Read Tibetan — པོད་སྐད་Tibetan Old Testament 2011 ཛ་ཀར་ཡ 10 Bible Online

ཛ་ཀར་ཡ 10 - Tibetan — པོད་སྐད་Tibetan Old Testament 2011 bible

ཛ་ཀར་ཡ 10

¹དཔྱིད་ཀའི་ནམ་དུས་སུ་ཆར་ཆུ་འབེབས་པའི་ཕྱིར་གཙོ་བོ་དཀོན་མཆོག་ལ་ཞུ་དགོས། ས་ཞིང་བཟང་པོ་ཡོང་བའི་ཆེད་དུ་ཆར་ཆུའི་སྤྲིན་པ་ཆར་ཆུ་འབེབས་པར་མཛད་མཁན་དེ་ནི་གཙོ་བོ་དཀོན་མཆོག་རང་ཉིད་ཡིན།

²མི་ཚོས་སྐུ་དང་ལྷ་པ་མོ་པ་སོགས་ལ་བརྟེན་མོད། འོན་ཀྱང་དེ་ཚོས་བརྫུན་མ་དང་ཆོ་མེད་ཁོ་ན་ལན་འདེབས་བྱེད་པ་དང་། ཡང་འགའ་ཤས་ཀྱིས་རྨི་ལམ་གྱི་དོན་འབྲེལ་ལོག་པ་བརྒྱབ་ནས་མི་ལ་མགོ་སྐོར་ལམ་ལོག་ཏུ་འཁྲིད་པ་དང་། དེ་ཚོས་ཕན་ཐོག་མེད་པའི་སེམས་གསོ་བཏང་བས། མི་མང་རྣམས་ལུག་བརླག་པ་བཞིན་ས་ཕྱོགས་ཀུན་ཏུ་གྲམ་ཞིང་། དེ་ཚོར་འགོ་ཁྲིད་བྱེད་མཁན་མེད་པས་དཀའ་ངལ་གྱི་ནང་དུ་ཚུད་དོ།

³གཙོ་བོ་དཀོན་མཆོག་གིས། ངའི་མི་འབངས་རྣམས་ལ་སྲིད་སྐྱོང་བྱེད་མཁན་ཕྱི་རྒྱལ་བའི་ཐོག་ང་ཁྲོ་ཡོད་པས་ངས་དེ་ཚོར་ཉེས་ཆད་གཏོང་རྒྱུ་ཡིན། ཡ་ཧུ་དཱའི་ཡུལ་མི་རྣམས་ནི་ངའི་མི་འབངས་ཡིན་པས། ང་ཀུན་དབང་ལྡན་པའི་གཙོ་བོ་དཀོན་མཆོག་ངས་དེ་ཚོའི་འཚོ་སྐྱོང་བྱེད་རྒྱུ་ཡིན། དེ་ཚོ་ནི་ངའི་རྟ་དམག་གི་ཚོ་བཞིན་སྟོབས་ཤུགས་ལྡན་པ་འགྱུར་རྒྱུ་ཡིན།

⁴དེ་ཚོའི་ཁོངས་ནས་སྲིད་སྐྱོང་བྱེད་མཁན་དང་། འགོ་བྱེད་དང་གཞན་ཡང་དམག་སྤྱི་རྣམས་ཐོན་ཏེ། ངའི་མི་འབངས་རྣམས་ལ་སྲིད་སྐྱོང་བྱེད་རྒྱུ་ཡིན།

⁵ཡ་ཧུ་དཱའི་ཡུལ་མི་རྣམས་ནི་ལམ་སྲང་ཁུལ་གྱི་འདམ་རྫབ་ནང་དུ་རང་གི་དགྲ་བོར་རྐང་བརྫིས་གཏོང་མཁན་དམག་མི་ལྟར་རྒྱལ་ཁ་ཐོབ་པར་འགྱུར། གཙོ་བོ་དཀོན་མཆོག་དེ་ཚོ་དང་མཉམ་དུ་གནས་ཡོད་པས་རྐྱེན་གྱིས། དེ་ཚོས་འཐབ་རྒོལ་བྱས་པ་དང་རྟ་དམག་རྣམས་ཀྱང་འཕམ་པར་བྱས་རྒྱུ་ཡིན།

