Read Tibetan — པོད་སྐད་Tibetan Old Testament 2011 གྲངས་ཀ 6 Bible Online

གྲངས་ཀ 6 - Tibetan — པོད་སྐད་Tibetan Old Testament 2011 bible

གྲངས་ཀ 6

¹གཙོ་བོ་དཀོན་མཆོག་གིས་མོ་ཤེ་ལ།

²གཤམ་གསལ་སློབ་སྟོན་རྣམས་ཨིསི་རཱཨེལ་མི་དམངས་རྣམས་ལ་ཤོད་ཅིག་ཅེས་བཀའ་བསྒོས་གནང་ངོ་། ནཛ་རི་པ་འགྱུར་ཕྱིར་དམིགས་བསལ་གྱི་དམ་བཅའ་ཕུལ་ཏེ། རང་ཉིད་གཙོ་བོ་དཀོན་མཆོག་ལ་བསྔོ་འབུལ་བྱས་པའི་སྐྱེ་ཕོ་མོ་གང་རུང་ཞིག་གིས།

³ཆང་རག་སོགས་འཐུང་མི་ཆོག་པ་དང་། རྒུན་འབྲུམ་ལས་བཟོས་པའི་བཏུང་བ་སོགས་དང་། རྒུན་འབྲུམ་དང་རྒུན་འབྲུམ་སྐམ་པོ་གཉིས་ཀ་ཟ་མི་ཆོག་པ་ཡིན་ནོ།

⁴དེ་བཞིན་ནཛ་རི་པ་འགྱུར་ཡུན་རིང་དུ་ཁོས་རྒུན་ཚལ་ལས་ཐོབ་པའི་ཟས་རིགས་གང་རུང་དང། དེའི་ས་བོན་ནམ་དང་པགས་པ་དང་བཅས་པ་གང་ཡང་ཟ་མི་རུང་བ་ཡིན་ནོ།

⁵ནཛ་རི་པའི་དམ་བཅའ་སྲུང་བའི་ཡུན་རིང་དུ་ཁོས་རང་གི་སྐྲ་བཅད་པའམ་བཞར་མི་ཆོག རང་ཉིད་གཙོ་བོ་དཀོན་མཆོག་ལ་བསྔོ་འབུལ་བྱས་པའི་དུས་ཡུན་རིང་དུ། ནཛ་རིའི་དམ་བཅའ་ཚུལ་བཞིན་སྲུང་སྟེ། དེ་ཚོའི་རང་གི་སྐྲ་སྐེ་བཅུག་དགོས།

⁶ཁོའི་སྐྲ་དེ་ནི་རང་ཉིད་དཀོན་མཆོག་ལ་བསྔོ་འབུལ་བྱས་ཟིན་པའི་རྟགས་མཚན་ཡིན་པས། ཁོས་རོའི་ཉེ་འགྲམ་དུ་ཕྱིན་ནས་རང་ལ་མི་གཙང་བ་བཟོ་མི་ཆོག ཡང་ཕུང་པོ་དེ་ནི་ཕ་མའམ། སྤུན་དང་སྲིང་མོ་སུ་འདྲ་ཞིག་གི་ཡིན་རུང་དེའི་ཉེ་འགྲམ་དུ་འགྲོ་མི་ཆོག་པ་དང་།

⁸ནཛ་རི་པ་བྱུང་ཡུན་རིང་དུ་ཁོ་རང་གཙོ་བོ་དཀོན་མཆོག་ལ་བསྔོ་འབུལ་བྱེད་ཟིན་པ་ཞིག་ཏུ་རྩིས་དགོས་པ་ཡིན་ནོ།

⁹ཁོ་མི་ཞིག་གི་འགྲམ་དུ་བསྡད་ཡོད་སྐབས། བློ་བུར་དུ་མི་དེ་ཤི་བའི་རྐྱེན་གྱིས་བསྔོ་འབུལ་ཟིན་པའི་ནཛ་རི པའི་སྐྲ་དེ་གྲིབ་ཅན་དུ་གྱུར་པ་ཡིན་ན། ཁོས་ཉིན་ཞག་བདུན་བར་དུ་སྒུག་དགོས། རྗེས་སུ་རང་གི་སྐྲ་བཞར་དགོས། དེ་བཞིན་དག་འབྱངས་བྱེད་པའི་སྒོ་ནས་ཁོ་གཙང་བར་འགྱུར་རྒྱུ་ཡིན།

