Read Tibetan — པོད་སྐད་Tibetan Old Testament 2011 གྲངས་ཀ 21 Bible Online

གྲངས་ཀ 21 - Tibetan — པོད་སྐད་Tibetan Old Testament 2011 bible

གྲངས་ཀ 21

¹ཀ་ནན་ཡུལ་གྱི་ལྷོ་ཕྱོགས་སུ་ཡོད་པའི་ཨ་རད་ཀྱི་རྒྱལ་པོ་ཀ་ནན་པ་དེས་ཨིསི་རཱཨེལ་པ་རྣམས་ས་གནས་ཨ་ཐ་རིམ་གྱི་ལམ་བརྒྱུད་དེ་ཡོང་གི་ཡོད་པའི་སྐོར་ཐོས་ནས་དེ་ཚོའི་ཐོག་ཏུ་དམག་འཐབ་བྱས་ཏེ། འགའ་ཤས་འཛིན་བཟུང་བྱས་སོ།

²ཨིསི་རཱཨེལ་པ་ཚོས་གཙོ་བོ་དཀོན་མཆོག་ལ་དམ་བཅའ་ཞིག་ཕུལ་ཏེ་སྨྲས་པ། གལ་ཏེ་ཁྱེད་ཀྱིས་མི་འདི་ཚོ་ང་ཚོའི་ལག་ཏུ་གནང་བ་ཡིན་ན། ང་ཚོས་དེ་ཚོའི་གྲོང་ཁྱེར་ཆ་ཚང་རྩ་མེད་གཏོང་རྒྱུ་ཡིན།

³གཙོ་བོ་དཀོན་མཆོག་གིས་དེ་ཚོའི་ཞུ་བར་གསན་ཏེ། ཀ་ནན་པ་འཕམ་པར་བྱེད་ཕྱིར་ཁོ་ཚོར་རོགས་གནང་བས། ཨིསི་རཱཨེལ་པ་ཚོས་དེ་དག་དང་དེ་ཚོའི་གྲོང་ཁྱེར་རྣམས་ཡོངས་སུ་རྩ་མེད་བཟོས་ནས་གནས་དེའི་མིང་ལ་ཧོར་མཱ་ཞེས་བཏགས་སོ༎

⁴དེ་ནས་ཨིསི་རཱཨེལ་པ་རྣམས་རི་བོ་ཧོར་ནས་ཐོན་ཏེ། རྒྱ་མཚོ་དམར་པོ་འགྲོ་བའི་ལམ་བརྒྱུད་དེ་ཡུལ་ཨེ་དྷོམ་མཐའ་བསྐོར་ནས་ཕྱིན་ནོ། འོན་ཀྱང་ལམ་དུ་འགྲོ་དུས་མི་མང་རྣམས་ཡིད་ཐང་ཆད་ནས།

⁵དཀོན་མཆོག་དང་མོ་ཤེ་ལ་བཀུར་བ་འདེབས་ཤིང་རྙོག་བརྗོད་བྱེད་དེ་སྨྲས་པ། ཁྱེད་ཀྱིས་ང་ཚོ་ཨི་ཇིབ་ནས་བཏོན་ཏེ་བཟའ་བཏུང་སོགས་གང་ཡང་མེད་པའི་འབྲོག་སྟོང་འདིར་ང་ཚོ་ཤི་བའི་ཕྱིར་འཁྲིད་ཡོང་དགོས་པ་དེ་གང་ཡིན་ནམ། ད་ནི་ཁ་ཟས་སྐྱོ་པོ་འདི་ལ་ཞེ་ཁྲེལ་བྱུང་།

⁶དེ་ནས་གཙོ་བོ་དཀོན་མཆོག་གིས་ཨིསི་རཱཨེལ་པ་ཚོའི་ཁྲོད་དུ་དུག་སྦྲུལ་གདུག་པ་ཅན་རྣམས་གཏོང་གནང་བས། སྦྲུལ་གྱི་སོ་བརྒྱབ་ནས་ཨིསི་རཱཨེལ་པ་མང་པོ་ཞིག་ཤིའོ།

