Read Tibetan — པོད་སྐད་Tibetan Old Testament 2011 ཧོ་ཟེ 2 Bible Online

ཧོ་ཟེ 2 - Tibetan — པོད་སྐད་Tibetan Old Testament 2011 bible

ཧོ་ཟེ 2

¹དེ་བས་ན་ཁྱོད་ཚོས་རང་གི་ཨིསི་རཱཨེལ་སྤུན་གྲོགས་རྣམས་ལ། དཀོན་མཆོག་གི་མི་འབངས་དང་། གཙོ་བོ་དཀོན་མཆོག་གིས་བརྩེ་བ་གནང་བའི་མི་རིགས་ཞེས་འབོད་ཅིག།

²ཀྱེ་ངའི་བུ་ཕྲུག་རྣམས། ཁྱོད་ཚོས་རང་གི་མ་ལ་ཞུ་བ་འཐེན་ཞིག། ད་ནི་མོ་ངའི་ཆུང་མ་མ་ཡིན་ཏེ། ངའང་མོའི་ཁྱོ་མ་ཡིན་ནོ། འོན་ཀྱང་ཁྱོད་ཚོས་མོ་ལ། ལོག་གཡེམ་དང་སྨད་ཚོང་མའི་ལས་སྤངས་དགོས་པའི་ཞུ་བ་འཐེན་ཞིག

³དེ་མིན་མོ་རང་སྐྱེས་པའི་དུས་སུ་གཅེར་བུར་ཡོད་པ་བཞིན། ངས་མོ་གཅེར་བུར་བཞག་རྒྱུ་ཡིན། མི་མེད་ལུང་སྟོང་སྐམ་པོ་བཞིན་དུ་བཟོས་ཏེ། མཐར་མོ་ཁ་སྐོམ་ནས་ཤི་བར་འགྱུར།

⁴ངས་མོའི་བུ་ཕྲུག་རྣམས་ལ་བརྩེ་བ་མི་བྱེད་དོ། དེ་གང་ཡིན་ཟེར་ན། དེ་དག་ནི་ཁྲེལ་དང་ངོ་ཚ་མེད་པའི་སྨད་འཚོང་མའི་བུ་ཕྲུག་ཡིན་པའི་ཕྱིར་རོ། ཡང་མོ་རང་གིས་སྨྲས་པ། ང་ངའི་སྙིང་སྡུག་ཚོའི་རྗེས་སུ་འགྲོ་གི་ཡིན། དེ་ཚོའི་ང་ལ་ཁ་ཟས་དང་ཆུ་དང་། བལ་དང་རས་ཆའི་གྱོན་གོས་དང་། སྐྱུར་སྣུམ་དང་རྒུན་ཆང་སོགས་སྟེར་ཡོང་།

⁶ད་ངས་མོ་ཚེར་མའི་ར་བས་བསྐོར་ཏེ་རྩིག་པ་ཞིག་རྩིག་ནས་མོའི་འགྲུལ་ལམ་བཀག་རྒྱུ་ཡིན།

⁷དེ་རྗེས་མོ་རང་གི་སྙིང་སྡུག་ཚོའི་རྗེས་སུ་རྒྱུག་ནས་ཀྱང་དེ་ཚོ་བཟུང་མི་ཐུབ་བོ། མོས་དེ་ཚོ་འཚོལ་ཀྱང་མ་རྙེད་དོ། མཐར་མོས། ད་ང་ནི་རང་གི་ཐོག་མའི་ཁྱོ་ཡོད་སར་ཕྱིར་ལོག་བྱེད་ཀྱི་ཡིན། གང་ཡིན་ཟེར་ན། དེ་དུས་ཀྱི་གནས་སྟངས་དེ་ནི་ད་ལྟ་བས་ལེགས་པ་ཡིན་ནོ།

⁸མོས་བྷལ་ལ་མཆོད་པའི་འབྲུ་དང་། རྒུན་ཆང་དང་། སྐྱུར་སྣུམ་དང། གསེར་སོགས་གཏེར་མཁན་ང་ཡིན་པ་དེ་མོས་ངོས་ལེན་བྱ་བཞིན་མེད།

⁹ད་ངས་སྟོན་ཐོག་རྔ་བའི་དུས་སུ་འབྲུ་དང་། རྒུན་ཆང་དང་། དེ་བཞིན་མོ་ལ་གྱོན་གོས་སྟེར་བའི་བལ་དང་རས་ཆ་སོགས་ཕྱིར་ལེན་རྒྱུ་ཡིན་ནོ།

¹⁰མོའི་སྙིང་སྡུག་ཚོའི་མདུན་དུ་ངས་མོ་ལ་གཅེར་བུར་བྱེད་སྐབས། སུས་ཀྱང་མོ་ལ་ངའི་ལག་པ་ནས་སྐྱབས་མི་ཐུབ།

¹¹ཡང་མོའི་ལོ་དང་ཟླ་དུས་སོ་སོའི་དུས་སྟོན་ཁག་དང་། གཞན་ཡང་ངལ་གསོ་བའི་ཞག་ལ་སོགས་པའི་ཆོས་ཀྱི་དུས་སྟོན་ཚང་མ་ངས་མེད་པར་བཟོ་རྒྱུ་ཡིན།

