Read Tibetan — པོད་སྐད་Tibetan Old Testament 2011 ཧོ་ཟེ 14 Bible Online

ཧོ་ཟེ 14 - Tibetan — པོད་སྐད་Tibetan Old Testament 2011 bible

ཧོ་ཟེ 14

¹ཀྱེ་ཨིསི་རཱཨེལ་རང་གི་དཀོན་མཆོག་གཙོ་བོ་དཀོན་མཆོག་གི་ཕྱོགས་སུ་ཕྱིར་ལོག་ཅིག ཁྱོད་ཚོ་ནི་རང་གི་སྡིག་པའི་རྐྱེན་གྱིས་མེད་པར་སོང་ཡོད།

²གཙོ་བོ་དཀོན་མཆོག་གི་ཕྱོགས་སུ་ལོག་ཅིག། སྨོན་ལམ་འདི་ནི་ཁོང་ལ་ཁྱོད་ཚོས་འབུལ་ཞིག། ང་ཚོའི་སྡིག་པ་ཚང་མ་བཟོད་གསོལ་གནང་ནས་ང་ཚོའི་སྨོན་ལམ་ལ་གསན་རོགས་གནང་། ང་ཚོའི་དམ་བཅའ་ལྟར་ང་ཚོས་ཁྱེད་ལ་བསྟོད་བསྔགས་འབུལ་ལོ།

³ཨ་སུར་གྱི་ང་ཚོ་ལ་ནམ་ཡང་སྐྱབས་མི་ཐུབ་པ་དང་། ཡང་དམག་གི་རྟ་ཚོས་ང་ཚོ་ལ་སྲུང་མི་ཐུབ། ང་ཚོ་རང་གི་བཟོས་པའི་སྐུ་འདྲ་ཚོ་ལ་ང་ཚོའི་དཀོན་མཆོག་ཟེར་ཡང་སྐྱར་ནམ་ཡང་བརྗོད་པར་མི་འགྱུར། གང་ལ་ཟེར་ན། ཀྱེ་གཙོ་བོ་དཀོན་མཆོག་དྭ་ཕྲུག་ཚོས་ཁྱེད་ནས་གཅིག་པུ་སྙིང་རྗེེ་ཐོབ་ཀྱི་ཡོད༎

⁴གཙོ་བོ་དཀོན་མཆོག་གིས་གསུངས་པ། ངའི་མི་འབངས་ལ་ངའི་རྩར་ཚུར་ཕྱིར་འཁྲིད་ཡོང་རྒྱུ་ཡིན། ངས་དེ་ཚོ་ལ་སེམས་ནས་བྱམས་པ་བྱ་རྒྱུ་ཡིན། ངའི་ཁྲོ་བ་དེ་ཚོ་ནས་དུས་རྒྱུན་གྱི་ཕྱིར་ཡལ་བར་འགྱུར།

⁵ང་ཨིསི་རཱཨེལ་མི་མང་གི་ཆེད་དུ་ས་སྐམ་སར་ཆར་ཆུ་བབས་པ་ལྟ་བུར་འགྱུར་རྒྱུ་ཡིན། དེ་ཚོ་མེ་ཏོག་ལྟར་ཤར་བ་དང་། ལེ་བ་ནོན་གྱི་ཤིང་སྡོང་ལྟར་དེ་ཡི་རྩ་བ་བརྟན་པོ་ཚུགས་པར་འགྱུར།

⁶དེ་ཚོ་གསར་དུ་སྐྱེས་ནས་གསོན་པོར་འགྱུར་བ་དང་། ཨ་རུ་རའི་སྡོང་པོ་ལྟར་མཛེས་པོ་ཆགས་པར་འགྱུར། ལེ་བ་ནོན་གྱི་འགྱམ་ཤིང་ལྟར་དེ་ཡི་དྲི་བཟང་ཁྱབ་པར་འགྱུར།

⁷ཡང་སྐྱར་དེ་ཚོ་ངའི་སྲུང་སྐྱོབ་འོག་ཏུ་བསྡད་པ་དང་། འབྲུ་ལྟར་དེ་ཚོ་འཕེལ་བར་འགྱུར། རྒུན་ཤིང་ལྟར་འཕེལ་བ་དང་། ལེ་བ་ནོན་གྱི་རྒུན་ཆང་ལྟར་དེ་ཚོ་སྐད་གྲགས་དང་ལྡན་པར་འགྱུར།

⁸ཀྱེ་ཨིསི་རཱཨེལ་པ་རྣམས། ད་སྐུ་འདྲ་ཚོ་དང་ངའི་དོན་ཅི་ཡོད། ངས་ཁྱོད་ཚོའི་སྨོན་ལམ་གྱི་ལན་སྤྲད་ནས་ཁྱོད་ཚོར་བལྟ་སྐྱོང་བྱེད་རྒྱུ་ཡིན། ང་ནི་རྒྱུན་ལྗང་ཤིང་སྡོང་དང་འདྲ་བ་ཁྱོད་ཚོའི་སྐྱབས་གནས་ཡིན། ང་ནི་ཁྱོད་ཚོའི་བྱིན་རླབས་ཀྱི་འབྱུང་ཁུངས་ཡིན་ནོ༎

⁹བློ་གྲོས་ཅན་སུ་ཡོད་དམ། ཁོས་བྱ་བ་འདི་ཚོ་དྲན་གསོ་ཐུབ་ཡོང་། རྟོགས་ཐུབ་མཁན་སུ་ཡོད་དམ། ཁོས་བྱ་བ་འདི་ཚོ་རྟོགས་ཐུབ་ཡོང་། གཙོ་བོ་དཀོན་མཆོག་གི་ལམ་དེ་དྲང་པོ་ལགས། མི་དྲང་བདེན་རྣམས་དེའི་ནང་འགྲུལ་བར་འགྱུར་རོ། འོན་ཀྱང་སྡིག་ཅན་རྣམས་དེ་ལ་སྣང་མེད་བྱེད་པའི་རྐྱེན་གྱི་ཐོག་ནས་འགྱེལ་བར་འགྱུར་རོ༎