Read Tibetan — པོད་སྐད་Tibetan Old Testament 2011 ཧ་བྷ་ཀུག 1 Bible Online

ཧ་བྷ་ཀུག 1 - Tibetan — པོད་སྐད་Tibetan Old Testament 2011 bible

ཧ་བྷ་ཀུག 1

¹ལུང་སྟོན་པ་ཧ་བྷ་ཀུག་ལ་འཕྲིན་བྱུང་བ་ལྟར་ལུང་བསྟན་གནང་བ།

²ཀྱེ་གཙོ་བོ་དཀོན་མཆོག། ག་དུས་བར་དུ་སྐྱབས་གྲོགས་ཆེད་དུ་འབོད་བསྐུལ་བྱེད་དགོས་སམ། འོན་ཀྱང་ཁྱེད་ཀྱིས་ངའི་འབོད་བསྐུལ་མ་གསན་པ་དང་། ང་ཚོ་ལ་དུས་ཟིངས་དྲག་པོ་དེ་ལས་ག་དུས་སྐྱབས་གནང་ངམ།

³ང་ལ་འདི་ལྟ་བུའི་ངན་པ་མཐོང་བཅུག་པ་གནང་བ་དེ་གང་ཡིན་ནམ། འདི་ལྟ་བུའི་ཚུལ་མིན་གྱི་ལས་རྣམས་ཁྱེད་ཀྱིས་ཇི་ལྟར་གཟིགས་ཐུབ་བམ། ངའི་མཐའ་འཁོར་བཞི་ལ་འཁྲུགས་ཟིངས་དང་འཇིག་པས་བསྐོར་ཞིང་ཡུལ་གྲུ་ཀུན་ཏུ་འཁྲུགས་རྩོད་ཁོ་ནས་གང་ཡོད་པ་དང་།

⁴ཡུལ་ཁྲིམས་ཉམས་ཏེ་ཁྲིམས་གཅོད་མི་དྲང་ཞིང་། མི་ངན་ནི་མི་དྲང་བདེན་ལས་མང་བར་འཕེལ་ཡོད། ཁྲིམས་ལ་བེད་སྤྱོད་ལོག་པ་བྱེད་ཀྱི་ཡོད་པ་རེད༎

⁵གཙོ་བོ་དཀོན་མཆོག་གིས་ཉིད་ཀྱི་མི་འབངས་རྣམས་ལ་བཀའ་སྩལ་བ། ཁྱོད་ཚོའི་མཐའ་འཁོར་དུ་ཡོད་པའི་མི་རིགས་རྣམས་ལ་མིག་ལྟོས་ཤིག་དང་། ཁྱོད་ཚོས་མཐོང་བའི་གནས་ཚུལ་དེ་ལ་ཁྱོད་ཚོ་ཧ་ལས་པར་འགྱུར། ངས་གང་བྱེད་རྒྱུ་ཡིན་པ་དེའི་སྐོར་ལ་ཁྱོད་ཚོས་ཐོས་ཀྱང་ཡིད་མ་ཆེས་སོ།

⁶ངས་བྷེ་བྷི་ལོ་ནི་ཡ་པའི་མི་རིགས་དྲག་པོ་དང་ཚ་གི་ཚི་གི་རྣམས་ལ་སྟོབས་ཤུགས་ཅན་བཟོ་གི་ཡིན། དེ་ཚོ་འཛམ་གླིང་ཀུན་ཏུ་ཕྱིན་ཏེ་གཞན་ཡུལ་དབང་འཛིན་བྱས་ཤིང་།

⁷མི་གཞན་ལ་དངངས་སྐྲག་དང་ཞེད་སྣང་བསྐུལ་བ་དང་། ང་རྒྱལ་ཆེ་ཞིང་ཁྲིམས་ལ་རྩིས་མེད་བྱེད་མཁན་ཞིག་ཏུ་འགྱུར་བ་དང་།

⁸དེ་ཚོའི་ཞོན་རྟ་རྣམས་ནི་གཟིག་ལས་མགྱོགས་པ་དང་། ལྟོགས་རྔམ་ཆེ་བའི་སྤྱང་ཀི་རྣམས་ལས་ཀྱང་འཇིགས་རུང་ཆེ་ཞིང་། དེ་ཚོའི་རྟ་དམག་རྣམས་ཐག་རིང་ཡུལ་ནས་ཡོང་སྐབས་བྱ་གླག་ཟས་ཀྱི་ཐོག་ཏུ་མཐོ་གཤོག་རྒྱབ་པ་བཞིན་བློ་བུར་དུ་མཆོངས་ཤིང་རྒྱུགས།

