Read Tibetan — པོད་སྐད་Tibetan Old Testament 2011 མི་ཀཱ 5 Bible Online

མི་ཀཱ 5 - Tibetan — པོད་སྐད་Tibetan Old Testament 2011 bible

མི་ཀཱ 5

¹ཀྱེ། ཡེ་རུ་ཤ་ལེམ་གྱི་ཡུལ་མི་རྣམས། ཁྱོད་ཚོའི་དམག་དཔུང་རྣམས་འཛོམས་བཅུག་ཅིག། གང་ལགས་ཟེར་ན་ང་ཚོར་ཕྱོགས་གང་ས་ནས་མཐའ་སྐོར་ཡོད་པ་དང་། དེ་ཚོས་ཨིསི་རཱཨེལ་གྱི་འགོ་བྱེད་ལ་དཔུང་རྒོལ་བྱ་བཞིན་འདུག།

²གཙོ་བོ་དཀོན་མཆོག་གིས། ཀྱེ་བྷེད་ལེ་ཧེམ་ཨེཕ་ར་ཐཱ་ཁྱོད་ནི་ཡ་ཧུ་དཱའི་ཡུལ་གྱི་ནང་ནས་གྲོང་ཁྱེར་ཆུང་ཤོས་ཤིག་ཡིན་མོད། འོན་ཀྱང་ངས་ཁྱོད་ཀྱི་ནང་ནས་ཨིསི་རཱཨེལ་གྱི་དོན་དུ་སྲིད་སྐྱོང་གནང་མཁན་ཞིག་གཏོང་རྒྱུ་ཡིན། ཁོང་གི་གདུང་རབས་ནི་གནའ་དུས་ནས་ཡོད་པ་ཡིན་ནོ།

³བུད་མེད་སྐྱེ་ཟུག་ཅན་ལ་བུ་དེ་མ་འཁྲུངས་བར་དུ་གཙོ་བོ་དཀོན་མཆོག་གིས་ཉིད་ཀྱི་མི་འབངས་དགྲ་བོའི་ལག་ཏུ་དོར་བ་གནང་ཞིང་། དེ་རྗེས་བཙན་བྱོལ་དུ་གནས་པའི་ཁོང་གི་ཡུལ་མི་རྣམས་རང་གི་མི་རིགས་གཅིག་པའི་ཡུལ་མི་རྣམས་དང་མཉམ་དུ་ཡང་སྐྱར་གཅིག་ཏུ་ཟླ་སྒྲིལ་བར་འགྱུར།

⁴ཁོང་ཕེབས་ནས་གཙོ་བོ་དཀོན་མཆོག་གི་ནུས་མཐུ་དང་དཀོན་མཆོག་གཙོ་བོ་དཀོན་མཆོག་གི་གཟི་བརྗིད་ཀྱི་སྒོ་ནས་ཉིད་ཀྱི་མི་འབངས་རྣམས་ལ་སྲིད་སྐྱོང་མཛད་རྒྱུ་ཡིན་པས། ཁོང་གི་མི་འབངས་རྣམས་འཇིགས་པ་དང་བྲལ་ཞིང་ཞི་བདེའི་ངང་དུ་གནས་པར་འགྱུར། གང་ལགས་ཟེར་ན། ས་གཞི་ཡོངས་ཀྱི་མི་སྡེས་ཁོང་གི་གཟི་བརྗིད་དང་མངའ་ཐང་ཆེན་པོར་གུས་བཀུར་ཞུས་ཤིང་།

⁵ཁོང་གིས་དེ་དག་ལ་ཞི་བདེ་གནང་བར་འགྱུར༎ ཨ་སུར་པ་ཚོས་ང་ཚོའི་ཡུལ་དུ་དམག་རྒྱབ་ནས་ང་ཚོའི་མཁར་རྫོང་སྟོར་ནས་ཡོང་དུས་ང་ཚོས་དེ་ཚོའི་ཐོག་ཏུ་གདོང་ལེན་བྱེད་ཕྱིར། ང་ཚོ་ཆང་མ་ལས་སྟོབས་ཆེ་བའི་དམག་དཔོན་དཔའ་རྩལ་ལྡན་པ་རྣམས་བཏང་གི་ཡིན།

