Read Tibetan — པོད་སྐད་Tibetan Old Testament 2011 ཛ་ཀར་ཡ 13 Bible Online

ཛ་ཀར་ཡ 13 - Tibetan — པོད་སྐད་Tibetan Old Testament 2011 bible

ཛ་ཀར་ཡ 13

¹ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་པ། སྐབས་དེར་དཱ་བིད་ཀྱི་རིགས་བརྒྱུད་དང་། ཡེ་རུ་ཤ་ལེམ་གྱི་ཡུལ་མི་རྣམས་ཀྱི་སྡིག་པ་དང་འདྲ་སྐུའི་མཆོད་པ་ནས་འདག་པའི་ཆེད་དུ་ཆུ་མིག་ཅིག་རྡོལ་ཞིང་།

²སྐབས་དེར་ངས་ཡུལ་གྱི་ནང་ནས་སྐུ་འདྲའི་མིང་རྣམས་མེད་པར་བྱས་ཏེ། སུས་ཀྱང་དེ་ཚོ་སླར་ཡང་མི་དྲན་པ་དང་། ལུང་སྟོན་པ་ཡིན་ཚུལ་བྱེད་མཁན་རྣམས་ལ་ངས་ཚར་གཅོད་བཏང་ཞིང་། མི་རྣམས་ཀྱི་སེམས་ནས་ལྷ་སྐུར་མཆོད་པའི་འདོད་པ་རྣམས་མེད་པར་བྱེད་རྒྱུ་ཡིན།

³དེ་རྗེས་སུས་ཀྱང་ད་དུང་ལུང་བསྟན་བཤད་ཚུལ་བྱས་པ་ཡིན་ན། ཁོ་ངེས་པར་དུ་བསད་དགོས་ཅེས་རང་གི་ཕ་མ་གཉིས་ནས་བརྗོད་པར་འགྱུར། གང་ལགས་ཟེར་ན། ཁོས་གཙོ་བོ་དཀོན་མཆོག་གི་ལུང་བསྟན་བཤད་ཚུལ་བྱས་ཀྱང་། དོན་དམ་དུ་ལུང་བསྟན་བརྫུན་མ་བཤད་པས་ཕྱིར་རོ། དེ་བཞིན་ཁོས་ལུང་བསྟན་བརྫུན་མ་བཤད་པ་ཡིན་ན། རང་གི་ཕ་མ་གཉིས་ཀྱིས་ཁོ་ལ་མཚོན་ཆ་བཙུགས་ནས་བསད་པར་འགྱུར།

⁴སྐབས་དེར་ལུང་སྟོན་པ་གཅིག་གིས་ཀྱང་ངས་ཞལ་གཟིགས་མཐོང་ཞིང་ལུང་བསྟན་བཤད་ཐུབ་ཀྱི་ཡོད་ཅེས་ང་རྒྱལ་མི་བྱེད་ཅིང་། ལུང་སྟོན་པ་ཡིན་ཚུལ་གྱིས་གྱོན་གོས་རྩུབ་པོ་དེ་དག་གྱོན་ཏེ་མི་མང་ལ་མགོ་སྐོར་གཏོང་མཁན་གཅིག་ཀྱང་མི་འབྱུང་ངོ་།

⁵སྐབས་དེར་མི་ཚོས། ང་ནི་ལུང་སྟོན་པ་མ་ཡིན་ཏེ། སོ་ནམ་པ་ཡིན་པས། ངས་ཚེ་གང་ཞིང་ལས་ཁོ་ན་བྱས་ནས་བསྡད་པ་ཡིན་ཞེས་སྨྲ་བར་འགྱུར།

⁶ཡང་འགའ་ཞིག་གིས། ཁྱོད་ཀྱི་བྲང་གི་རྨ་དེ་གང་ཡིན་ནམ་ཞེས་འདྲི་བ་ཡིན་ན། དེའི་ལན་དུ་ཁོས། དེ་ནི་ངའི་མཛའ་གྲོགས་ཀྱི་ཁང་པ་ནས་བྱུང་བའི་རྨ་ཡིན་ནོ་སྨྲས་ཡོང་༎

⁷ཀུན་དབང་ལྡན་པའི་གཙོ་བོ་དཀོན་མཆོག་གིས། ཀྱེ་རལ་གྲི། ངའི་ལས་བྱེད་མཁན་རྫི་བོ་དེ་ལ་རྒོལ་ཕྱིར་ཡར་ལོང་ཞིག ཁོ་ལ་གསོད་ཅིག། དེ་རྗེས་ལུག་རྣམས་ཁ་འཐོར་དུ་འགྲོ་ཡོང་། ངས་རང་གི་མི་འབངས་རྣམས་ལ་རྒོལ་རྒྱུ་ཡིན།

⁸ཡུལ་ཡོངས་ཀྱི་མི་འབོར་གསུམ་ཆ་གཉིས་ཙམ་ཤི་བར་འགྱུར།

⁹ངས་ལྷག་འཕྲོས་གསུམ་ཆ་གཅིག་པོ་དེ་ལ་དངུལ་ལ་མེས་དྭངས་སྙིག་སེལ་བ་བཞིན་ལྷད་འདོན་རྒྱུ་དང་། གསེར་ཚོད་བལྟ་བྱེད་པ་བཞིན་བརྟག་དཔྱད་བྱེད་རྒྱུ་ཡིན། དེ་ནས་ཁོ་ཚོས་ང་ལ་གསོལ་འདེབས་བྱེད་སྐབས་ངས་དེ་ཚོར་ལན་སྤྲོད་རྒྱུ་ཡིན་པ་དང་། དེ་ཚོ་ངའི་མི་འབངས་ཡིན་ཞེས་ངས་དེ་ཚོ་ལ་སྨྲ་རྒྱུ་ཡིན་པ་དང་། ང་ནི་ཁོ་ཚོའི་དཀོན་མཆོག་ཡིན་པར་དེ་ཚོས་ངོས་ལེན་བྱ་རྒྱུ་ཡིན་ནོ༎