⁷མི་དམངས་རྣམས་མོ་ཤེའི་རྩར་ཡོང་ནས། ང་ཚོས་གཙོ་བོ་དཀོན་མཆོག་དང་ཁྱེད་ལ་བཀུར་བ་འདེབས་ནས་སྡིག་པ་བྱས་པ་ཡིན། ད་སྦྲུལ་འདི་ཚོ་ཐར་སྤྲོད་གནང་རོགས་གནང་ཞེས་ཁྱེད་ཀྱིས་གཙོ་བོ་དཀོན་མཆོག་ལ་ཐུགས་སྨོན་གནང་རོགས་གནང་ཞེས་ཞུས་སོ། མོ་ཤེས་མི་རྣམས་ཀྱི་ཆེད་དུ་དེ་བཞིན་སྨོན་ལམ་འདེབས་སོ།

⁸དེ་ནས་གཙོ་བོ་དཀོན་མཆོག་གིས་མོ་ཤེ་ལ་ལི་ལས་སྦྲུལ་ཞིག་བཟོས་ནས་ཀ་བའི་ཁར་འཕྱར་དགོས་སོ། སྦྲུལ་གྱིས་སོ་བརྒྱབ་པ་སུས་ཀྱང་ལི་གི་སྦྲུལ་དེ་ལ་བལྟ་བ་ཡིན་ན་དྲག་གསོ་བར་འགྱུར་རོ་ཞེས་གསུངས་སོ།

⁹དེར་བརྟེན་མོ་ཤེས་ལི་ལས་སྦྲུལ་ཞིག་བཟོས་ནས་ཀ་བར་འཕྱར་བ་དང་། སྦྲུལ་གྱིས་སོ་བརྒྱབ་པ་སུས་ཀྱང་ལིའི་སྦྲུལ་དེར་བལྟ་བ་དང་དྲག་གསོ་གི་ཡོད་པ་ཡིན་ནོ༎

¹⁰ཨིསི་རཱཨེལ་པ་རྣམས་མདུན་བསྐྱོད་བྱས་ཏེ་ཨོ་བྷོད་དུ་སྒར་ས་བརྒྱབ་བོ།

¹¹དེ་རྗེས་ཁོ་ཚོ་གནས་དེ་ནས་ཐོན་ཏེ་མོ་ཨབ་པའི་ཡུལ་གྱི་ཤར་ཕྱོགས་ཀྱི་འབྲོག་སྟོང་ཁུལ་དུ་ཡོད་པའི་ཨི་ཡེ་ཨ་བྷ་རིམ་ཟེར་བར་སྒར་ས་བརྒྱབ་བོ།

¹²དེ་རྗེས་ཁོ་ཚོས་ཛེ་རེད་ཀྱི་ལུང་གཤོང་ཁུལ་དུ་སྒར་བརྒྱབ་བོ།

¹³དེ་རྗེས་ཁོ་ཚོ་ཡང་སྐྱར་ཐོན་ཏེ་ཨ་མོར་པའི་ཡུལ་བར་དུ་ཁྱབ་ཡོད་པའི་འབྲོག་སྟོང་ཁུལ་གྱི་གཙང་པོ་ཨར་ནོན་གྱི་བྱང་ཕྱོགས་སུ་སྒར་ས་བརྒྱབ་པ་ཡིན་ནོ། (ཨར་ནོན་ནི་མོ་ཨབ་པ་དང་ཨ་མོར་པ་རྣམས་ཀྱི་དབུས་ཀྱི་ས་མཚམས་འཁེལ་བ་ཡིན་པས།

¹⁴དམག་གི་ལོ་རྒྱུས་འཁོད་པའི་གཙོ་བོ་དཀོན་མཆོག་གི་དེབ་ཀྱི་ནང་དུའང་འདི་ལྟར་གསལ་ཡོད།) སུ་ཕཱའི་ས་ཁུལ་དུ་ཡོད་པའི་ཝ་ཧེབ་གྲོང་ཁྱེར་དང་ལུང་གཤོང་རྣམས་དང་། གཙང་པོ་ཨར་ནོན་དང་།

