Read Tibetan — པོད་སྐད་Tibetan Old Testament 2011 ཨ་མོསེ 5 Bible Online

ཨ་མོསེ 5 - Tibetan — པོད་སྐད་Tibetan Old Testament 2011 bible

ཨ་མོསེ 5

¹ཀྱེ་ཨིསི་རཱཨེལ་གྱི་མི་མང་རྣམས། ངས་ཁྱོད་ཀྱི་དོན་དུ་བླངས་པའི་སྐུ་ཕུང་གདན་ཞུའི་གླུ་འདི་ལ་ཉོན་དང་།

²ཨིསི་རཱཨེལ་ན་ཆུང་མ་ནི། ནམ་ཡང་ལང་མི་ཐུབ་པར་འགྱེལ་ལོ། མོ་ནི་ས་ཁར་འགྱེལ་ཡོད་པས། སློང་རོགས་བྱ་མཁན་སུ་ཡང་མེད།

³བླ་ན་མེད་པའི་གཙོ་བོ་དཀོན་མཆོག་གིས་གསུངས་པ། ཨིསི་རཱཨེལ་གྱི་གྲོང་ཁྱེར་ཞིག་ནས་དམག་མི་ཆིག་སྟོང་ཞིག་ཕྱི་ལ་བཏང་བ་དེའི་ཁོངས་ནས། བརྒྱ་ཕྲག་གཅིག་ལས་ཕྱིར་ལོག་མི་བྱེད་ཅིང་། དེ་བཞིན་གྲོང་ཁྱེར་གཞན་ཞིག་ནས་དམག་མི་བརྒྱ་ཕྲག་ཅིག་ཕྱི་ལ་བཏང་བའི་ཁོངས་ནས་དམག་མི་བཅུ་ལས་ཕྱིར་ལོག་མི་བྱེད་དོ།

⁴གཙོ་བོ་དཀོན་མཆོག་གིས་ཨིསི་རཱཨེལ་གྱི་མི་མང་རྣམས་ལ། ངའི་རྩར་ཡོང་ན་ཁྱོད་ཚོ་འཚོ་བར་འགྱུར།

⁵བྷིར་ཤེ་བྷ་རུ་བསྙེན་བཀུར་བྱེད་པར་མ་འགྲོ་ཞིག། ཁྱོད་ཚོས་ང་ལ་བྷེ་ཐེལ་དུ་འཚོལ་ཐབས་མ་བྱེད་ཅིག། གང་ལགས་ཟེར་ན། བྷེ་ཐེལ་ནི་རང་གི་སྙན་གྲགས་ཉམས་ཏེ་མཐོང་ཆུང་དུ་འགྱུར་ཡོང་། དེ་བཞིན་གྷིལ་གྷལ་དུའང་མ་འགྲོ། གང་ལ་ཟེར་ན། དེའི་ཡུལ་མི་རྣམས་བཙོན་བྱོལ་དུ་འཁྲིད་པར་འགྱུར་རོ།

⁶གཙོ་བོ་དཀོན་མཆོག་གི་དྲུང་དུ་སོང་བ་ཡིན་ན་ཁྱོད་ཚོ་འཚོ་བར་འགྱུར། དེ་མིན་ཁོང་ནི་ཨིསི་རཱཨེལ་གྱི་མི་མང་གི་ཐོག་ཏུ་མེ་ལྟར་འབར་ཞིང་། དེས་བེ་ཐེལ་གྱི་ཡུལ་མི་རྣམས་ཡོངས་སུ་འཚིག་ཅིང་། མི་སུས་ཀྱང་མེ་དེ་གསོད་པར་མི་ནུས་སོ།

⁷ཁྱོད་ཚོས་ཁྲིམས་ལོག་པར་སྤྱོད་ནས། མི་མང་གི་ཐོབ་ཐང་འཕྲོག་མཁན་ཁྱོད་ཚོ་འཇིགས་པར་འགྱུར་ཡོད།

⁸གཙོ་བོ་དཀོན་མཆོག་གིས་སྨིན་དྲུག་དང་དྲང་སྲོང་རྣམས་ཀྱི་སྐར་མའི་ཚོགས་རྣམས་ལ་བཀོད་པ་གནང་བ་དང་། མུན་པ་ནི་འོད་དུ་བསྒྱུར་བ་གནང་བ་དང་། ཉིན་མོ་མཚན་དུབསྒྱུར་བ་དང་། རྒྱ་མཚོའི་ཆུ་རྣམས་ལ་འབོད་པ་དང་། ས་གཞིའི་སྟེང་ལ་བླུགས་པ་གནང་མཁན་དེའི་མཚན་ལ་གཙོ་བོ་དཀོན་མཆོག་ཅེས་གསོལ་བ་ཡིན།