⁹དེ་ཚོའི་དམག་མི་རྣམས་ནི་དྲག་ཤུལ་ཆེན་པོས་གཞན་ཡུལ་དབང་འཛིན་བྱས་ཤིང་མདུན་དུ་བསྐྱོད་སྐབས་ཡུལ་མི་ཚང་མར་འཇིགས་སྣང་སྐྱེ། དེ་ཚོས་འཛིན་བཟུང་བྱས་པའི་བཙོན་པའི་ཁ་གྲངས་ནི་བྱེ་མའི་ཚོགས་དང་འདྲ་བར་གྲངས་ལས་འདས།

¹⁰དེ་ཚོས་རྒྱལ་པོ་རྣམས་ལ་དམའ་བེབས་བྱེད་ཅིང་ལས་བྱེད་པ་ཆེ་ཁག་རྣམས་ལ་འཕྱ་ཞིང་གད། མཁར་རྫོང་གང་འདྲ་ཞིག་གིས་ཀྱང་དེ་ཚོ་བཀག་མི་ཐུབ། སའི་འཛིན་རག་སྤུངས་ནས་མཁར་རྫོང་ལེན།

¹¹དེ་ནས་དེ་ཚོ་རླུང་འཚུབ་བཞིན་མྱུར་བར་ཡོང་ནས་འགྲོ་ཡོང་། དེ་ཚོ་མི་ཉེས་ཅན་ཡིན་པ་དང་། དེ་ཚོས་རང་གི་སྟོབས་ཤུགས་ལ་ལྷ་རྣམས་བརྟེན༎

¹²ཀྱེ་གཙོ་བོ་དཀོན་མཆོག། ཁྱེད་ནི་ཐོག་མ་ནས་དཀོན་མཆོག་ལགས་ཤིང་། ཁྱེད་ནི་ངའི་དམ་པ་དང་མཐའ་མེད་པའི་དཀོན་མཆོག་ཡིན། ཀྱེ་ངའི་གཙོ་བོ་དཀོན་མཆོག་ངའི་དཀོན་མཆོག་དང་སྲུང་སྐྱོབ་ཡིན། ཁྱེད་ཀྱི་བྷེ་བྷི་ལོན་པ་རྣམས་ལ་འདེམས་བསྐོས་གནང་སྟེ། ང་ཚོར་ཉེས་ཆད་གཏོང་བའི་ཆེད་དུ་ཁྱེད་ཀྱིས་དེ་རྣམས་ལ་སྟོབས་ཤུགས་ཆེན་པོ་བཟོས་གནང་མོད།

¹³འོན་ཀྱང་ཁྱེད་ཀྱིས་གཡོ་སྒྱུ་ལྡན་པའི་མི་ངན་འདི་རྣམས་ལ་ཐུགས་བཟོད་ཇི་ལྟར་གནང་ཐུབ་བམ། ཁྱེད་ཀྱི་སྤྱན་ནི་ཤིན་ཏུ་དམ་པ་ཡིན་པས། མི་ངན་སྡིག་སྤྱོད་རྣམས་ལ་གཟིགས་མ་ཐུབ་པ་ཡིན་ནོ། མི་ངན་འདི་ཚོས་རང་ལས་ཆོས་སེམས་ཆེ་བའི་མི་རྣམས་ལ་འཇིག་པ་གཏོང་བཞིན་པར་གཟིགས་ནས། ཁྱེད་ཀྱིས་གང་ཡང་མ་གསུངས་པར་དེ་མུར་བཞུགས་པ་དེ་གང་ཡིན་ནམ།

¹⁴མི་མང་རྣམས་ལ་སྲིད་སྐྱོང་དང་ལམ་སྟོན་བྱེད་མཁན་མེད་པར་ཉ་དང་འབུ་སྲིན་ལྟ་བུ་ཇི་ལྟར་བཟོས་གནང་ངམ།

¹⁵ཉ་པས་ཉ་འཛིན་པ་བཞིན་བྷེ་བྷི་ལོན་པ་ཚོས་མི་རྣམས་ལ་ལྕགས་ཀྱུས་མི་རྣམས་བཟུང་ངོ་། དེ་དག་ཉ་དོལ་ནང་དུ་བླུགས་ནས་དགའ་སྣང་ཆེན་པོས་སྐད་བརྒྱབ་པ་དང་།

¹⁶དེ་ཚོས་རང་གི་ཉ་དོལ་རྣམས་ལ་མཆོད་ནས་དམར་མཆོད་འབུལ་གྱི་ཡོད་པ་རེད། གང་ལགས་ཟེར་ན། ཉ་དོལ་དེ་ཚོའི་སྒོ་ནས་ཁོ་ཚོར་དངོས་པོ་བཟང་པོ་དང་འཚོ་བ་འབྱོར་གྱི་ཡོད་པས་ཕྱིར་རོ།

¹⁷ཁོ་ཚོས་སྙིང་རྗེ་མེད་པར་དུས་གཏན་དུ་རང་གི་རལ་གྲིས་མི་རིགས་འདྲ་མིན་རྣམས་ཀྱི་སྲོག་གཅོད་མུ་མཐུད་ནས་གནང་བཅུག་གམ༎