Read Tibetan — པོད་སྐད་Tibetan Old Testament 2011 ཧོ་ཟེ 5 Bible Online

ཧོ་ཟེ 5 - Tibetan — པོད་སྐད་Tibetan Old Testament 2011 bible

ཧོ་ཟེ 5

¹ཀྱེ་བླ་མ་རྣམས་ཚུར་ཉོན་ཞིག། ཀྱེ་ཨིསི་རཱཨེལ་མི་མང་རྣམས་འདིར་དོ་སྣང་བྱོས་ཤིག། ཀྱེ་རྒྱལ་པོའི་རིགས་བརྒྱུད་རྣམས་ཚུར་ཉོན་ཞིག། ཁྱོད་ཚོས་ཚུལ་བཞིན་ཁྲིམས་གཅོད་བྱེད་དགོས་ཀྱང་དེ་བཞིན་མ་བྱས་པས། ཁྱོད་ཚོའི་ཐོག་ཏུ་ཁྲིམས་འཕོག་ངེས་སོ། ཁྱོད་ཚོ་མིཛ་པཱ་རུ་རྙིད་དང་། རི་བོ་ཏ་བྷོར་དུ་བཀྲམ་པའི་དྲ་བར་གྱུར་ཡོད།

²གྲོང་ཁྱེར་ཨ་ཀ་སི་ཡ་རུ་ཁྱོད་ཚོ་ནི་གཞན་ལ་བསླུ་བའི་ཕྱིར་ས་དོང་གཏིང་རིང་པོར་འགྱུར་ཡོད་དོ། ངས་ཁྱོད་ཚོ་ཚང་མར་ཉེས་ཆད་གཏོང་རྒྱུ་ཡིན།

³ཨིསི་རཱཨེལ་གྱི་གནས་སྟངས་ངོ་མ་གང་ཡིན་པ་དེ་ངས་ཤེས་པས། མོ་ང་ནས་གབ་མི་ཐུབ། མོ་ནི་དམ་ཚིག་མི་གཙང་ཞིང། མོའི་ཡུལ་མི་རྣམས་ནི་ང་ལ་བསྙེན་བཀུར་བྱེད་འོས་པ་མེད་དོ༎

⁴དེ་ཚོའི་བྱ་སྤྱོད་ངན་པའི་རྐྱེན་གྱིས་དཀོན་མཆོག་གི་ཕྱོགས་སུ་བློ་བསྒྱུར་མི་ཐུབ་བོ། གང་ལ་ཟེར་ན། དེ་ཚོའི་བརྒྱུད་ལ་སྨད་ཚོང་མའི་ལས་ཀྱི་རྐྱེན་གྱིས་དེ་ཚོས་གཙོ་བོ་དཀོན་མཆོག་ལ་ངོས་འཛིན་མ་ཞུས་སོ།

⁵ཨིསི་རཱཨེལ་གྱི་ང་རྒྱལ་གྱིས་རང་ལ་དཔང་པོ་བྱེད་དོ། དེའི་ཕྱིར་ཨིསི་རཱཨེལ་སྡིག་པའི་ནང་དུ་ལྷུང་བ་དང་། མོོ་མཉམ་དུ་ཡ་ཧུ་དཱ་ཡང་ལྷུང་ངོ་།

⁶དེ་ཆོས་རང་གི་ར་ལུག་དང་ཕྱུགས་བཅས་གཙོ་བོ་དཀོན་མཆོག་ལ་དམར་མཆོད་འབུལ་བར་འཁྱེར་ནའང་། དེས་དེ་ཚོ་ལ་ཕན་ཐོག་གང་ཡང་བྱུང་མི་ཡོང་། དེ་ཚོས་ཁོང་ལ་རྙེད་མི་ཡོང་། གང་ལ་ཟེར་ན། ཁོང་གིས་དེ་ཚོར་སྤངས་ཡོད་དོ།

⁷དེ་ཚོས་གཙོ་བོ་དཀོན་མཆོག་ལ་དམ་ཚིག་ལོག་པར་བྱེད་ཡོད་པ་དང་། དེ་ཚོའི་ཕྲུ་གུ་རྣམས་གཙོ་བོ་དཀོན་མཆོག་གི་མ་ཡིན་ནོ། དེའི་རྐྱེན་གྱིས་དེ་ཚོ་དང་དེ་ཚོའི་ས་ཞིང་དང་བཅས་པ་ཚང་མ་མྱུར་དུ་མེད་པར་འགྱུར༎

