Read Tibetan — པོད་སྐད་Tibetan Old Testament 2011 གྲངས་ཀ 3 Bible Online

གྲངས་ཀ 3 - Tibetan — པོད་སྐད་Tibetan Old Testament 2011 bible

གྲངས་ཀ 3

¹གཙོ་བོ་དཀོན་མཆོག་གིས་མོ་ཤེ་དང་མཉམ་དུ་སི་ནཨེ་རི་བོར་གསུང་གླེང་གནང་སྐབས། ཨ་རོན་དང་མོ་ཤེའི་ནང་མི་ནི་གཤམ་གསལ་ལྟར་ཡིན་ནོ།

²ཨ་རོན་ལ་བུ་བཞི་ཡོད་པ་ནས། རྒན་ཤོས་ན་དྷབ་དང་། དེ་རྗེས་ཨ་བྷི་ཧུ། ཨེ་ལི་ཛར་དང་ཨི་ཐ་མར་བཅས་ཡིན་པ་དང་།

³དེ་དག་ནི་བླ་མའི་གོ་གནས་སུ་བསྔོ་འབུལ་གྱིས་བསྐོ་གཞག་བྱས་ཡོད་པ་ཡིན་ནོ།

⁴འོན་ཀྱང་སི་ནཨེ་འབྲོག་སྟོང་དུ་གཙོ་བོ་དཀོན་མཆོག་ལ་མེ་མི་གཙང་བ་ཞིག་ཕུལ་བའི་རྐྱེན་གྱིས་ན་དྷབ་དང་ཨ་བྷི་ཧུ་གཉིས་ལ་སྲོག་སྐྱོན་བྱུང་བ་ཡིན་ནོ། དེ་ཚོར་བུ་ཕྲུག་མ་བྱུང་བ་ཡིན་པས། ཨ་རོན་འཚོ་ཡུན་རིང་དུ་ཨེ་ལི་ཛར་དང་ཨི་ཐ་མར་གཉིས་ནས་བླ་མའི་གོ་གནས་སུ་སྲི་ཞུ་ཞུ་གནས་པ་ཡིན་ནོ༎

⁵གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

⁶ལེ་ཝིའི་སྡེ་རིགས་རྣམས་འཁྲིད་ནས་དེ་ཚོ་བླ་མ་ཨ་རོན་གྱི་ཞབས་ཏོག་པར་བསྐོ་གཞག་བྱོས་ཤིག

⁷དེ་དག་གིས་ང་གནས་པའི་དབུ་གུར་དམ་པའི་ལས་བྱེད་དགོས་པ་དང་། དེ་བཞིན་བླ་མ་རྣམས་དང་ཨིསི་རཱཨེལ་མི་སྡེ་ཡོངས་ལའང་དེ་བཞིན་ཞབས་ཏོག་ཞུ་དགོས་སོ།

⁸དེ་ཚོས་དབུ་གུར་དམ་པའི་མཁོ་ཆས་རྣམས་ཀྱི་འགན་ལེན་དགོས་པ་དང་། ཨིསི་རཱཨེལ་མི་མང་བྱིངས་ལའང་དེ་བཞིན་ཞབས་ཏོག་ཞུ་དགོས་པ་ཡིན་ནོ།

⁹ལེ་ཝི་པ་ཚོའི་ལས་འགན་ནི་ཨ་རོན་དང་ཁོའི་བུ་རྣམས་ལ་ཞབས་ཏོག་ཞུ་དགོས་པ་ཡིན་ནོ།

¹⁰ཁྱོད་ཀྱི་ཨ་རོན་དང་ཁོའི་བུ་རྣམས་བླ་མའི་ལས་འགན་དུ་བཀོད་བཞག་བྱེད་དགོས་སོ། དེ་མིན་གཞན་སུས་ཀྱང་ལས་ཀ་དེ་བྱེད་པར་ཐབས་ཤེས་བྱས་པ་ཡིན་ན་དེ་ནི་ངེས་པར་དུ་ཤི་དགོས་སོ།

¹¹གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

¹²ད་ལེ་ཝི་པ་རྣམས་ངའི་ཁོངས་སུ་གཏོགས་པ་ཡིན། སྔར་ངས་ཨི་ཇིབ་པའི་བུ་སྔོན་སྐྱེས་ཚང་མ་བསད་པའི་སྐབས་སུ། ཨིསི་རཱཨེལ་ནང་མི་རེ་རེའི་བུ་རྒན་ཤོས་རེ་དང་སེམས་ཅན་གྱི་སྔོན་སྐྱེས་ཚང་མ་ངའི་དོན་དུ་དམ་པར་བཟོས་པ་ཡིན། ད་ཨིསི་རཱཨེལ་གྱི་བུ་སྔོན་སྐྱེས་རྣམས་ཀྱི་ཚབ་ཏུ་ལེ་ཝི་པ་རྣམས་ངའི་ཡིན། དེ་ཚོ་ངའི་ཡིན་པར་འགྱུར། ང་ནི་གཙོ་བོ་དཀོན་མཆོག་ཡིན༎

