Read Tibetan — པོད་སྐད་Tibetan Old Testament 2011 ཛ་ཀར་ཡ 1 Bible Online

ཛ་ཀར་ཡ 1 - Tibetan — པོད་སྐད་Tibetan Old Testament 2011 bible

ཛ་ཀར་ཡ 1

¹པར་སི་ཡའི་རྒྱལ་པོ་ཆེན་པོ་དྷ་རི་ཨསེ་ཆབ་སྲིད་སྐྱོང་ལོ་གཉིས་པའི་ཟླ་བ་བརྒྱད་པར་གཙོ་བོ་དཀོན་མཆོག་གིས་བྷེ་རེ་ཀི་ཡཱའི་བུའམ་ཨིད་དྷོའི་ཚ་བོ་ལུང་སྟོན་པ་ཛ་ཀར་ཡཱ་ལ་གསུང་འཕྲིན་འདི་གནང་ངོ་།

²ཀུན་དབང་ལྡན་པའི་གཙོ་བོ་དཀོན་མཆོག་གིས་ཛ་ཀར་ཡཱ་ལ་ང་གཙོ་བོ་དཀོན་མཆོག་ཁྱོད་ཚོའི་མེས་པོ་རྣམས་ལ་ཤིན་ཏུ་ཁྲོ་ཡོད།

³འོན་ཀྱང་ད་ལྟ་ངས་ཁྱོད་ཚོ་ལ་ཤོད་རྒྱུར་ཁྱོད་ཚོ་ནི་ངའི་ཕྱོགས་སུ་བློ་ཁ་བསྒྱུར་ན། ངའང་ཁྱོད་ཚོའི་ཕྱོགས་སུ་ཕྱིར་ལོག་རྒྱུ་ཡིན།

⁴ཁྱོད་ཚོའི་མེས་པོའི་ལམ་ངན་དུ་མ་འབྲོངས་ཤིག། ལོ་མང་སྔོན་ནས་ལུང་སྟོན་པ་ཚོས་ཁོ་ཚོ་ལ། ལས་ངན་སྡིག་སྤྱོད་དག་སྤོང་དགོས་ཅེས་ངའི་གསུང་འཕྲིན་དེ་ཚོ་ལ་སྤྲད་ཀྱང་། ཁོ་ཚོས་ང་ལ་མ་ཉན་པར་བརྩི་སྲུང་མ་བྱས་སོ།

⁵ཁྱོད་ཚོའི་མེས་པོ་རྣམས་དང་ལུང་སྟོན་པ་དེ་ཚོ་ནི་ད་ལྟ་གསོན་པོར་གནས་མེད་དོ།

⁶སྔར་ངས་རང་གི་ཞབས་ཏོག་པ་ལུང་སྟོན་པ་ཚོ་བརྒྱུད་ནས་ཁྱོད་ཚོའི་མེས་པོ་རྣམས་ལ་བཀའ་ཁྲིམས་བཤད་ཅིང་ཟོན་བརྡ་བསྐུལ་རུང་། དེ་ཚོས་རྩིས་མེད་བྱས་པས། དེ་བཞིན་ཁོ་ཚོས་དེའི་ཉེས་ལན་འཁྱེར་དགོས་པ་བྱུང་ངོ་། དེ་ནི་གཙོ་བོ་དཀོན་མཆོག་ངས་སྔར་ནས་ཐག་གཅོད་ཟིན་པ་བཞིན་ཁོ་ཚོར་ཉེས་ཆད་བཏང་བ་ཡིན་པ་དེ་ཁོ་ཚོས་རྗེས་སུ་ཤེས་ཏེ། རང་གིས་བྱས་པའི་ལས་ངན་དག་གི་སྐོར་ལ་བློ་འགྱོད་བསྐྱེད་ཅིང་། ཁོ་ཚོར་ཉེས་ཆད་ཕོག་འོས་པ་དེ་ཁོ་ཚོས་ངོས་ལེན་བྱས་སོ་ཤེས་མི་རྣམས་ལ་ཤོད་ཅིག་ཅེས་གསུངས་སོ༎

