Read Tibetan — པོད་སྐད་Tibetan Old Testament 2011 དྷ་ནི་ཨེལ 4 Bible Online

དྷ་ནི་ཨེལ 4 - Tibetan — པོད་སྐད་Tibetan Old Testament 2011 bible

དྷ་ནི་ཨེལ 4

¹དེ་ནས་རྒྱལ་པོ་ནེ་བུ་ཀད་ནེ་ཛར་གྱིས་ཡུལ་གྱི་མི་རིགས་ཀུན་དང་། སྡེ་དང་སྐད་རིགས་འདྲ་མིན་སྨྲ་མཁན་ཚང་མར་བཀའ་འཕྲིན་བཏང་གནང་བ་འདི་ལྟ་སྟེ། ཁྱོད་ཚོར་བདེ་སྐྱིད་ཡོང་བའི་མཚམས་འདྲི་དང་བཅས།

²བླ་ན་མེད་པའི་དཀོན་མཆོག་གིས་ང་ལ་མངོན་པར་མཛད་པའི་ངོ་མཚར་ཆེ་བའི་རྟགས་མཚན་རྣམས་ཀྱིས་སྐོར་ངས་ཁྱོད་ཚོར་བཤད་རྒྱུ་ཡིན་པས། དེར་ལེགས་པར་ཉན་དགོས།

³དཀོན་མཆོག་གིས་ནི་ང་ཚོར་བསྟན་གནང་བའི། རྟགས་མཚན་དེ་དག་ངོ་མཚར་ཆེ་བ་ལགས། ཁོང་གིས་མཛད་པའི་རྫུ་འཕྲུལ་རྣམས་ཇི་འདྲ་སྟོབས་ཤུགས་ལྡན། གཙོ་བོ་དཀོན་མཆོག་རྒྱུན་དུ་མངའ་བདག་མཛད། ཉིད་ཀྱིས་དུས་རབས་ཀུན་ཏུ་རྒྱལ་སྲིད་སྐྱོང་།

⁴ང་ནི་ཕོ་བྲང་ནང་དུ་བདེ་སྐྱིད་དཔལ་ལ་ལོངས་སྤྱོད་ཅིང་གནས་ཡོད་པ་དང་།

⁵འོན་ཀྱང་ང་ཉལ་ནས་བསྡད་ཡོད་པའི་དུས་སུ། རྨི་ལམ་ཞེད་སྣང་ཆེན་པོ་ཞིག་ཏུ་ཞལ་གཟིགས་ཁྱད་མཚར་པོ་ཞིག་མཐོང་བྱུང་།

⁶ངས་བྷེ་བྷི་ལོན་གྱི་གྲོས་དཔོན་མཁས་པ་ཚང་མ་བཀོང་ནས་ངའི་རྨི་ལམ་གྱི་དོན་འགྲེལ་ཤོད་དགོས་པའི་བཀའ་བསྒོས་བྱས་པ་བཞིན།

⁷མོ་པ་དང་། སྒྱུ་མ་མཁན་དང་། རྩིས་པ་རྣམས་ངའི་མདུན་དུ་འཁྲིད་ཡོང་བ་དང་། ངས་དེ་ཚོར་རྨི་ལམ་གང་མཐོང་བ་དེ་བཤད་ཀྱང་། དེ་ཚོས་རྨི་ལམ་གྱི་དོན་འགྲེལ་བཤད་མ་ཐུབ་བོ།

⁸དེ་ནས་དྷ་ནི་ཨེལ་ངའི་རྩར་ཡོང་ནས། (ཁོའི་མིང་ལ་བྷེལ་ཏེ་ཤ་ཛར་ཡང་ཟེར་གྱི་ཡོད་པ་ཡིན་ནོ། མིང་དེ་ནི་ངའི་ལྷ་རྟེན་གྱི་མིང་ནས་བཏགས་པ་ཡིན་ནོ།) ཁོའི་ནང་དུ་དཀོན་མཆོག་གི་དམ་པའི་ཐུགས་ཉིད་ཡོད་པའི་ཁྱེན་གྱིས། ངས་ཁོ་ལ་རང་གི་རྨི་ལམ་གྱི་སྐོར་ལ་བཤད་པ་ཡིན་པས།

