Read Tibetan — པོད་སྐད་Tibetan Old Testament 2011 ཛེ་ཕ་ནི་ཡཱ 2 Bible Online

ཛེ་ཕ་ནི་ཡཱ 2 - Tibetan — པོད་སྐད་Tibetan Old Testament 2011 bible

ཛེ་ཕ་ནི་ཡཱ 2

¹ཀྱེ་ངོ་ཚ་མེད་པའི་མི་རིགས་རྣམས། ཁྱོད་ཚོ་ཕུབ་མ་ལྟར་རླུང་གི་མ་འཁྱེར་གོང་དང་། གཙོ་བོ་དཀོན་མཆོག་གི་ཐུགས་ཁྲོ་འབར་ཞིང་ཁྱོད་ཚོའི་ཐོག་ཏུ་མ་ཡོང་གོང་དང་། ཁོང་གི་ཐུགས་ཁྲོ་ཉིན་མོ་དེ་མ་བསྟན་པའི་གོང་དུ་ཁྱོད་ཚོ་དྲན་པ་གསོས་ཤིག

³ཀྱེ། སེམས་དུལ་ཞིང་གཙོ་བོ་དཀོན་མཆོག་གི་བཀའ་ལ་རྩིས་སྲུང་ཞུ་མཁན་གྱི་ཡུལ་མི་རྣམས། ཁྱོད་ཚོ་ཁོང་གི་ཕྱོགས་སུ་བློ་ཁ་ཡོངས་སུ་འགྱུར་ཏེ། ལས་དྲང་པོ་བྱས་ཤིང་གཙོ་བོ་དཀོན་མཆོག་གི་སྤྱན་སྔར་སེམས་དུལ་པོ་བྱས་ན། གཙོ་བོ་དཀོན་མཆོག་གི་ཐུགས་ཁྲོའི་ཉིན་མོ་དེ་ལ་ཁྱོད་ཚོ་ཉེས་ཆད་དེ་ལས་ཐར་བར་ཡང་སྲིད་དོ༎

⁴གྲོང་ཁྱེར་གྷ་ཛའི་ནང་དུ་ཡུལ་མི་གཅིག་ཀྱང་མ་ལུས་པ་དང་། ཨཤ་ཀེ་ལོན་སྟོངས་ཤིང་། ཨཤ་དྷོད་ཀྱི་ཡུལ་མི་རྣམས་ཉི་མ་ཕྱེད་ཀའི་ནང་དུ་ཕྱིར་སྐྲོད་གཏོང་རྒྱུ་དང་། དེ་བཞིན་ཨེག་རོན་གྱི་ཡུལ་མི་རྣམས་ཀྱང་རང་གི་གྲོང་ཁྱེར་ནས་མཐར་སྐྲོད་གཏོང་རྒྱུ་ཡིན་ནོ།

⁵རྒྱ་མཚོའི་འགྲམ་དུ་གནས་པའི་ཕེ་ལེ་ཤེད་གྱི་ཡུལ་མི་རྣམས་འཇིག་ཡོད། གཙོ་བོ་དཀོན་མཆོག་གིས་ཁྱོད་ཚོ་གཅིག་ཀྱང་མ་ལུས་པར་ཡོངས་སུ་འཇིག་པར་གནང་རྒྱུ་ཁྲིམས་གཅོད་གནང་ཟིན་པ་ཡིན།

⁶མཚོ་འགྲམ་དུ་ཡོད་པའི་ཁྱོད་ཚོའི་ཡུལ་གྲུ་ཁག་ནི་ལུག་རྫིའི་ཉལ་ཁང་དང་ལུག་ར་མ་གཏོགས་མེད་པའི་ལུང་སྟོངས་ཞིག་ཏུ་འགྱུར་ཞིང་།

⁷ཡ་ཧུ་དཱའི་ཡུལ་མི་གསོན་པོར་གནས་པ་ཚོས་ཁྱོད་ཚོའི་ཡུལ་དེ་དབང་འཛིན་བྱེད་རྒྱུ་ཡིན། དེ་ཚོས་རང་གི་ལུག་རྣམས་དེར་འཚོ་ཞིང་། ཨཤ་ཀེ་ལོན་པའི་ཁང་ཁྱིམ་ཚོར་དེ་ཚོར་མཚན་མོར་ཉལ་བར་འགྱུར། ཡང་དེ་ཚོའི་གཙོ་བོ་དཀོན་མཆོག་ནི་དེ་ཚོ་དང་མཉམ་དུ་འགྲོགས་པར་མཛད་དེ། དེ་ཚོར་སླར་ཡང་ཡར་རྒྱས་གོང་འཕེལ་དུ་གཏོང་བ་གནང་གི་རེད།

⁸ཡང་ཀུན་དབང་ལྡན་པའི་གཙོ་བོ་དཀོན་མཆོག་གིས། མོ་ཨབ་པ་དང་། ཨམ་མོན་པ་ཚོས་ངའི་མི་མང་རྣམས་ལ་དམའ་འབེབས་དང་འཕྱ་གཏམ་བྱེས་ཏེ། དེ་ཚོའི་ཡུལ་དེ་དབང་འཛིན་བྱེད་ཀྱི་ཡིན་ཞེས་ང་རྒྱལ་བྱེད་པ་དེ་ངས་ཐོས་བྱུང་བས།