⁶དེ་ཚོས་ནིམ་རོད་ཀྱི་ཡུལ་ཨ་སུར་ལ་དཔུང་ཤུགས་ཆེན་པོས་དབང་དུ་སྡུད་དེ། ཨ་སུར་པ་ཚོས་ང་ཚོའི་ས་ཐོག་ཏུ་དམག་འདྲེན་སྐབས། ང་ཚོའི་དཔའ་བོ་ཚོས་ངེད་རྣམས་ལ་སྐྱབས་ཀྱི་རེད།

⁷ལྷག་འཕྲོས་ལུས་པའི་ཨིསི་རཱཨེལ་པ་རྣམས་ནི་མི་རིགས་མང་པོའི་ཆེད་དུ་གཙོ་བོ་དཀོན་མཆོག་ནས་གནང་བའི་ཟིལ་པ་སོས་པ་དང་འདྲ་བ་དང་། རྩྭའི་ཐོག་ཏུ་བབས་པའི་དྲག་ཆར་དང་མཚུངས་པ་ཡིན། དེ་ཚོས་དཀོན་མཆོག་ལ་མ་གཏོགས་མི་ལ་བློ་གཏད་ནམ་ཡང་བྱེད་མི་ཡོང་།

⁸དེ་བཞིན་མི་རིགས་གཞན་རྣམས་ཀྱི་ཁྲོད་དུ་ལྷག་འཕྲོས་ལུས་པའི་ཨིསི་རཱཨེལ་པ་རྣམས་ནི་ནགས་གསེབ་བམ་རྩྭ་ཁར་གྱི་དབུས་སུ་རི་དྭགས་ཟ་བའི་སེང་གེ་དང་མཚུངས་ཤིང་། དེས་ལུག་ཁྱུའི་དཀྱིལ་དུ་མཆོང་ཞིང་དེ་དག་འཛིན་ཏེ་དུམ་བུར་བཏང་ནས་བསད་པར་འགྱུར། དེ་རྣམས་ཐར་བའི་རེ་ཐབས་དང་བྲལ་བ་ཡིན་ནོ།

⁹ཨིསི་རཱཨེལ་གྱིས་རང་གི་དགྲ་བོ་རྣམས་དབང་དུ་སྡུད་ནས་དེ་དག་ཤུལ་མེད་རྩ་གཏོར་དུ་གཏོང་རྒྱུ་རེད།

¹⁰གཙོ་བོ་དཀོན་མཆོག་གིས། དེ་དུས་ངས་ཁྱོད་ཚོའི་རྟ་རྣམས་འཕྲོག་ནས་ཤིང་རྟ་རྣམས་སྟོར་བཤིག་གཏོང་རྒྱུ་དང་།

¹¹ཁྱོད་ཚོའི་ཡུལ་གྱི་གྲོང་ཁྱེར་རྣམས་རྩ་སྟོར་བཏང་ཞིང་སྲུང་ཆའི་ཁར་རྫོང་རྣམས་ཀྱང་ཡོངས་སུ་མེད་པར་བཟོ་རྒྱུ་ཡིན་པ་དང་།

¹²ཁྱོད་ཚོའི་མཐུ་དང་མན་ངག་ཚང་མ་ཚར་གཅོད་རྒྱུ་དང་ལྷ་པ་དང་མོ་པ་ཡོང་བར་མི་འགྱུར།

¹³དེ་བཞིན་ཁྱོད་ཚོའི་སྐུ་འདྲ་རྣམས་དང་རྡོའི་རྟེན་རྣམས་རྩ་ལག་ཏུ་བཏང་བའི་རྗེས་ལ་ཁྱོད་ཚོ་རང་གིས་བཟོས་པའི་ལྷ་རྟེན་རྣམས་ལ་ནམ་ཡང་བསྙེན་བཀུར་བྱེད་མི་འགྱུར།

¹⁴ངས་ཁྱོད་ཚོའི་ཡུལ་དུ་ཡོད་པའི་ལྷ་མོ་ཨ་ཤེ་རཱའི་སྐུ་འདྲ་རྣམས་སྟོར་རློག་བཏང་ཞིང་། ཁྱོད་ཚོའི་གྲོང་ཁྱེར་རྣམས་ཀྱང་རྩ་ལག་ཏུ་གཏོང་རྒྱུ་ཡིན།

¹⁵ངའི་བཀའ་ལ་བརྩི་སྲུང་མི་བྱེད་མཁན་མི་རིགས་རྣམས་ལ་ངས་ཁྲོ་བ་ཆེན་པོས་དགྲ་ལེན་འཇལ་རྒྱུ་ཡིན་ཞེས་གསུངས་སོ༎