⁹ངས་ཁོ་ལ། ཀྱེ་བྷེལ་ཏེ་ཤ་ཛར། མངོན་ཤེས་མཁན་རྣམས་ཀྱི་གཙོ་བོ། དཀོན་མཆོག་གི་དམ་པའི་ཐུགས་ཉིད་དེ་ཁྱོད་ཀྱི་ནང་དུ་གནས་ཡོད་པས། ཁྱོད་ཀྱིས་གསང་དོན་ཚང་མ་རྟོགས་ཐུབ་པ་དེ་ངས་ཤེས་ཀྱི་ཡོད། ངས་མཐོང་བའི་རྨི་ལམ་ནི་གཤམ་གསལ་ལྟར་ཡིན་པས། ང་ལ་དེའི་དོན་འགྲེལ་ཤོད་དགོས་ཅེས་སྨྲས་པ་ཡིན་ནོ།

¹⁰ང་ཉལ་བའི་སྐབས་རྨི་ལམ་དུ་ས་གཞིའི་དབུས་སུ་ངས་ཤིང་སྡོང་ཆེན་པོ་ཞིག་མཐོང་བྱུང་།

¹¹ཤིང་སྡོང་དེ་ནི་ཇེ་ཆེར་ཕྱིན་ཏེ། མཐར་ནམ་མཁར་ཐུག་པས། འཇིག་རྟེན་གྱི་མི་རིགས་ཚང་མས་དེ་མཐོང་ཐུབ་པ་ཞིག་ཆགས་པ་དང་།

¹²དེའི་ལོ་འདབ་མཛེས་ཤིང་། དེར་ས་གཞིའི་མི་རིགས་ཚང་མས་ཟ་ནའང་ལྡང་ངེས་བཞིན་པའི་ཤིང་འབྲས་མང་པོ་སྨིན་པ་དང་། དེའི་སིལ་གྲིབ་འོག་ཏུ་ནགས་ཀྱི་གཅན་གཟན་རྣམས་གནས་སྡོད་བྱས་པ་དང་། དེའི་ཡལ་གར་བྱ་དང་བྱིའུ་རྣམས་ཀྱིས་མཚང་བཟོས་པ་དང་། སྲོག་ཆགས་འདྲ་མིན་སྣ་ཚོགས་ཀྱིས་དེའི་འབྲས་བུ་ལས་བཟས་སོ།

¹³ངས་ཞལ་གཟིགས་དེའི་སྐོར་ལ་བསམ་བློ་གཏོང་བཞིན་བསྡད་ཡོད་པའི་སྐབས་སུ། ངས་མཐོ་རིས་ནས་ཕོ་ཉ་གྲུང་པོ་དང་དོགས་ཟོན་ཅན་ཞིག་མར་བབ་བཞིན་པ་མཐོང་བྱུང་།

¹⁴དེས་སྐད་ཤུགས་ཆེན་པོས་བརྗོད་གསལ། ཤིང་སྡོང་དེའི་ཡལ་ག་དང་བཅས་པ་ཆོད་ཅིག། དེའི་ལོ་མ་རྣམས་སྤྲུགས་ནས་འབྲས་བུ་རྣམས་གཏོར་ཞིག དེའི་འོག་ཏུ་གནས་པའི་སེམས་ཅན་དང་དེའི་ཡལ་ག་ནས་བྱ་རྣམས་འདེད་ཅིག

¹⁵འོན་ཀྱང་བཅད་འཕྲོས་ལུས་པའི་སྡོང་པོའི་རྩ་བ་དེ་ལ་ལྕགས་དང་ལིའི་ཤན་བརྒྱབ་ནས་ཐང་ཀར་རྩའི་ཁྲོད་དུ་བཞག་དགོས། ནམ་མཁའི་ཟིལ་པ་མི་དེའི་སྟེང་དུ་འཕོག་བཅུག་པ་དང་། ཁོ་ལ་དུད་འགྲོ་སེམས་ཅན་དང་རྩ་ཤིང་སྣ་ཚོགས་ཀྱི་དཀྱིལ་དུ་གནས་བཅུག་ཅིག

