Tibetan — པོད་སྐད་Tibetan Old Testament 2011 bible online

དྷ་ནི་ཨེལ 11

¹ཕོ་ཉ་མཨེ་ཀལ་དེའི་ལས་འགན་ནི་ང་ལ་སྐྱབས་གྲོགས་དང་སྲུང་སྐྱོབ་མཛད་རྒྱུ་ཡིན་ཅིང་།

²ད་ངས་ཁྱོད་ལ་གང་ལབ་རྒྱུ་ཡིན་པ་དེ་ནི་བདེན་པ་ཡིན་ནོ༎ ཕོ་ཉ་དེས། པར་སི་ཡའི་ཐོག་ཏུ་རྒྱལ་པོ་གསུམ་གྱིས་དབང་འཛིན་བྱེད་རྒྱུ་དང་། དེ་རྗེས་རྒྱལ་པོ་བཞི་པ་ཞིག་བྱུང་ཞིང་། དེ་ནི་རྒྱལ་པོ་གཞན་རྣམས་ལས་ལྷག་པར་ནོར་ཕྱུག་ལྡན་པ་ཞིག་བྱུང་ཞིང་། དེའི་སྟོབས་དང་ལོངས་སྤྱོད་ཤིན་ཏུ་རྒྱས་པའི་སྐབས་སུ་གྷིརིསིའི་རྒྱལ་ཁབ་ལ་འགྲན་བསྡུར་དང་ཤེད་ཚད་བྱེད་པར་འགྱུར།

³དེ་ནས་རྒྱལ་པོ་རླབས་ཆེན་ཞིག་བྱུང་ཞིང་། དེས་རྒྱལ་ཁམས་ཆེན་པོ་ཞིག་ལ་དབང་འཛིན་བྱེད་དེ། སུ་ལའང་མ་བསྟུན་པར་རང་དགར་སྤྱོད་མོད།

⁴འོན་ཀྱང་ཁོའི་དབང་ཐང་ཤིན་ཏུ་རྒྱས་པའི་སྐབས་སུ་ཁོའི་རྒྱལ་ཁམས་དེ་ནི་དུམ་བུར་ཆག་སྟེ་རྒྱལ་ཕྲན་བཞི་རུ་ཆ་བགོས་འཐབ་རྒྱུ་ཡིན་པ་མ་ཟད། རྒྱལ་པོ་དེའི་ཚབ་ལ་རང་གི་རིགས་བརྒྱུད་ནས་མིན་པའི་རྒྱལ་པོ་གཞན་རྣམས་ཀྱིས་སྲིད་སྐྱོང་བྱེད་རྒྱུ། འོན་ཀྱང་དེ་ཚོ་ནི་སྔར་གྱི་རྒྱལ་པོ་དེ་དང་འདྲ་བའི་མངའ་ཐང་ལྡན་པར་མི་འགྱུར་རོ།

⁵ཨི་ཇིབ་ཀྱི་རྒྱལ་པོ་སྟོབས་ཆེན་ཡོང་རྒྱུ་དང་། ཁོའི་དམག་དཔོན་ཁོངས་ནས་གཅིག་ནི་དེ་ལས་ཀྱང་མངའ་ཐང་ཆེ་བར་འགྱུར་ཏེ། རྒྱལ་ཁམས་ཆེན་པོ་ཞིག་གི་ཐོག་ཏུ་སྲིད་སྐྱོང་བྱེད་པར་འགྱུར།

⁶དེ་ནས་ལོ་ཤས་རྗེས་སུ་ཨི་ཇིབ་ཀྱི་རྒྱལ་པོས་སི་རི་ཡའི་རྒྱལ་པོ་དང་མཉམ་དུ་མཐུན་ལམ་བྱས་ཏེ། དེ་ལ་རང་གི་བུ་མོ་མནའ་མར་གཏོང་རྒྱུ་ཡིན་མོད། འོན་ཀྱང་མཐུན་ལམ་དེ་ནི་ཡུན་རིང་མ་གནས་པར་སྲས་མོ་དེ་དང་མོའི་བཟའ་ཟླ་དང་མོའི་ཕྲུག་གུ་དང་། དེ་བཞིན་མོ་དང་མཉམ་དུ་ཕྱིན་པའི་འཁོར་གཡོག་དང་བཅས་པ་གསོད་པར་འགྱུར།