⁹ཨིསི་རཱཨེལ་གྱི་གསོན་པོའི་གཙོ་བོ་དཀོན་མཆོག་ངས་དམ་བཅའ་བྱས་ཤིང་། མོ་ཨབ་པ་དང་། ཨམ་མོན་པ་གཉིས་ནི་སོ་དྷོམ་དང་གྷོ་མོ་རཱ་བཞིན་དུ་འཇིག་རྒྱུ་ཡིན་པ་དང་། དེ་ཚོ་ཚྭའི་གཏེར་ཞིག་ཏུ་འགྱུར་ཞིང་དེར་ཚེར་ཤིང་མང་པོ་སྐྱེས་ནས་དུས་གཏན་དུ་འཇིག་པའི་གནས་ཤིག་ཏུ་འགྱུར་རྒྱུ་ཡིན་པ་དང་། གསོན་པོར་གནས་ཡོད་པའི་ངའི་མི་མང་ཚོས་དེ་ཚོའི་རྒྱུ་ནོར་བཅོམ་ཞིང་ལུང་པ་ཚང་མ་དབང་འཛིན་བྱེད་རྒྱུ་ཡིན་ནོ་ཞེས་གསུངས་སོ།

¹⁰མོ་ཨབ་པ་དང་ཨམ་མོན་པ་རྣམས་ཀྱིས་ཀུན་དབང་ལྡན་པའི་གཙོ་བོ་དཀོན་མཆོག་གི་མི་མང་རྣམས་ལ་ང་རྒྱལ་ཆེན་པོས་འཕྱ་ཞིང་དམའ་འབེབས་བྱས་པའི་རྐྱེན་གྱིས་ཁོ་ཚོར་དེ་ལྟ་བུའི་ཆད་པ་འཕོག་རྒྱུ་ཡིན་ནོ།

¹¹གཙོ་བོ་དཀོན་མཆོག་གིས་དེ་ཚོར་འཇིགས་སྣང་བསྐུལ་བ་གནང་སྟེ། ས་གཞིའི་ལྷ་རྟེན་རྣམས་ཀྱི་གཟི་བརྗིད་ཡོངས་སུ་མེད་པར་བྱེད་ཅིང་། མི་རིགས་ཀུན་གྱིས་རང་རང་སོ་སོའི་ས་གནས་སུ་ཁོང་ལ་བསྙེན་བཀུར་ཞུ་རྒྱུ་ཡིན་ནོ།

¹²གཙོ་བོ་དཀོན་མཆོག་གིས་ཨི་ཐི་ཨོ་པི་ཡའི་ཡུལ་མི་རྣམས་ཀྱང་ཚར་གཅོད་གཏོང་བ་གནང་ངེས་སོ།

¹³གཙོ་བོ་དཀོན་མཆོག་གིས་ཉིད་ཀྱི་ནུས་མཐུས་ཨ་སུར་གྱི་ཡུལ་འཇིག་པར་མཛད་དེ། གྲོང་ཁྱེར་ནི་ན་ཝཱེའང་ཡོངས་སུ་སྟོངས་ཤིང་། ཆུ་མེད་པའི་བྱེ་ཐང་བཞིན་དུ་སྐམ་པར་འགྱུརོ།

¹⁴གནས་དེ་ནི་ར་ལུག་དང་བ་ཕྱུག་ལ་སོགས་པའི་སེམས་ཅན་གྱི་རིགས་མང་པོ་ཞིག་གནས་པའི་ས་གནས་ཤིག་ཏུ་འགྱུར་རྒྱུ་ཡིན་པ་དང་། དེའི་གྱང་གོག་ཁག་ཏུ་བྱ་འུག་པ་རྣམས་གནས་ཤིང་དེའི་སྒེ་ཁུང་ཁག་ནས་འུག་པས་སྐད་འདོན་ཞིང་། སྒོ་ཐེམ་ཁག་ཏུ་བྱ་རོག་གིས་སྐད་རྒྱབ་པར་འགྱུར། ཡང་དེ་ཚོའི་ཁང་ཁྱིམ་རྣམས་ཞིག་ནས་ནང་གི་ཤུག་ཤིང་ཚང་མ་དེ་ནས་བཀོག་པར་འགྱུར།

¹⁵རང་གི་སྟོབས་ཤུགས་ལ་བློ་གཏད་བྱེད་དེ་རང་ཉིད་སྲུང་སྐྱོབ་བརྟན་པོའི་ནང་དུ་གནས་ཡོད་ཅེས་བསམ་ནས་ང་རྒྱལ་བྱེད་མཁན་གྲོང་ཁྱེར་དེ་ལ་རྐྱེན་ངན་དེ་འདྲ་བྱུང་བར་འགྱུར། གྲོང་ཁྱེར་དེའི་ཡུལ་མི་ཚོའི་སེམས་ལ་ཁོ་ཚོའི་གྲོང་ཁྱེར་དེ་ནི་འཛམ་གླིང་འདིའི་ནང་ནས་གྲོང་ཁྱེར་མངའ་ཐང་དང་སྲུང་སྐྱོབ་ནང་ཡོད་བཅས་བསམ་གྱི་ཡོད་དོ། འོན་ཀྱང་གྲོང་ཁྱེར་དེ་ནི་ཡོངས་སུ་སྟོངས་ཤིང་ནགས་ཀྱི་གཅན་གཟན་འཁོར་བའི་གནས་ཤིག་ཏུ་འགྱུར་བས། དེའི་ཉེ་ཁུལ་ནས་འགྲོ་སྐྱོད་བྱེད་མཁན་རྣམས་ཀྱི་སེམས་ལ་དངངས་སྐྲག་ཆེན་པོས་ཕྱི་ནུར་རྒྱབ་པར་འགྱུར༎