Read Tibetan — པོད་སྐད་Tibetan Old Testament 2011 དྷ་ནི་ཨེལ 7 Bible Online

དྷ་ནི་ཨེལ 7 - Tibetan — པོད་སྐད་Tibetan Old Testament 2011 bible

དྷ་ནི་ཨེལ 7

¹བྷེལ་ཤ་ཛར་གྱིས་བྷེ་བྷི་ལོ་ནི་ཡ་དུ་རྒྱལ་སྲིད་སྐྱོང་བའི་ལོ་དང་པོར། ངས་མཚན་མོའི་རྨི་ལམ་ཞིག་གི་ནང་ཞལ་གཟིགས་ཤིག་མཐོང་བྱུང་། ངས་རྨི་ལམ་དེ་བཞིན་ཡིག་ཐོག་ཏུ་བཀོད་པ་ནི་གཤམ་གསལ་ལྟར་ཡིན་ནོ།

²མཚན་མོ་དེར་ངས་མཐོང་བའི་ཞལ་གཟིགས་ནང། ས་ཕྱོགས་ཀུན་ནས་རླུང་འཚུབ་ལངས་ཏེ་རྒྱ་མཚོའི་ཐོག་ཏུ་བརྒྱབ་པ་དང་།

³རྒྱ་མཚོའི་ནང་ནས་སེམས་ཅན་མི་འདྲ་བ་གཟུགས་སྟོབས་ཧ་ཅང་ཆེ་བ་བཞི་ཐོན་ཞིང་།

⁴སེམས་ཅན་དང་པོ་དེ་ནི་སེང་གེ་དང་འདྲ་བ་ཡིན་པ་ལ་གླག་དང་འདྲ་བའི་ཤོག་པ་རྣམས་ཡོད་པ་དང་། ངས་བལྟ་བཞིན་དུ་ཤོག་པ་དེ་དག་ཆད་དེ། སེམས་ཅན་དེའི་རྐང་པ་གཉིས་མར་བཙུགས་ཏེ་མི་དང་འདྲ་བ་ཡར་བསླངས་ནས་དེ་ལ་མིའི་སེམས་གཤིས་སྤྲད་པ་ཡིན་ནོ།

⁵སེམས་ཅན་གཉིས་པ་དེས་ནི་རྐང་པ་གཉིས་བཙུགས་ནས་ཡར་ལངས་པའི་དོམ་དང་འདྲ་བ་ཡོད་པ་དང་། དེེས་རང་གི་སོས་རྩིབ་མ་གསུམ་བཟུང་ནས་ཡོད་པ་དང་། སྒྲ་ཞིག་གིས་དེ་ལ་བརྗོད་གསལ། ཁྱོད་ཀྱིས་ཤ་དེ་ལས་འདོད་པ་མ་ཚིམས་བར་དུ་ཟ་ཤིག

⁶ངས་བལྟ་བཞིན་བསྡད་ཡོད་སྐབས་སེམས་ཅན་གཞན་ཞིག་མཐོང་བྱུང་བས། དེ་ནི་གཟིགས་དང་འདྲ་བ་ཡིན་པ་ལ། དེའི་རྒལ་པར་བྱ་དང་འདྲ་བའི་ཤོག་པ་བཞི་ཡོད་པ་དང་། དེ་ལ་མགོ་བཞི་ཡོད་པ་ཡིན་ཏེ། དེ་ལ་མཐུ་དང་དབང་ཆ་སོགས་སྤྲད་ཡོད་པ་ཡིན་ནོ།

⁷ངས་བལྟ་བཞིན་བསྡད་ཡོད་སྐབས་སེམས་ཅན་བཞི་པ་ཞིག་མཐོང་བྱུང་བས། དེ་ནི་སྟོབས་ཤུགས་ཆེ་ཞིང་རྔམ་གཟི་ལྡན་ལ་འཇིགས་སུ་རུང་བ་ཞིག་ཡོད་པ་ཡིན་ཏེ། དེའི་ལྕགས་ཀྱི་སོ་ཆེན་པོས་རང་གིས་བསད་པའི་སེམས་ཅན་རྣམས་དུམ་བུར་བཟོས་པ་དང་། རྐང་པས་བརྫིས་ཀྱི་ཡོད་པ་ཡིན་ནོ། དེ་ལ་སེམས་ཅན་གཞན་དང་མི་འདྲ་བ་ར་ཅོ་བཅུ་ཡོད་ཅིང་།

