Read Tibetan — པོད་སྐད་Tibetan Old Testament 2011 ཨ་མོསེ 9 Bible Online

ཨ་མོསེ 9 - Tibetan — པོད་སྐད་Tibetan Old Testament 2011 bible

ཨ་མོསེ 9

¹ངས་གཙོ་བོ་དཀོན་མཆོག་ནི་མཆོད་ཁྲིའི་འགྲམ་དུ་བཞེངས་ཡོད་པ་མཇལ་བྱུང་། ཁོང་གིས་ང་ལ་བཀའ་གནང་གསལ། ཀ་ཕིབས་རྣམས་གཡོ་འགུལ་གཏོང་ཕྱིར་མཆོད་ཁང་གི་ཀ་བའི་རྩེ་ལ་ཤུགས་ཆེན་པོ་ཞུས་ཏེ། དེ་ཚོ་བཅག་ནས་མི་རྣམས་ཀྱི་མགོའི་ཐོག་ལ་ལྷུང་དུ་ཆུག་ཅིག ལྷག་འཕྲོས་ལུས་པ་རྣམས་ཀྱང་ངས་དམག་ལ་བསད་རྒྱུ་ཡིན་པས། དེ་ཚོའི་ཁོངས་ནས་མི་གཅིག་ཀྱང་བྲོས་ནས་ཐར་ཐབས་མེད་དོ།

²གལ་ཏེ་དེ་ཚོས་གཤིན་པོའི་ཁམས་སུ་སླེབས་པའི་ལམ་བྲུས་པ་ཡིན་ནའང་། ངས་དེ་ཚོར་འཛིན་བཟུང་བྱེད་རྒྱུ་དང་། གལ་ཏེ་ཁོ་ཚོ་མཐོ་རིས་སུ་འཛེགས་པའི་ཐབས་བྱས་ཀྱང་། ངས་དེ་ཚོ་མར་འབེབས་རྒྱུ་ཡིན།

³གལ་ཏེ་ཁོ་ཚོ་རི་བོ་ཀར་མེལ་གྱི་རྩེ་ལ་གབ་པ་ཡིན་ནའང་། ངས་དེ་ཚོ་བཙལ་ཏེ་འཇུས་རྒྱུ་ཡིན། དེ་ཚོ་རྒྱ་མཚོའི་གཏིང་དུ་གབ་པ་ཡིན་ནའང་། ངས་ཆུ་སྲིན་ཆེན་པོ་བཏང་ཞིང་། དེས་དེ་ཚོ་ཟ་བར་འགྱུར།

⁴གལ་སྲིད་དེ་ཚོ་དགྲ་བོ་ལག་ཏུ་ཚུད་ནས་ཡུལ་གཞན་དུ་བཙོན་རར་འཁྲིད་རུང་། དེ་ཚོའི་དགྲ་བོ་རྣམས་ལ་ངས་དེ་ཚོ་གསོད་དགོས་ཤེས་བཀའ་བཀོད་བྱེད་རྒྱུ་ཡིན། ངས་དེ་ཚོ་འཇིག་པར་བྱེད་རྒྱུའི་བློ་ཐག་གཙང་མ་གཅད་ཟིན་པས། ད་ངས་དེ་ཚོར་སྐྱབས་གྲོགས་སོགས་གང་ཡང་བྱེད་མི་ཡོང་ངོ་།

⁵བླ་ན་མེད་པའི་ཀུན་དབང་དཀོན་མཆོག་གིས་ས་གཞིར་རེག་པ་དང། དེ་འདར་ཞིང་གཡོ། དེའི་ནང་གནས་མཁན་ཚང་མས་སྨྲེ་སྔགས་འདོན། ཆུ་བོ་ནཱ་ཨེལ་ལྟར་ས་གཞི་ཡོངས་རྫོགས་ཡར་མར་གཡོ་ཞིང་འཁྲུགས།

⁶མཐོ་རིས་ཀྱི་གནས་སུ་གཙོ་བོ་དཀོན་མཆོག་ཉིད་ཀྱི་བཞུགས་གནས་ཕོ་བྲང་རྩིག་པ་གནང་ཞིང་། ས་གཞིའི་སྟེང་དུ་མཁའ་དབྱིངས་ཀྱི་རྨོག་འཇོག་པར་མཛོད། ཁོང་གིས་རྒྱ་མཚོའི་ཆུ་རྣམས་བོས་ནས་ས་གཞིའི་སྟེང་གཤོས། ཁོང་གི་མཚན་ནི་གཙོ་བོ་དཀོན་མཆོག་ཡིན།

⁷གཙོ་བོ་དཀོན་མཆོག་གིས་གསུངས་པ། ཀྱེ་ཨིསི་རཱཨེལ་མི་མང་རྣམས། ངས་ཁྱོད་ཚོ་ལ་དྲན་གསོ་བྱས་པ་བཞིན་ཨི་ཐི་ཨོ་པི་ཡའི་ཡུལ་མི་རྣམས་ལའང་དེ་བཞིན་དྲན་གསོ་བྱེད་ཀྱི་ཡོད། ཨི་ཇིབ་ཡུལ་ནས་ཁྱོད་ཚོ་འཁྲིད་ཡོང་བ་བཞིན། ཀ་རིཊ་ཡུལ་ནས་ཕེ་ལེ་ཤེད་པ་རྣམས་དང་། ཀིར་གྱི་ཡུལ་ནས་ཨ་རམ་པ་རྣམས་འཁྲིད་ཡོང་བ་ཡིན་ནོ།