⁷དེ་རྗེས་ཡུན་རིང་མ་ལོན་པར་མོའི་གཉེན་མཚན་ཞིག་རྒྱལ་པོར་འཁོད་རྒྱུ་དང་། སི་རི་ཡའི་རྒྱལ་པོའི་དམག་དཔུང་ལ་ཕར་རྒོལ་བྱས་ཏེ། དེ་ཚོའི་འཛིང་ར་ནང་འཛུལ་ནས་དེ་ཚོ་འཕམ་པར་བྱེད་རྒྱུ་དང་།

⁸ཁོས་དེ་ཚོའི་ལྷ་རྣམས་ཀྱི་འདྲ་སྐུ་དང་དེ་ཚོར་བསློ་འབུལ་བྱས་པའི་གསེར་དང་དངུལ་གྱི་དངོས་རིགས་མང་པོ་ཞིག་ཨི་ཇིབ་དུ་འཁྱེར་འགྲོ་རྒྱུ་ཡིན་པ་དང་། ལོ་འགའ་ཤས་ཞི་བདེར་གནས་པའི་རྗེས་སུ།

⁹སི་རི་ཡའི་རྒྱལ་པོས་ཨི་ཇིབ་དུ་བཙན་གནོན་བྱེད་མོད། འོན་ཀྱང་ཕྱི་ནུར་རྒྱབ་དགོས་པར་འགྱུར་རོ།

¹⁰སི་རི་ཡའི་རྒྱལ་པོའི་སྲས་རྣམས་ཀྱིས་དམག་དཔུང་ཆེན་པོ་ཞིག་བཀོང་ནས་དམག་གི་གོ་སྒྲིགས་བྱེད་རྒྱུ་ཡིན་པ་དང་། རྒྱལ་སྲས་ཚོའི་ཁོངས་ནས་གཅིག་གིས་དགྲ་བོའི་འཛིང་ར་ཆུ་ལོག་རྒྱུགས་པ་བཞིན་དུ་འཐབ་རྒོལ་བྱེད་པར་འགྱུར།

¹¹ཨི་ཇིབ་ཀྱི་རྒྱལ་པོ་ཧ་ཅང་ཁྲོས་ཏེ་སི་རི་ཡའི་རྒྱལ་པོ་དང་དམག་འཐབ་བྱེད་དེ། ཁོང་གི་དམག་ཚོགས་ཆེན་པོ་དེ་འཛིན་བཟུང་བྱེད་པར་འགྱུར།

¹²ཁོས་དམག་མི་མང་པོ་བསད་ནས་རྒྱལ་ཁ་ཐོབ་པ་དེ་ལ་སྤོབས་པ་བྱས་ནའང་། ཁོ་ལ་མུ་མཐུད་ཀྱིས་རྒྱལ་ཁ་ཐོབ་པར་མི་འགྱུར་རོ།

¹³སི་རི་ཡའི་རྒྱལ་པོ་ཕྱིར་ལོག་བྱས་ཏེ་སྔོན་ལས་ལྷག་པའི་དམག་ཚོགས་ཆེན་པོ་ཞིག་བསྡུ་བཀོང་བྱེད་རྒྱུ་ཡིན་པ་དང་། དུས་ལ་བབས་སྐབས་རྒྱལ་པོ་དེས་དམག་ཚོགས་ཆེ་ལ་གོ་མཚོན་ལེགས་སྒྲིགས་བྱས་པའི་དཔུང་ཚོགས་ཤིག་འཁྲིད་ནས་ཕྱིར་ལོག་བྱེད་པར་འགྱུར།

¹⁴དེ་ནས་མི་མང་པོས་ཨི་ཇིབ་ཀྱི་རྒྱལ་པོར་ངོ་ལོག་བྱེད་རྒྱུ་ཡིན་པ་དང་། དྷ་ནི་ཨེལ་ཁྱོད་ཀྱི་མི་རིགས་ཁོངས་ནས་མི་དྲག་ཤུལ་ཆེན་པོ་འགའ་ཤས་ཀྱིས་ཞལ་གཟིགས་ཤིག་མཐོང་བའི་རྐྱེན་གྱིས་ངོ་རྒོལ་བྱེད་རྒྱུ་ཡིན་ནོ། འོན་ཀྱང་དེ་ཚོ་འཕམ་པར་འགྱུར་རོ།

