Read Tibetan — པོད་སྐད་Tibetan Old Testament 2011 ཨི་ཛི་ཀི་ཨེལ 36 Bible Online

ཨི་ཛི་ཀི་ཨེལ 36 - Tibetan — པོད་སྐད་Tibetan Old Testament 2011 bible

ཨི་ཛི་ཀི་ཨེལ 36

¹གཙོ་བོ་དཀོན་མཆོག་གིས་གསུངས་སོ། ཀྱེ་མི་རྟག་པའི་སྐྱེ་བོ་ཁྱོད་ཀྱིས་ཨིསི་རཱཨེལ་གྱི་རི་བོ་ཚོར་འཕྲིན་འདི་ཉོན་ཞིག་ཞེས་སྨྲོས་ཤིག་དང།

²དེ་ཚོ་ལ་ང་བླ་ན་མེད་པའི་གཙོ་བོ་དཀོན་མཆོག་ནས་འཕྲིན་གང་ཡོད་པ་དེ་ལ་ཉོན་ཞིག་ཅེས་སྨྲོས་ཤིག་དང། ཨིསི་རཱཨེལ་གྱི་དགྲ་བོ་ཚོས་འདོད་མོས་ཀྱི་ད་ཆ་སྔོན་གྱི་རི་ཕྲན་དེ་ཚོ་ང་ཚོའི་ཡིན་ཟེར་འཕྱ་ཞིང་སྨྲས་ཡོད་དོ།

³ལུང་བསྟན་གྱིས་ནས་ང་བླ་ན་མེད་པའི་གཙོ་བོ་དཀོན་མཆོག་གི་ཇི་ལྟར་སྨྲས་པ་རྣམས་གསལ་གྲགས་བྱོས་ཤིག ཁྱིམ་མཚེས་རྒྱལ་ཁབ་ཚོས་དབང་བཟུང་བྱས་ནས་ཨིསི་རཱཨེལ་གྱི་རི་བོ་ཚོ་འཕྲོག་བཅོམ་བྱ་སྐབས་དེ་ཚོ་ཚང་མས་ཨིསི་རཱཨེལ་ལ་དམའ་འབེབས་བྱེད་ཡོད།

⁴དེར་བརྟེན་ང་བླ་ན་མེད་པའི་གཙོ་བོ་དཀོན་མཆོག་གིས། ཁྱོད་རི་བོ་དང་རི་ཕྲན་ཚོ་དང་རྒྱུག་ཆུ་ཚོ་དང་ལུང་གཤོང་ཚོ་དང་གྱང་གོག་དུ་ཕྱིན་པའི་ས་གནས་རྣམས་དང་མིས་སྤངས་པའི་གྲོང་ཁྱེར་འཕྲོག་བཅོམ་བྱས་པ་དང་། མཐའ་འཁོར་གྱི་རྒྱལ་ཁབ་ཚང་མས་དམའ་འབེབས་བྱས་ཡོད་པ་ཚོར་ངས་ཇི་ལྟར་ཤོད་རྒྱུ་ཡོད་པར་ཉོན་ཞིག

⁵ང་བླ་ན་མེད་པའི་གཙོ་བོ་དཀོན་མཆོག་གིས། ཤིན་ཏུ་ཁྲོ་བོའི་སྐབས་སུ་མཐའ་འཁོར་གྱི་མི་རིགས་ཚོ་དང་ལྷག་པར་དུ་ཨེ་དྷོམ་པའི་ཆེད་དུ་རྒྱབ་འགལ་གྱི་སྨྲས་ཡོད་པ་དང་། དེ་ཚོས་དགའ་སྤྲོ་དང་བསྙས་བཅོས་ཀྱིས་ངའི་ཡུལ་དབང་བཟུང་བྱས་པ་དང་། དེའི་རྩ་ཁ་ཚོ་ཡང་བདག་བཟུང་བྱས་ཡོད་པ་དང་།