⁸གྷི་བི་ཨཱ་རུ་དམག་དུང་བུད་ཅིག། ར་མཱ་རུ་ཉེན་བརྡ་བཏང་ཞིག། བྷེ་ཐ་བེན་དུ་དམག་གི་སྐད་རྒྱོབ་ཅིག། ཀྱེ་བྷེན་ཡ་མིན་པ་རྣམས་སྣེ་འཁྲིད་བྱོས་ཤིག།

⁹ཁྲིམས་གཅོད་ཀྱི་ཉིན་དེ་སླེབས་བཞིན་ཡོད་པ་དང། ཨིསི་རཱཨེལ་པ་རྣམས་སྟོངས་པར་འགྱུར་ཞིང་། ཨིསི་རཱཨེལ་པ་རྣམས་ཀྱི་ཁྲོད་དུ་འདི་ནི་ངེས་པར་འབྱུང་བར་འགྱུར།

¹⁰གཙོ་བོ་དཀོན་མཆོག་གིས་གསུངས་པ། ང་ནི་ཁྲོ་བཞིན་ཡོད། གང་ལ་ཟེར་ན། ཡ་ཧུ་དཱའི་འགོ་དཔོན་ཚོས་ཨིསི་རཱཨེལ་ལ་བཙན་འཛུལ་བྱས་ནས་དེ་ཚོ་ནས་ས་ཞིང་འཕྲོག་བཅོམ་བྱེད་ཡོད། དེའི་རྐྱེན་གྱིས་ངས་དེ་ཚོའི་ཐོག་ཏུ་ཆུ་ལོག་ལྟར་ཆད་པ་གཏོང་རྒྱུ་ཡིན།

¹¹ཨིསི་རཱཨེལ་ནི་མནར་གཅོད་ནང་ཚུད་ཡོད་པ་དང་། རང་ལ་བདག་པའི་ཞིང་དེ་བོར་ཡོད་དོ། གང་ལ་ཟེར་ན། རོགས་བྱེད་མ་ཐུབ་མཁན་སྐུ་འདྲ་ཚོའི་རྗེས་སུ་འབྲངས་བར་ཨུ་ཚུགས་བྱས་སོ།

¹²ངས་ཨིསི་རཱཨེལ་ཐོག་ཏུ་རྐྱེན་ངན་འཁྱེར་ཡོང་རྒྱུ་དང་། ཡ་ཧུ་དཱའི་མི་མང་རྣམས་འཇིགས་པར་བྱ་རྒྱུ་ཡིན།

¹³ཨིསི་རཱཨེལ་གྱིས་རང་གི་ནད་དང་། ཡ་ཧུ་དཱས་རང་གི་རྨ་རྣམས་མཐོང་སྐབས། དེ་ནས་ཨིསི་རཱཨེལ་གྱིས་ཨ་སུར་གྱི་རྒྱལ་པོ་ཆེན་པོའི་སར་རོགས་ཀྱི་ཕྱིར་མི་རྣམས་བཏང་ངོ་། འོན་ཀྱང་དེས་དྲག་གསོ་མ་ཐུབ་པ་དང་། རྨ་ཡང་གསོ་བར་བྱེད་མ་ཐུབ་བོ།

¹⁴ང་ནི་སེང་གེ་ལྟ་བུ་ཨིསི་རཱཨེལ་དང་ཡ་ཧུ་དཱའི་མི་མང་ཐོག་ཏུ་འཐབ་རྒྱུ་ཡིན། ང་རང་ཉིད་ཀྱིས་དེ་ཚོ་ལ་དུམ་བུར་དུམ་བུར་བཟོས་ནས་སློད་རྒྱུ་ཡིན། ངས་དེ་ཚོ་ལ་འདྲུད་སྐབས། དེ་ཚོ་ལ་སུས་ཀྱང་སྐྱབས་མ་ཐུབ་བོ།

¹⁵དེ་ཚོས་རང་གི་ཉེས་སྡིག་ལ་ངོས་ལེན་བྱས་ནས་ང་ལ་མ་འཚོལ་བར་དུ། ངས་རང་གི་མི་འབངས་རྣམས་ལ་སྤངས་རྒྱུ་ཡིན། ཅིག་བྱེད་ན་དེ་ཚོས་རང་ལ་དཀའ་ངལ་བྱུང་སྐབས་ང་ལ་འཚོལ་ཐབས་བྱེད་པར་འགྱུར༎