⁷རྒྱལ་པོ་ཆེན་པོ་དྷ་རི་ཨསེ་ཆབ་སྲིད་སྐྱོང་ལོ་གཉིས་པའི་ཤེ་བྷད་ཅེས་པའི་ཟླ་བ་བཅུ་གཅིག་པའི་ཚེས་ཉི་ཤུ་བཞིའི་མཚན་མོར་གཙོ་བོ་དཀོན་མཆོག་གིས་ང་ལ་ཞལ་གཟིགས་ཀྱི་སྒོ་ནས་འཕྲིན་ཞིག་གནང་བ་ནི་འདི་ལྟ་སྟེ།

⁸ངས་མི་ཞིག་ཞོན་རྟ་དམར་པོ་ཞིག་ལ་ཞོན་ནས་ལུང་གཤོང་དུ་ཡོད་པའི་ཧ་དས་ཤིང་རྣམས་ཀྱི་ཁྲོད་དུ་བཀག་ནས་བསྡད་ཡོད་པ་ཞིག་མཐོང་བྱུང་། ཡང་དེའི་གཞུག་ལ་རྟ་དམར་པོ་དང་། ཁྲ་ཁྲ་དང་། དཀར་པོ་བཅས་ཀྱང་མཐོང་བྱུང་།

⁹དེ་ནས་ངས་ཕོ་ཉ་དེ་ལ། ཀྱེ་གཙོ་བོ། རྟ་དེ་ཚོ་མཐོང་བའི་རྟགས་མཚན་དེ་གང་ཡིན་ནམ་ཞེས་འདྲི་པའི་ལན་དུ་ཕོ་ཉས། དེའི་གནད་དོན་གང་ཡིན་པ་ངས་བསྟན་རྒྱུ་ཡིན།

¹⁰གཙོ་བོ་དཀོན་མཆོག་གིས་དེ་ཚོ་ལ་འཇིག་རྟེན་དུ་བརྟག་དཔྱད་བྱེད་ཕྱིར་བཏང་གནང་བ་ཡིན་ནོ་ཞེས་སྨྲས་སོ།

¹¹དེ་ནས་དེ་ཚོས་ཕོ་ཉ་དེ་ལ། ང་ཚོ་འཇིག་རྟེན་ཀུན་ཏུ་ཕྱིན་པས། ས་གཞི་ཡོངས་རྫོགས་བཙན་གནོན་གྱི་འོག་ཏུ་གནས་འདུག་པ་མཐོང་བྱུང་ཞེས་ཞུས་པ་དང་།

¹²དེ་ནས་ཕོ་ཉ་དེས། ཀྱེ་ཀུན་དབང་ལྡན་པའི་གཙོ་བོ་དཀོན་མཆོག། ཁྱེད་ལོ་ངོ་བདུན་ཅུའི་རིང་ནས་ཡེ་རུ་ཤ་ལེམ་དང་ཡ་ཧུ་དཱའི་གྲོང་ཁྱེར་རྣམས་ལ་ཐུགས་ཁྲོ་བ་གནང་ཞིང་། དེ་ཚོའི་ཐོག་ཏུ་ཁྱེད་ཀྱིས་སྙིང་རྗེ་མ་གནང་བར་ནམ་ཞིག་བར་དུ་བཞུགས་སམ་ཞེས་བཀའ་འདྲི་ཞུས་པ་དང་།

¹³གཙོ་བོ་དཀོན་མཆོག་གིས་ཕོ་ཉ་དེ་ལ་སེམས་གསོའི་བཀའ་ལན་བཟང་པོ་གནང་བ་དང་།

¹⁴ཀུན་དབང་ལྡན་པའི་གཙོ་བོ་དཀོན་མཆོག་གིས་བཀའ་ལན་གང་གནང་བ་དེའི་སྐོར་ཕོ་ཉས་ང་ལ་བཤད་དེ། དེ་དག་ཁྱབ་སྒྲགས་བྱེད་དགོས་ཅེས་སྨྲས་སོ། ཡང་གཙོ་བོ་དཀོན་མཆོག་གི་བཀའ་ནི་འདི་ལྟ་སྟེ། ངའི་གྲོང་ཁྱེར་དམ་པ་ཡེ་རུ་ཤ་ལེམ་ལ་ངས་བརྩེ་གདུང་གཏིང་རིང་པོ་དང་དོ་སྣང་ཡོད།

