Read Tibetan — པོད་སྐད་Tibetan Old Testament 2011 ཨ་མོསེ 2 Bible Online

ཨ་མོསེ 2 - Tibetan — པོད་སྐད་Tibetan Old Testament 2011 bible

ཨ་མོསེ 2

¹གཙོ་བོ་དཀོན་མཆོག་གིས་གསུངས་པ། མོ་ཨབ་ཀྱི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོ་ལ་ངེས་པར་དུ་ཉེས་ཆད་གཏོང་རྒྱུ་ཡིན་ནོ། དེ་ཚོས་ཨེ་དྷོམ་གྱི་རྒྱལ་པོའི་རུས་པ་དེ་མེར་བསྲེགས་ནས་གོག་ཐལ་བཟོས་ནས་དེ་ལ་གུས་བཀུར་མ་བྱས་པ་ཡིན་ནོ།

²དེར་བརྟེན་ངས་མོ་ཨབ་ཡུལ་དུ་མེ་གཏོང་ཞིང་། ཀེ་རི་ཨོད་ཀྱི་མཁར་རྫོང་རྣམས་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ། མོ་ཨབ་ཀྱི་ཡུལ་མི་རྣམས་ནི་དམག་མིའི་སྐད་འབོད་དང་དམག་དུང་གི་སྒྲ་ལ་སོགས་པའི་དམག་གི་འུར་སྒྲའི་ནང་དུ་ཤི་རྒྱུ་ཡིན་ནོ།

³ངས་མོ་ཨབ་ཀྱི་རྒྱལ་པོ་དང་ཡུལ་དེའི་འགོ་བྱེད་ཚང་མ་བསད་རྒྱུ་ཡིན་ནོ༎

⁴གཙོ་བོ་དཀོན་མཆོག་གིས་གསུངས་པ། ཡ་ཧུ་དཱའི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོར་ངེས་པར་དུ་ཉེས་ཆད་གཏོང་རྒྱུ་ཡིན། དེ་ཚོས་ངའི་སློབ་སྟོན་ལ་རྩིས་མེད་བྱས་ཤིང་། ངའི་བཀའ་ཁྲིམས་རྣམས་མ་སྲུང་བར། སྔར་དེ་ཚོའི་མེས་པོ་རྣམས་ཀྱིས་བསྙེན་བཀུར་བྱས་པའི་ལྷ་རྟེན་རྫུན་མ་རྣམས་ཀྱི་འགོ་ཁྲིད་ཀྱིས་ལམ་ལོག་ཏུ་འཁྲིད་ཡོད།

⁵དེར་བརྟེན་ངས་ཡ་ཧུ་དཱ་རུ་མེ་གཏོང་ཞིང་། ཡེ་རུ་ཤ་ལེམ་གྱི་མཁར་རྗོང་རྣམས་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ༎

⁶གཙོ་བོ་དཀོན་མཆོག་གིས་གསུངས་པ། ཨིསི་རཱཨེལ་པ་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོར་ངེས་པར་དུ་ཉེས་ཆད་གཏོང་རྒྱུ་ཡིན། དེ་ཚོས་བུ་ལོན་འཇལ་མི་ཐུབ་མཁན་དང་། མཐའ་ན་ལྷམ་ཆ་གཅིག་གི་རིན་བབ་ཀྱང་འཇལ་ཐུབ་པའི་ནུས་པ་མེད་པའི་མི་དྲང་ཞིང་དབུལ་པོ་རྣམས་བྲན་འཁོལ་དུ་བཙོངས་པ་དང་།

⁷དེ་ཚོས་སྐྱོ་པོ་ཉམ་ཐག་རྣམས་ལ་ཐལ་བར་བརྫིས་ནས། དབུལ་པོ་རྣམས་ལ་འབུད་རྒྱག་རྒྱབ་ནས་ཕྱིར་བཏོན་ནོ། དེ་བཞིན་སྐྱེས་པ་ཞིག་དང་ཁོའི་ཕས་བྲན་མོ་བུ་མོ་གཅིག་རང་ལ་ཆགས་པ་སྤྱོད་པས། ངའི་མིང་དམ་པ་དེ་མི་གཙང་བར་བྱེད་དོ།