⁶དེར་བརྟེན་ཨིསི་རཱཨེལ་གྱི་ཡུལ་ལ་ལུང་བསྟན་བྱོས་ཤིག རི་བོ་རྣམས་དང་རི་ཕྲན་རྣམས་དང་རྒྱུག་ཆུ་རྣམས་དང་ལུང་གཤོང་རྣམས་དང་བཅས་པར་ང་བླ་ན་མེད་པའི་གཙོ་བོ་དཀོན་མཆོག་གིས། ཕྲག་དོག་གིས་ཁྲོ་བར་ངས་འདི་ལྟར་ཤོད་བཞིན་ཡོད། གང་ལགས་ཟེར་ན་མི་རིགས་དེ་ཚོས་དེ་ཚོ་ལ་དམའ་འབེབས་བྱས་པ་དང་མཐོང་ཆུང་བྱས་ཡོདདོ།

⁷ང་བླ་ན་མེད་པའི་གཙོ་བོ་དཀོན་མཆོག་གིས། མཐའ་འཁོར་གྱི་མི་རིགས་ཚོར་དམའ་འབེབས་བྱ་རྒྱུའི་དམ་བཅའ་ནན་པོ་བྱ་རྒྱུ་ཡིན།

⁸འོན་ཀྱང་ཨིསི་རཱཨེལ་གྱི་རི་བོའི་སྟེང་གི་ཤིང་སྡོང་ཚོར་ངའི་ཨིསི་རཱཨེལ་གྱི་མི་མང་ཚོའི་ཆེད་དུ་སླར་ཡང་ལོ་མ་དང་ཤིང་འབྲས་སྐྱེས་བར་འགྱུར། དེ་ཚོ་མགྱོགས་པོ་ཁྱིམ་དུ་ལོག་པར་འགྱུར།

⁹ང་ནི་ཁྱོད་ཚོའི་ཕྱོགས་སུ་ཡོད་པ་དང་། ངས་ཁྱོད་ཚོའི་ས་ལ་སླར་ཡང་ཞིང་རྨོ་བ་དང་སོན་འདེབས་རྒྱུར་ངེས་བརྟེན་བྱ་རྒྱུ་ཡིན་ནོ།

¹⁰ངས་ཁྱོད་ཚོའི་མི་འབོར་འཕར་བར་བྱ་རྒྱུ་དང་། ཁྱོད་ཚོ་གྲོང་ཁྱེར་ནང་བསྡད་པ་དང་། གཞིགས་ཤུལ་ལུས་པ་རྣམས་སྐྱར་བཞེངས་བྱེད་རྒྱུ་དང་།

¹¹ངའི་མི་མང་དང་སྒོ་ཕྱུགས་ཀྱི་གྲངས་ཀ་འཕེལ་བ་བྱ་རྒྱུ་ཡིན་ནོ། ཁྱོད་ཚོ་སྔར་ལས་མང་བ་ཡོང་བ་དང་ཁྱོད་ཚོར་བུ་ཕྲུག་མང་པོ་ཡོད་པ་དང་། ངས་ཁྱོད་ཚོ་ལ་དེར་སྔར་ལྟར་སྡོད་འཇུག་རྒྱུ་དང་། ངས་ཁྱོད་ཚོ་སྔར་ལས་ལྷག་པའི་ཕུན་སུམ་ཚོགས་པ་བཟོ་རྒྱུ་ཡིན་པ་དང་། དེ་ནས་ཁྱོད་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ།

¹²ངའི་མི་མང་ཨིསི་རཱཨེལ་པ་ཁྱོད་ཚོ་སླར་ཡང་ཡུལ་དུ་སྡོད་ཕྱིར་འཁྲིད་རྒྱུ་ཡིན་པ་དང་། དེ་ནི་ཁྱོད་ཚོ་རང་ཡུལ་དུ་འགྱུར་བ་དང་། དེས་ཁྱོད་ཚོའི་བུ་ཕྲུག་རྣམས་སླར་ལྟོགས་ཤི་ཐེབས་པར་མི་འཇུག་གོ

¹³ང་བླ་ན་མེད་པའི་གཙོ་བོ་དཀོན་མཆོག་གིས་བརྗོད་རྒྱུར། མི་མང་གིས། ཡུལ་དེ་ནི་མི་ཟ་མཁན་དང་དེ་ཚོས་རྒྱལ་ཁབ་ཀྱི་བུ་ཕྲུག་རྣམས་འཕྲོག་བཅོམ་བྱས་སོང་ཟེར་བ་བདེན་པ་ཡིན་ནོ།

