Read Tibetan — པོད་སྐད་Tibetan Old Testament 2011 ཧོ་ཟེ 1 Bible Online

ཧོ་ཟེ 1 - Tibetan — པོད་སྐད་Tibetan Old Testament 2011 bible

ཧོ་ཟེ 1

¹ཡ་ཧུ་དཱའི་རྒྱལ་པོ་ཨུ་ཛི་ཡཱ་དང་ཡོ་ཐམ་དང་ཨ་ཧཛེ་དང་། ཧེ་ཛི་ཀི་ཡཱ་བཅས་ཀྱི་དུས་དང་། ཡེ་ཧོ་ཨཤེའི་བུ་ཡེ་རོ་བོམ་ཨིསི་རཱཨེལ་གྱི་རྒྱལ་པོ་བྱས་པའི་དུས་སུ་གཙོ་བོ་དཀོན་མཆོག་གིས་བྷི་རིའི་བུ་ཧོ་ཟེའི་བརྒྱུད་ནས་གསུང་འཕྲིན་གནང་བ་འདི་ལྟར་ཡིན་ནོ།

²གཙོ་བོ་དཀོན་མཆོག་གིས་ཐོག་མར་ཧོ་ཟེའི་བརྒྱུད་ནས་ཨིསི་རཱཨེལ་ལ་གསུང་འཕྲིན་གནང་སྐབས། ཁོང་གིས་ཧོ་ཟེ་ལ་བཀའ་གནང་བ། ད་ཁྱོད་སོང་ལ་བུད་མེད་ཅིག་ལ་ཆང་ས་རྒྱོབ་ཅིག། ཡང་ཁྱོད་ཀྱི་ཆུང་མ་དེ་ནི་ཁྱོད་དང་དམ་ཚིག་མི་གཙང་ཞིང་། ཁྱོད་ཚོའི་བུ་ཕྲུག་རྣམས་ཀྱང་མོའི་གཤིས་ཁ་དང་མཚུངས་པར་འགྱུར། གནས་ཚུལ་དེ་དང་ཕྱོགས་མཚུངས་པར་ངའི་མི་འབངས་ཚོས་ཀྱང་ང་ལ་སྤངས་ཏེེ་དམ་ཚིག་མི་གཙང་བར་འགྱུར་ཡོད།

³དེ་ནས་ཧོ་ཟེས་དྷེབ་ལཱ་ཨེམ་གྱི་བུ་མོ་གྷོ་མེར་དང་ཆང་ས་རྒྱབ་ཏེ། ཁོ་གཉིས་ལ་ཐོག་མར་བུ་ཞིག་བྱུང་བའི་རྗེས་སུ།

⁴གཙོ་བོ་དཀོན་མཆོག་གིས་ཧོ་ཟེ་ལ། བུ་དེའི་མིང་ལ་ཡེཛ་རིལ་ཞེས་བཏགས་ཤིག། གང་ལ་ཟེར་ན། ཨིསི་རཱཨེལ་གྱི་རྒྱལ་པོའི་ཕ་མེས་ཡེ་ཧུ་ཞེས་པ་དེས་ཡེཛ་རིལ་དུ་སྲོག་གཅོད་བྱས་པའི་ཉེས་ལན་དུ། ངས་ཨིསི་རཱཨེལ་གྱི་རྒྱལ་པོ་ལ་རིང་མིན་ཉེས་ཆད་གཏོང་རྒྱུ་དང་། ངས་ཡེ་ཧུའི་མི་བརྒྱུད་རྩ་མེད་གཏོང་རྒྱུ་ཡིན།

⁵སྐབས་དེར་ངས་ཡེཛ་རིལ་གྱི་ལུང་གཤོང་དུ་ཨིསི་རཱཨེལ་གྱི་དཔུང་དམག་རྣམས་མེད་པར་བྱེད་རྒྱུ་ཡིན།