⁸ངས་རྭ་ཅོ་དེ་ཚོར་ཞིབ་པར་བལྟས་པ་ལས། དེ་ཚོའི་དཀྱིལ་ནས་རྭ་ཅོ་ཆུང་ངུ་ཞིག་སྐྱེས་བཞིན་ཡོད་པ་མཐོང་བྱུང། དེས་སྔོན་གྱི་རྭ་ཅོའི་ཁོངས་ནས་ར་ཅོ་གསུམ་རྩ་བཀོག་བཏང་ཞིང་། རྭ་ཅོ་དེ་ལ་མིའི་མིག་དང་རང་བསྟོད་ཆེ་བའི་གཏམ་གླེང་སྨྲ་བའི་ཁ་ཞིག་ཀྱང་ཡོད་པ་ཡིན་ནོ༎

⁹ངས་བལྟ་བཞིན་བསྡད་ཡོད་སྐབས། ཁྲི་མང་པོ་ཞིག་སྒྲིག་ནས་བཞག་པ་དང་། དུས་ཀུན་ཏུ་གསོན་པོར་བཞུགས་ཡོད་པ་དེ་ནི་ཁྲི་ཞིག་གི་སྟེང་དུ་བཞུགས་ཤིང་། ཁོང་གི་ན་བཟའ་ནི་ཁ་བ་དང་མཚུངས་ཤིང་། ཁོང་གི་དབུ་སྐྲ་ལྷད་མེད་པ་བལ་བཞིན་དུ་ཡིན་པ་དང་། ཁོང་གི་བཞུགས་ཁྲི་ནི་མེ་ལྕེའི་འཁོར་ལོའི་ཐོག་ཏུ་བཞག་ཡོད་པ་དང་དེ་འབར་བཞིན་ཡོད་དོ།

¹⁰བཞུགས་ཁྲི་དེ་ལས་མེའི་གཙང་པོ་ཞིག་ཐོན་བཞིན་ཡོད་པ་དང་། མི་སྟོང་ཕྲག་མང་པོས་ཁོང་ལ་བཀུར་སྟི་ཞུ་ཕྱིར་དེར་འཛོམས་ཡོད་ཅིང་། ཁོང་གི་མདུན་དུ་མི་བྱེ་བ་མང་པོ་ཡར་ལང་ནས་བསྡད་ཡོད་པ་ཡིན་ནོ། ཁྲིམས་རའི་ས་དེར་ལྷན་ཚོགས་མགོ་ཚུགས་ཤིང་ཁྲིམས་དེབ་རྣམས་ཁ་ཕྱེས་སོ།

¹¹ངས་བལྟ་བཞིན་བསྡད་ཡོད་སྐབས། ར་ཅོ་ཆུང་ངུ་དེས་རང་བསྟོད་ཆེན་པོའི་གཏམ་གླེང་བྱེད་བཞིན་པ་དེ་ངས་ད་དུང་ཐོས་བྱུང་། བལྟས་བཞིན་པ་དང་། སེམས་ཅན་བཞི་པ་དེ་བསད་ནས་དེའི་རོ་དེ་མེའི་ནང་དུ་དབྱགས་ཏེ་འཇིག་པར་བྱས་སོ།

¹²སེམས་ཅན་གཞན་ཚོའི་དབང་རྣམས་འཕྲོག་པ་རེད། འོན་ཀྱང་དེ་ཚོར་དུས་ཡུན་གང་ཙང་ཞིག་གི་ཆེད་དུ་གསོན་པོར་གནས་བཅུག་གོ

¹³མཚན་མོའི་ཞལ་གཟིགས་དེའི་ནང་དུ་ངས་མིའི་གཟུགས་དང་འདྲ་བ་ཞིག་མཐོང་བྱུང་། ཁོང་ནི་ངའི་ཕྱོགས་སུ་ཕེབས་བཞིན་ཡོད་པ་དང་། ཁོང་ལ་ཕྱོགས་བཞི་ནས་སྤྲིན་པས་བསྐོར་ཡོད་པ་དང། ཁོང་ནི་རྒྱུན་དུ་གསོན་པོར་བཞུགས་ཡོད་པ་དེའི་དྲུང་དུ་བཅར་ནས་དེར་བཞུགས་སོ།