¹⁵གྲོང་ཁྱེར་ཨར་དང་མོ་ཨབ་ཡུལ་གྱི་ས་མཚམས་བར་དུ་ཁྱབ་པའི་ལུང་གཤོང་གི་ཐུར་དུ་བབ་པའི་ས་ཁུལ་ཁག་བཅས་སོ།

¹⁶དེ་རྗེས་ཁོ་ཚོ་བེ་ཨོར་ཟེར་བའི་ཁྲོན་པར་འབྱོར་བ་དང་། དེར་གཙོ་བོ་དཀོན་མཆོག་གིས་མོ་ཤེ་ལ། མི་རྣམས་འདིར་བཀོང་ཞིག་དང་ངས་དེ་ཚོར་ཆུ་སྟེར་བར་བྱ་ཞེས་གསུངས་པ་དང་།

¹⁷སྐབས་དེར་ཨིསི་རཱཨེལ་པ་ཚོས་གཤམ་གསལ་ལྟར་མགུར་མ་ལེན་ནོ། ཀྱེ། ཁྲོན་པ་རྣམས་རང་གི་ཆུ་ཡར་བཏོན་ཞིག། ང་ཚོས་མགུར་མ་ལེན་ནས་དེ་ལ་བསུ་བར་བྱ།

¹⁸ཁྲོན་པ་དེ་ནི་རྒྱལ་སྲས་རྣམས་ཀྱིས་བྲུས། མི་མང་གི་འགོ་བྱེད་རྣམས་ཀྱིས། ཕྱག་བེར་དང་དབྱུག་པས་བྲུས་པ་ཡིན་ནོ། ཁོ་ཚོ་འབྲོག་སྟོང་དེ་ནས་ཐོན་ཏེ་མཏ་ཏ་ནཱ་ཞེས་པའི་ས་གནས་སུ་བསླེབས་སོ།

¹⁹ཡང་དེ་ནས་ཐོན་ཏེ་ན་ཧ་ལི་ཨེལ་དུ་བསླེབས་སོ། དེ་རྗེས་བྷ་མོཐ་ནང་།

²⁰བྷ་མོཐ་ནས་མོ་ཨབ་པའི་ཡུལ་གྱི་ལུང་གཤོང་ཁུལ་དུ་སོང་ངོ་། ལུང་གཤོང་དེ་ནི་རི་བོ་པིསི་གཱའི་ཤམ་དུ་འབྲོག་སྟོང་གི་ས་ཁུལ་ཚང་མ་མཐོང་ཐུབ་པ་ཡོད་པ་ཡིན་ནོ༎

²¹དེ་ནས་ཨིསི་རཱཨེལ་པ་ཚོས་ཨ་མོར་པའི་རྒྱལ་པོ་སི་ཧོན་གྱི་རྩར་བང་ཆེན་རྣམས་བཏང་ནས་སྨྲས་པ།

²²ང་ཚོ་ལ་ཁྱེད་ཀྱི་ཡུལ་བརྒྱུད་ནས་འགྲོ་རུ་འཇུག་རོགས་གནང་། ང་ཚོ་དང་ང་ཚོའི་ཟོག་སེམས་ཅན་རྣམས་གཞུང་ལམ་འགལ་ནས་ཕར་ཚུར་ཞིང་ངམ་རྒུན་ཚལ་ཁག་ཏུ་འཛུལ་མི་ཡོང་། ཁྱེད་ཀྱི་ཁྲོན་པའི་ཆུའང་འཐུང་མི་ཡོང་། ང་ཚོ་ཁྱེད་ཀྱི་ཡུལ་ནས་མ་ཐོན་བར་དུ་ལམ་ཆེན་ཁོ་ན་བརྒྱུད་དེ་འགྲོ་གི་ཡིན་ཞེས་སྨྲས་ཀྱང་།