¹³

¹⁴སི་ནཨེ་འབྲོག་སྟོང་དུ་གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ།

¹⁵ཟླ་བ་གཅིག་གམ་དེ་ལས་ཆེ་བའི་ལེ་ཝིའི་སྐྱེ་པ་ཕོ་རྣམས་རང་རང་སོ་སོའི་ཁྱིམ་ཚང་དང་རིགས་རུས་ལྟར་གྲངས་རྩིས་རྒྱབ་ནས་མིང་ཐོར་བྲིས་དགོས་སོ།

¹⁶མོ་ཤེས་དེ་ལྟར་བྱས་སོ།

¹⁷ལེ་ཝི་ལ་བུ་གསུམ་ཡོད་པ་ནི། གྷེར་ཤོན་དང་། ཀོ་ཧད་དང་མེ་ར་རི་བཅས་ཡིན་པ་དང་། དེ་དག་ནི་སོ་སོའི་རིགས་རུས་ཀྱི་མིང་འཁྱེར་བའི་མེས་པོར་འགྱུར་བ་ཡིན་ནོ། གྷེར་ཤོན་ལ་བུ་གཉིས་ཡོད་པ་ནི་ལིབ་ནི་དང་ཤིམ་ཨི་བཅས་དང། ཀོ་ཧད་ལ་བུ་བཞི་ཡོད་པ་ནི། ཨམ་རམ། ཨིཛ་ཧར། ཧེབ་རོན་དང་ཨུ་ཛི་ཨེལ་བཅས་ཡིན་པ་དང་། དེ་བཞིན་མེ་ར་རི་ལ་བུ་གཉིས་ཡོད་ཅིང་། དེ་དག་ནི་མཱ་ལི་དང་མུ་ཤི་བཅས་ཡིན་ནོ། དེ་དག་ནི་རང་རང་སོ་སོའི་མིང་འཁྱེར་བའི་ཁྱིམ་ཚང་གི་ཕ་མེས་སུ་འགྱུར་བ་ཡིན་ནོ།

¹⁸

¹⁹

²⁰

²¹གྷེར་ཤོན་རིགས་རུས་ཀྱི་ཁོངས་སུ་ལིབ་ནི་དང་ཤིམ་ཨི་ནང་མི་རྣམས་ཡོད་ཅིང་།

²²དེབ་ཐོར་འཁོད་པའི་ཟླ་བ་གཅིག་གམ་དེ་ལས་ཆེ་བའི་སྐྱེས་པ་ཕོ་རྣམས་ཀྱི་གྲངས་འབོར་ནི་ ༧,༥༠༠ ཡོད་པ་དང་།

²³རིགས་རུས་འདི་ནི་དབུ་གུར་དམ་པའི་རྒྱབ་ངོས་ནུབ་ཕྱོགས་སུ་སྒར་རྒྱབ་ནས་བསྡད་དགོས་པ་ཡིན་ཏེ།

²⁴རིགས་རུས་འདིའི་གཙོ་བོ་ནི་ལ་ཨེལ་གྱི་བུ་ཨེལ་ཡ་སཱཕ་ཡིན་ཅིང་།

²⁵དེ་ཚོ་ནི་དབུ་གུར་དམ་པ་དང་། དེའི་ནང་ཤ་དང་ཕྱི་ཁེབས་དང། སྒོའི་ཡོལ་བ་དང་།

²⁶དབུ་གུར་དམ་པ་དང་མཆོད་ཁྲིའི་མཐའ་འཁོར་གྱི་ཁྱམས་རའི་ཡོལ་བ་རྣམས་དང་། ཁྱམས་རའི་སྒོ་ཡོལ་བཅས་ཀྱི་དོ་དམ་པ་ཡིན་པས། ཁོ་ཚོས་ཡོ་ཆས་འདི་དག་དང་འབྲེལ་བ་ཡོད་པའི་ཞབས་ཏོག་ཚང་མ་ཞུ་དགོས་པ་ཡིན་ནོ།

²⁷ཀོ་ཧད་རིགས་རུས་ཀྱི་ཁོངས་སུ་ཨམ་རམ། ཨིཛ་ཧར། ཧེབ་རོན་དང་ཨུ་ཛི་ཨེལ་གྱི་ནང་མི་བཅས་ཡོད་པ་དང་།

²⁸དེབ་ཐོར་འཁོད་པའི་ཟླ་བ་གཅིག་གམ་དེ་ལས་ཆེ་བའི་སྐྱེ་པ་ཕོ་རྣམས་ཀྱི་གྲངས་འབོར་ནི་ ༨,༦༠༠ ཡོད་པ་དང་།