¹⁰ཉིན་ཞག་བརྒྱད་པར་ཁོས་ཕུག་རོན་ནམ་འང་གུ་ཆ་གཅིག་གཙོ་བོ་དཀོན་མཆོག་གནས་པའི་དབུ་གུར་དམ་པའི་སྒོའི་རྩར་འཁྱེར་ཡོང་སྟེ་བླ་མ་ལ་འབུལ་དགོས་ཤིང་།

¹¹བླ་མས་བྱ་གཅིག་དེ་སྡིག་སེལ་གྱི་མཆོད་པ་དང་གཞན་དེ་སྦྱིན་སྲེག་གི་མཆོད་པར་ཕུལ་ཏེ། ཁྱོད་ཀྱི་ཆེད་དུ་དག་འབྱངས་ཀྱི་ཆོ་ག་ཞིག་བཤམས་དགོས། གང་ལགས་ཟེར་ན། ཁོས་ཕུང་པོར་འཆང་པས་ཕྱིར་རོ། ཉིན་མོ་དེ་རང་ལ་ཁོས་རང་གི་སྐྲ་དེ་སྐྱར་དུ་བསྔོ་འབུལ་བྱས་ཏེ།

¹²གཙོ་བོ་དཀོན་མཆོག་གི་སྤྱན་སྔར་ནཛ་རི་པ་འགྱུར་ཡུན་རིང་དེ་སྐྱར་དུ་བསྔོ་འབུལ་བྱེད་དགོས། དེ་སྔོན་གྱི་དུས་ཡུན་དེ་ནི་རྩིས་མེད་དུ་འགྱུར་ཟིན་པ་ཡིན་ནོ། གང་ལགས་ཟེར་ན། དེ་སྔ་བསྔོ་འབུལ་ཟིན་པའི་ཁོའི་སྐྲ་དེ་མི་གཙང་བར་འགྱུར་བས་ཕྱིར་རོ། ཁོས་ལུག་གུ་ལོ་གཅིག་ལོན་པ་ཞིག་གུན་ཚབ་འཇལ་བའི་མཆོད་པར་འབུལ་དགོས།

¹³ནཛ་རི་པ་ཞིག་གིས་རང་གི་དམ་བཅའ་ཆ་ཚང་སྒྲུབ་ཟིན་པའི་རྗེས་སུ་བྱེད་དགོས་པའི་ཆོ་ག་ནི། གཙོ་བོ་དཀོན་མཆོག་གི་དབུ་གུར་དམ་པའི་གཟིམས་སྒོའི་རྩར་བཅར་ཏེ།

¹⁴གཙོ་བོ་དཀོན་མཆོག་ལ་སྐྱོན་མེད་པའི་སེམས་ཅན་གསུམ་མཆོད་པར་འབུལ་དགོས་པ་ནི། སྦྱིན་སྲེག་གི་ཆེད་དུ་ལོ་གཅིག་ལོན་པའི་ལུ་གུ་ཕོ་ཞིག་དང་། སྡིག་སེལ་གྱི་མཆོད་འབུལ་ཕྱིར་དུ་ལོ་གཅིག་ལོན་པའི་ལུ་གུ་མོ་ཞིག་དང་། དེ་བཞིན་མཐུན་འབྲེལ་གྱི་མཆོད་འབུལ་བྱེད་ཕྱིར་ལུག་གཅིག་བཅས་ཡིན་ནོ།

¹⁵ཁོས་ཆི་མན་མེད་པའི་བག་ལེབ་ཙེལ་པོ་གང་དེ། ཁ་སྐྱུར་པོའི་སྣུམ་བསྲེས་ནས་བཟོས་པའི་བག་ལེབ་མཐུག་པོ་དག་དང་ཁ་སྐྱུར་པོའི་སྣུམ་བྱུགས་པའི་བག་ལེབ་སྲབ་མོ་བཅས་འབུལ་དགོས་ཤིང་། ཡང་དེའི་ཁར་གཏན་འབེབས་ཟིན་པའི་འབྲུ་དང་རྒུན་ཆང་གི་མཆོད་པ་ཡང་ཁོས་འབུལ་དགོས།

¹⁶བླ་མས་འདི་དག་ཚང་མ་གཙོ་བོ་དཀོན་མཆོག་གི་དྲུང་དུ་འབུལ་ནས་སྡིག་སེལ་དང་སྦྱིན་སྲེག་གི་མཆོད་པ་བཅས་འབུལ་དགོས།