¹⁴རྒྱལ་ཁམས་ཀུན་གྱི་མི་རིགས་འདྲ་མིན་དང་། སྡེ་དང་སྐད་རིགས་མི་འདྲ་བའི་མི་ཐམས་ཅད་ཀྱིས་ཁོང་ལ་ཞབས་ཏོག་ཞུ་ཕྱིར། ཁོང་ལ་དབང་ཆ་དང་གཟེངས་བསྟོད་དང་མངའ་དབང་བཅས་འབུལ་བ་ཡིན་ནོ། ཁོང་གི་དབང་ཆ་རྒྱུན་དུ་གནས་ཤིང་། ཁོང་གི་ཆབ་སྲིད་ཀྱི་མཐའ་ནི་ནམ་ཡང་མེད་པ་ཡིན་ནོ༎

¹⁵ངས་ཞལ་གཟིགས་རྣམས་དེ་མཐོང་ནས་སེམས་ནང་འཇིགས་སྣང་དང་དངངས་ཚབས་ཆེན་པོ་བསྐྱེད་དེ།

¹⁶དེར་ལང་ནས་བསྡད་ཡོད་པའི་ནང་ནས་གཅིག་གི་རྩར་ཕྱིན་ནས་དེའི་དོན་འགྲེལ་ཤོད་ཕྱིར་སྨྲས་པས། ཁོས་ང་ལ་དེའི་དོན་བཤད་བྱུང་།

¹⁷དེས་བརྗོད་གསལ། སེམས་ཅན་ཆེན་པོ་བཞི་ནི་མ་འོངས་པར་འཇིག་རྟེན་དུ་ཡོང་རྒྱུ་ཡིན་པའི་རྒྱལ་ཁམས་བཞི་པོ་དེ་ཡིན་པ་དང་།

¹⁸བླ་ན་མེད་པའི་དཀོན་མཆོག་གི་སྐྱེ་བུ་རྣམས་ལ་རྒྱལ་སྲིད་ཀྱི་མངའ་དབང་ཐོབ་རྒྱུ་ཡིན་པ་དང་། དེ་ནི་དུས་རྒྱུན་དུ་རང་གི་ལག་ཏུ་གནས་པར་འགྱུར་རོ།

¹⁹དེ་རྗེས་ངས་སེམས་ཅན་བཞི་པ་དེའི་སྐོར་ལ་ཤེས་འདོད་བྱས་ཤིང་། དེ་ནི་སེམས་ཅན་གཞན་དང་མི་འདྲ་བ་འཇིགས་རུང་ལྡན་པ་ཞིག་ཡིན་པ་མ་ཟད། དེས་བསད་པའི་སེམས་ཅན་དེ་ལ་ལྕགས་ཀྱི་སོ་དང་ལིའི་སྡེར་མོས་དུམ་བུར་བཟོས་པའི་རྗེས་སུ་རྐང་པས་བརྫིས་ཀྱི་ཡོད་པ་དང།

²⁰ངས་དེའི་མགོ་ལ་ཡོད་པའི་རྭ་ཅོ་བཅུ་དང་། རྗེས་སུ་སྐྱེས་པའི་རྭ་ཅོ་དེས། སྔོན་མའི་རྭ་ཅོ་གསུམ་རྩ་བཀོག་བཏང་བ་དེའི་སྐོར་ལ་ཤེས་འདོད་བྱས་པ་ཡིན། རྭ་ཅོ་དེ་ལ་མིག་རྣམས་དང་ཁའང་ཡོད་པ་དང་། དེས་ང་རྒྱལ་གྱི་གཏམ་གླེང་བྱས་ཤིང་། དེ་ནི་སེམས་ཅན་གཞན་དག་ལས་ཀྱང་འཇིགས་སུ་རུང་བ་ཞིག་ཡོད་པ་ཡིན་ནོ།

²¹ངས་བལྟས་བཞིན་བསྡད་ཡོད་པ་ལས། རྭ་ཅོ་དེས་དཀོན་མཆོག་གི་སྐྱེ་བུ་རྣམས་ལ་དམག་འཐབ་བྱས་ཏེ་རྒྱལ་ཁ་ཐོབ་པ་དང་།

²²དུས་རྒྱུན་དུ་གསོན་པོར་བཞུགས་པ་དེ་ཕེབས་ནས། བླ་ན་མེད་པའི་དཀོན་མཆོག་གི་སྐྱེ་བུ་རྣམས་ཀྱི་ཕྱོགས་མཛད་དེ་ཞལ་ཆེ་གཅོད་པ་དང་། དཀོན་མཆོག་གི་སྐྱེ་བུ་རྣམས་ཀྱིས་རྒྱལ་སྲིད་ཀྱི་མངའ་དབང་ཐོབ་པའི་དུས་ལ་བབས་ཡོད་པ་ཡིན་ནོ།

