ག་རང་མཉམ་དུ་ཁྱོད་རང་མི་གཙང་བ་བཟོ་བཞིན་ཡོད། དེ་ནས་ད་དུང་ཨིསི་རཱཨེལ་པ་ཁྱོད་ཚོ་ངའི་སར་ངའི་ཐུགས་དགོངས་ཇི་ཡིན་འདྲི་བར་ཡོང་ངོ་། ངེས་གཏན་ཡོད་པ་ལྟར་ང་བླ་ན་མེད་པའི་གཙོ་བོ་དཀོན་མཆོག་འཚོ་བཞིན་པའི་དཀོན་མཆོག་ཡིན་སྟབས། ངས་ཁྱོད་ཚོར་ང་ལ་གང་ཡང་འདྲི་རུ་འཇུག་རྒྱུ་མིན་ནོ།

³²ཁྱོད་ཚོ་མི་རིགས་གཞན་ཚོ་དང་ཡུལ་གཞན་ལ་བསྡད་མཁན་ཤིང་སྡོང་དང་བྲག་ཚོར་མཆོད་མཁན་ལྟར་ཡོང་རྒྱུར་ཐག་བཅད་ཡོད། འོན་ཀྱང་དེ་ལྟར་ནམ་ཡང་མི་ཡོང་ངོ་༎

³³བདེན་པར་ང་བླ་ན་མེད་པའི་གཙོ་བོ་དཀོན་མཆོག་འཚོ་བཞིན་པའི་དཀོན་མཆོག་དངོས་ཡིན་སྟབས། ང་ཁྲོ་བའི་སྐབས་སུ་ངའི་མཐུ་སྟོབས་ཡོངས་ཀྱི་ནུས་ཤུགས་ཆེན་པོས་ངས་ཁྱོད་ཚོའི་སྟེང་དབང་བསྒྱུར་བྱེད་ཀྱི་ཡིན།

³⁴ངས་ཁྱོད་ཚོ་མཉམ་དུ་བསྡུས་ནས་ཁྱོད་ཚོ་ཁ་འཐོར་ནས་གནས་ཡུལ་ཚང་མ་ནས་ཕྱིར་འཁྲིད་སྐབས་ཁྱོད་ཚོར་ངའི་མཐུ་སྟོབས་དང་ངའི་ཁྲོ་བ་སྟོན་རྒྱུ་ཡིན་ནོ།

³⁵ངས་ཁྱོད་ཚོ་མི་རིགས་རྣམས་ཀྱི་འབྲོག་སྟོང་དུ་འཁྲིད་ནས་དེར་ཁྱོད་ཚོའི་མདུན་དུ་སྐྱོན་བརྫོད་བྱ་རྒྱུ་ཡིན་ནོ།

³⁶ངས་ཁྱོད་ཚོའི་ཕ་མེས་ཚོར་སི་ནཨེའི་འབྲོག་སྟོང་དུ་ཇི་ལྟར་སྐྱོན་བརྫོད་བྱེད་པ་ལྟར་ད་ཆ་ཁྱོད་ཚོར་སྐྱོན་བརྫོད་བྱ་རྒྱུ་ཡིན་ནོ། ཞེས་བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་ངོ་།

³⁷ངས་ཁྱོད་ཚོར་དབང་བསྒྱུར་བརྟན་པོ་བྱ་རྒྱུ་དང་། ངའི་དམ་བཅའ་ལ་བརྩི་བཀུར་ཞུ་རུ་འཇུག་རྒྱུ་ཡིན་ནོ།

³⁸ངས་ཁྱོད་ཚོའི་ཁྲོད་ནས་ངོ་ལོག་མཁན་དང་སྡིག་ཅན་ཚོ་ཕྱིར་འཁྲིད་རྒྱུ་ཡིན་ནོ། ངས་དེ་ཚོ་ད་ལྟ་ཁྱོད་ཚོ་བསྡད་པའི་ཡུལ་ཚོ་ནས་ཕྱིར་འདོན་བྱ་རྒྱུ་ཡིན་ཡང་ངས་དེ་ཚོ་ལ་ཨིསི་རཱཨེལ་ཡུལ་དུ་ལོག་འཇུག་རྒྱུ་མ་ཡིན་ནོ། དེ་ནས་ཁྱོད་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ།

³⁹བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་བར། ད་ཨིསི་རཱཨེལ་པ་ཁྱོད་ཚོ་སོང་ལ་ཁྱོད་ཚོས་འདོད་པ་ལྟར་བྱོས་ཤིག ཁྱོད་ཚོའི་སྐུ་འདྲ་ཚོའི་ཞབས་ཕྱི་ཞུས་ཤིག། འོན་ཀྱང་ངས་ཉེན་བརྡ་གཏོང་བའི་རྗེས་སུ་ཁྱོད་ཚོས་ངའི་བཀའ་ལ་ཉན་དགོས་པ་དང་། ཁྱོད་ཚོའི་སྐུ་འདྲ་ཚོར་འབུལ་བ་ཕུལ་ནས་ངའི་མིང་དམ་པར་བརྩི་མེད་བྱ་རྒྱུ་དེ་ཚོ་མཚམས་འཇོག་བྱེད་དགོས་སོ།

