Read Tibetan — པོད་སྐད་Tibetan Old Testament 2011 དྷ་ནི་ཨེལ 6 Bible Online

དྷ་ནི་ཨེལ 6 - Tibetan — པོད་སྐད་Tibetan Old Testament 2011 bible

དྷ་ནི་ཨེལ 6

¹དེ་ནས་རྒྱལ་པོ་དྷ་རི་ཡསེ་རང་གི་རྒྱལ་ཁམས་ཡོངས་སུ་སྲིད་ཚབ་ ༡༢༠ བསྐོ་གཞག་བྱས་པར་ཐག་བཅད་པ་རེད།

²འདི་ཐོག་སྲིད་ཚབ་རྣམས་ཀྱི་ལས་དོན་དང་རྒྱལ་པོའི་བདེ་དོན་ལ་བལྟ་རྟོགས་བྱེད་ཕྱིར་དྷ་ནི་ཨེལ་དང་མི་གཞན་དག་གཉིས་ལ་འདེམས་བསྐོས་བྱས་སོ།

³དྷ་ནི་ཨེལ་ནི་བལྟ་རྟོགས་བྱེད་མཁན་གཞན་གཉིས་ཡང་ན་སྲིད་ཚབ་ཚོ་ལས་ཀྱང་ལས་ཀ་ཡག་ག་བྱེད་ཀྱི་ཡོད་པ་ཡིན་པས། རྒྱལ་པོས་ཁོང་ལ་རྒྱལ་ཁམས་ཡོངས་ཀྱི་བལྟ་རྟོགས་བྱེད་མཁན་དུ་བསྐོ་གཞག་གནང་རྒྱུ་དགོངས་པ་བཞེས་སོ།

⁴དེ་ནས་བལྟ་རྟོགས་བྱེད་མཁན་གཞན་ཚོ་དང་སྲིད་ཚབ་ཚོས་དྷ་ནི་ཨེལ་གྱི་གཞུང་འབྲེལ་ལས་དོན་བྱེད་ཚུལ་སྐོར་ལ་སྐྱོན་བརྗོད་བྱེད་པའི་ཐབས་བཙལ་ཀྱང་། དེ་ཚོས་སྐྱོན་འཛུགས་གང་ཡང་བྱེད་མ་ཐུབ་བོ། གང་ལགས་ཟེར་ན། དྷ་ནི་ཨེལ་ནི་བློས་འཁེལ་པོ་ཞིག་ཡིན་པས། རང་གི་ལས་དོན་ལ་ནོར་འཁྲུལ་དང་གཡོ་ཐབས་སོགས་ནམ་ཡང་མི་བྱེད་དོ།

⁵དེ་ཚོས་ནང་ཁོངས་སུ། ད་ང་ཚོས་དྷ་ནི་ཨེལ་གྱི་ཆོས་དོན་སྐོར་ལ་སྐྱོན་བརྗོད་ཅིག་བྱེད་ཐུབ་ན་མ་གཏོགས། དེ་མིན་ཐབས་ཤེས་གང་འདྲ་ཞིག་གི་སྒོ་ནས་ཀྱང་སྐྱོན་འཛུགས་བྱེད་མི་ཐུབ་བོ་ཞེས་སྨྲས་སོ།

⁶དེར་བརྟེན་ཁོ་ཚོ་རྒྱལ་པོའི་དྲུང་དུ་བཅར་ནས། ཀྱེ་རྒྱལ་པོ་ཆེན་པོ་དྷ་རི་ཡསེ་སྐུ་ཚེ་བརྟན་པོར་ཤོག

⁷ཁྱེད་ཀྱིས་ཡུལ་དུ་སྲིད་སྐྱོང་བྱེད་ཕྱིར་བསྐོ་གཞག་མཛད་པའི་ང་ཚོ་བལྟ་རྟོགས་བྱེད་མཁན་རྣམས་དང་། སྲིད་ཚབ་རྣམས་དང་། སྲིད་ཚབ་ལས་རོགས་རྣམས་དང་། དེ་བཞིན་གཞན་ལས་བྱེད་པ་བཅས་ནས་ཐུན་མོང་གིས་གྲོས་འཆར་ཞིག་ཞུ་རྒྱུ་ཡོད། དེ་གང་ཡིན་ཞུས་ན། རྒྱལ་པོ་ཁྱེད་ཀྱིས་བཀའ་རྒྱ་ཞིག་གཏན་འབེབས་གནང་དུ་གསོལ། བཀའ་རྒྱ་དེའི་ནང་དུ་རྒྱལ་པོ་ཁྱེད་ལ་མ་གཏོགས་ལྷའམ་མི་སུ་འདྲ་ཞིག་ལའང་ཉིན་ཞག་སུམ་ཅུའི་རིང་དུ་སྨོན་ལམ་ཞུ་མི་ཆོག་པ་དང་། གལ་ཏེ་སུ་ཞིག་གིས་བཀའ་རྒྱ་དེ་ལ་རྩིས་མེད་ཞུས་པ་ཡིན་ན། དེ་ནི་སེང་གེའི་དོང་ནང་དུ་དབྱུགས་རྒྱུ་ཡིན་ཞེས་འཁོད་དགོས།

