Read Tibetan — པོད་སྐད་Tibetan Old Testament 2011 དྷ་ནི་ཨེལ 8 Bible Online

དྷ་ནི་ཨེལ 8 - Tibetan — པོད་སྐད་Tibetan Old Testament 2011 bible

དྷ་ནི་ཨེལ 8

¹རྒྱལ་པོ་བྷེལ་ཤ་ཛར་གྱི་རྒྱལ་སྲིད་སྐྱོང་ལོ་གསུམ་པར་ངས་ཞལ་གཟིགས་གཉིས་པ་མཐོང་བྱུང་བས།

²ཞལ་གཟིགས་དེའི་ནང་ང་ནི་བློ་བུར་དུ་ཨེ་ལམ་ཞིང་ཆེན་གྱི་ལྕགས་རིས་བསྐོར་བའི་གྲོང་ཁྱེར་སུ་སའི་ནང་དུ་བསླེབས་འདུག རང་ཉིད་གཙང་པོ་ཨུ་ལཨེའི་འགྲམ་དུ་ལངས་ནས་བསྡད་ཡོད་པ་དང་།

³གཙང་པོའི་ཉེ་འགྲམ་དུ་རྭ་ཅོ་རིང་པོ་གཉིས་ཡོད་པའི་ཕོ་ལུག་ཅིག་མཐོང་བྱུང་། དེའི་རྭ་ཅོ་ཡ་གཅིག་ནི་གཞན་དེ་ལས་རིང་བ་དང་གསར་དུ་སྐྱེས་པ་ལྟ་བུ་ཞིག་ཡོད་པ་ཡིན་ཏེ།

⁴ཕོ་ལུག་དེས་ནུབ་དང་བྱང་དང་ལྷོ་ཕྱོགས་ཀུན་ཏུ་རང་གི་རྭ་ཅོ་དབྱུགས་པས། སེམས་ཅན་གཞན་དག་སུས་ཀྱང་དེ་ལ་བཀག་ཐབས་བྱེད་པའམ། རང་ཉིད་ལ་དེའི་ནུས་སྟོབས་ལས་སྐྱོབ་ཐུབ་མཁན་ཞིག་མེད་པ་ཡིན་པས། དེ་ནི་བག་སེམས་མེད་པར་རང་འདོད་བཞིན་དུ་སྤྱོད་ཅིང་ཡོད་པ་ཡིན་ནོ།

⁵ང་ནི་དེའི་དོན་དེ་གང་ཡིན་ནམ་ཞེས་བསམ་ནས་བསྡད་ཡོད་པ་ལས། བློ་བུར་དུ་ནུབ་ཕྱོགས་ཁུལ་ནས་ར་ཞིག་རྒྱུག་ཡོང་ཞིང་། དེའི་བང་རྒྱུག་སྟངས་ནི་རྐང་པ་ས་ལ་མ་རེག་པ་སྟ་བུའི་མགྱོགས་པོར་རྒྱུག་གི་ཡོད་པ་མ་ཟད། ར་ཕོ་དེའི་མིག་གཉིས་ཀྱི་དབུས་སུ་རྭ་ཅོ་མངོན་གསལ་དོད་པོ་ཞིག་ཡོད་པ་དང་།

⁶ར་དེ་ནི་སྔར་ངས་གཙང་པོའི་འགྲམ་དུ་མཐོང་བའི་ཕོ་ལུག་དེའི་ཕྱོགས་སུ་ནུས་ཤུགས་ཆེན་པོས་རྒྱུག་ཡོང་བ་དང་།

⁷ངས་བལྟ་ཞིང་བསྡད་ཡོད་པ་ལས། དེས་ཕོ་ལུག་དེ་ལ་ཁྲོ་བ་ཆེན་པོས་བརྡུངས་ནས་དེའི་ར་ཅོ་གཉིས་ཀ་བཅག་པ་དང། ཕོ་ལུག་དེ་ལ་གདོང་ལེན་བྱེད་ཐུབ་པའི་ནུས་ཤུགས་མེད་པས། ར་དེས་ཕོ་ལུག་དེ་ས་ལ་བརྡབས་ནས་རྐང་པས་བརྫིས་ཀྱང་། དེ་ལ་སྐྱབས་གྲོགས་བྱེད་ཐུབ་མཁན་སུའང་མེད་པ་ཡིན་ནོ།

