Read Tibetan — པོད་སྐད་Tibetan Old Testament 2011 ཨོ་བ་དི་ཡཱ 1 Bible Online

ཨོ་བ་དི་ཡཱ 1 - Tibetan — པོད་སྐད་Tibetan Old Testament 2011 bible

ཨོ་བ་དི་ཡཱ 1

¹ཨོ་བ་དི་ཡཱས་མཐོང་བའི་ཞལ་གཟིགས་ནི། བླ་ན་མེད་པའི་གཙོ་བོ་དཀོན་མཆོག་གིས་ཨེ་དྷོམ་གྱི་སྐོར་ལ་བཀའ་གནང་བ། ང་ཚོས་གཙོ་བོ་དཀོན་མཆོག་ནས་གསུང་འཕྲིན་ཞིག་ཐོས་གསལ། མི་རིགས་རྣམས་ཀྱི་རྩར་ཕོ་ཉ་ཞིག་བཏང་བ་གནང་སྟེ། ཕོ་ཉ་དེས་དེ་ཚོ་ལ། གྲ་སྒྲིག་བྱོས་ཤིག། ད་ང་ཚོ་ཨེ་དྷོམ་དང་འཐབ་རྒོལ་བྱེད་པར་འགྲོའོ་ཞེས་སྨྲས་སོ༎

²གཙོ་བོ་དཀོན་མཆོག་གི་ཨེ་དྷོམ་ལ་གསུངས་པ། ངས་ཁྱོད་ལ་མི་རིགས་རྣམས་ཀྱི་ཁྲོད་ནས་མཐོང་ཆུང་བཟོས་ཏེ། ཚང་མས་ཁྱོད་ལ་སྡང་བར་འགྱུར་རོ།

³ཁྱོད་ནི་རང་གི་ང་རྒྱལ་གྱི་རྐྱེན་གྱིས་རང་ལ་མགོ་སྐོར་བཏོང་ཞིང་། ཁྱོད་ཚོའི་རྒྱལ་ས་ནི་བྲག་རིའི་མཁར་རྫོང་ཞིག་ཡིན་པ་དང་། ཡང་ཁྱོད་ཚོའི་གནས་ཁང་ནི་ས་གནས་མཐོ་སར་ཡིན་པས། ཁྱོད་ཚོས་རང་གི་སེམས་ལ། ང་ཚོར་དམའ་སར་འབེབས་མཁན་སུ་ཞིག་ཡོད་དམ་ཞེས་བསམ་མོད།

⁴འོན་ཀྱང་ཁྱོད་ནི་བྱ་ཆེན་གོ་བོ་ཀླད་དཀར་གྱི་ཚང་ལྟར་རང་གི་ཁྱིམ་མཐོ་སར་བཟོས་པའི་རྐྱེན་གྱིས། རྒྱུ་སྐར་རྣམས་ཀྱི་ཁྲོད་དུ་ཡོད་པ་བཞིན་མཐོང་ན་ཡང་། ངས་ཁྱོད་ལ་དེ་ནས་ཀྱང་མར་འབེབས་པར་བྱ་ཞེས་གཙོ་བོ་དཀོན་མཆོག་གིས་ཨེ་དྷོམ་ལ་གསུངས་སོ།

⁵མཚན་ལ་རྐུན་མ་འོངས་དུས་དེ་ཚོས་རང་ལ་གང་དགོས་པ་མ་གཏོགས་མི་འཁྱེར་ཞིང་། དེ་བཞིན་རྒུན་འབྲུམ་བསྡུ་སྒྲུག་བྱེད་མཁན་ཚོས་ཀྱང་རྒུན་འབྲུམ་རེ་གཉིས་ལྷག་འཕྲོས་བཞག་སྲོལ་ཡོད་ཀྱང་། འོན་ཀྱང་ཁྱོད་ཀྱི་དགྲ་བོས་ཁྱོད་ལ་ཡོངས་སུ་ཚར་གཅོད་པས། ཁྱོད་ལ་རྐྱེན་ངན་ཆེན་པོ་ཇི་ལྟར་བྱུང་ངམ།

⁶ཀྱེ་ཨེ་སའོའི་མི་བརྒྱུད་ཚོ། ཁྱོད་ཚོའི་རྒྱུ་དངོས་རྣམས་བཅོམ་ཡོད་པ་དང་།

⁷ཁྱོད་ཀྱི་མཐུན་ཕྱོགས་ཚོས་ཁྱོད་ལ་མགོ་སྐོར་བཏང་སྟེ་ཡུལ་ནས་ཕྱིར་སྐྲོད་བྱེད་པ་དང་། ཁྱོད་དང་ཞི་བདེ་ཡོད་པའི་མི་ཚོས་ཀྱང་ད་ལྟ་ཁྱོད་ལ་དབང་སྒྱུར་བྱེད་ཡོད། ཁྱོད་དང་མཉམ་དུ་ཁ་ཟས་བཟའ་བའི་གྲོགས་པོ་ཚོས་ཁྱོད་ཀྱི་ཆེད་དུ་རྙི་བཙུགས་ཡོད་པ་དང་། དེ་ཚོས་ཁྱོད་ཀྱི་གཅང་དྲུང་དེ་ཚོ་གང་དུ་ཡོད་ཅེས་ཟེར་རོ།