⁸དེར་བརྟེན་རྒྱལ་པོས་གོང་གསལ་ལྟར་བཀའ་རྒྱ་ཞིག་གཏན་འབེབས་གནང་ནས་དེ་ལ་མཚན་རྟགས་སྐྱོན་པ་གནང་ན། དེ་ནི་མ་དཱ་པ་དང་པར་ཤི་ཡའི་ཡུལ་ཁྲིམས་འགྱུར་བཀོད་མ་ཐུབ་པ་ཞིག་ཏུ་འགྱུར་རྒྱུ་ཡིན་ནོ་ཞེས་ཞུས་པ་དང་།

⁹དེར་བརྟེན་རྒྱལ་པོ་དྷ་རི་ཡསེ་ཀྱིས་བཀའ་ཤོག་དེ་ལ་མཚན་རྟགས་བརྒྱབ་བོ།

¹⁰དྷ་ནི་ཨེལ་གྱིས་བཀའ་རྒྱ་དེ་ལ་མཚན་རྟགས་འཁོད་ཟིན་པའི་སྐོར་ཐོས་པ་དང་ཁོང་རང་གི་ཁང་ཁྱིམ་དུ་ལོག་གོ ཁོང་གི་ཁང་མིག་སྟེང་ཐོག་གི་སྒེ་ཁུང་རྣམས་ནི་ཡེ་རུ་ཤ་ལེམ་གྱི་ཕྱོགས་སུ་བསྟན་ནས་བཟོས་ཡོད་པ་དང་། དེར་ཁོང་གིས་སྒེ་ཁུང་ཕྱེས་ནས་དུས་རྒྱུན་བཞིན་དུ་པུས་མོ་བཙུགས་ཏེ། དཀོན་མཆོག་ལ་ཉིན་རེར་ལན་གསུམ་རེ་སྨོན་ལམ་འདེབས་སོ།

¹¹དྷ་ནི་ཨེལ་གྱིས་དཀོན་མཆོག་ལ་སྨོན་ལམ་འདེབས་བཞིན་པ་ཁོང་གི་དགྲ་བོས་མཐོང་བ་དང།

¹²དེ་ཚོ་ཚང་མ་དྷ་ནི་ཨེལ་ལ་སྐྱོན་འཛུགས་བྱེད་ཕྱིར་ལྷན་ཅིག་ཏུ་རྒྱལ་པོའི་དྲུང་དུ་བཅར་ནས། དེ་ཚོས། ཀྱེ་རྒྱལ་པོ་ཆེན་པོ། ཉིན་ཞག་སུམ་ཅུའི་རིང་དུ་སུས་ཀྱང་ཁྱེད་ལ་མ་གཏོགས་ལྷ་དང་མི་སུ་འདྲ་ཞིག་ལའང་སྨོན་ལམ་ཞུ་མི་ཆོག་པ་དང། གལ་སྲིད་དེ་ལྟར་བྱས་པ་ཡིན་ན། མི་དེ་སེང་གེའི་དོང་ནང་དུ་དབྱུགས་དགོས་པའི་བཀའ་ཁྲིམས་གནང་བ་མ་ཡིན་ནམ་ཞེས་ཞུས་པ་དང་། རྒྱལ་པོས། དེ་ནི་བདེན་པ་ཡིན། བཀའ་རྒྱ་དེ་ནི་བཙན་ཞིང་བརྟན་པོ་ཡིན་པས། མ་དྷ་པ་དང་པར་ཤི་ཡའི་ཡུལ་ཁྲིམས་འགྱུར་བཀོད་མེད་པ་དེ་ཡིན་ནོ་ཞེས་གསུངས་སོ།

¹³དེ་ནས་དེ་ཚོས་རྒྱལ་པོ་ལ། ཡ་ཧུ་དཱ་ནས་ཡོང་བའི་བཙན་བྱོལ་བ་མིང་ལ་དྷ་ནི་ཨེལ་ཟེར་བ་དེས་རྒྱལ་པོ་ཁྱེད་ལ་བརྩི་གུས་མ་ཞུས་པ་མ་ཟད། ཁྱེད་ཀྱིས་གཏན་འབེབས་མཛད་པའི་བཀའ་རྒྱ་དེ་ལའང་སྲུང་རྩིས་མ་ཞུས་པར། ཉིན་རེར་ལན་གསུམ་རེ་སྨོན་ལམ་འདེབས་ཀྱི་འདུག་ཅེས་ཞུས་སོ།

