Read Tibetan — པོད་སྐད་Tibetan Old Testament 2011 ཨི་ཛི་ཀི་ཨེལ 29 Bible Online

ཨི་ཛི་ཀི་ཨེལ 29 - Tibetan — པོད་སྐད་Tibetan Old Testament 2011 bible

ཨི་ཛི་ཀི་ཨེལ 29

¹ང་ཚོ་བཙན་བྱོལ་གྱི་ལོ་བཅུ་པའི་ཟླ་བ་བཅུ་པའི་ཚེས་བཅུ་གཉིས་ཀྱི་ཉིན་མོར་གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

²ཁོང་གིས་ཀྱེ་མི་རྟག་པའི་སྐྱེ་བོ་ཨི་ཇིབ་ཀྱི་རྒྱལ་པོར་ངོ་རྒོལ་བྱོས་ཤིག ཁོ་ལ་ཨི་ཇིབ་ཡུལ་ཡོངས་ལ་ཉེས་པ་ཇི་ལྟར་གཏོང་གནང་རྒྱུ་ཡིན་པ་དེ་ཤོད་ཅིག

³བླ་ན་མེད་པའི་གཙོ་བོ་དཀོན་མཆོག་གིས། ཨི་ཇིབ་ཀྱི་རྒྱལ་པོ་ལ་འདི་ལྟར་བཀའ་གནང་བ་ཤོད་ཅིག ཁྱོད་ནི་རྒྱུགས་ཆུའི་ནང་ཉལ་མཁན་གྱི་བདུད་ཆུ་སྲིན་ལྟར་ཡིན་པས། ང་ནི་ཁྱོད་ཀྱི་དགྲ་བོ་ཡིན། གཙང་པོ་ན་ཨེལ་དེ་བཞིན་ཁྱོད་ཀྱི་ཡིན་པ་དང་ཁྱོད་ཀྱིས་དེ་བཟོས་པ་ཡིན་ཞེས་སྨྲས་ཀྱི་ཡོད་དོ།

⁴ངས་ཁྱོད་ཀྱི་འགྲམ་རུས་ལ་ལྕགས་ཀྱུག་ཞིག་རྒྱབ་ནས་ཁྱོད་ཀྱི་རྒྱུགས་ཆུའི་ནང་གི་ཉ་དེ་ཁྱོད་ལ་དམ་པོར་འབྱར་བ་བྱ་རྒྱུ་ཡིན་ནོ། དེ་ནས་ངས་གཙང་པོ་ན་ཨེལ་ལས་ཉ་རྣམས་ཁྱོད་ལ་དམ་པོར་འབྱར་བ་དང་མཉམ་དུ་ཕྱིར་འདོན་བྱ་རྒྱུ་ཡིན་ནོ།

⁵ངས་ཁྱོད་དང་ཉ་དེ་ཚོ་བྱེ་ཐང་དུ་དབྱུགས་རྒྱུ་ཡིན་པ་དང། ཁྱོད་ཀྱི་ལུས་ས་ལ་ལྷུང་ཞིང་སྦེད་མཁན་མེད་པར་ལུས་པར་འགྱུར། ངས་དེ་བྱ་དང་གཅན་གཟན་ཚོའི་ཟས་སུ་སྤྲོད་རྒྱུ་ཡིན་ནོ།

⁶དེ་ནས་ཨི་ཇིབ་ཀྱི་མི་མང་རྣམས་ནས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ། གཙོ་བོ་དཀོན་མཆོག་གིས་བཀའ་གནང་བ། ཨིསི་རཱཨེལ་པ་ཚོས་ཨི་ཇིབ་པ་ཁྱོད་ཚོ་ལ་རྒྱབ་སྐྱོར་གྱི་ཆེད་བློ་བཅོལ་བྱེད་ན་ཡང་ཁྱོད་ཚོ་དབྱུག་པ་སྐྱོ་པོ་ཞིག་ལས་ལྷག་པ་མེད་དོ།

⁷དེ་ཚོས་ཁྱོད་ལ་རྙེད་སྐབས་ཁྱོད་ཆག་པ་དང་། དེ་ཚོའི་མཆན་ཁུང་དུ་ཨི་ཁུང་བིག་པ་དང་དེ་ཚོའི་རྒྱབ་ཚིག་འབུད་པར་བྱེད་དོ།