¹⁵དེ་ནས་སི་རི་ཡའི་རྒྱལ་པོས་ལྕགས་རིས་བསྐོར་བའི་གྲོང་ཁྱེར་ཞིག་རང་གི་དམག་མིས་མཐའ་བསྐོར་ནས་དབང་སྒྱུར་བྱེད་སྐབས། ཨི་ཇིབ་ཀྱི་དམག་མི་ཚོས་མུ་མཐུད་ཀྱིས་ཕར་རྒོལ་བྱེད་མི་ཐུབ་པ་མ་ཟད། ཁོ་ཚོའི་དམག་མི་གྲགས་ཤོས་དེ་ཚོའང་ནུས་ཤུགས་ཉམས་པར་འགྱུར་རོ།

¹⁶སི་རི་ཡ་པ་བཙན་འཇུལ་བྱེད་མཁན་དེས་ཁོ་ཚོར་རང་གི་འདོད་པ་གང་ཡོད་བྱེད་པས། དེར་སུས་ཀྱང་ངོ་རྒོལ་བྱེད་མཁན་མེད་པར། ཞལ་བཞེས་གནང་བའི་ཡུལ་དུ་ལངས་ནས་དེ་ནི་རང་གི་དབང་དུ་བསྡུ་བར་འགྱུར།

¹⁷སི་རི་ཡའི་རྒྱལ་པོས་རང་གི་དཔུང་དམག་ཚང་མ་བེད་སྤྱོད་བྱས་ཏེ། དམག་འཐབ་འགྲུལ་བཞུད་ཤིག་བརྩམ་ཞིང་། རང་གི་དགྲ་བོའི་རྒྱལ་ཁམས་དེ་མེད་པར་བཟོས་ཕྱིར་མཐུན་སྒྲིག་བྱེད་ཚུལ་གྱིས། དེ་ལ་རང་གི་བུ་མོ་མནའ་མར་བཏང་བ་ཡིན་ནའང་། ཁོའི་འཆར་གཞི་དེ་ལ་ལམ་འགྲོ་ཡོང་བར་མི་འགྱུར་རོ།

¹⁸དེ་རྗེས་ཁོས་མཚོ་འགྲམ་གྱི་མི་རིགས་དེ་ཚོའི་ཐོག་ཏུ་དམག་འཐབ་བྱས་ཏེ། དེ་ཚོ་མང་ཆེ་བ་ཞིག་རང་དབང་དུ་བསྡུ་རྒྱུ་ཡིན་མོད། འོན་ཀྱང་ཕྱི་རྒྱལ་བའི་དཔོན་པོ་ཞིག་གིས་ཁོ་འཕམ་དུ་འཇུག་སྟེ། ཁོའི་ང་རྒྱལ་དེ་འཇོམས་པར་བྱེད་རྒྱུ་དང་། ངས་པར་དུ་སི་རི་ཡའི་རྒྱལ་པོའི་ང་རྒྱལ་ཁོའི་རང་གི་ཐོག་ཏུ་བླུགས་པར་འགྱུར།

¹⁹དེ་ནས་རྒྱལ་པོ་རང་ཡུལ་དུ་ཡོད་པའི་མཁར་རྫོང་ཁག་ཏུ་ཕྱིར་ལོག་བྱེད་རྒྱུ་ཡིན་མོད། འོན་ཀྱང་ཁོ་ནི་འཕམ་ཞིང་མེད་པར་འགྲོ་རྒྱུ་ཡིན་ནོ།

²⁰ཁོང་གི་རྗེས་སུ་རྒྱལ་པོ་གཞན་ཞིག་ཡོང་རྒྱུ་དང་། དེས་ཡུལ་གྱི་དཔལ་འབྱོར་གོང་འཕེལ་གཏོང་ཕྱིར། དཔྱ་ཁྲལ་བསྡུས་ཏེ་མི་མང་ལ་མནར་གཅོད་གཏོང་ཕྱིར་དཔོན་པོ་ཞིག་གཏོང་རྒྱུ་ཡིན་པ་དང་། རིང་མིན་རྗེས་སུ་རྒྱལ་པོ་དེ་བསད་རྒྱུ་ཡིན། འོན་ཀྱང་དེ་ནི་མངོན་གསལ་དུའམ་དམག་སར་བསད་པར་མི་འགྱུར་རོ༎