¹⁶ཁོ་ལོ་བདུན་བར་དུ་མིའི་བསམ་ཤེས་དང་བྲལ་ཏེ། དུད་འགྲོའི་བསམ་ཤེས་བཞིན་དུ་གནས་དགོས་རྒྱུ་ཡིན།

¹⁷དེ་ནི་གྲུང་པོ་དང་དོགས་ཟོན་ཅན་ཕོ་ཉ་དེས་ཐག་གཅོད་གནང་བ་ཡིན་པས། ད་ཕྱིན་ས་ཕྱོགས་ཀུན་གྱི་མི་ཚང་མས་ཤེས་རྟོགས་བྱེད་དགོས་པ་དེ་གང་ཡིན་ཟེར་ན། མིའི་རྒྱལ་ཁབ་རྣམས་ཀྱི་ཐོག་ཏུ་བླ་མེད་དཀོན་མཆོག་གིས་དབང་སྒྱུར་མཛད་ཐུབ་པ་མ་ཟད། ཁོང་གིས་རྒྱལ་ཁབ་དེ་དག་ཉིད་ཀྱི་ཐུགས་འདོད་བཞིན་དུ་སྐྱེ་བོ་སུ་ཞིག་ལའང་གནང་བར་སྲིད། སྐྱེ་བོ་སྣང་ཆུང་ཀུན་ལས་ཕལ་པ་ཞིག་ཡིན་ཀྱང་། དེ་ལའང་རྒྱལ་སྲིད་གནང་བར་སྲིད་པ་ཡིན་ནོ།

¹⁸རྒྱལ་པོས། ངས་མཐོང་བའི་རྨི་ལམ་ནི་དེ་ལྟར་ཡིན་པས། ད་བྷེལ་ཏེ་ཤ་ཛར་ཁྱོད་ཀྱིས་ང་ལ་དེའི་དོན་འགྲེལ་ཤོད་དགོས། ངའི་གྲོས་དཔོན་མཁས་པ་སུས་ཀྱང་དེའི་དོན་བཤད་མ་ཐུབ་མོད། འོན་ཀྱང་ཁྱོད་ཀྱིས་བཤད་ཐུབ་པ་ཡོད། གང་ལ་ཟེར་ན། དམ་པའི་དཀོན་མཆོག་གི་ཐུགས་ཉིད་དེ་ཁྱོད་ཀྱི་ནང་དུ་གནས་ཡོད་པས་ཕྱིར་རོ་ཞེས་གསུངས་སོ༎

¹⁹དེ་ནས་དྷ་ནི་ཨེལ་ལམ་བྷེལ་ཏེ་ཤ་ཛར་ནི་ཧ་ཅང་འཇིགས་ཏེ། ཡུན་ཙམ་རིང་དུ་གང་ཡང་བརྗོད་མ་ཐུབ་པར་གནས་པ་དང་། རྒྱལ་པོས་ཁོ་ལ། རྨི་ལམ་དེ་དང་དེའི་དོན་འགྲེལ་གྱི་ཁྱོད་ལ་འཇིགས་མི་བཅུག་ཅིག་ཅེས་གསུངས་པ་དང་། ལན་དུ་བྷེལ་ཏེ་ཤ་ཛར་གྱིས། རྨི་ལམ་དེ་ནི་རྒྱལ་པོ་ཁྱེད་ཀྱི་སྐོར་ལ་མ་ཡིན་པར། ཁྱེད་ཀྱི་དགྲ་བོའི་སྐོར་ལ་བྱུང་བ་ཡིན་ན་ཅི་མ་རུང་།