²⁹དེ་དག་ནི་དབུ་གུར་དམ་པའི་ལྷོ་ཕྱོགས་སུ་སྒར་རྒྱབ་ནས་སྡོད་དགོས་པ་ཡིནནོ།

³⁰དེ་ཚོའི་རིགས་རུས་ཀྱི་གཙོ་བོ་ནི་ཨུ་ཛི་ཨེལ་གྱི་བུ་ཨེ་ལི་ཛ་ཕན་ཡིན་ནོ།

³¹དེ་ཚོའི་ལས་འགན་ནི་དམ་བཅའི་སྒྲོམ་དང་ལྕོག་རྩེ་དང་མར་མེའི་སྟེགས་བུ་དང་མཆོད་ཁྲི་དང་། བླ་མ་ཚོས་གནས་མཆོག་དམ་པའི་ནང་དུ་བེད་སྤྱོད་བྱེད་པའི་སྣོད་ཆས་སོགས་དང། དེ་བཞིན་ཤིན་ཏུ་གནས་མཆོག་དམ་པའི་སྒོའི་ཡོལ་བ་བཅས་ལ་བདག་འཛིན་བྱེད་རྒྱུ་ཡིན་པ་དང་། དེ་ཚོས་མཁོ་ཆས་འདི་རྣམས་དང་འབྲེལ་བ་ཡོད་པའི་ཞབས་ཏོག་ཚང་མ་ཞུ་དགོས་པ་ཡིན་ནོ།

³²ལེ་ཝི་པ་རྣམས་ཀྱི་གཙོ་བོ་ནི་བླ་མ་ཨ་རོན་གྱི་བུ་ཨེ་ལི་ཛར་ཡིན་ཞིང་། དེ་ནི་གནས་དམ་པའི་ནང་དུ་ཞབས་ཏོག་ཞུ་མཁན་རྣམས་ཀྱི་གཙོ་བོ་དེ་ཡིན་ནོ།

³³མེ་ར་རིའི་རིགས་རུས་ཀྱི་ཁོངས་སུ་མཱ་ལི་དང་མུ་ཤིའི་ནང་མི་རྣམས་ཡོད་པ་ཡིན་ནོ།

³⁴དེབ་ཐོར་འཁོད་པའི་ཟླ་བ་གཅིག་གམ་དེ་ལས་ཆེ་བའི་སྐྱེ་པ་ཕོ་རྣམས་ཀྱི་གྲངས་འབོར་ནི་ ༦,༢༠༠ ཡོད་པ་དང་།

³⁵རིགས་རུས་འདི་ནི་དབུ་གུར་དམ་པའི་བྱང་ཕྱོགས་སུ་སྒར་རྒྱབ་ནས་བསྡད་དགོས་པ་ཡིན། རིགས་རུས་དེའི་འགོ་དཔོན་ནི་ཨ་བྷི་ཧེལ་གྱི་བུ་ཛུ་རི་ཨེལ་ཡིན་ནོ།

³⁶དབུ་གུར་དམ་པའི་གུར་སྒྲོམ་དང་། དེའི་རྒྱུག་པ་དང་ཀ་བ་དང་ཞབས་འདན་ལ་སོགས་པའི་མཁོ་བྱད་ཚང་མའི་འགན་འཁུར་དེ་ཚོ་ལ་སྤྲད་ཡོད་དོ། མཁོ་བྱད་དེ་དག་དང་འབྲེལ་ཡོད་ཀྱི་སྲི་ཞུ་ཚང་མ་ཁོ་ཚོས་བྱེད་དགོས་ཤིང་།

³⁷ཕྱིའི་ཁྱམས་རའི་ཀ་བ་རྣམས་དང་ཞབས་འདན་རྣམས་དང་ཕུར་པ་རྣམས་དང་ཐག་པ་བཅས་ཀྱི་ལས་འགན་ཡང་ཁོ་ཚོའི་ཐོག་ཏུ་ཡོད་པ་ཡིན་ནོ།

³⁸མོ་ཤེ་དང་ཨ་རོན་དང་ཁོའིི་བུ་རྣམས་ནི་ཤར་ངོས་སུ་དབུ་གུར་དམ་པའི་མདུན་དུ་སྒར་རྒྱབ་ནས་བསྡད་དགོས་ཤིང་། ཨིསི་རཱཨེལ་མི་མང་གི་དོན་དུ་དམ་པའི་གནས་སུ་བྱེད་དགོས་པའི་སྲི་ཞུའི་ལས་འགན་ཚང་མ་ཁོ་ཚོའི་ཐོག་ཏུ་འཁེལ་ཡོད་པ་ལས། དེ་ནི་གཞན་སུ་ཞིག་གིས་ལས་དེ་དག་བྱས་པ་ཡིན་ན་དེ་ནི་ངེས་པར་དུ་ཤི་དགོས་པ་ཡིན་ནོ།