¹²མོའི་སྙིང་སྡུག་ཚོས་ང་ལ་སྟེར་བའི་གླ་ཆ་ཡིན་ཞེས་མོས་ཟེར་བའི་རྒུན་ཤིང་དང་སེ་ཡབ་ཤིང་རྣམས་ངས་མེད་པར་བྱེད་རྒྱུ་ཡིན། ངས་མོའི་ཞིང་དེ་རྣམས་དབེན་གནས་སུ་བཅོས་རྒྱུ་ཡིན། ནགས་ཀྱི་སེམས་ཅན་རྣམས་ཀྱིས་དེ་དག་མེད་པར་བྱེད་པར་འགྱུར།

¹³ཡང་མོས་བྷལ་ལ་བདུག་སྤོས་བདུག་ནས། རྒྱན་ཆ་གོན་ནས་རང་གི་སྙིང་སྡུག་ཚོའི་རྗེས་སུ་འབྲངས་ཏེ། ང་ལ་བརྗེད་པའི་ཉེས་ལན་དུ། ངས་མོ་ལ་ངེས་པར་ཆད་པ་གཏོང་རྒྱུ་ཡིན་ཞེས་གཙོ་བོ་དཀོན་མཆོག་གིས་གསུངས་ཡོད༎

¹⁴དེ་བས་ན་ངས་མོ་འབྲོག་སྟོང་དུ་འཁྲིད་དེ་བྱམས་བརྩེའི་གཏམ་བརྗོད་ཅིང་མོའི་སེམས་ཚུར་བསྒྱུར་ཐུབ་པ་བྱ་རྒྱུ་ཡིན།

¹⁵མོའི་རྒུན་ཚལ་རྣམས་ཕྱིར་ལོག་སྤྲད་དེ། དཀའ་ངལ་གྱི་ལུང་གཤོང་ཞེས་པ་དེ་རེ་བའི་སྒོ་ཞིག་ཏུ་བཅོས་རྒྱུ་དང་། སྔར་ཨི་ཇིབ་ནས་ཐོན་ཞིང། ལང་ཚོ་དར་བའི་དུས་སུ་མོས་ངའི་ཁ་ལ་ཉན་པ་བཞིན། གནས་དེར་མོས་སླར་ཡང་ངའི་ཁ་ལ་ཉན་ནོ།

¹⁶མོས་སླར་ཡང་ང་ལ་རང་གི་ཁྱོ་ཞེས་འབོད་པ་མ་གཏོགས་རང་གི་བྷལ་ཞེས་ནམ་ཡང་འབོད་མི་ཡོང་།

¹⁷ངས་མོའི་ཁ་ནས་བྷལ་གྱི་མིང་དེ་ནམ་ཡང་བརྗོད་མི་བཅུག་གོ

¹⁸སྐབས་དེར་ངས་ནགས་ཀྱི་སེམས་ཅན་དང་འདབ་ཆགས་ཚོར། ངའི་མི་འབངས་རྣམས་ལ་གནོད་འཚེ་བྱས་མི་ཆོག་པའི་དམ་བཅའ་བྱེད་རྒྱུ་ཡིན། ངས་རལ་གྲི་དང་གཞུ་ལ་སོགས་པའི་དམག་གི་གོ་མཚོན་ཚང་མ་ཡུལ་ནས་མེད་པར་བྱེད་དེ། ངའི་མི་འབངས་རྣམས་ཞི་བདེ་ལྷིང་འཇགས་སུ་གནས་བཅུག་རྒྱུ་ཡིན།

¹⁹ཀྱེ་ཨིསི་རཱཨེལ་ངས་ཁྱོད་ལ་རང་གི་ཆུང་མར་ངོས་འཛིན་ཞིང་། ངས་ཁྱོད་རང་ལ་བདེན་པ་དང་དམ་ཚིག་གཙང་མ་བྱ་རྒྱུ་ཡིན། རྒྱུན་དུ་བརྩེ་གདུང་དང་སྙིང་རྗེ་བྱེད་དེ། དུས་གཏན་དུ་བདག་འཛིན་བྱེད་རྒྱུ་ཡིན།

²⁰ངས་ཁྱོད་ལ་རང་གི་ཆུང་མར་ངོས་ལེན་བྱས་པའི་དམ་བཅའ་དེ་སྲུང་ཞིང་། ཁྱོད་ནས་ཀྱང་ང་ལ་རང་གི་གཙོ་བོ་དཀོན་མཆོག་ཞེས་ངོས་འཛིན་བྱེད་པར་འགྱུར།

²¹སྐབས་དེར་ངའི་མི་འབངས་ཨིསི་རཱཨེལ་གྱི་སྨོན་ལམ་ལ་ངས་ལན་སྤྲད་དེ། ངས་ས་གཞིར་ཆར་ཆུ་འབེབས་ཤིང་། འབྲུ་དང་རྒུན་ཆང་དང་སྐྱུར་སྣུམ་སོགས་འཕེལ་རྒྱས་བྱུང་ངོ་།

²³ངས་རང་གི་མི་འབངས་རྣམས་ཡུལ་དུ་གཞིས་ཚུགས་པར་བྱས་ཤིང་དེ་དག་ཡར་རྒྱས་གོང་དུ་འཕེལ་བར་འགྱུར། དེ་སྔ་ལོ་རུ་ཧ་མ་ཞེས་པའི་མི་རྣམས་ལ་ངས་གཅེས་སྐྱོང་བྱེད་རྒྱུ་ཡིན། ལོ་ཨམ་མི་ཞེས་པ་རྣམས་ལ་ངའི་མི་འབངས་སུ་ངོས་འཛིན་བྱེད་རྒྱུ་དང་། དེ་ཆོས་ཀྱང་ང་ལ་རང་གི་དཀོན་མཆོག་ཏུ་ངོས་ལེན་བྱེད་རྒྱུ་ཡིན་ནོ༎