¹⁴འོན་ཀྱང་ད་ནས་བཟུང་ཁྱོད་ཀྱིས་མི་ཟ་མཁན་དང་ཁྱོད་ཚོའི་བུ་ཕྲུག་རྣམས་འཕྲོག་བཅོམ་བྱ་མཁན་ཞིག་ཏུ་མི་འགྱུར། ཞེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁵ད་ནས་ཡུལ་དེས་མི་རིགས་གཞན་ཚོས་སྨྲས་པར་ཉན་མི་དགོས་པ་དང་བསྙས་བཅོས་བྱེད་པར་བལྟ་མི་དགོས་སོ། ད་ནས་ཡུལ་གྱི་བུ་ཕྲུ་རྣམས་འཕྲོག་བཅོམ་མི་བྱེད་ཅེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

¹⁶གཙོ་བོ་དཀོན་མཆོག་གིས་ང་ལ་བཀའ་གནང་བ་ནི།

¹⁷ཁོང་གིས་ཀྱེ་མི་རྟག་པའི་སྐྱེ་བོ། ཨིསི་རཱཨེལ་པ་ཚོ་དེ་ཚོའི་ཡུལ་དུ་སྡོད་སྐབས། དེ་ཚོ་སྡོད་ཚུལ་དང་བྱ་ཚུལ་གྱིས་ཡུལ་དེ་མི་གཙང་བ་བཟོས་ཡོད་པ་དང་། ངས་དེ་ཚོའི་སྤྱོད་ཚུལ་དེ་བུད་མེད་ཟླ་མཚན་སྐབས་ཀྱི་ཆོ་ག་ལྟར་མི་གཙང་བར་ཆ་འཛིན་བྱ་རྒྱུ་ཡིན་ནོ།

¹⁸དེ་ཚོས་ཡུལ་དུ་སྲོག་གཅོད་གྱིས་པ་དང་། དེ་ཚོའི་སྐུ་འདྲས་དེ་ལ་མི་གཙང་བ་བཟོས་པའི་རྐྱེན་གྱིས་དེ་ཚོ་ལ་ངའི་ཁྲོ་བའི་ནུས་ཤུགས་ཀྱི་འཚོར་བ་ཡོང་དུ་འཇུག་རྒྱུ་ཡིན་ནོ།

¹⁹དེ་ཚོའི་སྡོད་ཚུལ་དང་བྱ་ཚུལ་གྱི་རྐྱེན་གྱིས་ངས་དེ་ཚོ་ལ་སྐྱོན་བརྗོད་བྱས་པ་དང་། དེ་ཚོ་ཕྱི་རྒྱལ་གྱི་རྒྱལ་ཁབ་ཡོངས་སུ་ཁ་སྟོར་གཏོང་རྒྱུ་ཡིན།

²⁰དེ་ཚོ་གང་དུ་སོང་ཡང་ངའི་མཚན་དམ་པར་དམའ་འབེབས་བྱས་ཡོད་དོ། གང་ལ་ཟེར་ན། མི་མང་ཚོས། མི་འདི་ཚོ་གཙོ་བོ་དཀོནམཆོག་གི་མི་མང་ཡིན་ན་ཡང་དེ་ཚོའི་ཁོང་གི་ཡུལ་སྤངས་དགོས་བྱུང་ངོ་ཞེས་བརྗོད་བཞིན་ཡོད་དོ།

²¹དེས་རྐྱེན་གྱི་ངའི་མཚན་དམ་པར་དོ་སྣང་བྱེད་དགོས་པ་བྱུང་ངོ་། གང་ལ་ཟེར་ན། ཨིསི་རཱཨེལ་པ་ཚོ་གང་དུ་སོང་ཡང་ངའི་མཚན་དེ་ལ་དམའ་འབེབས་བྱུང་ཡོད་དོ།

²²དེ་བས་ན་ཨིསི་རཱཨེལ་པ་ཚོ་ལ་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པའི་འཕྲིན་འདི་ཤོད་ཅིག ངས་ཇི་ལྟར་བྱ་རྒྱུ་དེ་ཨིསི་རཱཨེལ་པ་ཚོའི་ཆེད་དུ་མ་ཡིན་པ་དང་། དེ་ནི་ཁྱོད་ཚོ་གང་དུ་སོང་ཡང་ངའི་མཚན་དམ་པ་ལ་དམའ་འབེབས་བྱུང་བའི་ཆེད་དུ་ཡིན།