⁸དེ་ནས་ང་བླ་ན་མེད་པའི་གཙོ་བོ་དཀོན་མཆོག་གིས། ཁྱོད་ཚོར་རལ་གྲིས་འཐབ་པར་མི་གཏོང་རྒྱུ་དང་དེ་ཚོས་ཁྱོད་ཚོའི་མི་མང་དང་སེམས་ཅན་རྣམས་གསོད་པ་དང་།

⁹ཨི་ཇིབ་ཡུལ་འདི་བཞིན་སྟོང་པ་ཆུ་ཟོས་སུ་འགྱུར། དེ་ནས་ཁྱོད་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར། ཁྱོད་ཀྱི་གཙང་པོ་ན་ཨེལ་འདི་བཞིན་ཁྱོད་ཀྱི་ཡིན་པ་དང་དེ་ཁྱོད་ཀྱིས་བཟོས་པ་ཡིན་ཞེས་བརྗོད་སྟབས།

¹⁰ང་ནི་ཁྱོད་དང་ཁྱོད་ཀྱི་གཙང་པོ་ན་ཨེལ་གྱི་དགྲ་བོ་ཡིན། ངས་ཨི་ཇིབ་ཡུལ་གྱི་བྱང་ཕྱོགས་ཀྱི་མིག་དྷོལ་གྱི་གྲོང་ཁྱེར་ནས་ལྷོ་ཕྱོགས་ཨསེ་ཝན་གྱི་གྲོང་ཁྱེར་དང་ཨི་ཐི་ཨོ་པི་ཡ་པའི་ས་མཚམས་བར་ཡོངས་རྫོགས་སྟོང་པ་ཆུ་ཟོས་སུ་གཏོང་རྒྱུ་ཡིན་ནོ།

¹¹མི་དང་སེམས་ཅན་གང་ཡང་དེ་བརྒྱུད་འགྲོ་བར་མི་བྱེད་དོ། ལོ་བཞི་བཅུའི་རིང་དེ་རུ་སུ་ཡང་གནས་སྡོད་མི་བྱེད་དོ།

¹²ངས་ཨི་ཇིབ་དེ་བཞིན་འཛམ་གླིང་ནང་ལ་ཧ་ཅང་གི་ལུང་སྟོང་ཞིག་བཟོ་རྒྱུ་ཡིན་པ་དང་། ལོ་བཞི་བཅུའི་རིང་ཨི་ཇིབ་ཀྱི་གྲོང་ཁྱེར་རྣམས་གྲོང་ཁྱེར་གཞན་ལས་སྡུག་པའི་གྱང་གོག་ཏུ་གནས་པར་འགྱུར། ངས་ཨི་ཇིབ་པ་ཚོ་ལ་བཙན་བྱོལ་བ་བཟོ་རྒྱུ་ཡིན་པ་དང་། དེ་ཚོ་ཡུལ་ཚང་མར་བྲོས་འགྲོ་བ་དང་མི་རིགས་གཞན་པ་ཚོ་དང་མཉམ་དུ་བསྡད་པར་བྱེད་དོ།

¹³བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་བ་ནི། ལོ་བཞི་བཅུའི་རྗེས་སུ་ཨི་ཇིབ་པ་རྣམས་ངས་ཁ་གཏོར་བའི་ཡུལ་ནས་ཕྱིར་འཁྲིད་ཡོང་རྒྱུ་དང་།

¹⁴ངས་དེ་ཚོ་རང་གི་ཐོག་མའི་ཁང་ཁྱིམ་ཨི་ཇིབ་ཀྱི་ལྷོ་ཕྱོགས་སུ་སྡོད་འཇུག་རྒྱུ་ཡིན་པ་དང་། དེར་དེ་ཚོ་མི་རིགས་སྐྱོ་པོ་ཞིག་ཡོང་བར་འགྱུར་རོ།

¹⁵རྒྱལ་ཁབ་ཚང་མའི་ནང་ནས་སྐྱོ་ཤོས་སུ་འགྱུར་བ་དང་། དེ་ཚོས་རྒྱལ་ཁབ་གཞན་ཚོའིི་ཐོག་རྒྱལ་སྲིད་སྐྱོངས་བར་མི་བྱའོ། ངས་དེ་ཚོ་ལ་ཧ་ཅང་སྣང་ཆུང་བཟོ་རྒྱུ་དང་དེ་ཚོས་རྒྱལ་ཁབ་གཞན་སུ་ལ་ཡང་དེ་ཚོའི་མངའ་འོག་ཏུ་འགུག་པར་མི་ནུས་སོ།

