Read Tibetan — པོད་སྐད་Tibetan Old Testament 2011 ཨ་མོསེ 8 Bible Online

ཨ་མོསེ 8 - Tibetan — པོད་སྐད་Tibetan Old Testament 2011 bible

ཨ་མོསེ 8

¹ང་ལ་བླ་ན་མེད་པའི་གཙོ་བོ་དཀོན་མཆོག་ནས་ཞལ་གཟིགས་གཞན་ཞིག་བསྟན་གནང་ངོ་། དེའི་ནང་ངས་ཤིང་འབྲས་སླེ་པོ་ཞིག་མཐོང་བས།

²གཙོ་བོ་དཀོན་མཆོག་གིས། ཀྱེ་ཨ་མོསི་ཁྱོད་ཀྱིས་ག་རེ་མཐོང་གི་འདུག་གམ་ཞེས་བཀའ་འདྲི་གནང་བའི་ལན་དུ་ངས། ཤིང་འབྲས་ཡོད་པའི་སླེ་པོ་ཞིག་མཐོང་གི་འདུག་ཅེས་ཞུས་པ་དང་། གཙོ་བོ་དཀོན་མཆོག་གིས་ང་ལ་གསུངས་པ། ད་ངའི་མི་མང་ཨིསི་རཱཨེལ་གྱི་མཐའ་མའི་དུས་དེ་རན་པ་ཡིན་པས། ད་ངས་དེ་ཚོར་ཉེས་ཆད་གཏོང་རྒྱུའི་ཐག་གཅོད་བྱས་ཟིན་ཅིང་།

³ཉིན་མོ་དེ་ལ་ཕོ་བྲང་ནང་དུ་བཏང་བའི་གླུ་གཞས་རྣམས་སྨྲེ་སྔགས་སུ་བསྒྱུར་ཞིང་། ས་ཕྱོགས་ཀུན་ཏུ་མི་རོས་ཁྱབ་སྟེ། དེ་ཚོ་ཁུ་སིམ་མེར་ཕྱི་རོལ་དུ་དབྱུགས་པར་འགྱུར་རོ༎

⁴ཀྱེ། སྐྱོ་པོ་རྣམས་ལ་རྐང་བརྫིས་གཏོང་མཁན་དང་ཡུལ་གྱི་དབུལ་པོ་རྣམས་ལ་ཚར་གཅོད་གཏོང་མཁན་ཚོ་འདི་ལ་ཉོན་ཞིག

⁵ཁྱོད་ཚོའི་སེམས་ལ་དུས་ཆེན་དམ་པ་འདི་ཚོ་ག་དུས་རྫོགས་ཡོང་བསམ་མོ། གང་ལ་ཟེར་ན། ང་ཚོའི་འབྲུ་རིགས་འདི་ཚོ་འཚོང་དགོས་འདུག་ཅེས་དང་། ངལ་གསོ་བའི་ཞག་དེ་ག་དུས་རྫོགས་ཡོང་ངམ། གང་ལ་ཟེར་ན། ང་ཚོས་དངོས་ཟོག་རྣམས་འཚོང་དགོས་པ་དང་། གོང་ཚད་ཐོལ་པ་ལེན་ཆོག་པ་དང་། ཉག་རྡོ་བརྫུན་མར་བེད་སྤྱོད་བཏང་ནས་ལྗིད་ཚད་ཀྱི་ཐོག་ལ་མགོ་སྐོར་གཏོང་ཆོག་གོ

⁶ང་ཚོས་གྲོ་དཀྱུས་མ་ཞིག་ལ་གོང་ཚད་མཐོ་པོ་ལེན་ནས་འཚོང་ཆོག་པ་དང་། མི་དབུལ་པོ་ཞིག་གིས་ལྷམ་ཆ་གཅིག་གི་རིན་པའང་སྤྲོད་མ་ཐུབ་པས། ང་ཚོས་དེ་ལྟ་བུའི་མི་ཞིག་ཉོས་ནས་རང་གི་བྲན་འཁོལ་དུ་ཉར་ཆོག་པ་འདུག་ཅེས་བསམ་མོད།