²³ཁྱོད་ཚོས་དེ་ཚོའི་ཁྲོད་དུ་དམའ་འབེབས་བཟོས་པའི་ངའི་མཚན་རླབས་ཆེན་གྱི་དམ་པའི་སྐོར་ངས་མི་རིགས་ཚོར་འགྲེམ་སྟོན་བྱ་སྐབས། དེ་ཚོས་ང་ནི་གཙོ་བོ་དཀོན་མཆོག་ཡིན་པ་ཤེས་པར་འགྱུར། ཞེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ། ང་ནི་དམ་པ་ཡིན་ཟེར་མི་རིགས་ཚོ་ལ་བསྟན་རྒྱུ་ངས་ཁྱོད་ཚོ་ལ་བེད་སྤྱོད་བྱ་རྒྱུ་ཡིན་ནོ།

²⁴ངས་ཁྱོད་ཚོ་མི་རིགས་དང་ལུང་པ་ཚང་མ་ནས་ལེན་ནས་ཁྱོད་ཚོའི་ཡུལ་དུ་ཕྱིར་འཁྲིད་རྒྱུ་ཡིན་ནོ།

²⁵ངས་ཁྱོད་ཚོའི་སྟེང་ཆུ་གཙང་མ་གཏོར་ནས་ཁྱོད་ཚོ་སྐུ་འདྲ་དང་ཁྱོད་ཚོ་མི་གཙང་བ་བཟོ་བ་ཚང་མ་ནས་གཙང་མ་བཟོ་རྒྱུ་ཡིན་ནོ།

²⁶ངས་ཁྱོད་ཚོ་ལ་སྙིང་གསར་པ་དང་སེམས་གསར་པ་སྤྲོད་རྒྱུ་ཡིན། ངས་ཁྱོད་ཀྱི་རྡོའི་སྙིང་གྱོང་པོ་དེ་སྟོན་ནས་ཁ་ལ་ཉན་པའི་སྙིང་ཞིག་སྤྲོད་རྒྱུ་ཡིན་ནོ།

²⁷ཁྱོད་ཚོ་ནས་ངའི་བཀའ་ཁྲིམས་རྣམས་དང་ངས་སྤྲད་པའི་བཀའ་རྣམས་སྲུང་བར་ངའི་ཐུགས་ཉིད་ཁྱོད་ཀྱི་ནང་དུ་འཇུག་རྒྱུ་ཡིན།

²⁸དེ་ནས་ངས་ཁྱོད་ཚོའི་ཕ་མེས་ཚོར་སྤྲད་པའི་ཡུལ་དུ་གནས་སྡོད་བྱེད་འཇུག་པ་དང་། ཁྱོད་ཚོ་ངའི་མི་མང་དུ་འགྱུར་བ་དང་ང་ནི་ཁྱོད་ཚོའི་དཀོན་མཆོག་དུ་འགྱུར་རྒྱུ་ཡིན།

²⁹ངས་ཁྱོད་ཚོ་མི་གཙང་བ་ཚང་མ་ནས་སྐྱོབས་པར་བྱ་བ་དང་། ཁྱོད་ཚོར་ཡང་སྐྱར་མུ་གེ་མི་འབྱུང་བའི་ཆེད་ངས་འབྲུ་ཤིན་ཏུ་འབོལ་པོ་ཡོང་བའི་བཀའ་གཏོང་བར་བྱའོ།

³⁰མུ་གེ་ཡང་སྐྱར་བྱུང་ནས་མི་རིགས་རྣམས་ཀྱི་ཁྲོད་དུ་ཁྱོད་ཚོར་དམའ་འབེབས་མི་ཡོང་བའི་ཆེད་དུ། ངས་ཁྱོད་ཀྱི་འབྲས་བུའི་སྡོང་པོ་དང་ས་ཞིང་བཅས་ཀྱི་ཐོན་སྐྱེད་སྤེལ་རྒྱུ་ཡིན་ནོ།

³¹ཁྱོད་ཀྱི་སྤྱོད་ཚུལ་ངན་པ་དང་ནོར་འཁྲུལ་གྱིས་པ་རྣམས་ཁྱོད་ཀྱིས་དྲན་པར་འགྱུར་བ་དང་། རང་གི་སྡིག་པ་དང་ལས་ངན་རྐྱེན་གྱིས་རང་ཉིད་ལ་སྐྱུག་བྲོ་བར་འགྱུར།

