Read Tibetan — པོད་སྐད་Tibetan Old Testament 2011 ཧོ་ཟེ 13 Bible Online

ཧོ་ཟེ 13 - Tibetan — པོད་སྐད་Tibetan Old Testament 2011 bible

ཧོ་ཟེ 13

¹སྔོན་དུས་སུ་ཨེཕ་ར་ཡིམ་གྱིས་སྨྲ་བའི་སྐབས་སུ་ཨིསི་རཱཨེལ་པ་རྣམས་འཇིགས་ནས་འདར་བ་དང་། ཨེཕ་ར་ཡིམ་ནི་ཨིསི་རཱཨེལ་དུ་གཙོ་བོར་འགྱུར་རོ། འོན་ཀྱང་མི་ཚོས་བྷལ་ལ་མཆོད་ནས་སྡིག་པ་གྱིས་པས་དེའི་ཆེད་དུ་དེ་ཚོ་ཤི་བར་འགྱུར།

²ད་དུང་དེ་ཚོས་སྡིག་པ་མུ་མཐུད་ནས་གྱིས་པ་དང་། ལག་ཤེས་མཁས་པ་ཚོས་རང་གི་དོན་དུ་རང་གི་དངུལ་གྱི་བླུག་རྒྱབ་པའི་འདྲ་སྐུ་བཟོས་པ་དང་། སྤྱང་པོའི་སྒོ་ནས་དབྱིབས་སྟོན་པ་དང། མི་དེ་ཚོའི་སྐོར་ལ་འདི་སྐད་དུ། དེ་ཚོས་མིའི་དམར་མཆོད་འབུལ་གྱི་ཡོད་པ་དང་། བེའུའི་འདྲ་སྐུ་ལ་ཁ་སྐྱེལ་ལོ།

³དེའི་ཕྱིར་མི་འདི་ཚོ་ནི་སྔ་དྲོའི་སྨུག་པ་དང་ཟིལ་པ་འདྲ་བ་དེ་ཚོ་ཡང་ཡལ་བར་འགྱུར། རླུང་གིས་གཡུལ་འཐག་ནས་འཁྱེར་བའི་སོག་མ་དང་། སྐར་ཁུང་ནས་ཐོན་པའི་དུ་བ་ལྟ་བུ་ཡལ་བར་འགྱུར།

⁴གཙོ་བོ་དཀོན་མཆོག་གིས་གསུངས་པ། ཁྱོད་ཚོ་ཨི་ཇིབ་ནས་འདོན་མཁན་ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན། ང་མ་གཏོགས་ཁྱོད་ཚོའི་དཀོན་མཆོག་གཞན་ཞིག་མེད་དོ། ང་གཅིག་པུ་ཁྱོད་ཚོའི་སྐྱབས་མགོན་ཡིན།

⁵འབྲོག་སྟོང་དུ་ཉི་མ་ཚ་བའི་སྐབས་སུ་ངས་ཁྱོད་ཚོ་ལ་ལྟ་རྟོག་བྱས་པ་ཡིན།

⁶ཁྱོད་ཚོ་ས་གནས་བཟང་པོར་འབྱོར་ནས་ཚིམས་པ་དང་། ཁྱོད་ཚོར་ང་རྒྱལ་སྐྱེད་ནས་ང་ལ་བརྗེད་དོ།

⁷དེར་བརྟེན་ང་ཁྱོད་ཚོའི་སར་སེང་གེ་ལྟར་མཆོངས་རྒྱུ་དང་། གཟིག་ལྟ་བུ་ཁྱོད་ཚོའི་ལམ་དུ་འཇབ་ནས་སྡོད་ཀྱིས་ཡིན།

⁸ཕྲུ་གུ་འཕྲོག་པའི་མོ་དོམ་ལྟར་ཁྱོད་ཚོ་ལ་འཐབ་ནས་ངས་ཧྲལ་གྱིས་ཡིན། སེང་གེ་ལྟར་ངས་ཁྱོད་ཚོ་ལ་དེ་ག་རང་དུ་མིད་ཀྱིས་ཡིན། ནགས་ཀྱི་གཅན་གཟན་དང་འདྲ་བ་ངས་ཁྱོད་ཚོར་དུམ་བུར་བཟོ་བར་འགྱུར།