⁸མཆོད་འབུལ་བྱེད་ས་གར་ཡོད་སར་དབུལ་པོ་ཚོ་ནས་གཏའ་མར་ལེན་པའི་གོས་སྟེང་ཉལ་ལོ། ཡང་བུ་ལོན་གྱི་ཚབ་ཏུ་ལེན་པའི་རྒུན་ཆང་དེ་དཀོན་མཆོག་གི་མཆོད་ཁང་དུ་འཐུང་ངོ་།

⁹འོན་ཀྱང་ཀྱེ་ངའི་མི་རྣམས། ངས་ཁྱོད་ཚོའི་དོན་དུ་ཤུག་ཤིང་ལྟ་བུའི་གཟུགས་ཚད་རིང་ལ་བེ་ཤིང་ལྟ་བུའི་ལུས་སྟོབས་ཆེ་བའི་ཨ་མོར་པ་རྣམས་ཡོངས་སུ་ཚར་བཅད་པ་ཡིན་ནོ།

¹⁰ངས་ཁྱོད་ཚོ་ཨི་ཇིབ་ནས་ཕྱིར་བཏོན་ཏེ་ལོ་ངོ་བཞི་བཅུའི་རིང་དུ་འབྲོག་སྟོང་ནང་དུ་འཁྲིད་དེ། མཐར་ཨ་མོར་པའི་ལུང་པ་དེ་ཁྱོད་ཚོའི་བདག་དབང་དུ་སྤྲད་པ་ཡིན་ནོ།

¹¹དེ་ཙམ་མ་ཟད་ངས་ཁྱོད་ཚོའི་བུ་འགའ་ཤས་ལ་ལུང་སྟོན་པ་དང་འགའ་ཤས་ལ་ན་ཛིར་[1]གྱི་གོ་གནས་སུ་འདེམ་བསྐོ་བྱས་པ་ཡིན་ཞིང་། ཀྱེ་ཨིསི་རཱཨེལ་གྱི་ཡུལ་མི་རྣམས། གཙོ་བོ་དཀོན་མཆོག་ངས་གང་སྨྲས་པའི་གནས་ཚུལ་འདི་ཚོ་བདེན་པ་མ་ཡིན་ནམ།

¹²འོན་ཀྱང་ཁྱོད་ཚོས་ན་ཛིར་གྱི་གོ་གནས་སུ་ཡོད་པ་རྣམས་ལ་རྒུན་ཆང་འཐུང་བཅུག་པ་དང་། ལུང་སྟོན་པ་རྣམས་ལ་ངའི་གསུང་འཕྲིན་བཤད་མ་བཅུག་པ་ཡིན་པས།

¹³འབྲུའི་དོད་པོ་ལྗིད་པོས་གླང་གི་འཁོར་ལོ་ལ་མནན་པ་བཞིན། ད་ངས་ཁྱོད་ཚོ་ལ་མནན་རྒྱུ་ཡིན།

¹⁴སྐབས་དེར་བང་རྒྱུག་པ་ལ་མཁས་པ་ཇི་འདྲ་ཞིག་ཡིན་རུང་། དེ་ནི་བྲོས་ནས་ཐར་ཐབས་མེད་ཅིང་། སྟོབས་ཤུགས་ལྡན་པའི་མི་རྣམས་ལུས་སྟོབས་ཉམས་པ་དང་། དེ་བཞིན་དམག་མི་ཚོས་ཀྱང་རང་ལ་སྲུང་སྐྱོབ་བྱེད་མི་ཐུབ་པ་དང་།

¹⁵གཞུ་འཐེན་མཁན་ཚོའང་རང་སར་ལངས་མི་ཐུབ་པ་དང་། མགྱོགས་པོར་རྒྱུག་མཁན་ཀྱང་མི་ཐར་ཞིང་། རྟ་པ་རྣམས་ཀྱང་རང་སྲོག་སྐྱབས་ནས་བྲོས་ཐབས་མེད་དོ།

¹⁶ཉིན་མོ་དེ་ལ་དཔའ་ངར་ལྡན་པའི་དམག་མིས་ཀྱང་མཚོན་ཆ་སྤངས་ནས་བྲོས་པར་འགྱུར་རོ། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