Read Tibetan — པོད་སྐད་Tibetan Old Testament 2011 ཨི་ཛི་ཀི་ཨེལ 5 Bible Online

ཨི་ཛི་ཀི་ཨེལ 5 - Tibetan — པོད་སྐད་Tibetan Old Testament 2011 bible

ཨི་ཛི་ཀི་ཨེལ 5

¹གཙོ་བོ་དཀོན་མཆོག་གིས་བཀའ་གནང་བ། མི་རྟག་པའི་སྐྱེ་བོ་ཁྱོད་ཀྱིས་གྲི་རྣོ་པོ་ཞིག་བླངས་ནས་ཁྱོད་ཀྱི་ཁ་སྤུ་དང་སྐྲ་བཞར་བར་བེད་སྤྱོད་བྱོས་ཤིག དེ་ནས་ཡང་སྐྱར་དེ་ཚོ་ཉ་གངལ་འདེགས་ནས་དུམ་བུ་གསུམ་དུ་ཆ་བགོས་བྱོས་ཤིག

²དུམ་བུ་གསུམ་ཆ་དེ་གྲོང་ཁྱེར་ལ་དཔུང་དམག་གི་བསྐོར་བ་རྫོགས་སྐབས་མེར་བསྲེགས་ཤིག གསུམ་ཆ་གཞན་དེ་བླངས་ནས་ཁྱོད་གྲོང་ཁྱེར་གྱི་ཕྱི་རོལ་དུ་འགྲོ་སྐབས་རང་གི་རལ་གྲིས་དུམ་བུར་བཏུབ་ཅིག དུམ་བུ་གསུམ་པ་དེ་རླུང་ལ་སྟོར་ཞིག་དང་ངའི་རལ་གྲིས་དེའི་རྗེས་དེད་བྱའོ།

³སྐྲ་ཕྲན་བུ་ཉར་ནས་ཁྱོད་ཀྱི་གོས་ཀྱིི་མཐའ་ཆགས་ནང་སྒྲིལ་ཞིག

⁴དེ་རྗེས་ཡང་སྐྱེར་དེ་ནས་ཕྲན་བུ་བླངས་ནས་འཚིག་ཏུ་འཇུག་ཅིག མེ་དེ་ནས་ཨིསི་རཱཨེལ་གྱི་རྒྱལ་ཁབ་ཡོངས་རྫོགས་ལ་ཁྱབ་འཕེལ་དུ་འགྱུར་རོ་ཅེས་སོ།

⁵བླ་ན་མེད་པའི་གཙོ་བོ་དཀོན་མཆོག་གིས་བཀའ་གནང་བར། ཡེ་རུ་ཤ་ལེམ་ལ་ལྟོས་ཤིག། ངས་དེ་འཛམ་གླིང་གི་དཀྱིལ་དུ་བཞག་པ་དང་དེའི་མཐའ་འཁོར་ཡོངས་སུ་རྒྱལ་ཁབ་གཞན་ཚོ་བཞག་ཡོད་དོ།

⁶འོན་ཀྱང་ཡེ་རུ་ཤ་ལེམ་གྱི་ང་ལ་ངོ་ལོག་བྱས་པ་དང་དེ་ནི་རྒྱལ་ཁབ་གཞན་ལས་སྡུག་རྩུབ་ཆེ་བ་དང་དེའི་མཐའ་འཁོར་གྱི་ཡུལ་གཞན་ཚོ་ལས་བཀའ་ལ་མི་ཉན་མཁན་ཞིག་གསལ་སྟོན་བྱས་ཡོད། ཡེ་རུ་ཤ་ལེམ་གྱིས་ངའི་བཀའ་ལ་ཁས་ལེན་མ་བྱས་པ་དང་ངའི་བཀའ་ཁྲིམས་སྲུང་རྒྱུར་ངོས་ལེན་བྱས་མེད་དོ།

⁷ད་ཡེ་རུ་ཤ་ལེམ་ཁྱོད་ང་བླ་ན་མེད་པའི་གཙོ་བོ་དཀོན་མཆོག་གིས་ཇི་ལྟར་སྨྲས་པར་ཉོན་ཞིག། ངའི་བཀའ་ཁྲིམས་ལ་མི་ཉན་པ་དང་ངའི་བཀའ་ལ་མ་སྲུང་བའི་རྐྱེན་གྱིས་ཁྱོད་ཀྱི་མཐའ་འཁོར་གྱི་རྒྱལ་ཁབ་ཚོ་ལས་ལྷག་པའི་དཀའ་ངལ་ཁྱོད་ལ་ཡོང་བ་ཡོད། ཁྱོད་ཚོས་མི་རིགས་གཞན་གྱི་ལུགས་སྲོལ་གྱི་རྗེས་སུ་འཇུག་ཡོད་པས།

⁸དེར་བརྟེན་ང་བླ་ན་མེད་པའི་གཙོ་བོ་དཀོན་མཆོག་གིས་ཁྱོད་ཚོ་ནི་ངའི་དགྲ་བོ་ཡིན་ཞེས་བརྗོད་རྒྱུ་ཡིན། ངས་མི་རིགས་ཚང་མས་མཐོང་སར་ཁྱོད་ཚོར་ཁྲིམས་གཅོད་གཏོང་རྒྱུ་ཡིན་ནོ།