²¹ཕོ་ཉས་དོན་འགྲེལ་བྱེད་ཅིང་། སི་རི་ཡའི་རྒྱལ་པོ་རྗེས་མ་དེ་ནི་མི་ངན་པ་ཞིག་ཡོང་རྒྱུ་ཡིན་པ་དང་། མི་དེ་རྒྱལ་པོ་འོས་པ་ཞིག་མེད་བཞིན་དུ། བློ་བུར་དུ་ཡོང་ནས་གཡོ་ཐབས་བྱས་ཏེ་རྒྱལ་སྲིད་རང་གི་ལག་ཏུ་བླངས་པར་འགྱུར།

²²ཁོ་ལ་ངོ་རྒོལ་བྱེད་མཁན་དཀོན་མཆོག་གི་བླ་ཆེན་དེ་ཡིན་ནའང་བསད་དེ་མིང་ཤུལ་ཙམ་ཡང་མེད་པར་བྱེད་རྒྱུ་ཡིན་པ་དང་།

²³དེས་ཆིངས་སྒྲིག་བྱེད་པའི་སྒོ་ནས་མི་རིགས་གཞན་ཚོ་ལ་མགོ་བསྐོར་གཏོང་བ་དང་། རྒྱལ་ཁབ་ཆུང་ངུ་ཞིག་གི་ཐོག་ཏུ་སྲིད་སྐྱོང་བྱེད་པ་ཡིན་ནའང་། ཁོའི་མངའ་ཐང་ནི་ཇེ་ཆེར་འགྲོ་བར་འགྱུར།

²⁴ཁོས་མངའ་སྡེ་ཕྱུག་པོ་ཞིག་གི་ཐོག་ཏུ་སྔོན་ནས་ཟོན་བརྡ་མ་བྱས་པར་བློ་བུར་དུ་དབང་གནོན་བྱེད་རྒྱུ་ཡིན་ཏེ། ཁོའི་ཕ་མེས་རྣམས་ཀྱིས་དེ་སྔ་བྱས་མ་མྱོང་བའི་ལས་རྣམས་བྱེད་པར་འགྱུར། དེ་ནས་ཁོས་དམག་གི་སྐབས་སུ་བཅོམ་པའི་དངོས་རྫས་དང་ས་ཁང་རྣམས་རང་གི་རྗེས་འཇུག་རྣམས་ལ་ཆ་བགོས་བྱེད་རྒྱུ་དང་། ཁོས་མཁར་རྫོང་ཁག་ཏུ་འཐབ་འཛིང་བྱེད་པའི་འཆར་གཞི་གཏིང་མོད། འོན་ཀྱང་ཁོའི་དུས་ཀྱི་མཐའ་མ་དེ་རན་པར་འགྱུར་རོ།

²⁵ཁོས་ཨི་ཇིབ་ཀྱི་རྒྱལ་པོའི་ཐོག་ཏུ་འཐབ་རྒོལ་བྱེད་ཕྱིར་བློ་སྟོབས་ཆེན་པོས་དམག་དཔུང་ཤུགས་ཆེ་ཞིག་གོ་སྒྲིགས་བྱེད་པར་འགྱུར། དེར་གདོང་ལེན་བྱེད་ཕྱིར་ཨི་ཇིབ་ཀྱི་རྒྱལ་པོས་དམག་དཔུང་སྟོབས་ཆེན་ཞིག་གྲ་སྒྲིགས་བྱེད་རྒྱུ་ཡིན་མོད། འོན་ཀྱང་རྒྱལ་པོ་དེ་ནི་གཡོ་ཐབས་ཀྱི་སྒོ་ནས་འཕམ་པར་འགྱུར།

²⁶ཁོས་བློས་འཁེལ་བའི་གྲོས་དཔོན་ཚོས་ཁོ་ལ་འཇིག་པར་བྱེད་རྒྱུ་དང་། ཁོའི་དམག་མིའི་ཁ་གྲངས་མང་པོ་ཞིག་བསད་དེ་དམག་དཔུང་དང་བཅས་པ་རྩ་མེད་བཟོ་བར་འགྱུར།