⁸ར་དེ་ཧ་ཅང་ངར་སེམས་ཆེ་རུ་སྐྱེད་དེ། ཁོའི་ནུས་སྟོབས་ཤིན་ཏུ་དར་བའི་སྐབས་སུ་ཁོའི་རྭ་ཅོ་དེ་ཆག་པ་དང་། དེའི་ཚབ་ལ་རྭ་ཅོ་གསར་པ་མངོན་གསལ་ཆེ་བ་བཞི་སྐྱེས་ཤིང་། རྭ་ཅོ་དེ་དག་གི་རྩེ་ནི་ས་ཕྱོགས་སོ་སོར་ཕྱོགས་ནས་ཡོད་པ་ཡིན་ནོ།

⁹ར་ཅོ་དེ་ཚོའི་ཁོངས་ནས་གཅིག་ལས་རྭ་ཅོ་ཆུང་ངུ་ཞིག་སྐྱེས་ཏེ། དེའི་ནུས་མཐུ་ནི་ལྷོ་དང་ཤར་དང་ཞལ་བཞེས་གནང་བའི་ཡུལ་བར་དུ་ཁྱབ་བོ།

¹⁰དེའི་ནུས་སྟོབས་ཧ་ཅང་རྒྱས་ཏེ་མཐོ་རིས་ཀྱི་དཔུང་ཚོགས་སམ་རྒྱུ་སྐར་གྱི་ཚོགས་ལའང་འཐབ་རྒོལ་བྱེད་ནུས་པར་འགྱུར་བ་དང། དེས་སྐར་མ་འགའ་ཤས་ས་ལ་མར་ལྷུང་བར་བྱས་ཏེ་རྐང་པའི་འོག་ཏུ་བརྫིས་སོ།

¹¹དེས་མཐོ་རིས་ཀྱི་དཔུང་ཚོགས་ཀྱི་སྲས་ལའང་རྒོལ་བ་དང། དེ་ལ་ཉིན་རེར་ཕུལ་བའི་དམར་མཆོད་རྣམས་ཀྱང་བཀག་ཅིང་། དེའི་མཆོད་ཁང་ཡང་མི་གཙང་བར་བྱས་སོ།

¹²དེར་མི་རྣམས་ཀྱིས་ཉིན་རེར་ཚུལ་བཞིན་དམར་མཆོད་འབུལ་རྒྱུའི་ཚབ་ལ་སྡིག་པའི་ལས་ངན་ཤ་སྟག་བྱས་ཏེ། བདེན་པའི་ཆོས་དེ་ས་ལ་སྐྱུར་བ་ལྟ་བུའི་རྩིས་མེད་བྱས་ཤིང་། རྭ་ཅོ་དེས་བྱས་པའི་ལས་དོན་ཚང་མར་ལམ་འགྲོ་བྱུང་ངོ་།

¹³དེ་རྗེས་ཕོ་ཉ་ཞིག་གིས་ཕོ་ཉ་གཞན་ཞིག་ལ་འདྲི་གླེང་བྱེད་བཞིན་པར་ངས་ཐོས་གསལ། ཞལ་གཟིགས་ནང་དུ་གང་མཐོང་བ་རྣམས་ག་དུས་བར་དུ་གནས་སམ། ཉིན་རེའི་དམར་མཆོད་ཀྱི་ཚབ་ཏུ་ཉེན་ཚབ་ཆེ་བའི་སྡིག་ལས་ངན་པ་ག་དུས་བར་དུ་གནས་སམ། མཐོ་རིས་ཀྱི་དཔུང་ཚོགས་དང་དེའི་མཆོད་ཁང་བཅས་ག་དུས་བར་དུ་རྐང་འོག་ཏུ་བརྫིས་པར་འགྱུར་རམ།