³⁹གཙོ་བོ་དཀོན་མཆོག་གིས་བཀའ་བཞིན་མོ་ཤེས་རིགས་རུས་སོ་སོའི་ཁོངས་སུ་ཟླ་བ་གཅིག་གམ་དེ་ལས་ཆེ་བའི་ལེ་ཝིའི་སྐྱེས་པ་ཕོ་རྣམས་ཀྱི་མིང་ཐོ་བྲིས་པའི་བསྡོམས་གྲངས་ནི་ ༢༢,༠༠༠ ཡོད་པ་ཡིན་ནོ༎

⁴⁰གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཨིསི་རཱཨེལ་ཡོངས་ཀྱི་བུ་སྔོན་སྐྱེས་ཚང་མ་ངའི་ཡིན། དེ་བས་ན་ཨིསི་རཱཨེལ་པའི་བུ་སྔོན་སྐྱེས་ཟླ་བ་གཅིག་ལོན་པ་དང་དེ་ལས་ཆེ་བ་ཚང་མའི་མིང་ཐོ་བྲིས་དགོས། འོན་ཀྱང་དེ་ཚོའི་ཚབ་ཏུ་ངས་ལེ་ཝི་པ་ཚང་མ་བདག་ཉར་བྱེད་རྒྱུ་ཡིན། ང་ནི་གཙོ་བོ་དཀོན་མཆོག་ཡིན། དེ་བཞིན་ཕྱུགས་ཟོག་སྔོན་སྐྱེས་ཚང་མའི་ཚབ་ཏུའང་ངས་ལེ་ཝི་པ་ཚོའི་ཕྱུགས་ཟོག་རྣམས་བདག་ཉར་བྱེད་རྒྱུ་ཡིན།

⁴¹

⁴²དེ་ནས་མོ་ཤེས་གཙོ་བོ་དཀོན་མཆོག་གིས་བཀའ་གནང་བ་བཞིན།

⁴³བུ་སྔོན་སྐྱེས་ཟླ་བ་གཅིག་གམ་དེ་ལས་ཆེ་བ་རྣམས་ཀྱི་མིང་ཐོ་བྲིས་པ་དང་། དེའི་བསྡོམས་གྲངས་ནི་ ༢༢,༢༧༣ བྱུང་བ་ཡིན་ནོ།

⁴⁴གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

⁴⁵ད་ཨིསི་རཱཨེལ་པའི་བུ་སྔོན་སྐྱེས་རྣམས་ཀྱི་ཚབ་ཏུ་ལེ་ཝི་པ་རྣམས་བསྔོ་འབུལ་བྱེད་དགོས་པ་དང་། ལེ་ཝི་པ་རྣམས་ངའི་ཡིན། ང་ནི་གཙོ་བོ་དཀོན་མཆོག་ཡིན། དེ་བཞིན་ཨིསི་རཱཨེལ་པའི་ཕྱུགས་ཟོག་སྔོན་སྐྱེས་རྣམས་ཀྱི་ཚབ་ཏུ་ལེ་ཝི་པ་ཚོའི་ཕྱུགས་ཟོག་རྣམས་བསྔོ་འབུལ་བྱེད་དགོས་སོ།

⁴⁶ཨིསི་རཱཨེལ་པའི་བུ་སྔོན་སྐྱེས་རྣམས་ཀྱི་ཁ་གྲངས་ནི་ལེ་ཝི་པ་ཚོའི་ཁ་གྲངས་ལས་ ༢༧༣ མང་བ་ཡོད་པ་ཡིན་པས། བུ་ཐོལ་པ་རྣམས་ནི་བླུ་རིན་སྤྲད་ནས་ཕྱིར་བླུ་དགོས།

⁴⁷བླུ་རིན་གྱི་ཚད་ནི་བུ་རེར་གཞུང་གི་ཁྲིམས་སྲོལ་ལྟར་ཚད་ལྡན་པའི་དངུལ་ཊམ་ལྔརེ་འཇལ་དགོས།

⁴⁸དངུལ་དེ་ནི་ཨ་རོན་དང་ཁོའི་བུ་རྣམས་ལ་སྤྲོད་དགོས་པ་ཡིན་ནོ།

⁴⁹དེ་ནས་མོ་ཤེས་གཙོ་བོ་དཀོན་མཆོག་གི་བཀའ་གནང་བ་ལྟར་བྱས་སོ།

⁵⁰དངུལ་ཊམ་ ༡,༣༦༥ འཁྱེར་ནས།

⁵¹ཨ་རོན་དང་ཁོའི་བུ་རྣམས་ལ་སྤྲད་དོ༎