²⁰ནམ་མཁའ་བར་དུ་བསླེབས་པའི་ཤིང་སྡོང་རིང་ལ་ས་གཞིའི་མི་རིགས་ཚང་མས་མཐོང་ཐུབ་པ་དང་།

²¹དེའི་ལོ་འདབ་མཛེས་ཤིང་། དེའི་ཤིང་འབྲས་འཕེལ་ཏེ་འཇིག་རྟེན་གྱི་མི་ཚང་མས་ཟ་ནའང་ལྡང་ངེས་བཞིན་པ་ཡོད་དང་། དེའི་འོག་ཏུ་ནགས་ཀྱི་སེམས་ཅན་རྣམས་གནས་ཏེ། དེའི་ཡལ་གར་བྱ་བྱིའུས་མཚང་བཟོས་ཡོད་དོ།

²²ཀྱེ་རྒྱལ་པོ་ཆེན་པོ། ཤིང་སྡོང་རིང་ལ་སྟོབས་ཆེ་བ་དེ་ནི་རྒྱལ་པོ་རང་ཉིད་ཡིན་ཅིང། ཁྱེད་ཀྱི་མངའ་ཐང་མཐོ་ཞིང་ནམ་མཁར་བསླེབས་པ་ལྟ་བུར་འགྱུར་ཞིང། སྐུ་ཉིད་ཀྱི་དབང་ཐང་ནི་འཇིག་རྟེན་ཡོངས་སུ་ཁྱབ་ནས་ཡོད་པ་ཡིན།

²³ཁྱེད་ཀྱིས་གཟིགས་བཞིན་བཞུགས་ཡོད་པའི་སྐབས་སུ་མཐོ་རིས་ནས་ཕོ་ཉ་ཞིག་བྱུང་ནས། ཤིང་སྡོང་དེ་བཅད་ནས་རྩ་མེད་བཏང་ཞིང་། བཅད་འཕྲོས་ལུས་པའི་ཤིང་སྡོང་གི་དུམ་བུ་དེ་ལ་ལྕགས་དང་ལིའི་ཤན་བརྒྱབ་ནས་ཐང་ཀར་རྩའི་དཀྱིལ་དུ་བཞག་པ་དང་། ནམ་མཁའི་ཟིལ་པས་མི་དེ་འབང་ཞིང་། དེ་ནི་ལོ་བདུན་བར་དུ་དུད་འགྲོ་དང་མཉམ་དུ་གནས་དགོས་པར་འགྱུར་ཞེས་སྨྲས་པ་ཡིན་ནོ།

²⁴ཀྱེ་རྒྱལ་པོ་ཆེན་པོ། དེའི་དོན་ནི་འདི་ལྟར་ཡིན་ནོ། བླ་ན་མེད་པའི་དཀོན་མཆོག་གིས་མ་འོངས་པར་རྒྱལ་པོ་ཁྱེད་ཀྱི་ཐོག་ཏུ་གང་བྱུང་བའི་སྐོར་ལ་གསལ་བསྒྲགས་གནང་བ་ཡིན་ཅིང་།

²⁵ཁྱེད་ནི་མི་སྡེའི་ཁྲོད་ནས་མཐར་སྐྲོད་ཡོང་རྒྱུ་མ་ཟད། ནགས་ཀྱི་དུད་འགྲོ་དང་མཉམ་དུ་གནས་དགོས་ཤིང་། ལོ་བདུན་བར་དུ་ཁྱེད་ནི་བ་གླང་བཞིན་དུ་རྩ་ཟ་དགོས་རྒྱུ་དང་། ཁྱེད་ནི་ཐང་སྟོང་ཁུལ་དུ་ཉལ་དགོས་ཤིང། གནམ་གྱི་ཟིལ་པས་འབང་དགོས་རྒྱུ་ཡིན་པ་དང། དེ་ནས་བླ་མེད་དཀོན་མཆོག་གིས་མིའི་རྒྱལ་ཁབ་ཀུན་གྱི་ཐོག་ཏུ་དབང་བསྒྱུར་མཛད་ཐུབ་པ་དང་། ཁོང་རང་ཉིད་ཀྱིས་ཐུགས་འདོད་གནང་བའི་སྐྱེ་བོ་སུ་འདྲ་ཞིག་ལའང་རྒྱལ་ཁབ་དེ་ཚོ་གནང་སྲིད་པ་དེ་ལ་ཁྱེད་ཀྱིས་ངོས་ལེན་གནང་བར་འགྱུར།

