Read Tibetan — པོད་སྐད་Tibetan Old Testament 2011 ཧག་གྷཨེ 2 Bible Online

ཧག་གྷཨེ 2 - Tibetan — པོད་སྐད་Tibetan Old Testament 2011 bible

ཧག་གྷཨེ 2

¹ལོ་དེ་རང་གི་ཟླ་བ་བདུན་པའི་ཚེས་ཉི་ཤུ་གཅིག་གི་ཉིན་ལུང་སྟོན་པ་ཧག་གྷཨེའི་བརྒྱུད་ནས་སྐྱར་དུ་གཙོ་བོ་དཀོན་མཆོག་གིས་གསུངས་བ་ནི།

²ཁོང་གིས་ཧག་གྷཨེ་ལ་ཡ་ཧུ་དཱའི་སྲིད་ཚབ་ཛེ་རུ་བྷ་བྷེལ་དང་བླ་ཆེན་ཡོ་ཤུ་ཨ་དང་མི་མང་ཀུན་ལ་དེ་ལྟར་སྨྲས་དགོས་ཅེས་གསུངས་སོ།

³ཁྱོད་ཚོའི་ནང་ནས་ཐོག་མའི་མཆོད་ཁང་དེ་གཟི་བརྗིད་ཆེན་པོ་ཇི་ལྟར་ཡོད་པའི་སྐོར་དྲན་གསོ་བྱེད་ཐུབ་མཁན་ད་ལྟའང་ཡོད་སྲིད་དོ། ད་ལྟ་ཁྱོད་ཚོས་མཆོད་ཁང་དེ་གང་འདྲ་ཞིག་མཐོང་གི་འདུག་གམ། སྔོན་གྱི་གནས་སྟང་དེ་དང་སྡུར་དུས་ད་ལྟ་གང་ཡང་མ་ཡིན་པ་ལྟར་འཚོར་རམ།

⁴འོན་ཀྱང་ཁྱོད་ཚོ་སུས་ཀྱང་སེམས་ཤུགས་མ་ཉམས་པར་ལས་དེ་བྱོས་ཤིག་གང་ལགས་ཟེར་ན། ང་ཁྱོད་ཚོ་དང་མཉམ་དུ་གནས་ཡོད།

⁵སྔར་ཁྱོད་ཚོ་ཨི་ཇིབ་ནས་ཐོན་སྐབས་ང་ཁྱོད་ཚོ་དང་མཉམ་དུ་རྟག་པར་གནས་ཀྱི་ཡིན་ཞེས་དམ་བཅའ་བྱས་པ་བཞིན་ད་ལྟའང་ང་དེ་བཞིན་གནས་ཡོད་པས། ད་ཁྱོད་ཚོ་འཇིགས་མི་དགོས་སོ།

⁶ངས་རིང་མིན་གནམ་དང་ས་གཞི་དང་། དེ་བཞིན་མཚོ་དང་སྐམ་ས་བཅས་པ་ཚང་མར་གཡོ་འགུལ་ཆེན་པོ་བཏང་རྒྱུ་ཡིན།

⁷རྒྱལ་ཁབ་ཚང་མའི་ཐོག་ཏུ་རྒྱལ་ཁ་ཐོབ་རྒྱུ་ཡིན། དེ་ཚོའི་རྒྱུ་ནོར་ཚང་མ་འཁྱེར་ཡོང་ནས་ངའི་མཆོད་ཁང་དེས་ཡོངས་སུ་ཁེངས་པ་བྱེད་རྒྱུ་ཡིན་ནོ།

⁸ས་གཞི་ནང་ཡོད་པའི་གསེར་དང་དངུལ་ཀྱི་རིགས་ཀུན་གྱི་བདག་པོ་ང་ཡིན་ཅིང་།

⁹ད་ལྟའི་མཆོད་ཁང་གསར་པ་དེ་ནི་སྔར་གྱི་མཆོད་ཁང་རྙིང་པ་དེ་ལས་ཀྱང་གཟི་བརྗིད་ཆེ་བ་ཞིག་བཟོ་རྒྱུ་དང་། དེར་ངས་རང་གི་མི་མང་རྣམས་ལ་ཞི་བདེ་དང་ཡར་རྒྱས་ཕུན་སུམ་ཚོགས་པའི་བྱིན་རླབས་ཤིག་སྟེར་རྒྱུ་ཡིན་ཞེས་ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་སོ༎