⁸ངས་ཨེ་དྷོམ་ལ་ཆད་པ་གཏོང་བའི་ཉིན་མོ་དེ་ལ་དེའི་མི་མཁས་པ་རྣམས་ཚར་གཅོད་གཏོང་རྒྱུ་ཡིན་པ་དང་། དེ་ཚོའི་བློ་གྲོས་རྣམས་མེད་པར་བྱེད་རྒྱུ་ཡིན་ཞེས་གཙོ་བོ་དཀོན་མཆོག་གིས་གསུངས་སོ།

⁹ཀྱེ་ཏེ་མན་གྲོང་ཁྱེརཁྱོད་ཀྱི་དཔའ་བོ་རྣམས་དཔའ་འཁུམ་ཞིང་། ཨེ་དྷོམ་གྱི་དམག་མི་རྣམས་ཡོངས་སུ་གསོད་པར་འགྱུར༎

¹⁰ཁྱོད་ཀྱིས་རང་གི་སྤུན་ཡ་ཀོབ་ཀྱི་རིགས་རྒྱུད་ལ་བཙན་དབང་བྱས་པའི་རྐྱེན་གྱིས་ཁྱོད་ངོ་ཚས་ཡོངས་སུ་འགེབས་ཏེ། དུས་མཐའ་མེད་བར་དུ་འཇིག་པར་འགྱུརོ།

¹¹དགྲ་བོ་རྣམས་ཀྱིས་གཞུང་སྒོ་སྟོར་སྐབས། དེ་ཉིན་ཁྱོད་ཚོ་ལོགས་སུ་བསྡད་པ་དང་། དེ་ཚོས་ཡེ་རུ་ཤ་ལེམ་གྱི་རྒྱུ་ནོར་འཁྱེར་ནས་ནང་ཁུལ་དུ་བགོ་བཤའ་རྒྱབ་པས། ཁྱོད་ཚོའང་དེ་ཚོ་དང་འདྲའོ།

¹²རང་གི་སྤུན་རྐྱེན་ངན་ནང་དུ་ཚུད་སྐབས་དེ་ལ་སྐྱབས་གྲོགས་མ་བྱེད་པར་ལྟ་ནས་བསྡད་མི་རུང་བ་དང་། ཡ་ཧུ་དཱའི་བུ་བརྒྱུད་རྣམས་ལ་འཇིགས་པ་བྱུང་སྐབས་ཁྱོད་དགའ་སྣང་བྱེད་མི་རུང་བ་དང་། དེ་ཚོས་དཀའ་འཚེ་མྱོང་སྐབས་ཁྱོད་ཀྱིས་འཕྱ་གཏམ་བྱེད་མི་རུང་བ་ཡིན་ནོ།

¹³ངའི་མི་འབངས་ཚོས་འཚེ་བ་མྱང་དུས་དེ་ཚོའི་ཐོག་ཏུ་འཕྱ་རྒྱུ་དང་དེ་ཚོའི་རྒྱུ་ནོར་འཕྲོག་བཅོམ་བྱེད་པར་ངའི་མི་འབངས་ཀྱི་གྲོང་ཁྱེར་ནང་དུ་ཁྱོད་ཚོ་འཛུལ་མི་རུང་ངོ་།

¹⁴དེ་ཚོའི་ཁོངས་ནས་བྲོས་འགྲོ་མཁན་རྣམས་ལ་ཁྱོད་ལམ་འཛོམས་སུ་སྒུག་ནས་འཛིན་བཟུང་བྱེད་བཅུག་མི་རུང་པ་དང་། དེ་ཚོར་དཀའ་ངལ་བྱུང་སྐབས་ལྷག་འཕྲོས་ལུས་པའི་དེ་ཚོའི་མི་རྣམས་ལ་ཁྱོད་ཀྱིས་དགྲ་བོའི་ལག་ཏུ་སྤངས་མི་རུང་བ་ཡིན་ནོ༎

¹⁵མི་རིགས་ཚང་མའི་ཁྲོད་དུ་གཙོ་བོ་དཀོན་མཆོག་གི་འཁྲིམས་གཅོད་གནང་བའི་ཉིན་མོ་དེ་ནི་ཉེ་བར་རན་པས། ཀྱེ་ཨེ་དྷོམ་ཁྱོད་ཀྱིས་མི་གཞན་ལ་གང་བྱས་པ་ལྟར་ཁྱོད་ལའང་དེ་བཞིན་བྱེད་ངེས་ཤིང་། ཁྱོད་ཀྱི་ལས་ངན་པའི་སྒྲུབ་འབྲས་ནི་རང་གི་ཐོག་ཏུ་འཁོར་བར་འགྱུར།