²⁶བཅད་འཕྲོས་ལུས་པའི་ཤིང་སྡོང་གྱི་རྩ་བ་ཐང་ལ་བཞག་ཡོད་པའི་དོན་ནི། དཀོན་མཆོག་གིས་འཇིག་རྟེན་ཀུན་ལ་རྒྱལ་སྲིད་སྐྱོང་ནུས་པ་དེར་ཁྱེད་ཀྱིས་ངོས་ལེན་གནང་བའི་རྗེས་སུ། སྐུ་ཉིང་སླར་ཡང་རྒྱལ་པོ་གནང་རྒྱུ་ཡིན།

²⁷དེ་བས་ན་རྒྱལ་པོ་ཁྱེད་ཀྱིས་སྡིག་པའི་ལས་རྣམས་སྤངས་ཏེ་ངས་གང་སྨྲས་པའི་གཏམ་ལ་གསན་ནས། ཉམ་ཐག་རྣམས་ལ་སྙིང་རྗེ་གནང་རྒྱུ་ལ་སོགས་པའི་མཛད་བཟང་འབའ་ཞིག་གནང་ན། སྐུ་ཉིད་ཀྱི་མཛད་དོན་ཀུན་ལ་ལམ་འགྲོ་ཡར་རྒྱས་ཡོང་ངེས་སོ་ཞེས་ཞུས་སོ།

²⁸གོང་གསལ་གནས་ཚུལ་དེ་དག་རྒྱལ་པོ་ནེ་བུ་ཀད་ནེ་ཛར་གྱི་ཐོག་ཏུ་ཆ་ཚང་བྱུང་ངོ།

²⁹དེ་ནས་ལོ་གཅིག་འཁོར་བའི་རྗེས་ལ། བྷེ་བྷི་ལོན་དུ་ཡོད་པའི་རང་གི་ཕོ་བྲང་གི་ཐོག་ཏུ་ཕར་ཚུར་འགྲོ་བཞིན་པའི་སྐབས་སུ།

³⁰ཁོང་གིས། ལྟོས་དང་བྷེ་བྷི་ལོན་ནི་ཇི་ལྟར་རླབས་ཆེན་འདུག ངས་རང་གི་གཟི་བརྗིད་དང་མཐུ་སྟོབས་སྟོན་པའི་ཕྱིར་དུ་བྷེ་བྷི་ལོན་དེ་རང་གི་རྒྱལ་ས་བཟོས་པ་ཡིན་ཞེས་སྨྲས་སོ།

³¹རྒྱལ་པོའི་ཞལ་ནས་གཏམ་དེ་མ་རྫོགས་པའི་སྔོན་དུ་མཐོ་རིས་ནས་སྒྲ་ཞིག་བྱུང་ཞིང་། དེས་ཀྱེ་རྒྱལ་པོ་ནེ་བུ་ཀད་ནེ་ཛར། ངས་གང་སྨྲས་པ་དེ་ལ་ཚུར་ཉོན་ཞིག། ད་ཁྱོད་ལས་རྒྱལ་པོའི་དབང་ཆ་དེ་ལེན་ཟིན་པ་དང།

³²ཁྱོད་ནི་མི་སྡེའི་ཁྲོད་ནས་ཐར་སྐྲོད་གཏོང་རྒྱུ་ཡིན་པ་དང་། ནགས་ཀྱི་དུད་འགྲོ་རྣམས་དང་མཉམ་དུ་གནས་སྡོད་བྱེད་དགོས་ཏེ། བ་གླང་བཞིན་དུ་ལོ་བདུན་བར་དུ་རྩ་ཟ་དགོས་པར་འགྱུར། དེ་རྗེས་བླ་མེད་དཀོན་མཆོག་གིས་མིའི་རྒྱལ་ཁབ་ཚོའི་ཐོག་ཏུ་སྐུ་དབང་མཛད་ཐུབ་པ་མ་ཟད། རྒྱལ་ཁབ་དེ་དག་ཁོང་གི་ཐུགས་འདོད་གནང་བའི་སྐྱེ་བོ་སུ་འདྲ་ཞིག་ལའང་གནང་སྲིད་པ་དེ་ལ་ཁྱོད་ཀྱིས་ངོས་ལེན་བྱེད་པར་འགྱུར་ཅེས་གསུངས་སོ།