⁹ཀྱེ་ཨིསི་རཱཨེལ་ངས་ཁྱོད་ཚོ་ལ་མེད་པར་བཟོ་རྒྱུ་ཡིན། དེ་ནས་སུས་ཁྱོད་ཚོ་ལ་སྐྱབས་ཐུབ་བམ།

¹⁰ཁྱོད་ཚོས་རྒྱལ་པོ་དང་འགོ་དཔོན་རྣམས་དགོས་ཟེར་རོ། འོན་ཀྱང་དེ་ཚོས་ཇི་ལྟར་མི་རིགས་སྐྱོབ་ཐུབ་བམ།

¹¹ང་ཁྲོ་བའི་ངང་ངས་ཁྱོད་ཚོ་ལ་རྒྱལ་པོ་རྣམས་སྟེར་བ་ཡིན། ངའི་ཁྲོ་བ་དྲག་པོའི་ངང་ངས་དེ་ཚོ་ལ་འཁྱེར་བ་ཡིན།

¹²ཨིསི་རཱཨེལ་གྱི་སྡིག་པའི་གྲངས་ཐོ་རྒྱབ་ཡོད། གྲངས་ཐོ་འདི་ཚོ་སྲུང་ནས་བཞག་ཡོད།

¹³ཕྲུ་གུ་སྐྱེ་བའི་སྐབས་སུ་མངལ་ནས་ཕྱིར་ཐོན་པར་མི་འདོད་པ་ལྟར། ཨིསི་རཱཨེལ་ལ་གསོན་པོའི་གོ་སྐབས་ཐོབ་ཡོད་པ་དང་། འོན་ཀྱང་དེ་ཚོ་བློ་རྨོངས་པའི་རྐྱེན་གྱིས་གོ་སྐབས་མ་བླངས་སོ།

¹⁴ངས་མི་འདི་ཚོ་ལ་འཆི་བའི་གླིང་ནས་ཀྱང་སྐྱོབ་རྒྱུ་མིན། ཡང་ན་འཆི་བའི་སྟོབས་ལས་འདོན་རྒྱུ་མིན། ཀྱེ་འཆི་བ་ཁྱོད་ནད་རིམས་འཁྱེར་ཤོག། འཆི་བའི་གླིང་ཁྱོད་འཇིགས་པ་འཁྱེར་ཤོག། མི་འདི་ཚོ་ལ་ངས་ནམ་ཡང་སྙིང་རྗེ་བྱ་རྒྱུ་མིན།

¹⁵གལ་ཏེ་ཨིསི་རཱཨེལ་པ་རྩྭ་ངན་ལྟར་འཕེལ་ན་ཡང་། ངས་འབྲོག་སྟོང་ནས་ཤར་རླུང་ཚ་པོ་གཏོང་རྒྱུ་ཡིན། ཡང་དེ་ཡིས་ཆུ་མིག་དང་ཁྲོན་པ་རྣམས་སྐམ་པར་བྱེད་རྒྱུ་ཡིན། ཁོའི་རིན་ཐང་ཅན་གྱི་དངོས་པོ་རྣམས་འཕྲོག་པར་འགྱུར།

¹⁶ང་ལ་ས་མར་ཡས་རྒོལ་བའི་རྐྱེན་གྱིས་ཉེས་ཆད་འཁྱེར་དགོས་པ་ཡིན། མི་དེ་ཚོ་དམག་སར་ཤི་དགོས་པ་དང་ཕྲུ་གུ་རྣམས་ས་ཁར་བརྡབ་ནས་གསོད་པར་འགྱུར། བུད་མེད་སྦྲུམ་མ་རྣམས་ཀྱི་གྲོད་པ་གཤགས་པར་འགྱུར༎