⁹ཁོང་གིས་མཐུ་སྟོབས་ཅན་དང་དེ་ཚོའི་སྐྱབས་གནས་བཙན་པོ་རྣམས་འཇིག་པར་མཛད་དོ།

¹⁰ཁྱོད་ཚོས་བདེན་པའི་ཁྲིམས་སྤྱོད་མཁན་ལ་སྡང་བ་དང་ཁྲིམས་སར་བདེན་གཏམ་སྨྲ་མཁན་ལ་མཐོང་ཆུང་བྱེད་དོ།

¹¹དབུལ་པོ་ཉམས་ཐག་རྣམས་ལ་བཙན་གནོན་བྱས་ཏེ། དེ་ཚོའི་འབྲུ་རྣམས་འཕྲོག་བཅོམ་བྱས་པ་ཡིན་པས། ཁྱོད་ཚོ་རྡོ་རྩིག་བརྒྱབ་པའི་ཁང་བཟང་ནང་དུ་སྡོད་ལོང་མེད་ཅིང་། ཁྱོད་ཚོས་འདེབས་ལས་བྱས་པའི་རྒུན་ཚལ་བཟང་པོ་རྣམས་ལས་རྒུན་ཆང་འཐུང་ལོང་མི་ཡོང་ངོ་།

¹²ཁྱོད་ཚོའི་སྡིག་པ་རྣམས་ཚབས་ཆེན་ཇི་ལྟར་ཡིན་པ་དང་། ཁྱོད་ཚོས་ནག་ཉེས་ཇི་བྱས་སྐོར་ངས་གསལ་པོར་ཤེས་ཀྱི་ཡོད། ཁྱོད་ཚོས་མི་བཟང་པོ་རྣམས་ལ་མནར་སྤྱོད་གཏོང་བ་དང་། ལྐོག་རྔན་ལེན་པ་དང་དབུལ་པོ་རྣམས་ལ་ཁྲིམས་སར་ཁྲིམས་གཅོད་དྲང་པོ་ཐོབ་པར་བཀག་གི་ཡོད་དོ།

¹³དེ་བས་ན་དུས་ངན་དེ་ལྟ་བུའི་སྐབས་སུ་ཁ་རོག་སྡོད་པ་ནི་བློ་གྲོས་ཅན་ཡིན་ནོ།

¹⁴ཁྱོད་ཚོ་འཚོ་བའི་ཕྱིར་ངན་པའི་རྗེས་སུ་མ་འབྲང་བར་བཟང་པོ་ཁོ་ནའི་རྗེས་སུ་འབྲངས་ཤིག་དང་། དེ་ལྟར་བྱས་ན་ཁྱོད་ཚོས་རང་གི་སྨྲ་བ་བཞིན་དུ་ཀུན་དབང་ལྡན་པའི་གཙོ་བོ་དཀོན་མཆོག་ནི་ཁྱོད་ཚོ་དང་མཉམ་དུ་འགྲོགས་པར་འགྱུར་རོ།

¹⁵ངན་པར་སྡང་ཞིང་བཟང་པོ་ལ་གཅེས་པར་འཛིན་དགོས་པ་དང་། ཁྲིམས་སར་ཁྲིམས་གཅོད་དྲང་པོ་བྱེད་དགོས། དེ་ལྟར་བྱས་ན་ལྷག་འཕྲོས་ལུས་པའི་མི་རིགས་འདི་ཚོ་ལ་གཙོ་བོ་དཀོན་མཆོག་གིས་སྙིང་རྗེ་གནང་སྲིད་དོ།

¹⁶བླ་ན་མེད་པའི་ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་པ། གྲོང་ཁྱེར་གྱི་གཞུང་ལམ་ཁག་ཏུ་སྨྲེ་སྔགས་དང་ངུ་འབོད་དྲག་པོ་འདོན་ཞིང་། གཤིན་པོའི་ཆེད་དུ་མྱ་ངན་བྱེད་ཕྱིར་མི་ལག་བསྒྲིགས་པའི་ངུ་འབོད་མཁན་མཉམ་དུ་ཞིང་པ་རྣམས་ཀྱང་མྱ་ངན་བྱེད་ཕྱིར་འབོད་པ་དང་།

¹⁷རྒུན་ཚལ་ཚང་མར་སྨྲེ་སྔགས་འདོན་པར་དང་། ངས་ཁྱོད་ཚོར་ཉེས་ཆད་གཏོང་ཕྱིར་ཡོང་བཞིན་པའི་རྐྱེན་གྱིས་གནས་ཚུལ་དེ་ཚོ་ཚང་མ་འབྱུང་ངེས་པ་ཡིན་ནོ་ཞེས་གཙོ་བོ་དཀོན་མཆོག་གིས་གསུངས་སོ།