¹⁴ཕོ་ཉ་གཞན་དེས་ལན་འདེབས་བྱེད་པ་ངས་ཐོས་གསལ། དེ་ནི་སྔ་དགོང་ ༢,༣༠༠ བར་དུ་མུ་མཐུད་དེ་གནས་རྒྱུ་དང་། དེའི་རིང་ལ་སུས་ཀྱང་སྔ་དགོང་གཉིས་ཀྱི་དམར་མཆོད་མི་འབུལ་ཞིང་། དེ་རྗེས་མཆོད་ཁང་དེ་སྔར་གྱི་གནས་སྟངས་དེ་བཞིན་གསོ་བར་འགྱུར་རྒྱུ་ཡིན༎

¹⁵ངས་ཞལ་གཟིགས་དེའི་དོན་གང་ཡིན་ནམ་ཞེས་བསམ་ཞིང་བསྡད་ཡོད་སྐབས། བློ་བུར་དུ་ངའི་མདུན་ན་སྐྱེ་བོ་ཞིག་ལངས་ནས་བསྡད་འདུག

¹⁶ངས་གཙང་པོ་ཨུ་ལཨེ་ཕྱོགས་ནས་གསུང་སྐད་ཅིག་ཕེབས་པ་ཐོས་གསལ། ཀྱེ་གྷབ་རི་ཨེལ། ཁོས་གང་མཐོང་བ་དེའི་དོན་ཤོད་ཅིག

¹⁷དེ་ནས་གྷབ་རི་ཨེལ་ངའི་རྩར་ཡོང་སྟེ་ངའི་འགྲམ་དུ་ལངས་པས། ང་ཧ་ཅང་འཇིགས་ཤིང་ས་ལ་མར་འགྱེལ་བྱུང་། ཁོང་གིས་ང་ལ། ཀྱེ་མི་རྟགས་པའི་མི། ཞལ་གཟིགས་དེའི་དོན་ཤེས་པར་བྱོས་ཤིག། ཞལ་གཟིགས་དེ་ནི་འཛམ་གླིང་གི་མཐའ་མའི་དུས་ཀྱི་སྐོར་ལ་ཡིན་ནོ། ཞེས་སྨྲས་སོ།

¹⁸ཕོ་ཉ་དེས་གཏམ་གླེང་བྱེད་བཞིན་པའི་སྐབས་སུ་ང་ནི་ས་ཁར་དྲན་མེད་དུ་འགྱེལ་མོད། འོན་ཀྱང་དེས་ང་ལ་ཡར་བསླངས་ཏེ་སྨྲས་པ།

¹⁹དཀོན་མཆོག་གི་ཐུགས་ཁྲོའི་འགྲུབ་འབྲས་གང་བྱུང་སྐོར་ངས་ཁྱོད་ལ་སྟོན་རྒྱུ་ཡིན་པ་དང་། ཞལ་གཟིགས་དེ་ནི་མཐའ་མའི་དུས་ཀྱི་སྐོར་ལ་ཡིན་ཅིང་།

²⁰ཁྱོད་ཀྱིས་ཞལ་གཟིགས་ནང་མཐོང་བའི་ཕོ་ལུག་ར་ཅོ་གཉིས་ཡོད་པ་དེ་ནི་མ་དཱ་དང་པར་སི་ཡའི་རྒྱལ་ཁབ་གཉིས་ལ་མཚོན་པ་དང་།

²¹ར་དེ་ནི་གྷིརིསི་ཀྱི་རྒྱལ་ཁབ་དང། དེའི་མིག་གཉིས་ཀྱི་དབུས་སུ་ཡོད་པའི་རྭ་ཅོ་མངོན་གསལ་དོད་པོ་དེ་ནི་རྒྱལ་ཁབ་དེའི་རྒྱལ་པོ་དང་པོ་དེ་ལ་མཚོན་པ་ཡིན་ཏེ།