¹⁵ཞི་བདེ་ལྷོད་ཡངས་སུ་གནས་པའི་རྒྱལ་ཁབ་རྣམས་ལ་ང་ནི་ཁྲོས་ནས་ཡོད། གང་ལ་ཟེར་ན། ངའི་མི་འབངས་རྣམས་ལ་ངས་ཁྲོ་བ་ངང་འཐེན་བྱེད་སྐབས། རྒྱལ་ཁབ་དེ་ཚོས་ངའི་མི་འབངས་རྣམས་ལ་དཀའ་སྡུག་གང་མང་བཏང་བ་ཡིན་པས་ཕྱིར་རོ།

¹⁶དེ་བས་ན་ཡེ་རུ་ཤ་ལེམ་ལ་སྙིང་རྗེ་བྱེད་ཕྱིར་ད་ང་གྲོང་ཁྱེར་དེར་ཕྱིར་ལོག་བྱས་ཡོད། ད་ངའི་མཆོད་ཁང་དེ་ཉམས་གསོ་བྱེད་རྒྱུ་དང་། གྲོང་ཁྱེར་དེ་སྐྱར་དུ་འཛུག་བསྐྲུན་བྱེད་རྒྱུ་ཡིན།

¹⁷ཡང་ཕོ་ཉས་ང་ལ་སྐྱར་དུ་ཁྱབ་སྒྲགས་བྱེད་དགོས་ཅེས་གསུངས་པའི་བཀའ་ནི་འདི་ལྟ་སྟེ། ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་གསལ། ཁོང་གི་གྲོང་ཁྱེར་རྣམས་ནི་སྔར་བཞིན་ཡར་རྒྱས་གོང་དུ་འཕེལ་རྒྱུ་ཡིན་པ་དང་། ཁོང་གིས་ཡེ་རུ་ཤ་ལེམ་ལ་སྐྱར་དུ་སྐྱབས་གྲོགས་མཛད་ཅིང་། དེ་ལ་སྐུ་ཉིད་རང་གི་གྲོང་ཁྱེར་ཞིག་ཏུ་ངོས་འཛིན་གནང་རྒྱུ་ཡིན་ནོ༎

¹⁸ཡང་ཞལ་གཟིགས་གཞན་ཞིག་ལ་ངས་གླང་གི་རྭ་ཅོ་བཞི་མཐོང་ཞིང་།

¹⁹ང་དང་མཉམ་དུ་གཏམ་གླེང་བྱེད་བཞིན་པའི་ཕོ་ཉ་དེ་ལ་ངས། རྭ་ཅོ་འདི་ཚོའི་རྟགས་མཚན་གང་ཡིན་ནམ་ཞེས་འདྲིས་པའི་ལན་དུ། ཕོ་ཉ་དེས། དེ་ཚོ་ནི་ཡ་ཧུ་དཱ་དང་། ཨིསི་རཱཨེལ་དང་། ཡེ་རུ་ཤ་ལེམ་གྱི་མི་རྣམས་ཕྱོགས་གང་སར་ཁ་འཐོར་དུ་གཏོང་མཁན་སྟོབས་ཤུགས་ལྡན་པའི་རྒྱལ་ཁབ་དེ་ལ་མཚོན་པ་ཡིན་ནོ་ཞེས་སྨྲས་སོ།

²⁰དེ་རྗེས་གཙོ་བོ་དཀོན་མཆོག་གིས་ང་ལ། ལག་ཏུ་ཐོ་བ་འཁྱེར་བའི་བཟོ་པ་བཞི་བསྟན་པ་གནང་ཞིང་།

²¹ངས་དེ་ཚོ་ག་རེའི་ཆེད་དུ་ཡོང་བ་ཡིན་ནམ་ཞེས་བཀའ་འདྲི་ཞུས་པའི་ལན་དུ། ཕོ་ཉས། དེ་ཚོ་ནི་ཡ་ཧུ་དཱ་ཡོངས་སུ་འཇིག་སྐྱོན་བཏང་ཞིང་དེའི་ཡུལ་མི་རྣམས་ས་ཕྱོགས་ཀུན་ཏུ་ཁ་འཐོར་བཏང་མཁན་རྒྱལ་ཁབ་རྣམས་ལ་དངངས་སྐྲག་བསྐུལ་ཞིང་དེ་ཚོའི་སྲིད་དབང་འཕྲོག་པའི་ཆེད་དུ་ཡོང་བ་ཡིན་ནོ་ཞེས་སྨྲས་སོ༎