¹⁸ཁྱོད་ཚོ་གཙོ་བོ་དཀོན་མཆོག་གི་ཉིན་མོ་དེ་ལ་སྒུག་སྡོད་བྱེད་མཁན་རྣམས་འཇིགས་སྐྲག་ཡོང་བར་འགྱུར། ཁྱོད་ཀྱི་ཆེད་དུ་ཉིན་མོ་དེ་ནི་འོད་མ་ཡིན་པར། མུན་པ་དང་ལྡན་པར་འགྱུར། དེས་ཁྱོད་ལ་ཕན་ཐོགས་ཇི་ལྟར་བྱུང་ངམ།

¹⁹ཉིན་མོ་དེ་ནི་མི་ཞིག་སེང་གེ་ལས་བྲོས་ཐར་ན་ཡང་དོམ་དང་འཕྲད་པ་ལྟ་བུ་ཡོང་རྒྱུ་དང་། ཡང་ན་མི་ཞིག་རང་གི་ཁྱིམ་དུ་བསླེབས་ནས་རྩིག་པར་ལག་པ་བཞག་སྐབས་སྦྲུལ་གྱིས་སོ་བརྒྱབ་པ་ལྟ་བུ་ཡིན་པས།

²⁰གཙོ་བོ་དཀོན་མཆོག་གི་ཉིན་མོ་དེས་མུན་ནག་འཁྱེར་ཡོང་བ་དང་། འོད་མེད་པས་ཡིད་མུག་པའི་ཉིན་མོ་བྱུང་བར་འགྱུར།

²¹གཙོ་བོ་དཀོན་མཆོག་གིས་གསུངས་པ། ངས་ཁྱོད་ཚོའི་ཆོས་ཀྱི་དུས་སྟོན་ཁག་ལ་སྡང་ཞིང་ཞེན་ལོག་བྱེད་བཞིན་ཡོད།

²²ཁྱོད་ཚོས་སྦྱིན་སྲེག་གི་མཆོད་པ་དང་འབྲུ་སྣའི་མཆོད་འབུལ་བྱས་པར་ངས་ངོས་ལེན་མི་བྱེད་ཅིང་། ཁྱོད་ཚོས་དམར་མཆོད་ཀྱི་ཆེད་དུ་ངའི་རྩར་འཁྱེར་ཡོང་བའི་སེམས་ཅན་རྒྱགས་པ་རྣམས་ཀྱང་ངས་ངོས་ལེན་མི་བྱའོ།

²³ཁྱོད་ཚོའི་སྐད་ཤུགས་ཆེན་པོས་མགུར་དབྱངས་ལེན་པ་རྣམས་མཚམས་འཇོག་བྱོས་ཤིག་དང་། ཁྱོད་ཚོའི་སྒྲ་སྙན་གྱི་རོལ་དབྱངས་རྣམས་ང་ལ་ཉན་འདོད་མེད།

²⁴དེ་ལས་ཁྲིམས་་དྲང་པོ་རྒྱུག་ཆུ་ལྟ་བུ་དང་། དྲང་བ་ཉིད་ནི་ནམ་ཡང་མི་སྐམ་པའི་ཆུ་བོ་བཞིན་དུ་རྒྱུག་བཅུག་ན་དེ་ལེགས་པ་ཡིན་ནོ།

²⁵ཀྱེ་ཨིསི་རཱཨེལ་གྱི་མི་མང་རྣམས། ངས་ཁྱོད་ཚོ་ལོ་ངོ་བཞི་བཅུ་རིང་ལ་འབྲོག་སྟོང་བརྒྱུད་ནས་འཁྲིད་པའི་སྐབས་སུ་ང་ལ་དམར་མཆོད་དང་མཆོད་པའི་རིགས་སོགས་འབུལ་དགོས་ཤེས་ལབ་རྒྱུ་མ་བྱུང་།

²⁶འོན་ཀྱང་ད་ཁྱོད་ཚོས་ལྷ་རྟེན་གྱི་རྒྱལ་པོ་སག་ཀུད་དང་སྒྱུ་སྐར་གྱི་ལྷ་རྟེན་ཀེ་ཝན་བཅས་ཀྱི་སྐུ་འདྲར་བསྙེན་བཀུར་བྱས་པ་ཡིན་པས།

²⁷ངས་ཁྱོད་ཚོ་ལ་དྷ་མསེ་ཀསེ་རྒལ་ནས་ཡུལ་ཕ་རོལ་དུ་ཁྱོད་ཚོ་ལ་བཙོན་དུ་འཁྲིད་སྐབས་ཁྱོད་ཚོའི་སྐུ་འདྲ་དེ་ཚོ་ཡང་མཉམ་དུ་འཁྱེར་དགོས་སོ་ཞེས་གཙོ་བོ་དཀོན་མཆོག་གིས་གསུངས་སོ། ཁོང་གི་མཚན་ནི་ཀུན་དབང་ལྡན་པའི་དཀོན་མཆོག་ཡིན༎