²²རྭ་ཅོ་དང་པོ་དེ་ཆག་ནས་གསར་དུ་རྭ་ཅོ་བཞི་སྐྱེས་པ་དེ་ནི། རྒྱལ་ཁབ་དེ་རྒྱལ་ཁམས་ཆུང་ཁག་བཞི་ལ་ཆ་བགོས་བྱེད་རྒྱུའི་རྟགས་མཚན་ཡིན་པ་དང་། རྒྱལ་ཁམས་བཞི་པོ་དེ་དག་ནི་སྔར་གྱི་རྒྱལ་ཁབ་དེ་བཞིན་སྟོབས་ཆེན་པོར་གནས་པར་མི་འགྱུར་རོ།

²³རྒྱལ་ཁབ་དེ་ཚོའི་མཐའ་མའི་དུས་ལ་བསླེབས་སྐབས། དེ་དག་གི་ངན་སྤྱོད་ཚད་ལས་འགལ་ཞིང་། དེ་ཚོར་ཉེས་ཆད་གཏོང་འོས་པར་འགྱུར་རྒྱུ་དང་། དེར་རྒྱལ་པོ་རང་འདོད་ཆེ་ལ། ངན་སེམས་ལྡན་ཞིང་གཡོ་སྒྱུ་ཆེ་བ་ཞིག་འབྱུང་རྒྱུ་དང་།

²⁴དེ་ནི་མཐུ་སྟོབས་དང་ལྡན་པར་འགྱུར་རྒྱུ་ཡིན་མོད། འོན་ཀྱང་མཐུ་སྟོབས་དེ་ནི་རང་གི་ནུས་པ་ལས་མ་ཡིན་ནོ། དེས་འཇིག་སྐྱོན་ཆེན་པོ་གཏོང་རྒྱུ་ཡིན་པ་མ་ཟད། ཁོས་བྱས་པའི་ལས་དོན་ཚང་མར་ལམ་འགྲོ་བྱུང་ཡོང། དེས་མི་མངའ་ཐང་ཆེན་པོ་རྣམས་དང་དཀོན་མཆོག་གི་སྐྱེ་བུ་རྣམས་ལའང་གནོད་སྐྱོན་གཏོང་ཉེན་ཡོད།

²⁵ཁོ་ནི་གཡོ་སྒྱུ་ཆེ་བས་མི་གཞན་ལ་མགོ་སྐོར་གཏོང་བར་མཁས་པ་དང་། ང་རྒྱལ་བསྐྱེད་དེ་ཟོན་བརྡ་མ་བྱེད་པར་མི་མང་པོར་འཇིག་སྐྱོན་གཏོང་བར་འགྱུར། དེས་མངའ་བདག་རྣམས་ཀྱི་གཙོ་བོ་ལའང་རྒོལ་སེམས་ཞུ་རྒྱུ་ཡིན་མོད། འོན་ཀྱང་ཁོ་ནི་མིའི་ནུས་མཐུས་མ་ཡིན་པར་འཇིག་རྒྱུ་ཡིན་ནོ།

²⁶ཁྱོད་ལ་བཤད་ཟིན་པའི་སྔ་དགོང་གཉིས་ཀྱི་དམར་མཆོད་ཀྱི་སྐོར་གྱི་ཞལ་གཟིགས་དེ་ནི་དངོས་སུ་འགྲུབ་རྒྱུ་ཡིན་མོད། འོན་ཀྱང་དེ་ནི་ད་ལྟ་གསང་བར་བཞག་དགོས། གང་ལ་ཟེར་ན། དེ་ནི་ཡུན་རིང་རྗེས་སུ་མ་གཏོགས་འགྲུབ་པར་མི་འགྱུར་རོ།

²⁷ང་ནི་ཡིད་སྨུག་སྟེ་ཉིན་ཞག་མང་པོའི་བར་དུ་ལུས་ཁམས་མི་བདེ་བར་འགྱུར་རོ། དེ་རྗེས་ང་ལངས་ནས་རྒྱལ་པོས་ང་ལ་བསྐུལ་བའི་ལས་བྱེད་པར་ཕྱིར་ལོག་བྱས་མོད། འོན་ཀྱང་ཞལ་གཟིགས་དེའི་སྐོར་ལ་ང་ནི་མགོ་འཐོམས་ཤིང་། དེའི་སྐོར་གང་ཡང་རྟོགས་མ་ཐུབ་བོ༎