Read Tibetan — པོད་སྐད་Tibetan Old Testament 2011 ཧོ་ཟེ 11 Bible Online

ཧོ་ཟེ 11 - Tibetan — པོད་སྐད་Tibetan Old Testament 2011 bible

ཧོ་ཟེ 11

¹གཙོ་བོ་དཀོན་མཆོག་གིས་གསུངས་པ། ཨིསི་རཱཨེལ་ཕྲུ་གུ་ཡིན་པའི་སྐབས་སུ་ངས་ཁོ་ལ་གཅེས་པོ་བྱས་པ་ཡིན། ངས་རང་གི་བུ་ལ་ཨི་ཇིབ་ནས་ཕྱིར་བོས་པ་ཡིན།

²ངས་དེ་ཚོ་ལ་ཇི་ཙམ་བོས་ཀྱང་། དེ་ལས་ཀྱང་དེ་ཚོ་ཐག་རིང་དུ་སོང་ངོ་། དེ་ཚོས་བྷལ་ལ་དམར་མཆོད་འབུལ་བ་དང་། རྐོས་པའི་འདྲ་སྐུ་རྣམས་ལ་སྤོས་བདུག་གོ།

³ཨིསི་རཱཨེལ་པ་ཚོར་ལག་པ་བཟུང་ནས་འགྲུལ་བར་སློབ་མཁན་དེ་ནི་ང་རང་ཡིན་ནོ། འོན་ཀྱང་ངས་དེ་ཚོ་ལ་ལྟ་སྐྱོང་བྱེད་པ་དེ་ཁོ་ཚོས་ངོས་ལེན་མ་བྱས་སོ།

⁴ངས་དེ་ཚོ་ལ་བྱམས་པ་དང་བརྩེ་བས་ཉེ་བར་འཁྱེར་ཡོང་བ་ཡིན། ངས་དེ་ཚོ་ལ་ཡར་ཀྱག་ནས་ངའི་འགྲམ་པར་འབྱར་བ་དང་། དེ་ཚོ་ལ་ཁ་ཟས་སྟེར་ཕྱིར་ང་སྒུར་བ་ཡིན།

⁵དེ་ཚོ་ངའི་རྩར་ཡོང་བར་མ་ཉན་ནོ། དེར་བརྟེན་དེ་ཚོ་ཨི་ཇིབ་ཡུལ་དུ་ཕྱིར་ལོག་དགོས་པ་དང་། ཨ་སུར་གྱིས་དེ་ཚོའི་སྟེང་དུ་རྒྱལ་སྲིད་སྐྱོང་བར་འགྱུར།

⁶དེ་ཚོའི་གྲོང་ཁྱེར་རྣམས་ལ་དམག་སླེབས་པ་དང་། གྲོང་ཁྱེར་གྱི་རྒྱལ་སྒོ་རྣམས་གཅོག་པར་འགྱུར། དེ་ཚོའི་བསམ་བློར་ཇི་ཡོད་པ་དེ་རང་བྱེད་པའི་རྐྱེན་གྱིས་ངའི་མི་འབངས་མེད་པར་འགྱུར།

⁷དེ་ཚོ་ང་ནས་ཕྱིར་ལོག་བྱེད་པར་ཨུ་ཚུགས་བྱེད་ཡོད་པ་དང་། དེ་ཚོས་ངུ་འབོད་བྱས་ཀྱང་དེ་ཚོའི་དཔུང་པ་ནས་སུ་ཞིག་གིས་གཉའ་ཤིང་དེ་བཏོན་པར་མི་འགྱུར།

⁸ཀྱེ་ཨིསི་རཱཨེལ་ངས་ཁྱོད་ལ་ཇི་ལྟར་སྤངས་ནུས་སམ། ངས་ཁྱོད་ལ་ཇི་ལྟར་དགྲ་བོའི་ལག་ཏུ་རྩིས་སྤྲོད་ཐུབ་བམ། ངས་ཁྱོད་ལ་ཇི་ལྟར་ཨད་མ་དང་འདྲ་བ་མེད་པར་བྱེད་ཐུབ་བམ། ཡང་ན་ཇི་ལྟར་ཛེ་བོ་ཨིམ་དང་འདྲ་བ་སྤྱོད་ཐུབ་བམ། ངའི་སྙིང་གིས་ལས་དེ་བྱ་འདོད་མེད། ཁྱོད་ཀྱི་ཆེད་དུ་ངའི་བརྩེ་བ་ཧ་ཅང་གི་གཏིང་རིང་པོ་ཡོད་དོ།

⁹ངས་རང་གི་ཁྲོ་བའི་ནང་ཁྱོད་ཚོ་ལ་ཉེས་ཆད་མི་བཏང་ངོ་། སྐྱར་དུ་ངས་ཨིསི་རཱཨེལ་ལ་ཚར་མི་བཅད་དོ། གང་ལ་ཟེར་ན། ང་ནི་དཀོན་མཆོག་ཡིན་པས་མི་མ་ཡིན་ནོ། ང་དམ་པ་མཆོག་ནི་ཁྱོད་ཚོ་མཉམ་དུ་ཡོད། ང་ཡང་སྐྱར་ཁྱོད་ཚོའི་རྩར་ཁྲོ་བའི་ངང་ཡོང་བར་མི་འགྱུར་རོ།

¹⁰ང་སེང་གེ་ལྟར་དེ་ཚོའི་དགྲ་བོ་ལ་ངར་སྐད་སྒྲོག་སྐབས། ངའི་མི་མང་ངའི་རྗེས་སུ་འབྲངས་བར་འགྱུར། དེ་ཚོ་ངའི་རྩར་ནུབ་ཕྱོགས་ནས་མྱུར་དུ་ཡོང་བར་འགྱུར།

¹¹དེ་ཚོ་ཨི་ཇིབ་ནས་བྱ་ལྟ་བུ་དང་ཨ་སུར་ནས་ཕུག་རོན་ལྟར་ཡོང་བར་འགྱུར། ངས་དེ་ཚོ་སླར་ཡང་སོ་སོའི་ཁྱིམ་དུ་འཁྲིད་རྒྱུ་ཡིན་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

¹²གཙོ་བོ་དཀོན་མཆོག་གིས་གསུངས་པ། ཨིསི་རཱཨེལ་གྱི་མི་རྣམས་ཀྱིས་རྫུན་དང་གཡོ་སྒྱུས་ང་ལ་བསྐོར་ནས་ཡོད་པ་དང་། ཡ་ཧུ་དའི་མི་རྣམས་ཀྱིས་ད་དུང་དམ་ཚིག་ལྡན་པའི་ང་དམ་པའི་དཀོན་མཆོག་ལ་ངོ་རྒོལ་བྱས་བཞིན་ཡོད་དོ༎