⁴⁰དེའི་ཡུལ་གྱི་རི་བོ་དམ་པའི་ཨིསི་རཱཨེལ་གྱི་རི་མཐོ་པོར་ཨིསི་རཱཨེལ་གྱི་མི་མང་ཁྱོད་ཚོ་ཚང་མས་ང་ལ་བསྙེན་བཀུར་ཞུ་བར་བྱེད་དོ། ང་ཁྱོད་ཚོ་མཉམ་དུ་དགའ་བ་དང་། ཁྱོད་ཚོས་ང་ལ་དམར་མཆོད་རྣམས་དང་ཁྱོད་ཚོའི་འབུལ་བ་ལེགས་ཤོས་དང་ཁྱོད་ཚོའི་དམ་པའི་འབུལ་བ་འབུལ་བའི་ངས་རེ་བ་བྱེད་དོ།

⁴¹ངས་ཁྱོད་ཚོ་ཁ་གཏོར་བའི་ཡུལ་ཚོ་ནས་ཕྱིར་འཁྲིད་པ་དང་། ཁྱོད་ཚོ་དང་མཉམ་དུ་འདུ་འཛོམས་བྱས་པའི་རྗེས་ལ་ཁྱོད་ཚོས་སྲེག་པའི་དམར་མཆོད་ལ་ངས་ངོས་ལེན་བྱེད་པ་དང་མི་རིགས་ཚོས་ང་དམ་པ་ཡིན་པ་མཐོང་བར་འགྱུར་རོ།

⁴²ངས་ཁྱོད་ཚོའི་ཕ་མེས་ཚོར་སྤྲོད་རྒྱུ་ཁས་ལེན་གྱིས་པའི་ཡུལ་ཨིསི་རཱཨེལ་དུ་ཕྱིར་འཁྲིད་སྐབས། ཁྱོད་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར།

⁴³ད་ནས་ཁྱོད་ཚོས་དམའ་འབེབས་ཅན་གྱི་བྱ་བ་གྱིས་པ་དང་། ཁྱོད་ཚོས་རང་ལ་མི་གཙང་བ་ཇི་ལྟར་བཟོས་པ་རྣམས་དྲན་པར་འགྱུར། ཁྱོད་ཚོས་ངན་པའི་བྱ་བ་གྱིས་པའི་རྐྱེན་གྱིས་རང་གིས་རང་ལ་ཞེན་ལོག་སྐྱེས་པར་འགྱུར་རོ།

⁴⁴ངས་ངའི་མཚན་ལ་སྲུང་སྐྱོབས་བྱ་རྒྱུའི་ལས་འགུལ་བྱེད་སྐབས་ཨིསི་རཱཨེལ་པ་ཁྱོད་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར། གང་ལ་ཟེར་ན། ངས་ཁྱོད་ཚོའི་སྤྱོད་ངན་དང་ངན་པའི་བྱ་སྤྱོད་ལ་དགོས་ངེས་ལྟར་བྱས་མེད་ཅེས་བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་ངོ་༎

⁴⁵གཙོ་བོ་དཀོན་མཆོག་གིས་ང་ལ་བཀའ་མོལ་གནང་བ་ནི།

⁴⁶ཀྱེ་མི་རྟག་པའི་སྐྱེ་བོ་ལྷོ་ཕྱོགས་སུ་ལྟོས་ཤིག། ལྷོ་ཕྱོགས་ལ་རྒོལ་གཏམ་དང་ལྷོ་ཕྱོགས་ཀྱི་ཤིང་ནགས་ཚོའི་ཐོག་ལུང་སྟོན་ཞིག

⁴⁷ལྷོ་ཕྱོགས་ཀྱི་ཤིང་ནག་ཚོར་ང་བླ་ན་མེད་པའི་གཙོ་བོ་དཀོན་མཆོག་གིས་ཇི་ལྟར་སྨྲ་བ་ཉོན་ཞིག་ཅེས་སྨྲོས་ཤིག ལྟོས་ཤིག། ངས་མེ་ཞིག་སྤར་རྒྱུ་དང་དེས་ཁྱོད་ཚོའི་ནང་ཡོད་པའི་ཤིང་སྡོང་ལྗང་ཁུ་དང་སྐམ་པོ་བཅས་པ་ཚང་མ་བསྲེགས་པར་བྱེད་དོ། དེ་གང་གིས་ཀྱང་གསོད་པར་མི་ནུས་སོ། དེ་ནི་ལྷོ་ནས་བྱང་དུ་འཕེལ་བ་དང་ཚང་མར་མེ་ལྕེ་དེའི་ཚ་དྲོད་ཀྱི་འཚོར་བ་ཡོང་ངོ་།

⁴⁸དེ་ཚོས་ང་གཙོ་བོ་དཀོན་མཆོག་གིས་མེ་དེ་སྤར་བ་དང་སུས་ཀྱང་དེ་གསོད་མི་ཐུབ་པ་མཐོང་བར་འགྱུར་རོ།

⁴⁹འོན་ཀྱང་ངས་འགོག་ཐབས་ཞུས་ནས། བླ་ན་མེད་པའི་གཙོ་བོ་དཀོན་མཆོག་ང་ལ་དེ་ལྟར་བྱེད་དུ་མ་འཇུག་རོགས་གནང་། ཚང་མས་ངས་གཏམ་དཔེ་ཐོག་ནས་ཤོད་ཀྱི་འདུག་ཅེས་སྐྱོན་བརྗོད་བྱེད་ཀྱི་ཡོད་དོ་ཅེས་ཞུས་སོ༎

Read Tibetan — པོད་སྐད་Tibetan Old Testament 2011 ཨི་ཛི་ཀི་ཨེལ 20 Bible Online

ཨི་ཛི་ཀི་ཨེལ 20 - Tibetan — པོད་སྐད་Tibetan Old Testament 2011 bible

ཨི་ཛི་ཀི་ཨེལ 20