¹⁷དེ་བཞིན་ཕོ་ལུག་ནི་མཐུན་འབྲེལ་གྱི་མཆོད་པར་གཙོ་བོ་དཀོན་མཆོག་ལ་འབུལ་དགོས་པ་དང་། ཙེལ་པོ་དེ་ནང་ཡོད་པའི་བག་ལེབ་དེ་དང་ཆབས་ཅིག་འབུལ་དགོས། འབྲུ་དང་རྒུན་ཆང་གི་མཆོད་པ་བཅས་ཀྱང་འབུལ་དགོས།

¹⁸དབུ་གུར་དམ་པའི་གཟིམ་སྒོའི་རྩར་ནཛ་རི་པས་རང་གི་སྐྲ་བཞར་ནས་མཐུན་འབྲེལ་གྱི་མཆོད་པ་འབར་བཞིན་པའི་མེའི་ནང་དུ་སྐྲ་དེ་བླུགས་དགོས།

¹⁹དེ་རྗེས་ལུག་ཐུག་གི་དཔུང་པ་ཆུའི་ནང་དུ་འཁོལ་ཚར་བའི་ཞུགས་ལ་བླ་མ་གྱིས་དེ་ཕྱིར་བཏོན་ཏེ། ཙེལ་པོའི་ནང་ནས་བག་ལེབ་མཐུག་པོ་ཞིག་དང་། ཡང་བག་ལེབ་སྲབ་མོ་ཞིག་ཀྱང་བླངས་ཏེ་དེ་དག་ཚང་མ་ནཛ་རི་པའི་ལག་ཏུ་སྤྲོད་དགོས།

²⁰དེ་ནས་བླ་མས་དེ་དག་དམིགས་བསལ་གྱི་འབུལ་བའི་ཚུལ་དུ་གཙོ་བོ་དཀོན་མཆོག་ལ་འབུལ་དགོས། དེ་ནི་བླ་མའི་ཆེད་དུ་དམ་པའི་འབུལ་བ་ཡིན། དེའི་ཁར་ཁྲིམས་སྲོལ་བཞིན་དུ་ལུག་ཐུག་གི་བྲང་ཤ་དང་རྐང་ཤ་བཅས་བླ་མའི་ཐོབ་སྐལ་ཡིན་ཏེ། དེ་རྗེས་ནཛ་རི་པས་རྒུན་ཆང་སོགས་འཐུང་ཆོག་པ་ཡིན་ནོ།

²¹ཁྲིམས་དེ་ཚོ་ནི་ནཛ་རི་པ་རྣམས་ཀྱི་ཆེད་དུ་ཡིན། གལ་ཏེ་ནཛ་རི་པ་ཞིག་གིས་དམ་བཅའ་བྱས་པ་ལས་ལྷག་པའི་འབུལ་བ་ཞིག་འབུལ་རྒྱུའི་ཁས་ལེན་བྱས་ཡོད་པ་ཡིན་ན། ཁོས་དེ་བཞིན་ཆ་ཚང་སྒྲུབ་དགོས་སོ༎

²²གཙོ་བོ་དཀོན་མཆོག་གིས་མོ་ཤེ་ལ།

²³ཨ་རོན་དང་ཁོའི་བུ་ཚོས་ཨིསི་རཱཨེལ་པ་རྣམས་ལ་བྱིན་གྱིས་རླབས་སྐབས། གཤམ་གསལ་ལྟར་ཚིག་འདི་རྣམས་བརྗོད་དགོས་ཅེས་བཀའ་གནང་ངོ་།

²⁴གཙོ་བོ་དཀོན་མཆོག་གིས་ཁྱོད་ལ་བྱིན་གྱིས་རླབས་ཤིང་གཅེས་སྐྱོང་མཛད་པར་ཤོག

²⁵གཙོ་བོ་དཀོན་མཆོག་གིས་ཁྱོད་ལ་ཐུགས་རྗེ་དང་བཀའ་དྲིན་གནང་བར་མཛོད།

²⁶གཙོ་བོ་དཀོན་མཆོག་གིས་ཁྱོད་ལ་ཐུགས་རྗེས་གཟིགས་ཤིང་ཞི་བདེ་གནང་བར་ཤོག

²⁷དེ་ནས་གཙོ་བོ་དཀོན་མཆོག་གིས་གསུངས་པ། གལ་ཏེ་དེ་ཚོས་ངའི་མིང་བརྗོད་དེ་ཨིསི་རཱཨེལ་པ་རྣམས་ལ་བྱིན་རླབས་སྤྲད་པ་ཡིན་ན་ངས་ཁོ་ཚོར་བྱིན་གྱིས་རླབས་རྒྱུ་ཡིན་ནོ༎