Read Tibetan — པོད་སྐད་Tibetan Old Testament 2011 མི་ཀཱ 2 Bible Online

མི་ཀཱ 2 - Tibetan — པོད་སྐད་Tibetan Old Testament 2011 bible

མི་ཀཱ 2

¹མཚན་མོ་ཉལ་ཁྲིར་འགྱེལ་ནས་བྱུས་ངན་རྩོམ་མཁན་རྣམས་བཀྲ་མི་ཤིས་པ་ཡིན། གང་ལགས་ཟེར་ན་ནམ་ལང་བ་དང་ཁོ་ཚོས་གོ་སྐབས་རྙེད་མ་ཐག་ཏུ་བྱུས་ངན་དེ་དག་ལག་ལེན་ལྟར་ངེས་ཤིང་།

²དེ་ཚོས་མི་གཞན་གྱི་ས་ཞིང་དང་ཁང་ཁྱིམ་རྣམས་བཙན་འཕྲོག་བྱས་པས། མི་དང་རྒྱུ་དངོས་སོགས་གང་ལའང་བརྟན་ཆ་མེད་པ་ཡིན་ནོ།

³དེ་ནས་གཙོ་བོ་དཀོན་མཆོག་གིས། ངས་ཁྱོད་ཚོའི་ཐོག་ཏུ་རྐྱེན་ངན་ཞིག་གཏོང་རྒྱུ་ཡིན་པས། དེ་ལས་ཁྱོད་ཚོ་ཐར་ཐབས་མེད་ཅིང་། དཀའ་ངལ་དེའི་ནང་དུ་ཚུད་པའི་ཚེ་ཁྱོད་ཚོའི་ང་རྒྱལ་ཡོངས་སུ་འཇོམས་པར་འགྱུར།

⁴དེ་དུས་མི་གཞན་གྱིས་ཁྱོད་ཚོར་བྱུང་བའི་རྐྱེན་ངན་དེ་ལ་དཔེ་བླངས་ཤིང་། འཕྱ་གཏམ་དང་འབྲེལ་སྨྲེ་སྔགས་འདི་བཞིན་གླུ་ལེན་པར་འགྱུར། ངེད་རྣམས་ཡོངས་སུ་སྟོངས་ནས་འཇིག་ཅིང་ནུབ། ང་ཚོའི་ས་ཞིང་གཙོ་བོ་དཀོན་མཆོག་གིས་བཞེས། ང་ཚོར་བཙོན་བཟུང་བྱེད་མཁན་ལ། ས་ཞིང་དེ་དག་ཆ་བགོས་གནང་།

⁵དེར་བརྟེན་རྗེས་སུ་གཙོ་བོ་དཀོན་མཆོག་གི་མི་འབངས་རྣམས་ལ་ས་སྐལ་ཕྱིར་སློག་བྱེད་སྐབས་ཁྱོད་ཚོའི་ནང་ནས་སུ་ལའང་ས་སྐལ་ཐོབ་མི་ཡོང་།

⁶མི་མང་ཚོས་ང་ལ་བརྗོད་གསལ། ང་ཚོར་དེ་ལྟ་བུའི་ལུང་བསྟན་བཤད་མི་དགོས། དཀོན་མཆོག་གིས་ང་ཚོར་དམའ་འབེབས་དེ་འདྲ་ནམ་ཡང་གནང་མི་སྲིད།

⁷ཨིསི་རཱཨེལ་མི་མང་རྣམས་ལ་དམོད་པ་ཕོག་ཡོད་པ་ཡིན་ནམ། གཙོ་བོ་དཀོན་མཆོག་གི་ཐུགས་བཟོད་དེ་རྫོགས་པ་ཡིན་ནམ། ཁོང་གིས་ང་ཚོར་དེ་འདྲ་གནང་སྲིད་དམ། དྲང་པོ་བྱེད་མཁན་རྣམས་ལ་ངའི་བཀའ་ཡིས་བཟང་པོ་མི་བྱེད་དམ།

⁸གཙོ་བོ་དཀོན་མཆོག་གིས་བཀའ་ལན་དུ། ཁྱོད་ཚོས་ངའི་མི་མང་ལ་དགྲ་ལྟར་ཐབས་རྒོལ་བྱས་ཤིང་། སྲུང་ཆ་བརྟན་པོ་ཡོད་བསམ་ནས་མི་རྣམས་དམག་ས་ནས་ཁྱིམ་དུ་ཕྱིར་ལོག་གོ འོན་ཀྱང་ཁྱོད་ཚོས་ཁོ་ཚོའི་ལུས་ལ་ཡོད་པའི་སྟོད་ཐུང་ཀྱང་འཕྲོག་བཅོམ་བྱས་པར་སྒུག་ནས་བསྡད་ཡོད།

⁹ངའི་མི་མང་གི་བུད་མེད་རྣམས་གནས་ཁང་སྐྱིད་པོ་ནས་ཕྱིར་བཏོན་བྱས་ཤིང་། དེ་ཚོའི་བུ་ཕྲུག་རྣམས་ནས་བྱིན་རླབས་རྣམས་རྒྱུན་གྱི་ཕྱིར་བཅོམ་ཡོད་པ་ཡིན།

¹⁰ད་ཁྱོད་ཚོ་ལོངས་ལ་ཕར་སོང་ཞིག་ཁྱོད་ཚོའི་སྡིག་པའི་རྐྱེན་གྱིས་གནས་འདི་འཇིག་ཡོད་དོ། ད་ས་ཁུལ་འདིར་དུས་བདེ་པོ་ཞིག་ནམ་ཡང་ཤར་རྒྱུ་མེད་དོ།

¹¹ཁྱོད་ཚོའི་འདོད་པ་བཞིན་དུ་ཆང་རག་སོགས་འབེལ་པོ་ཡོང་བ་ཡོད་ཅེས་ལུང་བསྟན་ལོག་པ་བཤད་མཁན་ལུང་སྟོན་པ་རྫུན་མ་རྣམས་ལ་མི་བརྒྱུད་འདིས་དགའ་མོས་བྱེད་ཀྱི་ཡོད།

¹²འོན་ཀྱང་ངས་ཨིསི་རཱཨེལ་མི་མང་ལྷག་ལུས་ཚང་མ་ལུག་ཁྱུ་ལུག་རར་འཛོམས་པ་བཞིན་ས་ཕྱོགས་གཅིག་ཏུ་འདུ་ཚོགས་བྱས་ཏེ། ཁྱོད་ཚོའི་ཡུལ་དེ་སླར་ཡང་ལུག་ཁྱུའི་ཁེངས་བའི་རྩྭ་ཁ་བཞིན་མི་ཚོགས་མང་པོས་གང་བ་ཡོད།

¹³དཀོན་མཆོག་གིས་དེ་ཚོ་བཙན་བྱོལ་ལས་གྲོལ་བའི་ཐབས་ལམ་ཞིག་མཛད་ནས། གྲོང་ཁྱེར་གྱི་རྒྱལ་སྒོ་རྣམས་སྟོར་ཞིང་ཕྱིར་ཐོན་ནས་རང་དབང་བྱུང་བར་འགྱུར། གཙོ་བོ་དཀོན་མཆོག་རང་ཉིད་དེ་ཚོའི་རྒྱལ་པོའི་ཚུལ་དུ་ཕེབས་ནས་དེ་ཚོར་དབུ་འཁྲིད་གནང་རྒྱུ་ཡིན༎