²³སི་ཧོན་གྱིས་ཨིསི་རཱཨེལ་པ་རྣམས་རང་གི་ཡུལ་བརྒྱུད་ནས་འགྲོ་མ་བཅུག་གོ ཁོས་རང་གི་དམག་མི་རྣམས་བཀོང་ནས་འབྲོག་སྟོང་གི་ས་གནས་ཡ་ཧཱཛ་བར་དུ་ཕྱིན་ཏེ་ཨིསི་རཱཨེལ་པ་ཚོའི་སྟེང་དུ་འཐབ་རྒོལ་བྱས་སོ།

²⁴འོན་ཀྱང་ཨིསི་རཱཨེལ་པ་ཚོས་དམག་སར་དགྲ་བོ་མང་པོ་བསད་དེ་གཙང་པོ་ཨར་ནོན་ནས་བྱང་ཕྱོགས་ཡ་བྷོག་བར་དུ་རང་གི་དབང་དུ་བསྡུས་པ་ཡིན་ནོ། དེ་བཞིན་དེ་དག་ཨམ་མོན་པ་རྣམས་ཡོད་པའི་གནས་བར་དུ་སླེབས་སོ། གང་ལ་ཟེར་ན་ཨམ་མོན་པ་རྣམས་ཀྱི་ས་མཚམས་ནི་བཙན་པོར་སྲུང་ཡོད་པ་ཡིན་ནོ།

²⁵དེ་བཞིན་ཨིསི་རཱཨེལ་པ་ཚོས་ཨ་མོར་པའི་གྲོང་ཁྱེར་ཁག་དང་ཧེཤ་བྷོན་དང་དེའི་ཉེ་འགྲམ་གྱི་གྲོང་ཁྱེར་རྣམས་རང་གི་དབང་དུ་བསྡུས་ནས་དེར་གཞིས་ཆགས་ཤིང་གནས་སོ།

²⁶ཨ་མོར་པའི་རྒྱལ་པོ་སི་ཧོན་གྱི་རྒྱལ་ས་ནི་ཧེཤ་བྷོན་དུ་ཡོད་ཅིང་། སི་ཧོན་གྱིས་སྔར་མོ་ཨབ་པའི་རྒྱལ་པོ་དང་དམག་འཐབ་བྱས་ནས་གཙང་པོ་ཨར་ནོན་བར་དུ་ཁྱབ་ཡོད་པའི་ཁོའི་ཡུལ་ལུང་ཚང་མ་རང་གི་དབང་དུ་བསྡུས་སོ།

²⁷དེར་བརྟེན་པས་སྙན་ངག་མཁན་རྣམས་ཀྱིས་གཤམ་གསལ་ལྟར་གླུ་གཞས་གཏོང་གི་ཡོད་དོ། སི་ཧོན་རྒྱལ་པོའི་གྲོང་ཁྱེར་ཧེཤ་བྷོན་དུ་ཤོག་ཅིག ཡུལ་དེ་སླར་གསོ་འཛུགས་བསྐྲུན་བྱུང་བ་དེ། ང་ཚོས་མཐོང་བའི་རེ་འདོད་སེམས་ལ་བསྐྱེད།

²⁸རེ་ཞིག་ཧེཤ་བྷོན་གྲོང་ཁྱེར་འདིའི་ནང་ནས། སི་ཧོན་དམག་མི་མེ་བཞིན་སྔོན་དུ་རྒྱུག། དེས་ནི་མོ་ཨབ་ཡུལ་གྱི་གྲོང་ཁྱེར་ཨར་ནི་འཇིག་པར་བྱས། ཨར་ནོན་སྟོད་ཀྱི་རི་ཁུལ་རྣམས་ནི་ཚར་བཅད་བཏང།

²⁹ཀྱེ། མོ་ཨབ་ཡུལ་དུ་གནས་པའི་ཡུལ་མི་རྣམས། གཏམ་དེ་ཁྱོད་དོན་ཉེན་ཚབས་ཅི་ལྟར་ཆེའོ། ཁྱོད་ཚོ་ཀེ་མོཤ་ལ་མཆོད་མཁན་རྣམས། གཅིག་ཀྱང་མ་ལུས་ཡོངས་སུ་འཇིགས་པར་བྱས། ཁྱོད་ཚོའི་ལྷ་ཡིས་སྐྱེས་པ་རྣམས་ལ་ནི། སྐྱབས་བཅོལ་པ་ཡི་གནས་སྟངས་འགྱུར་བཅུག་གོ དེ་བཞིན་ཁྱོད་ཚོའི་བུད་མེད་རྣམས་ལ་ནི། ཨ་མོར་པ་ཡི་རྒྱལ་པོའི་བཙོན་དུ་བཅུག།