⁹ཁྱོད་ཚོས་གང་བྱས་པ་ཚང་མར་ང་ཞེན་པ་ལོག་ཡོད་པ་དང་། དེ་རྐྱེན་གྱིས་ངས་སྔར་ནམ་ཡང་མ་བཏང་བ་དང་ཡངསྐྱར་ནམ་ཡང་མི་གཏོང་བའི་ཆད་པ་དེ་ཡེ་རུ་ཤ་ལེམ་ཁྱོད་ལ་གཏོང་རྒྱུ་ཡིན་ནོ།

¹⁰དེའི་འབྲས་བུར་ཡེ་རུ་ཤ་ལེམ་གྱི་ཕ་མ་ཚོས་རང་གི་ཕྲུ་གུ་ཟ་བ་དང་ཕྲུ་གུ་ཚོས་རང་གི་ཕ་མ་ཟ་བར་བྱེད་པ་དང་། ངས་ཁྱོད་ལ་ཉེས་ཆད་གཏོང་རྒྱུ་དང་སུ་ཡང་གསོན་པོར་ལྷག་པ་དེ་ས་ཕྱོགས་ཡོངས་སུ་ཁ་སྟོར་རྒྱུ་ཡིན་ནོ།

¹¹དེར་བརྟེན་ང་འཚོ་བཞིན་པའི་དཀོན་མཆོག་ཡིན་པའི་རྐྱེན་གྱིས་བླ་ན་མེད་པའི་གཙོ་བོ་དཀོན་མཆོག་གི་བཀའ་ནི་ཁྱོད་ཚོས་ངན་ལས་དང་སྐྱུག་བྲོ་བའི་བྱ་སྤྱོད་ཀྱིས་ངའི་མཆོད་ཁང་མི་གཙང་བ་བཟོས་ཡོད་སྟབས་ངས་སྙིང་རྗེ་མེད་པར་ཁྱོད་ཚོ་གསོད་རྒྱུ་ཡིན་ནོ།

¹²ཁྱོད་ཚོ་གསུམ་ཆ་གཅིག་ལ་ནད་དང་ལྟོགས་སྐོམ་གྱིས་གྲོང་ཁྱེར་ནང་འཆི་བར་འགྱུར་བ་དང་། གསུམ་ཆ་གཅིག་ལ་གྲོང་ཁྱེར་གྱི་ཕྱི་རོལ་དུ་རལ་གྲིས་གསོད་པར་འགྱུར་བ་དང་། གསུམ་ཆ་མཐའ་མ་དེ་ལ་ངས་རླུང་ལ་སྟོར་བ་དང་རལ་གྲིས་དེ་ཚོའི་རྗེས་དེད་བྱ་རྒྱུ་ཡིན་ནོ།

¹³ཁྱོད་ལ་ངའི་འདོད་པ་མ་ཚིམས་བར་ངའི་ཁྲོ་བ་དང་ཞེ་སྡང་གི་ནུས་ཤུགས་ཡོངས་ཛོགས་ཧ་གོ་བ་ཡོང་བར་འགྱུར། འདི་ལྟར་འབྱུང་སྐབས་ང་གཙོ་བོ་དཀོན་མཆོག་གིས་ཁྱོད་ཚོར་སྨྲས་པར་ཁྱོད་ཚོ་ལ་ཡིད་ཆེས་ཡོང་བར་འགྱུར་རོ། གང་ལ་ཟེར་ན། ཁྱོད་ཚོའི་དམ་ཚིག་མེད་པར་ང་ཤིན་ཏུ་ཁྲོ་བ་ཡིན་ནོ།

¹⁴ཁྱོད་ཚོའི་མཐའ་འཁོར་གྱི་མི་རིགས་ཚོའི་བརྒྱུད་ནས་འགྲོ་མཁན་ཚང་མས་ཁྱོད་ཚོར་མཐོང་ཆུང་བྱེད་པ་དང་། ཁྱོད་ཚོ་ལས་ཐག་རིང་གནས་པར་བྱེད་དོ།

¹⁵ང་ཁྲོ་ཞིང་འཇིགས་སྐྲག་ཅན་དུ་འགྱུར་ནས་ཁྱོད་ཚོར་ཆད་པ་གཏོང་སྐབས་ཁྱོད་ཚོའི་ཉེ་འཁོར་གྱི་མི་རིགས་རྣམས་ཤིན་ཏུ་སྐྲག་པར་འགྱུར་རོ། དེ་ཚོས་ཁྱོད་ཚོར་ཞེན་ལོག་གི་རྣམ་པས་བལྟ་བ་དང་ཁྱོད་ཚོར་ཁྱད་གསོད་བྱེད་དོ།

¹⁶ངས་ཁྱོད་ཚོའི་ཟ་ཆའི་འབྱུང་ཁུངས་མཚམས་འཇོག་བྱས་ནས་ཁྱོད་ཚོ་ལྟོགས་ཤི་རྒྱབ་ཏུ་འཇུག་རྒྱུ་ཡིན། ཁྱོད་ཚོ་མེད་པར་བཟོ་བར་མདའ་རྣོ་པོས་ཁྱོད་ཚོར་རྒྱབ་པ་ལྟར་ཁྱོད་ཚོར་ལྟོགས་སྐོམ་དང་ན་ཟུག་གི་འཚོར་བ་ཡོང་ངོ་།

¹⁷ངས་ཁྱོད་ཚོའི་བུ་ཕྲུག་གསོད་པར་ལྟོགས་སྐོམ་དང་གཅན་གཟན་དྲག་པོ་གཏོང་རྒྱུ་དང་། ཁྱོད་ཚོ་གསོད་པར་ནད་དང་ཟིང་འཁྲུགས་དང་དམག་གཏོང་རྒྱུ་ཡིན་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