Read Tibetan — པོད་སྐད་Tibetan Old Testament 2011 ཧ་བྷ་ཀུག 2 Bible Online

ཧ་བྷ་ཀུག 2 - Tibetan — པོད་སྐད་Tibetan Old Testament 2011 bible

ཧ་བྷ་ཀུག 2

¹ད་ང་མཁར་རྫོང་མཐོན་པོའི་སྟེང་དུ་འཛེགས་ཏེ་ངའི་སྐྱོན་བརྗོད་ལ་གཙོ་བོ་དཀོན་མཆོག་གིས་བཀའ་གང་གནང་བ་དེ་ཉན་ཕྱིར་སྒུག་ནས་བསྡད་ཀྱི་ཡིན།

²གཙོ་བོ་དཀོན་མཆོག་གིས་ང་ལ་བཀའ་ལན་འདི་གནང་བ། ངས་གང་བསྟན་པ་དེ་ཁྱོད་ཀྱིས་བྱང་བུ་ཞིག་གི་ཐོག་ཏུ་གསལ་པོར་བྲིས་ཤིག དེ་ནི་མཐོང་མ་ཐག་ཏུ་ཀློག་ཐུབ་པ་ཞིག་དགོས།

³འདི་ནི་ད་ལྟ་ལམ་སང་འགྲུབ་པའི་དུས་ལ་མ་རན་པས། དེ་རྣམས་ཡིག་ཐོག་ཏུ་བཀོད་དགོས་པ་ཡིན་མོད། འོན་ཀྱང་དུས་དེ་མྱུར་བར་སླེབས་ཀྱི་ཡོད་པས། ངས་གང་བསྟན་པ་དེ་རྣམས་འགྲུབ་པར་འགོར་བ་འདྲ་པོ་བྱུང་ན་ཡང་སྒུག་དགོས། དེ་ནི་ངེས་པར་འགྲུབ་པ་དང་འགོར་མི་ཡོང་།

⁴བཀའ་འཕྲིན་ནི་འདི་ལྟར་ཡིན། མི་ངན་རྣམས་གསོན་པོར་གནས་མི་འགྱུར། འོན་ཀྱང་ཆོས་དྲང་རྣམས་ནི་དཀོན་མཆོག་ལ་དད་པའི་རྐྱེན་གྱི་གསོན་པོར་གནས་པར་འགྱུརོ༎

⁵ནོར་ནི་སླུ་ཁྲིད་དང་ལྡན་ཞིང་། འདོད་རྔམ་ཅན་གྱི་མི་ནི་ང་རྒྱལ་ཅན་དང་ཚ་གི་ཚི་གི་ཡོད་པས་འཆི་བ་ལྟ་བུའི་ནམ་ཡང་བློ་ཁ་ཚིམ་རྒྱུ་མེད་པས། དེའི་རྐྱེན་གྱིས་དེ་ཚོས་མི་རིགས་གཅིག་རྗེས་གཉིས་རྗེས་ལ་དབང་འཛིན་བྱས་སོ།

⁶དེ་ཚོའི་དབང་འོག་ཏུ་ཚུད་པའི་མི་རྣམས་ཀྱིས་དེ་ཚོར་མི་དགའ་བའི་རྣམ་འགྱུར་བསྟན་ཏེ་འཕྱ་སྨད་བྱེད་ཅིང་སྨྲས་པ། གཞན་ནོར་འཕྲོག་བཅོམ་བྱེད་མཁན་ཁྱོད་ཚོ་འཇིག་པར་ཤོག། ཁྱོད་ཚོས་བཙན་དབང་ཆེན་པོས་བུ་ལོན་དེད་ནས་ག་དུས་བར་དུ་ཕྱུག་པོར་གནས་དགོས་སམ།

⁷འོན་ཀྱང་ཁྱོད་ཆོས་ཧ་གོ་བའི་སྔོན་དུ་བུ་ལོན་ནང་དུ་ཚུད་དེ་བཙན་དབང་གིས་སྐྱེད་ཁ་འཇལ་དགོས་བྱུང་ཡོང་། དགྲ་བོ་རྣམས་ཡོང་ནས་ཁྱོད་ཚོར་འདར་བཅུགོ། དེ་ཚོས་ཁྱོད་ཚོ་ལ་བཅོམ་པར་འགྱུར།