³⁰འོན་ཀྱང་ད་ནི་ཧེཤ་བྷོན་ནས་དྷི་བྷོན་བར། དེ་བཞིན་ས་གནས་ན་ཤིམ་ཞེས་པ་ནས། མེ་དྷེ་བྷ་ཡི་ཉེ་འགྲམ་ནོ་པཱ་བར། ཁྱབ་ནས་ཡོད་པའི་དེ་ཚོའི་བུ་བརྒྱུད་རྣམས་ནི་འཇིག་ནས་ཡོད།

³¹དེ་བཞིན་ཨིསི་རཱཨེལ་པ་རྣམས་ཨ་མོར་པ་ཚོའི་ཡུལ་དུ་གནས་སྡོད་བྱས་སོ།

³²སྐབས་དེར་མོ་ཤེ་གྲོང་ཁྱེར་ཡ་ཛེར་དུ་འཐབ་གོལ་ཇི་ལྟར་བྱེད་དགོས་པའི་ཐབས་བཟང་ཤོས་དེ་ཤེས་རྟོགས་བྱེད་པར་རང་གི་མི་རྣམས་བཏང་བས། ཨིསི་རཱཨེལ་པ་ཚོས་གྲོང་ཁྱེར་དེ་དང་དེའི་མཐའ་སྐོར་དུ་ཡོད་པའི་གྲོང་ཚོ་གཞན་རྣམས་དབང་དུ་བསྡུས་པ་དང། དེར་གནས་སྡོད་བྱས་པའི་ཨ་མོར་པ་རྣམས་ཕྱིར་འདེད་བྱས་སོ།

³³དེ་རྗེས་ཨིསི་རཱཨེལ་པ་རྣམས་ལམ་བསྐོར་ནས་བྷ་ཤཱན་དུ་འགྲོ་བའི་ལམ་དེ་འཇུས་སོ། བྷ་ཤཱན་གྱི་རྒྱལ་པོ་ཨོག་གིས་རང་གི་དམག་མི་རྣམས་འཁྲིད་ནས་དེ་ཚོར་འཐབ་རྒོལ་བྱེད་ཕྱིར་ཨེད་རེ་ཨི་ཞེས་པའི་གནས་སུ་ཐོན་ནོ།

³⁴སྐབས་དེར་གཙོ་བོ་དཀོན་མཆོག་གིས་མོ་ཤེ་ལ། ཁྱོད་ཁོ་ལ་འཇིག་མི་དགོས། ངས་ཁྱོད་ལ་ཁོ་དང་ཁོའི་འབངས་མི་སེར་དང་དེ་བཞིན་ཁོའི་ཡུལ་ལུང་ཚང་མའི་ཐོག་ཏུ་རྒྱལ་ཁ་སྟེར་རྒྱུ་ཡིན་པས། སྔར་ཁྱོད་ཀྱི་ཧེཤ་བྷོན་དུ་རྒྱལ་སྲིད་སྐྱོང་མཁན་ཨ་མོར་པའི་རྒྱལ་པོ་སི་ཧོན་ལ་གང་བྱས་པ་བཞིན་ཁོ་ལའང་དེ་ལྟར་བྱས་ཤིག་ཅེས་གསུངས་སོ།

³⁵ཨིསི་རཱཨེལ་པ་ཚོས་ཨོག་དང་ཁོའི་བུ་རྣམས་དང་དེ་བཞིན་ཁོའི་མི་འབངས་ཚང་མ་བསད་དེ། དེ་ཚོའི་མི་ཤུལ་གཅིག་ཀྱང་མ་ལུས་པར་བྱས་པ་མ་ཟད། དེ་ཚོས་ཁོའི་ཡུལ་དེའང་དབང་འཛིན་བྱས་སོ༎