Read Tibetan — པོད་སྐད་Tibetan Old Testament 2011 ན་ཧུམ 3 Bible Online

ན་ཧུམ 3 - Tibetan — པོད་སྐད་Tibetan Old Testament 2011 bible

ན་ཧུམ 3

¹བརྫུན་དང་སྲོག་གཅོད་བྱས་ཤིང་། འཕྲོག་བཅོམ་བྱས་པའི་ནོར་གྱིས་གང་བའི་གྲོང་ཁྱེར་ཁྱོད་བཀྲ་མི་ཤིས།

²རྟ་ལྕག་གི་བརྡུངས་པའི་སྐད་དང་། འཁོར་ལོ་འཁོར་བའི་སྐད་དང་། དེ་བཞིན་རྟ་རྒྱུག་པའི་སྐད་དང་། གཞན་ཡང་ཤིང་རྟ་འཁོར་བའི་སྒྲ་ལ་ཉོན་དང་།

³རྟ་དམག་རྣམས་ཀྱིས་དམག་རྒྱབ་སྐབས་དེ་ཚོའི་རལ་གྲི་དང་མདུང་རྣམས་ཀྱི་འོད་མདངས་འཁྱུག་ཅིང་། གྲངས་ལས་འདས་པའི་མི་རོའི་སྤུངས་ཡོད་སར་རྐང་པ་ཐོགས་ནས་མི་རྣམས་འགྱེལ་ལོ།

⁴གྲོང་ཁྱེར་ནི་ན་ཝཱེ་ནི་མཛེས་སྡུག་ལྡན་ལ་སླུ་འཁྲིད་མཁན་སྨད་འཚོང་མ་དེས་མི་རིགས་མང་པོའི་ཡིད་དབང་འཕྲོག་སྟེ། མཐར་དེ་ཚོ་རང་དབང་དུ་བསྡུས་པས་དེ་ལ་ཉེས་ཆད་ཕོགས་ངེས་པ་ཡིན་ནོ།

⁵ཀུན་དབང་ལྡན་པའི་གཙོ་བོ་དཀོན་མཆོག་གིས་བཀའ་གནང་བ། ཀྱེ་ནི་ན་ཝཱེ་ངས་ཁྱོད་ལ་ཉེས་ཆད་བཏང་ཞིང་། ཁྱོད་ནི་གོས་མེད་གཅེར་བུར་འགྲོ་དགོས་བྱས་ཏེ། མི་རིགས་ཚང་མའི་མདུན་དུ་ཁྱོད་ངོ་ཚའི་ནང་ཚུད་པ་སྟོན་རྒྱུ་ཡིན།

⁶ངས་ཁྱོད་ལ་དམའ་འབེབས་བྱས་ཏེ། ཁྱོད་ཀྱི་ཐོག་ཏུ་གད་སྙིགས་འཕངས་པ་དང་། མི་ཚང་མས་ཁྱོད་ལ་ཧ་ལས་ཤིང་འཇིག་ནས་ལྟ་བར་འགྱུར།

⁷ཁྱོད་མཐོང་མ་ཐག་ཏུ་མི་ཚང་མ་ཕྱི་ལོག་རྒྱབ་སྟེ། དེ་ཚོས་ནི་ན་ཝཱེ་ནི་གྱང་གོག་ཏུ་འགྱུར་ཡོད་པས། མོ་ལ་སུས་སྙིང་རྗེ་སྐྱེ་སྟེ་སེམས་གསོ་གཏོང་མཁན་སུ་ཡོད་དམ་ཞེས་བརྗོད་པ་དང་།

⁸ཀྱེ་ནི་ན་ཝཱེ་ཁྱོད་ཨི་ཇིབ་ཀྱི་རྒྱལ་ས་ཐེ་བེསི་ལས་ལེགས་པ་ཞིག་ཡོད་དམ། གྲོང་ཁྱེར་དེའི་མཐའ་སྐོར་ལ་གཙང་པོ་ན་ཨེལ་ནི་མོའི་སྲུང་སྐྱོབ་ཀྱི་ཕྱིར་ལྕགས་རི་བཞིན་བསྐོར་ཡོད་ཅིང་།

⁹ཡང་རྒྱལ་ཁབ་དེས་ཨི་ཐི་ཨོ་པི་ཡ་དང་ཨི་ཇིབ་ཡོངས་སུ་སྲིད་སྐྱོང་སྟེ། དེའི་མངའ་ཐང་ནི་ཚད་ལས་བརྒལ་ཞིང་། ལིབ་ཡ་ནི་དེའི་མཐུན་འབྲེལ་རྒྱལ་ཁབ་ཅིག་ཡིན་མོད།

¹⁰འོན་ཀྱང་ཐེ་བེསིའི་ཡུལ་མི་རྣམས་ནི་བཙན་བྱོལ་དུ་འཁྲིད་དེ། དེ་ཚོའི་བུ་ཕྲུག་རྣམས་སྲང་ལམ་ཁུལ་དུ་བརྡུངས་ནས་བསད་དོ། ཡང་དེ་ཚོའི་ཡུལ་མི་གཙོ་དྲག་རྣམས་ལྕགས་ཐག་གིས་བཅིངས་ཏེ། དེ་ཚོར་འཛིན་བཟུང་བྱེད་མཁན་ཚོས་དེ་ཚོ་བགོ་ཤ་བརྒྱབ་ནས་འཁྲིད་དོ།