⁸ཁྱོད་ཚོས་མི་རིགས་མང་པོ་བཅོམ་པ་ཡིན་པས་ལྷག་འཕྲོས་ལུས་པ་རྣམས་ཀྱིས་ཁྱོད་ལ་བཅོམ་རྒྱུ་ཡིན། གང་ལགས་ཟེར་ན། ཁྱོད་ཀྱིས་སྲོག་གཅོད་བྱས་ཤིང་འཛམ་གླིང་ཡུལ་གྲུ་མང་པོའི་མི་དང་གྲོང་ཁྱེར་ཁག་ལ་དྲག་གཅོད་བྱས་པའི་རྐྱེན་གྱིས་སོ།

⁹ཁྱོད་འཇིག་པར་འགྱུར་ཡོད། བཙན་དབང་དྲག་པོའི་སྒོ་ནས་བླངས་པའི་ནོར་གྱིས་རང་གི་མི་ཚང་ཕྱུག་པོར་བཟོས་ཡོད་པ་དང་། གནོད་འཚེ་དང་ཉེན་ཁ་ལས་རང་ཉིད་གཅིག་པོའི་ཁང་ཁྱིམ་སྐྱབས་ཐབས་བྱེད་ཡོད།

¹⁰ཁྱོད་ཀྱིས་བཤམས་པའི་བྱུས་ངན་རྣམས་རང་གི་ནང་མིའི་ཐོག་ཏུ་ངོ་ཚའི་རྒྱུ་ཞིག་ཏུ་འགྱུར་ཞིང་། ཁྱོད་ཀྱིས་མི་རིགས་མང་པོར་འཇིག་སྐྱོན་བཏང་བས་ཡང་རང་ཉིད་ཐོག་ཏུ་འཇིག་པ་འཁྱེར་ཡོང་ངོ་།

¹¹ཁྱོད་ཀྱིས་བྱས་པའི་ལས་ངན་གྱི་སྐོར་ལ་རྩིག་པའི་རྡོ་དང་ཐོག་གི་གདུང་མ་རྣམས་ཀྱིས་ཀྱང་ཁྱོད་ཀྱི་ཐོག་ཏུ་སྐད་ཤུགས་ཆེན་པོས་སྐྱོན་བརྗོད་བྱེད་བཞིན་ཡོད།

¹²ཁྱོད་འཇིག་པར་འགྱུར་ཡོད། ཁྱོད་ཀྱིས་གྲོང་ཁྱེར་ནི་ཁྲིམས་འགལ་གྱི་རྨང་གཞི་ལས་བཙུགས་ཡོད་པ་དང་། དེ་ལ་སྲོག་གཅོད་ཀྱི་སྒོ་ནས་ཡར་སླངས་ཡོད་པས།

¹³ཁྱོད་ཀྱིས་དབང་འཛིན་བྱས་པའི་མི་རིགས་རྣམས་ཀྱིས་དོན་མེད་འབད་བརྩོན་བྱས་ཏེ་དེ་ཚོ་རང་ཉིད་ནི་ཐང་ཆད་ཡོད་པ་དང་། ཁོ་ཚོས་གང་སླངས་པ་ཚང་མ་མེས་ཡོངས་སུ་བསྲེགས་ཡོད་དོ། ཡང་དེ་ནི་ཀུན་དབང་ལྡན་པའི་གཙོ་བོ་དཀོན་མཆོག་གིས་གནང་བའི་མཛད་འཕྲིན་ཞིག་ཡིན་ནོ།

¹⁴རྒྱ་མཚོ་རྣམས་ཆུས་གང་བ་བཞིན་ས་གཞི་ནི་གཙོ་བོ་དཀོན་མཆོག་གི་གཟི་བརྗིད་ལྡན་པའི་ཡེ་ཤེས་ཀྱིས་གང་བར་འགྱུར།