³²ཨིསི་རཱཨེལ། ངས་དེ་ཚོ་ཚང་མ་ཁྱོད་ཀྱི་ཆེད་དུ་བྱས་པ་མ་ཡིན་པ་དེ་ཁྱོད་ཀྱིས་ཤེས་པ་ངས་འདོད་དོ། ཁྱོད་ཀྱིས་ཇི་ལྟར་གྱིས་པ་ལ་ཁྱོད་རང་ངོ་ཚ་བ་དང་དམའ་འབེབས་ཀྱི་འཚོར་བ་ཡོང་བར་ངས་འདོད་དོ། ཅེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

³³བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་བ་ནི། ངས་ཁྱོད་ཚོའི་སྡིག་པ་ཚང་མ་ནས་གཙང་མ་བཟོས་ནས། ངས་སླར་ཡང་ཁྱོད་ཚོའི་གྲོང་ཁྱེར་དུ་སྡོད་བཅུག་པ་དང་གཞིག་རུལ་རྣམས་སྐྱར་བཟོ་བྱེད་དུ་འཇུག་རྒྱུ་ཡིན་ནོ།

³⁴སུ་ཞིག་གིས་ཁྱོད་ཚོའི་ཞིང་ཁ་བརྒྱུད་ནས་འགྲོ་མཁན་དེ་ཚོས་སྔར་ཞིང་ཁ་དེ་ཚོ་རྩ་རིང་པོ་སྐྱེས་པ་དང་ཤིང་ནགས་སུ་ཆགས་པ་མཐོང་ན་ཡང་། ངས་ཁྱོད་ཚོར་སླར་ཡང་ཞིང་ཁ་དེ་ཚོ་འདེབས་འཇུག་རྒྱུ་ཡིན་ནོ།

³⁵ཚང་མས་སྔར་ལུང་སྟོང་གི་ས་ཁུལ་འདི་བཞིན་ཇི་ལྟར་ཨེ་དྷེན་གྱི་ལྡུམ་ར་ལྟ་བུ་འགྱུར་བ་དང་། གྲོང་ཁྱེར་གཞིགས་རུལ་དང་འཕྲོག་བཅོམ་བྱས་པ་དང་གྱང་ཤུལ་ལུས་པ་རྣམས་ད་ཆ་ཇི་ལྟར་སྲུང་ཆ་བརྟེན་པོར་འགྱུར་ནས་མི་རྣམས་གནས་སྡོད་བྱེད་དམ་ཞེས་སྨྲའོ།

³⁶དེ་ནས་ཁྱིམ་མཚེའི་མི་རིགས་གསོན་པོ་གནས་པ་ཚོས། ང་གཙོ་བོ་དཀོན་མཆོག་གིས་གྲོང་ཁྱེར་གཞིགས་གོག་རྣམས་སྐྱར་བཟོ་བྱས་པ་དང་། ཕན་མེད་ཞིང་ཁ་ཚོར་སྐྱར་འདེབ་བྱས་པ་ཤེས་པར་འགྱུར། ཞེས་ང་གཙོ་བོ་དཀོན་མཆོག་གིས་དེ་ལྟར་བྱ་རྒྱུར་ཁས་ལེན་བྱས་ཡོད་པ་དང། ངས་དེ་སྒྲུབ་པར་བྱ་རྒྱུ་ཡིན་ནོ།

³⁷བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་བ་ནི། ངས་སླར་ཡང་ཨིསི་རཱཨེལ་པ་ཚོར་ང་ལ་རོགས་རམ་ཆེད་འབོད་བསྐུལ་བྱེད་འཇུག་རྒྱུ་དང་། དེ་ཚོའི་གྲངས་ནི་ལུག་གི་ཁྱུ་ལྟར་སྤེལ་བཇུག་རྒྱུ་ཡིན།

³⁸དེ་ནས་ད་ལྟའི་གྲོང་ཁྱེར་གཞིགས་གོག་ངང་ཡོད་པ་དེ་ཚོ་སྔར་ཡེ་རུ་ཤ་ལེམ་དུ་དུས་སྟོན་སྐབས་སུ། དམར་མཆོད་ཕུལ་བར་ལུག་གིས་ཁེངས་པ་ལྟར་མིས་ཁེངས་པར་འགྱུར་རོ། དེ་ནས་དེ་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་རོ༎