³³གཏམ་དེ་ལམ་སང་འགྲུབ་བོ། རྒྱལ་པོ་མི་སྡེའི་ཁྲོད་ནས་ཐར་སྐྲོད་བྱུང་སྟེ། བ་གླང་བཞིན་དུ་རྩ་ཟ་དགོས་པ་དང་། ཁོང་གི་སྟེང་དུ་ཟིལ་པ་བབས་ཏེ། སྐྲ་རིང་ཞིང་བྱ་གླག་གི་སྤུ་དང་འདྲ་བ། དེ་བཞིན་སེན་མོའང་བྱའི་སྡེར་མོ་བཞིན་དུ་རིང་པོར་ཆག་གོ།

³⁴དེ་ནས་རྒྱལ་པོས་གསུངས་པ། ལོ་བདུན་གྱི་རྗེས་སུ་ངས་ནམ་མཁར་བལྟས་པ་དང་ངའི་དྲན་པ་ཕྱིར་རྙེད་བྱུང། དུས་རྒྱུན་དུ་བཞུགས་པའི་བླ་མེད་དཀོན་མཆོག་ལ་ངས་བསྟོད་བསྔགས་དང་གུས་བཏུད་དང་གཟི་བརྗིད་འབུལ་བ་ཡིན་ཞེས་གསུངས་སོ། ཁོང་གི་དུས་རྒྱུན་དུ་རྒྱལ་སྲིད་སྐྱོང་ཞིང་། དེ་ནི་དུས་མཐའ་མེད་བར་དུ་གནས་པར་འགྱུར།

³⁵ཁོང་གི་སྤྱན་སྔར་འཇིག་རྟེན་གྱི་མི་རྣམས་ནི་ཐོང་ཆུང་ལགས་ཏེ། མཐོ་རིས་ཀྱི་ཕོ་ཉ་དང་ས་གཞིའི་མི་རྣམས་ཁོང་གིས་མངའ་འོག་ཏུ་ཡོད་ཅིང་། སུས་ཀྱང་ཁོང་གི་ཐུགས་དགོངས་ལ་འགལ་ཟླ་ཞུ་མི་ཐུབ་ཅིང་། ཁོང་གི་མཛད་འཕྲིན་དག་ལ་སུས་ཀྱང་འདྲི་རྩད་བྱེད་མི་ནུས་སོ།

³⁶ངའི་དྲན་པ་ཕྱིར་རྙེད་པ་དང་། ངའི་མངའ་ཐང་དང་དཔལ་དང་ངའི་རྒྱལ་སྲིད་ཀྱི་གཟི་བརྗིད་བཅས་པ་ཆ་ཚང་ང་ལ་ཕྱིར་སློག་གནང་བྱུང་། ངའི་ལས་བྱེད་པ་དང་ངའི་མི་གཙོ་དྲག་རྣམས་ཀྱིས་ང་ལ་དགའ་བསུ་བྱས་ཏེ། སྔར་ལས་ཀྱང་རྩིས་ཐང་ཆེན་པོའི་སྒོ་ནས་ང་ལ་རྒྱལ་པོའི་དབང་དེ་ཕྱིར་སྤྲོད་བྱས་བྱུང་།

³⁷ད་ང་ནེ་བུ་ཀད་ནེ་ཛར་གྱིས་མཐོ་རིས་ཀྱི་མངའ་བདག་ཆེན་པོ་དེ་ལ་བསྟོད་པ་དང་གུས་བཏུད་དང་གཟི་བརྗིད་འབུལ་གྱི་ཡོད། ཁོང་གི་མཛད་འཕྲིན་ཚང་མ་དྲང་ཞིང་ཁྲིམས་དྲང་པོ་ཡིན་པ་དང་། ང་རྒྱལ་ཅན་ལ་ཁོང་གིས་དམའ་བར་མཛད་གནང་ངོ༎