¹⁰ཡང་རྒྱལ་པོ་ཆེན་པོ་དྷ་རི་ཨསེ་རྒྱལ་སྲིད་སྐྱོང་ལོ་གཉིས་པའི་ཟླ་བ་དགུ་པའི་ཚེས་ཉི་ཤུ་བཞིའི་ཉིན་ཀུན་དབང་ལྡན་པའི་གཙོ་བོ་དཀོན་མཆོག་གིས་ལུང་སྟོན་པ་ཧག་གྷཨེ་བརྒྱུད་ནས་སྐྱར་དུ་གསུང་གླེང་གནང་ངོ་།

¹¹ཁྱོད་ཀྱིས་གཤམ་གསལ་དོན་གནད་ཁག་གི་སྐོར་ལ་བཀའ་ཁྲིམས་གཞིར་བཟུང་ལྟར་བླ་མ་རྣམས་ཀྱི་བསམ་ཚུལ་གང་ཡོད་སྐོར་དྲི་བ་འདྲི་དགོས་སོ།

¹²གལ་སྲིད་མི་སུ་ཞིག་གིས་དམར་མཆོད་དབུལ་ནས་བསྔོ་འབུལ་བྱས་ཟིན་པའི་ཤའི་དུམ་བུ་ཞིག་རང་གི་གོས་ལ་བསྒྲིལ་ནས་འཁྱེར་འགྲོ་སྐབས། གོས་དེ་ཟུར་ནས་བག་ལེབ་ལ་སོགས་པའི་ཁ་ཟས་ཀྱི་རིགས་དང་། རྒུན་ཆང་དང་། སྐྱུ་རུའི་སྣུམ་མམ། གཞན་ཡང་ཟ་ཆས་ཀྱི་རིགས་གང་འདྲ་ཞིག་ལ་རེགས་པ་ཡིན་ན་ཁ་ཟས་དེ་ཚོ་ཡང་དམ་པར་འགྱུར་རམ་ཞེས་དྲིས་པ་དང་། ལན་དུ་བླ་མ་རྣམས་ཀྱིས། དེ་ལྟར་བྱུང་མི་སྲིད་ཅེས་སྨྲས་སོ།

¹³ཡང་ཧག་གྷཨེས། གལ་ཏེ་མི་ཞིག་གིས་རོ་ལ་ལག་པ་འཆང་ནས་རང་ཉིད་མི་གཙང་བར་འགྱུར་ཞིང་། ཡང་དེས་གོང་གསལ་ཁ་ཟས་ཀྱི་རིགས་ལ་ལག་པ་འཆང་བ་ཡིན་ན། ཁ་ཟས་དེ་ཚོ་ཡང་མི་གཙང་བར་འགྱུར་རམ་ཞེས་དྲིས་པའི་ལན་དུ། བླ་མ་རྣམས་ཀྱིས་དེ་ནི་མི་གཙང་བར་འགྱུར་རོ་ཞེས་སྨྲས་སོ།

¹⁴དེ་ནས་ཧག་གྷཨེས་སྨྲས་པ། གཙོ་བོ་དཀོན་མཆོག་གིས་འདི་སྐད་དུ། མི་བརྒྱུད་འདི་དང་དེ་ཚོའི་ཐོན་སྐྱེད་ཚང་མ་གོང་གསལ་དཔེ་དང་མཚུངས་ཤིང་། དེ་ཚོས་མཆོད་ཁྲིར་ཕུལ་པའི་རྫས་ཚང་མ་མི་གཙང་བ་ཡིན་ནོ༎

¹⁵གཙོ་བོ་དཀོན་མཆོག་གི་གསུངས་པ། ཁྱོད་ཚོའི་ཐོག་ཏུ་གནས་ཚུལ་གང་བྱུང་བ་དེར་ཁྱོད་ཚོས་མཐོང་མི་ཐུབ་བམ། སྔར་མཆོད་ཁང་བཞེངས་འགོ་མ་འཚུགས་གོང་དུ།