²³ང་ལ་དོན་འགྲེལ་བཤད་པ་ནི། སེམས་ཅན་བཞི་པ་དེ་ནི་མ་འོངས་པར་འཇིག་རྟེན་དུ་འབྱུང་རྒྱུའི་རྒྱལ་ཁམས་བཞི་པ་དེ་ཡིན་ཅིང་། དེ་ནི་རྒྱལ་ཁམས་གཞན་དག་ལས་མི་འདྲ་བ་ཞིག་ཡོང་རྒྱུ་དང་། དེས་འཇིག་རྟེན་ཚང་མ་དབང་གནོན་བྱས་ཏེ་རྐང་རྫིས་གཏོང་རྒྱུ་དང་།

²⁴རྭ་ཅོ་བཅུའི་དོན་ནི་རྒྱལ་ཁམས་དེའི་ཐོག་ཏུ་རྒྱལ་སྲིད་སྐྱོང་མཁན་རྒྱལ་པོ་བཅུ་ལ་མཚོན་པ་དང་། དེ་རྗེས་རྒྱལ་པོ་གཞན་ཞིག་འབྱུང་རྒྱུ་ཡིན་པས། དེ་ནི་རྒྱལ་པོ་སྔོན་མ་རྣམས་དང་མི་འདྲ་བ་མ་ཟད། དེས་རྒྱལ་པོ་གསུམ་གྱི་ཐོག་ཏུ་རྒྱལ་ཁ་ཐོབ་པར་འགྱུར།

²⁵དེས་བླ་ན་མེད་པའི་དཀོན་མཆོག་ལ་བཀུར་བ་འདེབས་ཏེ། དཀོན་མཆོག་གི་སྐྱེ་བུ་རྣམས་ལ་གནོད་འཚེ་གཏོང་ཞིང་། ཆོས་ཁྲིམས་དང་དུས་སྟོན་རྣམས་ལ་སྒྱུར་བཅོས་གཏོང་ཐབས་བྱེད་པ་དང་། ལོ་གསུམ་དང་ཕྱེད་ཀའི་བར་དུ་དཀོན་མཆོག་གི་འབངས་རྣམས་དེའི་མངའ་འོག་ཏུ་གནས་དགོས་རྒྱུ་དང།

²⁶དེ་རྗེས་མཐོ་རིས་ཀྱི་ཞལ་ཆེའི་འདུ་ཚོགས་ཚོགས་ཏེ། ཁོའི་མངའ་ཐང་འཕྲོག་ནས་དེ་ལ་རྩ་མེད་གཏོང་བར་འགྱུར།

²⁷འཇིག་རྟེན་ཡོངས་ཀྱི་རྒྱལ་ཁབ་རྣམས་ཀྱི་དབང་དང་མངའ་ཐང་ཚང་མ་བླ་ན་མེད་པའི་དཀོན་མཆོག་གི་སྐྱེ་བུ་རྣམས་ལ་སྤྲོད་རྒྱུ་ཡིན་པ་དང། དེ་ཚོའི་རྒྱལ་སྲིད་ཀྱི་མངའ་ཐང་ནི་མཐའ་མེད་པ་ལགས་ཤིང་། འཇིག་རྟེན་ཡོངས་ཀྱི་རྒྱལ་པོ་ཚང་མས་དེ་ཚོར་སྲི་ཞུ་ཞབས་ཏོག་ཞུས་ཏེ། དེ་ཚོའི་བཀའ་ལ་རྩིས་སྲུང་ཞུ་བར་འགྱུར།

²⁸ངས་ཞུ་རྒྱུའི་གནས་ཚུལ་གྱི་མཐའ་བསྡོམས་ནི་དེ་ཙམ་ཡིན་ཏེ། ང་ཧ་ཅང་འཇིགས་ཤིང་། ངའི་ངོ་མདངས་ཀྱང་སེར་པོར་བསྒྱུར་བ་དང་། གནས་ཚུལ་དེ་ཚོ་ཚང་མ་ངའི་སེམས་ནང་བཞག་ཡོད་པ་ཡིན་ནོ༎