²⁷དེ་ནས་རྒྱལ་པོ་གཉིས་ཀ་ལྕོག་རྩེ་གཅིག་གི་སྟེང་དུ་ཁ་ཟས་ཟ་ནའང་། དེ་ཚོས་བསམ་ཚུལ་ངན་པ་འཁྱེར་བས། ཕན་ཚུན་གཅིག་གིས་གཅིག་ལ་རྫུན་གཏམ་བཤད་པར་འགྱུར། འོན་ཀྱང་ཁོ་ཚོས་འདོད་པ་བཞིན་དུ་འགྲུབ་པར་མི་འགྱུར་རོ། གང་ལ་ཟེར་ན། དེའི་དུས་དེ་སླེབས་མེད་པ་ཡིན་པས་ཕྱིར་རོ།

²⁸སི་རི་ཡའི་རྒྱལ་པོ་དེ་ནི་རང་གིས་འཕྲོག་བཅོམ་བྱས་པའི་རྒྱུ་དངོས་ཚང་མ་འཁྱེར་ཡོང་ནས། དཀོན་མཆོག་གི་མི་འབངས་རྣམས་ཀྱི་ཆོས་དེ་རྩ་མེད་བཟོ་རྒྱུའི་བློ་ཐག་བཅད་དེ་ཡོང་རྒྱུ་མ་ཟད། ཁོས་རང་གི་འདོད་པ་གང་ཡོད་བྱས་ཟིན་པའི་རྗེས་སུ་རང་ཡུལ་དུ་ཕྱིར་ལོག་བྱེད་པར་འགྱུར།

²⁹རྗེས་སུ་ཁོས་ཨི་ཇིབ་ཀྱི་ཐོག་ཏུ་སླར་ཡང་འཐབ་རྒོལ་བྱེད་ནའང་། ད་ལན་གྱི་གནས་ཚུལ་དེ་ནི་དུས་རྒྱུན་དང་མི་འདྲ་བ་འགྱུར་རྒྱུ་ཡིན།

³⁰རོམ་པ་རྣམས་མཚོ་ཐོག་ནས་ཡོང་སྟེ་ཁོའི་ཐོག་ཏུ་དམག་འཐབ་བྱེད་པས་ཁོ་འཇིགས་པར་འགྱུར། དེ་ནས་ཁོ་ཁྲོ་བཞིན་ཕྱིར་ལོག་བྱེད་དེ། དཀོན་མཆོག་གི་འབངས་རྣམས་ཀྱི་ཆོས་དེ་རྩ་མེད་གཏོང་ཐབས་བྱེད་རྒྱུ་དང། ཁོས་ཆོས་དེ་ལ་དད་ལོག་བྱེད་མཁན་ཚོའི་སློབ་སྟོན་ལ་ཉན་པར་འགྱུར།

³¹ཁོའི་དམག་མི་འགའ་ཤས་ཀྱིས་མཆོད་ཁང་བཙོག་པ་བཟོ་བ་དང་། ཉིན་རེའི་དམར་མཆོད་དེ་ཚོ་འཚམས་འཇོག་བྱེད་དེ། དེར་འཇིག་པར་བྱེད་པ་ཤིན་ཏུ་འཇིགས་སུ་རུང་བ་དེ་འཇོགས་པར་འགྱུར།

³²རྒྱལ་པོས་བསླུ་ཁྲིད་བྱེད་དེ་ཆོས་ལ་དད་ལོག་བྱེད་མཁན་ཚོའི་རྒྱབ་སྐྱོར་ཐོབ་ནའང་། དཀོན་མཆོག་ལ་དད་མོས་ཞུ་མཁན་ཚོས་དེ་ལ་གདོང་ལེན་གྱིས་འཐབ་རྒོལ་བྱེད་པར་འགྱུར།