¹⁶སྔར་མཆོད་ཁང་བཞེངས་འགོ་མ་འཚུགས་གོང་དུ་ཁྱོད་ཚོས་འབྲུ་ཀི་ལོ་ ༢༠༠ བསྡུ་བའི་རེ་འདོད་བྱས་མོད། འོན་ཀྱང་ཀི་ལོ་ ༡༠༠ ལས་མ་ཐོན་པ་དང་། གཞོང་པའི་ནང་ནས་རྒུན་ཆང་ལི་ཊར་ ༡༠༠ འདོན་པའི་རེ་འདོད་བྱས་ཀྱང་ལི་ཊར་བཞི་བཅུ་ལས་མ་ཐོན་ཞིང་།

¹⁷ཁྱོད་ཚོས་འདེབས་ལས་བྱས་པའི་སྟོན་ཐོག་ཚང་མ་མེད་པར་བཟོ་ཕྱིར་ངས་རླུང་ཚ་པོ་དང་སེར་བ་བཏང་རུང་ཁྱོད་ཚོས་འགྱོད་སེམས་མ་བྱས་མོད།

¹⁸འོན་ཀྱང་དེ་རིང་ཟླ་བ་དགུ་པའི་ཚེས་ཉི་ཤུ་བཞིའི་ཉིན་མོ་འདི་ནི་མཆོད་ཁང་གི་རྨང་གཞི་བཏིང་ཟིན་པའི་ཉིན་མོ་དེ་ཡིན་པས། ད་ནས་ཕྱིན་ཆད་གནས་ཚུལ་གང་བྱུང་སྐོར་ཁྱོད་ཚོས་བསམ་བློ་གཏོང་ཞིག

¹⁹བང་མཛོད་ནང་འབྲུ་སོགས་ལྷག་མེད་ནའང་། རྒུན་ཤིང་དང་། སེ་ཡབ་ཤིང་དང་། སེ་འབྲུ་དང་། དེ་བཞིན་ཁ་སྐྱུར་པོའི་ཤིང་སྡོང་སོགས་ལ་ད་བར་འབྲས་བུ་མ་སྐྱེས་ན་ཡང་། འོན་ཀྱང་ད་ནས་ཕྱིན་ཆད་ངས་ཁྱོད་ཚོར་བྱིན་རླབས་སྟེར་རྒྱུ་ཡིན་ནོ༎

²⁰ཡང་ཟླ་བ་དེ་ཀའི་ཚེས་ཉི་ཤུ་བཞིའི་ཉིན་ཧག་གྷཨེ་བརྒྱུད་ནས་གཙོ་བོ་དཀོན་མཆོག་གིས་གསུང་འཕྲིན་གཉིས་པ་གནང་ཞིང་།

²¹ཡ་ཧུ་དཱའི་སྲིད་ཚབ་ཛེ་རུ་བྷ་བྷེལ་ལ་འདི་སྐད་དུ། ད་ངས་གནམ་དང་ས་གཞི་གཡོ་འགུལ་བྱེད་གྲབ་བྱེད་བཞིན་ཡོད་པ་དང་།

²²རྒྱལ་ཁམས་རྣམས་ཀྱི་ཐོག་ཏུ་རྒྱ་ཁ་ཐོབ་པ་དང་དེ་ཚོའི་ནུས་ཤུགས་མེད་པར་བཟོ་རྒྱུ་ཡིན། དེ་ཚོའི་ཤིང་རྟ་རྣམས་དང་ཁ་ལོ་པ་བཅས་པ་ཚང་མ་རློག་ཅིང་། རྟ་རྣམས་ཤི་བ་དང་། དེ་བཞིན་རྟ་ཞོན་མཁན་རྣམས་ཀྱང་ཕན་ཚུན་གཅིག་གིས་གཅིག་ལ་བསད་པར་འགྱུར་རོ།

²³ཉིན་མོ་དེ་ལ་ངས་རང་གི་ཞབས་ཏོག་པ་ཛེ་རུ་བྷ་བྷེལ་ཁྱོད་ལ་ངའི་མིང་གི་ངང་ན་སྲིད་སྐྱོང་བྱེད་ཕྱིར་བསྐོ་བཞག་བྱེད་རྒྱུ་ཡིན་ནོ། ཁྱོད་ནི་ངས་འདམས་པའི་སྐྱེ་བུ་དེ་ཡིན་ནོ་ཞེས་ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་སོ༎