¹⁶གང་ལ་ཟེར་ན། ཁྱོད་ཀྱིས་རི་བོ་དམ་པའི་སྟེང་དུ་ངའི་ཁྲོ་བའི་ཕོར་པ་ལས་ཇི་ལྟར་འཐུང་པ་བཞིན། མི་རིགས་གཞན་ཚོས་ཀྱང་དེ་བཞིན་རྟག་ཏུ་འཐུང་ནས་འཁྱོར་ཞིང་། དེ་ཚོའི་ཤུལ་ཙམ་ཡང་གནས་པར་མི་འགྱུར་རོ༎

¹⁷འོན་ཀྱང་རི་བོ་ཛི་ཡོན་དུ་མི་འགའ་ཤས་ཐར་བར་འགྱུར་བ་དང་། གནས་དེ་དམ་པར་བྱུང་བར་འགྱུར། ཡ་ཀོབ་ཀྱི་མི་བརྒྱུད་ཚོས་རང་གི་ཐོབ་སྐལ་ལ་བདག་དབང་བྱེད་རྒྱུ་ཡིན་པ་དང་༎

¹⁸ཡ་ཀོབ་ཀྱི་མི་བརྒྱུད་དང་། ཡོ་སེབ་ཀྱི་མི་བརྒྱུད་ནི་མེ་ལྕེར་འགྱུར་ཞིང་། དེ་ཚོས་ཨེ་སའོའི་མི་རྣམས་ལ་མེས་སོག་རོ་ལ་སྲེག་པ་བཞིན་མེད་བར་བྱས་པར་འགྱུར། ཨེ་སའོའི་མི་བརྒྱུད་ནང་ནས་མི་གཅིག་ཀྱང་ལུས་མི་ཡོང་ཞེས་གཙོ་བོ་དཀོན་མཆོག་གིས་གསུངས་པ་ཡིན་ནོ།

¹⁹ལྷོ་ཕྱོགས་ཀྱི་ཡ་ཧུ་དཱའི་ཡུལ་མི་ཚོས་ཨེ་དྷོམ་གྱི་ཡུལ་དབང་བཟུང་བྱས་པ་དང་། ནུབ་ཕྱོགས་ཐང་ཐེར་ཁུལ་གྱི་ཡུལ་མི་ཚོས་ཕེ་ལེ་ཤེད་དབང་འཛིན་བྱེད་རྒྱུ་ཡིན་པ་དང་། དེ་ཚོས་ཨེཕ་ར་ཡིམ་དང་ས་མར་ཡའི་ས་ཁུལ་ཁག་ནི་ཨིསི་རཱཨེལ་གྱིས་བདག་འཛིན་བྱེད་རྒྱུ་ཡིན། དེ་བཞིན་བེན་ཡ་མིན་གྱི་མི་མང་ཚོས་གྷིལ་ཨད་ལ་དབང་འཛིན་བྱེད་པར་འགྱུར།

²⁰ཨིསི་རཱཨེལ་གྱི་བྱང་ཕྱོགས་སུ་བཙན་བྱོལ་དུ་ཚུད་པའི་དམག་མི་ཚོ་ཕྱིར་ལོག་བྱས་ཏེ། ཕི་ནི་སི་ཨ་ནས་བྱང་ཕྱོགས་ཛ་རེ་ཕད་ཅེས་པའི་ས་གནས་བར་དབང་འཛིན་བྱེད་རྒྱུ་དང་། དེ་བཞིན་སར་དིསེ་རུ་ཡོད་པའི་ཡེ་རུ་ཤ་ལེམ་ནས་ཕྱིན་པའི་བཙན་བྱོལ་པ་ཚོས་ཡ་ཧུ་དཱའི་ལྷོ་ཕྱོགས་ཀྱི་གྲོང་ཁྱེར་ཁག་ལ་དབང་འཛིན་བྱེད་རྒྱུ་ཡིན་ནོ།

²¹ཡེ་རུ་ཤ་ལེམ་གྱི་རྒྱལ་ཁ་ཐོབ་པའི་དཔའ་བོ་རྣམས་ཀྱིས་ཨེ་དྷོམ་ལ་དམག་རྒྱབ་སྟེ། དེར་སྲིད་སྐྱོང་བྱེད་རྒྱུ་ཡིན་པ་དང་། གཙོ་བོ་དཀོན་མཆོག་རང་ཉིད་ནི་དེ་ཚོའི་རྒྱལ་པོ་མཛད་རྒྱུ་ཡིན་ནོ།།