³³མི་མང་གི་བློ་གྲོས་དང་ལྡན་པའི་འགོ་ཁྲིད་ཚོས་གཞན་མང་པོ་ཚོར་སློབ་སྟོན་བྱེད་རྒྱུ་དང་། འོན་ཀྱང་གནས་སྐབས་རིང་དུ་ཁོ་ཚོ་འགའ་ཤས་དམག་སར་བསད་པའམ་མེར་སྲེག་གཏོང་ནས་བསད་པ་དང། འགའ་ཤས་ལ་འཕྲོག་བཅོམ་བྱེད་དེ་བཙོན་དུ་འཁྲིད་པར་འགྱུར།

³⁴མི་བསད་བྱུང་བཞིན་པའི་སྐབས་སུ་དཀོན་མཆོག་གི་མི་འབངས་རྣམས་ལ་རོགས་རམ་ཕྲན་བུ་ཞིག་ཐོབ་པར་འགྱུར། མང་ཆེ་བ་ནི་རང་དོན་ཁོ་ནའི་ཆེད་དུ་དེ་ཚོ་དང་མཉམ་དུ་ལག་འབྲེལ་བྱེད་པར་འགྱུར།

³⁵བློ་གྲོས་ལྡན་པའི་འགོ་ཁྲིད་དེ་ཚོ་འགའ་ཤས་བསད་རྒྱུ་ཡིན་པ་དང་། འོན་ཀྱང་དེའི་རྐྱེན་གྱིས་མི་མང་པོ་གཙང་ཞིང་དམ་པར་འགྱུར་བ་དང་། དཀོན་མཆོག་གིས་གཏན་འབེབས་གནང་བའི་དུས་ཀྱི་མཐའ་མ་དེ་མ་སླེབས་བར་དུ་དེ་ལྟར་མུ་མཐུད་ནས་འབྱུང་བར་འགྱུར།

³⁶སི་རི་ཡའི་རྒྱལ་པོས་རང་འདོད་བཞིན་དུ་སྤྱོད་དེ། ཁོ་རང་ལྷ་རྟེན་གཞན་ལས་མངའ་ཐང་ཆེ་བ་མ་ཟད། བླ་ན་མེད་པའི་དཀོན་མཆོག་ལས་ཀྱང་ཆེ་བ་ཡིན་ཚུལ་གྱིས་སྦོར་ཤོབ་བཤད་པར་འགྱུར། དཀོན་མཆོག་གིས་ཁོ་ལ་ཆད་པ་མ་གནང་བར་དུ་ཁོས་དེ་བཞིན་མུ་མཐུད་དེ་བྱེད་ཅིང་། དཀོན་མཆོག་གི་མཛད་འཕྲིན་དག་ནི་ཉིད་ཀྱི་འཆར་གཞིའི་དགོང་དོན་ལྟར་གནང་བར་འགྱུར།

³⁷རྒྱལ་པོས་རང་གི་མེས་པོ་རྣམས་ཀྱིས་བརྟེན་པའི་ལྷ་རྟེན་དང་། བུད་མེད་ཚོས་བརྩེ་བའི་ལྷ་རྟེན་དག་ལ་བརྩི་མེད་བྱེད་རྒྱུ་དང་། གང་ལྟར་ཁོས་ལྷ་རྟེན་ཚང་མར་བརྩི་མེད་བྱེད་པར་འགྱུར། གང་ལ་ཟེར་ན། ཁོའི་བསམ་ཚུལ་ལྟར་ཁོ་ནི་ལྷ་རྟེན་ཀུན་ལས་ཆེ་བ་ཡིན་པར་བསམ་གྱི་ཡོད་དོ།

³⁸དེའི་ཚབ་ལ་ཁོས་མཁར་རྫོང་སྲུང་སྐྱོབ་བྱེད་པའི་ལྷ་རྟེན་དེ་ལ་དད་གུས་བྱེད་དེ། རང་གི་ཕ་མེས་རྣམས་ཀྱིས་ད་བར་མ་རྟེན་པའི་ལྷ་རྟེན་དེ་ལ་གསེར་དང་དངུལ་དང་ནོར་བུ་ལ་སོགས་པའི་འབུལ་བ་རིན་ཐང་ཆེན་པོ་དག་འབུལ་རྒྱུ་ཡིན་པ་དང་།