⁶ངས་ཡ་ཧུ་དཱའི་ཡུལ་མི་རྣམས་སྟོབས་ཤུགས་དང་ལྡན་པར་བྱེད་རྒྱུ་དང་། ཨིསི་རཱཨེལ་གྱི་ཡུལ་མི་རྣམས་ལ་སྐྱབས་རྒྱུ་ཡིན། ངས་དེ་ཚོར་སྙིང་རྗེ་ཆེན་པོས་རང་ཡུལ་དུ་ཕྱིར་སློག་བྱེད་རྒྱུ་ཡིན་པ་དང་། ངས་དེ་ཚོ་ནམ་ཡང་དོར་མེད་པ་བཞིན་བྱུང་རྒྱུ་ཡིན། གང་ལགས་ཟེར་ན། ང་ནི་དེ་ཚོའི་དཀོན་མཆོག་གཙོ་བོ་དཀོན་མཆོག་ཡིན་པས། ངས་དེ་ཚོའི་ཞུ་བར་ལན་འདེབས་བྱེད་རྒྱུ་ཡིན།

⁷ཨིསི་རཱཨེལ་མི་མང་རྣམས་ནི་དམག་མི་བཞིན་དུ་སྟོབས་ཤུགས་ལྡན་པ་དང་། རྒུན་ཆང་འཐུང་མཁན་བཞིན་དུ་དགའ་མགུར་སྤྱོད་པས། གཙོ་བོ་དཀོན་མཆོག་གིས་ཁོ་ཚོར་གང་གནང་བ་དེ་མཐོང་ནས་ཁོ་ཚོའི་བུ་བརྒྱུད་ཚོས་རྒྱལ་ཁ་དེའི་སྐོར་ལ་དྲན་གསོ་བྱེད་དེ་དགའ་མགུར་སྤྱོད་རྒྱུ་དང་།

⁸ངས་རང་གི་མི་འབངས་རྣམས་བོས་ཏེ། ས་གནས་གཅིག་ཏུ་བཀོང་རྒྱུ་ཡིན་པ་དང་། ངས་དེ་ཚོར་སྐྱབས་ཏེ་དེ་ཚོའི་ཁ་གྲངས་སྤེལ་ནས་སྔར་བཞིན་མི་འབོར་ཆེན་པོ་བཟོ་རྒྱུ་ཡིན་ནོ།

⁹སྔར་ངས་དེ་ཚོ་རྒྱལ་ཁབ་ཀུན་ཏུ་ཁ་གཏོར་མོད། འོན་ཀྱང་ཡུལ་གྲུ་ཐག་རིང་ཁུལ་ནས་ཁོ་ཚོས་ང་ལ་དྲན་གསོ་བྱས་པས། ཁོ་ཚོས་བུ་ཕྲུག་དང་བཅས་པ་འཚོ་ཞིང་། ལྷན་ཅིག་ཏུ་རང་ཡུལ་ལ་ཕྱིར་ལོག་བྱེད་རྒྱུ་ཡིན་ནོ།

¹⁰ངས་དེ་དག་ཨི་ཇིབ་དང་ཨ་སུར་ཡུལ་ནས་འཁྲིད་ཡོང་སྟེ། དེ་དག་རང་ཡུལ་དུ་གཞིས་ཆགས་ཤིང་། ངས་དེ་ཚོ་གྷིལ་ཨད་དང་ལེ་བ་ནོན་ཁུལ་དུ་ཡང་གཞིས་ཆགས་བཅུག་པས། ཡུལ་ཡོངས་སུ་མིས་གང་བར་འགྱུར།

¹¹དེ་ཚོས་དཀའ་སྡུག་གི་རྒྱ་མཚོ་རྒལ་ནས་འགྲོ་སྐབས། དེའི་རྦ་རླབས་རྣམས་ངས་ཞི་བར་བྱས་པས། གཙང་པོ་ན་ཨེལ་གཏིང་ནས་སྐམ་པར་འགྱུར་བ་དང་། ཨ་སུར་གྱི་ང་རྒྱལ་ཞི་ཞིང་དུལ་པོར་འགྱུར་ཏེ། ཨི་ཇིབ་ཀྱི་དཔལ་ཉམས་པར་འགྱུར།

¹²ངས་རང་གི་མི་འབངས་རྣམས་སྟོབས་དང་ལྡན་པར་བྱས་ཏེ། དེ་ཚོས་ང་ལ་བསྙེན་བཀུར་བྱས་ཤིང་ངའི་བཀའ་ལ་རྩིས་སྲུང་བྱེད་པར་འགྱུར་ཞེས་གཙོ་བོ་དཀོན་མཆོག་གིས་གསུངས་སོ༎