⁸བླ་ན་མེད་པའི་གཙོ་བོ་དཀོན་མཆོག་ནི་སྡིག་པའི་གང་བའི་ཨིསི་རཱཨེལ་གྱི་རྒྱལ་ཁམས་དེ་ལ་གཟིགས་ཤིང་གཞུགས་ཡོད་པས། ངས་དེ་ལ་ས་གཞིའི་ངོས་ནས་མེད་པར་བྱེད་རྒྱུ་ཡིན། འོན་ཀྱང་ངས་ཡ་ཀོབ་ཀྱི་མི་བརྒྱུད་ཚང་མ་མེད་པར་བྱེད་མི་ཡོང་།

⁹དེ་བས་ན་ངས་བཀའ་བཀོད་བྱས་ནས་འབྲུ་ཚགས་མའི་ནང་དུ་གཡོ་བསྒུལ་བཏང་བ་བཞིན། ཨིསི་རཱཨེལ་མི་མང་རྣམས་ཀྱང་གཡོ་བསྒུལ་བཏང་རྒྱུ་ཡིན། མཁོ་མེད་རྣམས་ནི་དབྱེ་བའི་ཕྱིར་མི་རིགས་གཞན་གྱི་ཁྲོད་དུ་དེ་ཚོར་གཡོ་བསྒུལ་བཏང་རྒྱུ་ཡིན།

¹⁰ངའི་མི་མང་གི་ཁོངས་ནས་གཙོ་བོ་དཀོན་མཆོག་གི་ང་ཚོའི་ཐོག་ཏུ་གནོད་འཚེ་གང་ཡང་གཏོང་གནང་མི་ཡོང་ཞེས་བརྗོད་མཁན་སྡིག་ཅན་ཚང་མ་དམག་ཏུ་ཚར་གཅོད་གཏོང་རྒྱུ་ཡིན་ནོ༎

¹¹གཙོ་བོ་དཀོན་མཆོག་གིས། གྱང་གོག་རྙིང་པ་ལྟ་བུར་འགྱུར་བའི་དཱ་བིད་ཀྱི་རྒྱལ་ཁམས་དེ་སླར་ཡང་ཉམས་གསོ་བྱེད་པའི་དུས་དེ་ཉེ་བར་རན་པས། ད་ངས་དེའི་ལྕགས་རི་རྣམས་སྐྱར་དུ་བརྩིག་ནས་དེ་ཚོ་ཉམས་གསོ་བྱས་ཏེ། སྔར་བཞིན་ལེགས་པར་བཟོ་རྒྱུ་ཡིན་ནོ།

¹²དེ་རྗེས་ཨིསི་རཱཨེལ་མི་མང་ཚོས་ལྷག་འཕྲོས་ལུས་པའི་ཨེ་དོམ་་གྱི་ཆ་ཤས་དང་སྔར་ངའི་ཁོངས་སུ་གཏོགས་པའི་མི་བརྒྱུད་ཚང་མ་དབང་འཛིན་བྱེད་ཡོང་ཞེས་གསུངས་པ་དང་། དེ་ལྟར་འགྲུབ་པར་གནང་བར་འགྱུར།

¹³གཙོ་བོ་དཀོན་མཆོག་གིས་གསུངས་པ། ད་ནི་དུས་ཉེ་ཞིང་རན་པས། སྟོན་ཐོག་རྔ་བའི་དུས་ཡུན་ལས་ལོ་ཐོག་སྨིན་པར་མྱུར་ཞིང་། རྒུན་ཆང་བཟོ་བའི་དུས་ཡུན་ལས་རྒུན་འབྲུམ་སྨིན་པ་མྱུར་བ་དང་། རི་བོ་ཁག་ནས་རྒུན་ཆང་མངར་མོ་འཛག་སྟེ། དེས་རི་ཕྲན་རྣམས་ལ་ཡོངས་སུ་རྒྱུག་པར་འགྱུར།

¹⁴ངས་རང་གི་མི་མང་རྣམས་དེ་ཚོའི་ཡུལ་དུ་འཁྲིད་ཡོང་ཞིང་། དེ་ཚོས་གྲོང་ཁྱེར་གྱང་གོག་དེ་ཚོ་ཉམས་གསོ་བྱས་ཏེ། དེར་གནས་སྡོད་བྱེད་རྒྱུ་ཡིན། དེ་ཚོས་རྒུན་ཚལ་བཙུགས་ནས་རྒུན་ཆང་འཐུང་བ་དང་། ཚལ་ཞིང་འདེབས་ལས་བྱས་ཏེ་སྟོན་ཐོག་ལ་ལོངས་སྤྱོད་བྱེད་པར་འགྱུར།

¹⁵སྔར་ངས་དེ་ཚོར་སྟེར་བའི་ཡུལ་དེར་ངའི་མི་མང་རྣམས་ངས་གཞིས་བཙུགས་བཅུག་རྒྱུ་ཡིན། ཁོ་ཚོ་ས་གནས་དེ་ནས་ནམ་ཡང་བཏོན་པར་མི་འགྱུར་རོ། ཞེས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་བཀའ་གནང་བ་ཡིན་ནོ།།