³⁹ཁོས་རང་གི་མཁར་རྫོང་སྲུང་སྐྱོབ་ཆེད་དུ། ཕྱི་མིའི་ལྷ་རྟེན་ལ་བསྙེན་བཀུར་བྱེད་མཁན་མི་རྣམས་ལ་བེད་སྤྱོད་བྱེད་པ་དང་། ཁོ་ལ་རྒྱལ་པོར་ངོས་ལེན་བྱེད་མཁན་རྣམས་ལ་རྩིས་མཐོང་ཆེན་པོ་བྱེད་དེ་གོ་གནས་སྤར་བ་མ་ཟད། ཁོ་ཚོར་ས་གཞིས་སོགས་རྔན་པར་སྟེར་བར་འགྱུར།

⁴⁰སི་རི་ཡའི་རྒྱལ་པོའི་དུས་ཀྱི་མཐའ་མ་དེ་ཕལ་ཆེར་རན་སྐབས་ཨི་ཇིབ་ཀྱི་རྒྱལ་པོས་ཁོ་ལ་འཐབ་རྒོལ་བྱེད་པ་དང་། སི་རི་ཡའི་རྒྱལ་པོས་ཀྱང་ཤིང་རྟ་དང་རྟ་དང་གྲུ་མང་པོར་བེད་སྤྱོད་བཏང་ནས་ནུས་ཤུགས་ཆེན་པོས་ཕར་རྒོལ་བྱེད་པར་འགྱུར། ཆུ་ལོག་བརྒྱབ་པ་བཞིན་ཁོས་ཡུལ་གྲུ་མང་པོར་བཙན་རྒོལ་བྱེད་དེ།

⁴¹ཞལ་བཞེས་གནང་བའི་ཡུལ་དེའང་བཙན་རྒོལ་བྱེད་ཅིང་། མི་ཁྲི་ཁྲག་མང་པོ་བསད་རྒྱུ་ཡིན་པ་དང་། འོན་ཀྱང་ཡུལ་ཨེ་དྷོམ་དང་། མོ་ཨཱབ་དང་། ལྷག་འཕྲོས་ལུས་པའི་ཨམ་མོན་བཅས་ཐར་བར་འགྱུར།

⁴²ཁོས་ཡུལ་གྲུ་དེ་ཚོའི་ཐོག་ཏུ་བཙན་རྒོལ་བྱེད་སྐབས་ཨི་ཇིབ་ཀྱང་ཐར་བར་མི་འགྱུར་རོ།

⁴³ཁོས་ཨི་ཇིབ་ཀྱི་སྦས་པའི་གཏེར་གསེར་དངུལ་ལ་སོགས་པའི་རྒྱུ་ནོར་རྩ་ཆེ་བ་རྣམས་མཉམ་དུ་འཁྱེར་རྒྱུ་ཡིན་པ་དང་། ལིབ་ཡ་དང་ཨི་ཐི་ཨོ་པི་ཨ་ཡང་དབང་སྒྱུར་བྱེད་པར་འགྱུར།

⁴⁴དེ་ནས་ཤར་དང་བྱང་ནས་ཡོང་བའི་གནས་འཕྲིན་ཐོས་ཏེ་ཁོ་ལ་འཇིགས་སྣང་སྐྱེ་རྒྱུ་ཡིན་པ་དང། དྲག་ཤུགས་ཆེན་པོས་དམག་འཐབ་བྱེད་དེ་མི་མང་པོ་བསད་པར་འགྱུར།

⁴⁵མཆོད་ཁང་ཡོད་པའི་རི་བོ་དང་རྒྱ་མཚོའི་བར་ལ་ཁོས་རྒྱལ་པོའི་གུར་ཆེན་ཁག་ཕུབ་རྒྱུ་ཡིན་མོད། འོན་ཀྱང་དེར་ཁོ་ལ་རོགས་བྱེད་མཁན་སུའང་མེད་པར་གཅིག་པུར་ལུས་ཏེ་ཤི་བར་འགྱུར་རོ་ཞེས་སྨྲས་སོ༎

Read Tibetan — པོད་སྐད་Tibetan Old Testament 2011 དྷ་ནི་ཨེལ 11 Bible Online

དྷ་ནི་ཨེལ 11 - Tibetan — པོད་སྐད་Tibetan Old Testament 2011 bible

དྷ་ནི་ཨེལ 11