⁷འོན་ཀྱང་ཨིསི་རཱཨེལ་གྱི་གཙོ་བོ་དཀོན་མཆོག་གིས་དམ་བཅའ་མཛད་ཅིང་གསུངས་པ། ངས་དེ་ཚོའི་ལས་ངན་དག་ནམ་ཡང་མི་བརྗེད་པས།

⁸ས་གཡོམ་བྱུང་བ་དང་། ཡུལ་མི་ཚང་མ་དཀའ་ངལ་ཆེན་པོའི་ནང་དུ་ཚུད་ཅིང་། གཙང་པོ་ན་ཨེལ་གྱི་རྦ་རླབས་འཁྲུག་པ་བཞིན་དུ་ཡུལ་ལྗོངས་ཚང་མ་ཡར་མར་གཡོ་ཞིང་འཁྲུགས་སོ།

⁹ད་ངས་ཉིན་གུང་ཉི་མ་ནུབ་པར་བྱེད་ཅིང་། ས་གཞི་ཚང་མར་ཉིན་མོར་མུན་པའི་ནང་དུ་ཚུད་པར་བྱེད་རྒྱུའི་དུས་དེ་ཉེ་བར་རན་པ་ཡིན་ཞེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁰ངས་ཁྱོད་ཚོས་དགའ་སྟོན་རྣམས་གཤིན་པོའི་ཆོ་ག་ལྟར་དང་། དགའ་སྐྱིད་ཀྱི་གླུ་གཞས་རྣམས་སྨྲེ་སྔགས་སུ་བསྒྱུར་རྒྱུ་ཡིན་པ་དང་། ཁྱོད་ཚོས་མགོའི་སྐྲ་བྲེག་ནས་ལུས་ལ་རྩ་རས་གྱོན་ཞིང་། བུ་གཅིག་ལས་མེད་པ་དེའང་ཤི་ནས་མྱ་ངན་བྱེད་བཞིན་པའི་ཕ་མ་བཞིན་དུ་འགྱུར་རྒྱུ་དང་། ཉིན་མོ་དེའི་མཐའ་མ་ནི་ཧ་ཅང་དཀའ་ངལ་དང་ལྡན་པར་འགྱུར་རོ།

¹¹ད་ངས་ཡུལ་དེ་ལ་རིང་མིན་མུ་གེ་ཞིག་གཏོང་རྒྱུ་ཡིན་ནོ། མུ་གེ་དེ་ནི་ཁ་ཟས་དང་འཐུང་བའི་མུ་གེ་མ་ཡིན་པར། དེ་ཚོ་གཙོ་བོ་དཀོན་མཆོག་གི་གསུང་འཕྲིན་མ་ཐོས་པའི་རྐྱེན་གྱིས་ལྟོགས་ཅིང་སྐོམ་པར་འགྱུར་ཞེས་ང་བླ་ན་མེད་པའི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹²གཙོ་བོ་དཀོན་མཆོག་གི་གསུང་འཕྲིན་འཚོལ་བའི་ཕྱིར་མི་རྣམས་འཆི་བའི་རྒྱ་མཚོ་ནས་མེ་ཌིི་ཊ་རེ་ནི་ཡན་དུ་འགྲོ་རུང་། དེ་རྙེད་མི་ཡོང་།

¹³ཉིན་མོ་དེ་ལ་གཟུགས་པོ་ཐང་པོ་ཡོད་པའི་ན་གཞོན་ཕོ་མོ་ཚོའང་སྐོམ་ཞིང་དྲན་མེད་དུ་རྒྱལ་བ་དང་།

¹⁴བྷིར་ཤེ་བྷ་བཅས་ས་མར་ཡའི་ལྷ་རྟེན་སོགས་ཀྱི་མིང་བརྗོད་དེ་མནའ་སྐྱེལ་མཁན་རྣམས་མར་རྒྱལ་ནས་དེ་ཚོ་སྐྱར་དུ་ལངས་བར་མི་འགྱུར་རོ༎