¹⁶སླར་ཡང་ཨིསི་རཱཨེལ་པ་ཚོ་ནམ་ཡང་དེ་ཚོ་ལ་རོགས་རམ་ཆེད་རེ་བཅོལ་མི་བྱེད་དོ། ཨི་ཇིབ་ལ་བློ་བཅོལ་བའི་འབྲས་བུས་ཨིསི་རཱཨེལ་པ་ཚོ་ལ་རང་གི་ནོར་འཁྲུལ་ཇི་ལྟར་གྱིས་པ་དེ་འདྲེན་པར་འགྱུར། དེ་ནས་ཨིསི་རཱཨེལ་པ་ཚོས་ང་བླ་ན་མེད་པའི་གཙོ་བོ་དཀོན་མཆོག་ཡིན་པ་ཤེས་པར་འགྱུར༎

¹⁷ང་ཚོའི་བཙན་བྱོལ་གྱི་ལོ་ཉི་ཤུ་རྩ་བདུན་པའི་ཟླ་བ་དང་པོའི་ཚེས་གཅིག་ཉིན་གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

¹⁸ཁོང་གིས་ཀྱེ་མི་རྟག་པའི་སྐྱེ་བོ། བྷེ་བྷི་ལོན་གྱི་རྒྱལ་པོ་ནེ་བུ་ཀད་ནེ་ཛར་གྱིས་ཊ་ཡར་ལ་བཙན་རྒོལ་བྱེད་པ་དང་། ཁོང་གིས་རང་གི་དམག་མི་ཚོར་དོ་པོ་ལྗིད་པོ་འཁུར་བཅུག་སྟབས་དེ་ཚོའི་མགོ་ལ་སྐྲ་མེད་པར་འགྱུར་བ་དང་། དེ་ཚོའི་དཔུང་པའི་པགས་པ་བཤུས་ན་ཡང་། རྒྱལ་པོ་དང་ཁོང་གི་དམག་མི་ཚོས་དེ་ཚོའི་དཀའ་ལས་རྒྱབ་པའི་འབྲས་བུ་གང་ཡང་མ་ཐོབ་བོ།

¹⁹དེར་བརྟེན་ད་ང་བླ་ན་མེད་པའི་གཙོ་བོ་དཀོན་མཆོག་གིས་བརྗོད་རྒྱུ་འདི་ལྟར་ཡིན་ནོ། ངས་ཨི་ཇིབ་ཡུལ་དེ་རྒྱལ་པོ་ནེ་བུ་ཀད་ནེ་ཛར་ལ་སྤྲོད་རྒྱུ་ཡིན་པ་དང་། ཁོས་འཕྲོག་བཅོམ་བྱས་ནས་ཨི་ཇིབ་ཀྱི་རྒྱུ་ནོར་རྣམས་ཁོའི་དམག་མི་ཚོའི་གླ་ཆའི་ཆེད་འཁྱེར་བར་བྱེད་དོ།

²⁰ངས་ཁོ་ལ་ཨི་ཇིབ་འདི་བཞིན་ལས་ཀ་བྱེད་པའི་གླ་ཆར་སྤྲོད་རྒྱུ་ཡིན་ནོ། གང་ལ་ཟེར་ན། ཁོའི་དམག་མི་ཚོས་ངའི་ཆེད་དུ་ལས་ཀ་བྱེད་བཞིན་ཡོད་ཅེས། ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

²¹དེ་ལྟར་བྱུང་སྐབས་ངས་ཨིསི་རཱཨེལ་གྱི་མི་མང་ཚོ་ལ་སྟོགས་ཤུགས་ཆེན་པོ་བཟོ་རྒྱུ་དང་། ཨི་ཛི་ཀི་ཨེལ་ཁྱོད་ལ་དེ་ཚོའི་ཁྲོད་དུ་ཚང་མས་ཐོས་སར་སྐད་ཚ་ཤོད་དུ་འཇུག་རྒྱུ་ཡིན་པ་དང་། དེ་ནས་དེ་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར༎