¹⁵ཁྱོད་ནི་འཇིག་པར་འགྱུར་ཡོད། ཁྲོ་བོའི་ངང་ཁྱོད་ཀྱིས་རང་གི་ཁྱིམ་མཚེས་ལ་དམའ་འབེབས་དང་ཞབས་འདྲེན་ཞུས་པ་དང་། དེ་ཚོར་ར་བཟི་པ་ལྟར་འཁྱོར་བཅུག་པས།

¹⁶ད་ཁྱོད་ཀྱི་རེ་མོས་ཡིན་ཙང། ཁྱོད་ནི་གུས་ཞབས་ཀྱི་ཚབ་ཏུ་ངོ་ཚས་ཡོངས་སུ་བཀབ་པར་འགྱུར། རང་ཉིད་ཆང་རག་འཐུང་སྟེ་འཁྱོར་བ་དང་། གཙོ་བོ་དཀོན་མཆོག་གིས་ཁྱོད་ལ་རང་གི་ཉེས་ཆད་ཀྱི་ཕོར་པ་དེ་ལས་འཐུང་དུ་བཅུག་པས། ཁྱོད་ཀྱི་གུས་ཞབས་ཚང་མ་དམའ་འབེབས་སུ་འགྱུརོ།

¹⁷ཁྱོད་ཀྱིས་ལེ་བ་ནོན་གྱི་ཤིང་ནགས་ཚང་མ་བཅད་པ་ཡིན་པས་ད་ཁྱོད་ཀྱང་གཅོད་རྒྱུ་དང་། ཁྱོད་ཀྱིས་དེའི་སེམས་ཅན་རྣམས་བསད་པ་ཡིན་པས། ད་སེམས་ཅན་རྣམས་ཀྱིས་ཁྱོད་ལ་དངངས་སྐྲག་བསྐུལ་རྒྱུ་ཡིན། དེ་འདྲ་བྱུང་དགོས་པའི་གནད་དོན་ནི་སྔར་ཁྱོད་ཀྱིས་སྲོག་གཅོད་བྱས་པ་དང་། འཛམ་གླིང་མི་རིགས་ཡོངས་དང་གྲོང་ཁྱེར་ཀུན་ཏུ་ཁྱོད་ཀྱིས་དྲག་སྤྱོད་བྱས་པའི་རྐྱེན་གྱིས་སོ།

¹⁸མིས་བཟོས་པའི་སྐུ་འདྲ་ཞིག་ལ་བརྟེན་པས་ཁྱོད་ལ་ཕན་ཐོག་ག་རེད་ཡོད་དམ། དེས་བརྫུན་ཤ་སྟག་ཤོད་ཀྱི་ཡོད་དོ། སྐུ་འདྲ་བཟོ་མཁན་དེས་རང་གི་ལག་པས་བཟོས་པའི་བཀོད་པ་ལ་བློ་བཏད་བྱས་པ་དང་། དེ་ནི་གཏམ་བརྗོད་མ་ཐུབ་མཁན་སྐུ་འདྲ་ཞིག་མ་གཏོགས་མ་ཡིན།

¹⁹ཁྱོད་ཚོ་འཇིག་པ་ཡིན། ཁྱོད་ཚོས་ཤིང་གི་དུམ་བུ་ཞིག་ལ་ཁྱེད་མནལ་སད་ཅིག་ཅེས་དང་ཡང་རྡོ་ཞིག་ལ། ཁྱེད་ཡར་བཞེངས་ཤིག་ཅེས་སྨྲས་མོད། འོན་ཀྱང་སྐུ་འདྲ་ཞིག་གིས་གང་ཞིག་མངོན་པར་བྱེད་སྲིད་དམ། དེ་ལ་དངུལ་དང་གསེར་གྱིས་བརྒྱན་ཡོད་ནའང་དེའི་ནང་དུ་སྲོག་མེད་དོ།

²⁰གཙོ་བོ་དཀོན་མཆོག་ནི་ཉིད་ཀྱི་མཆོད་ཁང་དམ་པར་བཞུགས་ཡོད་པས། ས་གཞིའི་མི་རིགས་ཡོངས་རྫོགས་ཁོང་གི་སྤྱན་སྔར་ཁུ་སིམ་མེར་གནས་པར་བྱོས་ཤིག།