¹⁴གནས་ཚུལ་དེ་ཐོས་ནས་རྒྱལ་པོ་ཧ་ཅང་ཐུགས་འཁྲུགས་ཤིང་། དགོང་དྲོ་ཉི་མ་མ་ནུབ་བར་དུ་ཁོང་གི་ཐབས་ཤེས་སྣ་ཚོགས་ཀྱི་སྒོ་ནས་དྷ་ནི་ཨེལ་ལ་སྐྱབས་ཐབས་གནང་ངོ་།

¹⁵དེ་ནས་དྷ་ནི་ཨེལ་གྱི་དགྲ་བོ་ཚོ་རྒྱལ་པོའི་དྲུང་དུ་བཅར་ནས་ཞུས་པ་། མ་དཱ་པ་དང་པར་ཤི་ཡའི་ཁྲིམས་སྲོལ་ལྟར་རྒྱལ་པོའི་ལན་གཅིག་བཀའ་གནང་བ་དེ་ནམ་ཡང་འགྱུར་བཀོད་བྱེད་རྒྱུ་མེད་པ་དེ་ནི་ཁྱེད་ཀྱིས་མཁྱེན་གསལ་ཡིན་ནོ།

¹⁶དེར་བརྟེན་རྒྱལ་པོས་དྷ་ནི་ཨེལ་ལ་འཛིན་བཟུང་བྱས་ནས་སེང་གའི་དོང་ནང་དུ་དབྱུགས་དགོས་པའི་བཀའ་གནང་ངོ། ཁོང་གིས་དྷ་ནི་ཨེལ་ལ། རྒྱུན་དུ་ཁྱོད་ཀྱིས་དད་གུས་ཆེན་པོས་བསྙེན་བཀུར་ཞུས་པའི་དཀོན་མཆོག་དེས་ཁྱོད་ལ་སྐྱོབ་པར་ཤོག་ཅེས་གསུངས།

¹⁷སེང་གེའི་ཚང་དོང་གི་སྒོ་རུ་རྡོ་ཆེན་པོ་ཞིག་བཞག་ནས། དྷ་ནི་ཨེལ་ལ་སུས་ཀྱང་སྐྱོབ་མི་ཐུབ་པའི་ཕྱིར་རྒྱལ་པོས་ཉིད་ཀྱི་ཕྱག་དམ་དང་མི་སྣ་གཙོ་དྲག་ཁག་གིས་ཀྱང་རང་རང་སོ་སོའི་ཐེ་ཙེ་རྡོ་དེའི་ཁར་བརྒྱབས་སོ།

¹⁸དེ་རྗེས་རྒྱལ་པོ་རང་གི་ཕོ་བྲང་དུ་ཕེབས་ཏེ། གསོལ་བ་དང་གླུ་གར་ལ་སོགས་པའི་སྤྲོ་སེང་དག་སྤངས་ནས་མཚན་གང་གཉིད་མེད་པར་བཞུགས་སོ།

¹⁹སྔ་དྲོ་ནམ་ལངས་སྐབས་སུ་རྒྱལ་པོ་ཡར་བཞེངས་ནས་མགྱོགས་པོར་སེང་གེའི་ཚང་དོང་དུ་ཕེབས་ནས།

²⁰ཐུགས་འཕྲལ་ཆེན་པོས། ཀྱེ་དྷ་ནི་ཨེལ། གསོན་པོའི་དཀོན་མཆོག་གི་ཞབས་ཏོག་པ། ཁྱོད་ཀྱིས་རྒྱུན་དུ་དད་གུས་ཆེན་པོས་བསྙེན་བཀུར་ཞུས་པའི་དཀོན་མཆོག་དེས་ཁྱོད་ལ་སེང་གེ་ལས་སྲུང་སྐྱོབ་གནང་ཐུབ་སོང་ངམ་ཞེས་བཀའ་འདྲི་གནང་བས།