¹¹ཀྱེ་ནི་ན་ཝཱེ་ཁྱོད་ཀྱང་ར་བཟི་བ་བཞིན་བཟི་ནས་རང་གི་དགྲ་བོའི་ལག་ནས་ཐར་ཐབས་བྱེད་རྒྱུ་ཡིན་པ་དང་།

¹²ཁྱོད་ཀྱི་མཁར་རྫོང་ཐམས་ཅད་འབྲས་བུ་སྨིན་པའི་སེ་ཡབ་ཤིང་སྡོང་རྣམས་དང་མཚུངས་ཏེ། དེ་ཚོ་སྤྲུག་མ་ཐག་ཏུ་འབྲས་བུ་རྣམས་ཐད་ཀར་ཁའི་ནང་དུ་ལྷུང་རྒྱུ་དང་།

¹³ཁྱོད་ཀྱི་དམག་མི་རྣམས་ནི་བུད་མེད་དང་མཚུངས་པས། དགྲ་བོའི་མདུན་དུ་ཁྱོད་ཀྱི་ཡུལ་དེ་སྲུང་སྐྱོབ་མེད་བར་ལུས་རྒྱུ་ཡིན་པ་དང་། རྒྱལ་སྒོའི་སྒོ་བརྟན་རྣམས་ཀྱང་མེས་འཚིག་རྒྱུ་ཡིན་ནོ།

¹⁴ཁྱོད་ལ་དམག་གིས་མཐའ་བསྐོར་རྒྱུ་ཡིན་པས། དེ་དུས་མཁོ་བའི་འཐུང་ཆུ་གྲ་སྒྲིགས་བྱེད་དགོས་པ་དང་། མཁར་རྫོང་རྣམས་བརྟན་པོར་བྱོས་ཤིག། འདམ་རྫིས་ཏེ་ས་བག་བཟོ་རྩིས་བྱོས་ཤིག། ས་བག་བཟོ་ཕྱིར་བླུགས་གྲ་སྒྲིག་བྱོས་ཤིག།

¹⁵གང་ལྟར་ཁྱོད་ཀྱིས་ཐབས་ཤེས་གང་བྱས་རུང་ཁྱོད་ནི་མེ་དང་དམག་གིས་ཡོངས་སུ་འཇིག་ངེས་པ་མ་ཟད། ཆ་ག་འབུས་ལོ་ཐོག་ཟས་པ་བཞིན་ཁྱོད་ཚོ་ཚང་མ་རྩ་མེད་དུ་འགྲོ་རྒྱུ་ཡིན་ནོ། ཁྱོད་ཚོ་ཆ་ག་འབུའི་ཚོགས་བཞིན་ཁ་གྲངས་འཕེལ་ཞིང་།

¹⁶ཁྱོད་ཚོའི་ཚོང་པ་རྣམས་སྐར་མའི་ཚོགས་ལས་མང་བར་རྒྱས་མོད། འོན་ཀྱང་ཆ་ག་འབུ་འཕུར་ནས་འགྲོ་བ་བཞིན་ད་ལྟ་དེ་ཚོ་ཚང་མ་གཅིག་ཀྱང་མ་ལུས་པར་ཕྱིན་ཡོད་པ་ཡིན་ནོ།

¹⁷ཁྱོད་ཀྱི་ལས་བྱེད་པ་ཁག་གི་ཁ་གྲངས་ནི་གནམ་གྲང་མོའི་སྐབས་སུ་རྩིག་པའི་ལོག་ལ་གནས་པའི་ཆ་ག་འབུའི་ཚོགས་དང་འདྲ་སྟེ། ཉི་མ་ཤར་བ་དང་དེ་ཚོ་གར་སོང་ཆ་མེད་དུ་འཕུར་ནས་འགྲོ་བ་དང་མཚུངས་སོ།

¹⁸ཀྱེ་ཨ་སུར་གྱི་རྒྱལ་པོ་ཆེན་པོ། ཁྱོད་ཀྱི་སྲིད་ཚབ་རྣམས་དང་ཡུལ་མི་གཙོ་དྲག་ཚང་མ་ཤི་སྟེ། ཁྱོད་ཀྱི་འབངས་རྣམས་རི་བརྒྱུད་ཁུལ་དུ་ཁ་ཐོར་ཞིང་དེ་ཚོ་རང་གནས་སོ་སོར་འཁྲིད་ཡོང་མཁན་སུའང་མེད།

¹⁹ཁྱོད་ཀྱི་རྨ་ཁ་གསོ་བའི་ཐབས་ཤེས་གཅིག་ཀྱང་མེད། ཁྱོད་ལ་བྱུས་ཉེས་བྱུང་བའི་སྐོར་གྱི་གནས་ཚུལ་ཐོས་མཁན་ཚང་མས་དགའ་སྣང་ཆེན་པོས་ལག་པ་རྡབ་བོ། གང་ལགས་ཟེར་ན་ཁྱོད་ཀྱི་སྡུག་རྩུབ་དྲག་པོའི་འོག་ནས་ཐར་བའི་མི་སུ་ཞིག་ཡོད་དམ།།