⁶དེ་རྗེས་གྷོ་མེར་ལ་བུ་མོ་ཞིག་སྐྱེས་པ་དང་། གཙོ་བོ་དཀོན་མཆོག་གིས་ཧོ་ཟེ་ལ་གསུངས་པ། མོའི་མིང་ལ་ལོ་རུ་ཧ་མ་[1] ཞེས་བཏགས་ཤིག གང་ལ་ཟེར་ན། ད་ཕྱིན་ངས་ཨིསི་རཱཨེལ་མི་མང་རྣམས་ལ་བརྩེ་བ་མི་བྱེད་ཅིང་། དེ་ཚོར་སྡིག་སེལ་ཡང་མི་བྱེད་དོ།

⁷འོན་ཀྱང་ངས་ཡ་ཧུ་དཱའི་མི་མང་རྣམས་ལ་བརྩེ་བ་བྱེད་ཅིང་། དེ་ཚོའི་དཀོན་མཆོག་གཙོ་བོ་དཀོན་མཆོག་ངས་དེ་ཚོ་ལ་སྐྱབས་རྒྱུ་ཡིན། འོན་ཀྱང་དམག་གི་རལ་གྲི་དང་། མདའ་གཞུ་དང་། རྟ་དང་རྟ་པ་བཅས་ཀྱི་སྒོ་ནས་སྐྱབས་པར་མི་འགྱུར་རོ།

⁸གྷོ་མེར་གྱིས་རང་གི་བུ་མོ་ལ་འོ་མ་བཅད་པའི་རྗེས་སུ། མོ་སླར་ཡང་མངལ་དང་ལྡན་ཞིང་བུ་ཞིག་སྐྱེས་སོ།

⁹གཙོ་བོ་དཀོན་མཆོག་གིས་ཧོ་ཟེ་ལ་གསུངས་པ། བུའི་མིང་ལ་ལོ་ཨམ་མི[2] ཞེས་བཏགས་ཤིག གང་ལ་ཟེར་ན། ཨིསི་རཱཨེལ་མི་མང་རྣམས་ངའི་མི་འབངས་མ་ཡིན་ཞིང་། ངའང་དེ་ཚོའི་དཀོན་མཆོག་མ་ཡིན་ནོ༎

¹⁰ཨིསི་རཱཨེལ་མི་མང་རྣམས་ནི་གྲངས་ལས་འདས་ཤིང་རྩིས་དཀའ་བའི་རྒྱ་མཚོའི་བྱེ་མ་དང་མཚུངས་ཤིང་། ད་ལྟ་དཀོན་མཆོག་གིས་ཁོ་ཚོ་ལ་ངའི་མི་འབངས་མ་ཡིན་ཞེས་གསུངས་ཀྱང་། ཁོང་གིས་དེ་ཚོ་ལ། ཁྱོད་ཚོ་ནི་གསོན་པོའི་དཀོན་མཆོག་གི་བུ་དང་བུ་མོ་ཡིན་ནོ་ཞེས་གསུངས་པའི་དུས་དེ་ཉེ་བར་རན་པ་ཡི་ནོ།

¹¹ཡ་ཧུ་དཱའི་མི་མང་དང་ཨིསི་རཱཨེལ་མི་མང་གཉིས་གཅིག་ཏུ་ཟླ་སྒྲིལ་ཏེ། དེ་གཉིས་ཐུན་མོང་གི་ཐོག་ནས་འགོ་བྱེད་གཅིག་བསྐོ་གཞག་བྱེད་རྒྱུ་ཡིན་པ་མ་ཟད། དེ་ཚོ་སླར་ཡང་རང་ཡུལ་དུ་ཡར་རྒྱས་ཕུན་སུམ་ཚོགས་པར་འགྱུར་རྒྱུ་ཡིན་ནོ། ཡེཛ་རིལ་གྱི་ཉིན་མོ་དེ་ནི་ཉིན་མོ་ཆེན་པོ་ཞིག་ཡིན་པར་འགྱུར༎