²¹ལན་དུ་དྷ་ནི་ཨེལ་གྱིས། ཀྱེ་རྒྱལ་པོ་ཆེན་པོ་སྐུ་ཚེ་བརྟན་པར་ཤོག།

²²སེང་གེས་ང་ལ་གནོད་སྐྱོན་གཏོང་མ་ཐུབ་པའི་ཕྱིར་དཀོན་མཆོག་གིས་ཉིད་ཀྱི་ཕོ་ཉ་གཏོང་བ་གནང་ནས་སེང་གེའི་ཁ་བཀག་པ་གནང་བྱུང་། ང་ལ་གནོད་ཉེས་མེད་པ་དང་། ངས་རྒྱལ་པོ་ཁྱེད་ལ་གནོད་པའི་ལས་སོགས་གང་ཡང་བྱས་མེད་པ་དེ་ཁོང་གིས་མཁྱེན་ནས་དེ་བཞིན་གནང་བ་ཡིན་ཞེས་ཞུས་སོ།

²³དེ་ནས་རྒྱལ་པོ་ཤིན་ཏུ་ཐུགས་མཉེས་ཏེ། དྷ་ནི་ཨེལ་ལ་སེང་གེའི་ཚང་དོང་ནས་ཡར་འདོན་དགོས་པའི་བཀའ་གནང་བ་བཞིན། དེ་ཚོས་ཁོང་ལ་དོང་ནས་ཡར་བཏོན་པ་དང་། ཁོང་ལ་རྨས་སྐྱོན་སོགས་གང་ཡང་བྱུང་མེད་པ་ཡིན་ནོ། གང་ལ་ཟེར་ན། ཁོང་གིས་དཀོན་མཆོག་ལ་བློ་བཅོལ་ཡོད་པས་ཕྱིར་རོ།

²⁴དེ་ནས་རྒྱལ་པོས་དྷ་ནི་ཨེལ་ལ་སྐྱོན་འཛུགས་བྱེད་མཁན་ཚང་མ་འཛིན་བཟུང་དགོས་པའི་བཀའ་གནང་བས་། དེ་ཚོའི་ཆུང་མ་བུ་ཕྲུག་དང་བཅས་པ་སེང་གེའི་ཚང་དོང་དུ་དབྱུགས་སྐབས། ཚང་དོང་གི་གཏིང་དུ་མ་སླེབས་གོང་ནས་སེང་གེས་དེ་ཚོའི་ཐོག་ཏུ་མཆོང་སྟེ། དེ་ཚོའི་རུས་པ་བཅག་ནས་དུམ་བུར་བཟོས་པ་རེད།

²⁵དེ་ནས་རྒྱལ་པོ་དྷ་རི་ཡསེ་ཀྱིས་འཇིག་རྟེན་ཀུན་ཏུ་གནས་པའི་མི་རིགས་འདྲ་མིན་དང་། མི་སྡེ་སྣ་ཚོགས་དང་། དེ་བཞིན་སྐད་རིགས་མི་གཅིག་པའི་མི་རྣམས་ལ་གཤམ་གསལ་ལྟར་འཕྲིན་ཡིག་ཞིག་བཏང་ངོ། ཁྱོད་ཚོར་བདེ་སྐྱིད་ཡོང་བའི་མཚམས་འདྲི་དང་བཅས།

²⁶ངའི་རྒྱལ་ཁམས་ཡོངས་ཀྱི་མི་ཚོས་དྷ་ནི་ཨེལ་གྱི་དཀོན་མཆོག་ལ་བག་སེམས་ཆེན་པོས་བསྙེན་བཀུར་ཞུ་དགོས་པའི་བཀའ་བསྒོས་བྱེད་རྒྱུ་ཡིན། ཁོང་ནི་གསོན་པོར་བཞུགས་པའི་དཀོན་མཆོག་ལགས། ཁོང་གིས་རྒྱུན་དུ་རྒྱལ་སྲིད་སྐྱོང་བར་མཛད། རྒྱལ་སྲིད་དེ་ནི་ནམ་ཡང་མི་འཇིག་ཅིང་། ཁོང་གི་མཐུ་དང་ནུས་པའི་མཐའ་མེད་དོ།

²⁷ཁོང་གིས་སྐྱབས་ཤིང་ཉེན་ཁ་ཀུན་ལས་འགྲོལ། ཁོང་གིས་གནམ་དང་ས་གཞིའི་ཕྱོགས་ཀུན་ཏུ། ངོ་མཚར་ཆེ་བའི་ལྟས་རྣམས་སྟོན་པར་མཛད། དྷ་ནི་ཨེལ་སེང་གེའི་ཉེན་ལས་སྐྱབས་མཛད་དོ།

²⁸དེ་ནས་རྒྱལ་པོ་དྷ་རི་ཡསེ་དང་པར་ཤི་ཡའི་རྒྱལ་པོ་སའི་རསེ་ཀྱི་སྲིད་སྐྱོང་སྐབས་སུ་དྷ་ནི་ཨེལ་ལ་ཡར་རྒྱས་གོང་འཕེལ་ཆེན་པོ་བྱུང་བ་ཡིན་ནོ༎