Read Tibetan — པོད་སྐད་Tibetan Old Testament 2011 ཛ་ཀར་ཡ 3 Bible Online

ཛ་ཀར་ཡ 3 - Tibetan — པོད་སྐད་Tibetan Old Testament 2011 bible

ཛ་ཀར་ཡ 3

¹ཞལ་གཟིགས་གཞན་ཞིག་གི་ནང་གསལ། གཙོ་བོ་དཀོན་མཆོག་གིས་ང་ལ་གཙོ་བོ་དཀོན་མཆོག་གི་ཕོ་ཉའི་མདུན་དུ་བླ་ཆེན་ཡོ་ཤུ་ཨ་ལངས་ནས་བསྡད་པ་བསྟན་གནང་ངོ་། ཡང་ཡོ་ཤུ་ཨ་ལ་སྐྱོན་བརྗོད་བྱེད་ཕྱིར་བདུད་དེའང་ཁོང་གི་འགྲམ་དུ་ལངས་ནས་ཡོད་པ་དང་།

²གཙོ་བོ་དཀོན་མཆོག་གི་ཕོ་ཉས་བདུད་དེ་ལ། ཀྱེ། བདུད། གཙོ་བོ་དཀོན་མཆོག་གིས་ཁྱོད་ལ་སྐྱོན་བརྗོད་མཛད་པར་ཤོག། ཡེ་རུ་ཤ་ལེམ་ལ་གཅེས་པོ་གནང་མཁན་གཙོ་བོ་དཀོན་མཆོག་དེས་ཁྱོད་ལ་སྐྱོན་བརྗོད་གནང་བར་ཤོག། སྐྱེ་བོ་འདི་ནི་མེ་ནས་བཏོན་པའི་ཤིང་འབར་བཞིན་པ་ཞིག་དང་མཚུངས་པ་ཡིན་ནོ་ཞེས་གསུངས་སོ།

³ཡོ་ཤུ་ཨ་ནི་གྱོན་གོས་བཙོག་པ་ཞིག་གོན་ནས་དེར་ལངས་ནས་ཡོད་པས།

⁴དེ་ནས་ཕོ་ཉ་དེས་དེར་ལངས་བསྡད་ཡོད་པའི་གཞན་ཚོ་ལ། སྐྱེ་བོ་འདིས་གོན་པའི་གྱོན་གོས་བཙོག་པ་རྣམས་མར་ཕུད་ཅིག་ཅེས་གསུངས་པ་དང་། ཁོང་གིས་ཡོ་ཤུ་ཨ་ལའང་། ངས་ཁྱོད་ཀྱི་སྡིག་པ་སེལ་ཚར་བ་ཡིན་པས། ད་ངས་ཁྱོད་ལ་གྱོན་གོས་གསར་པ་ཞིག་གཡོག་རྒྱུ་ཡིན་ཞེས་གསུངས་སོ།

⁵དེ་བས་ན་ཁོང་གིས་དེ་ཚོ་ལ་ཡོ་ཤུ་ཨའི་མགོ་ལ་ཐོད་རས་གཙང་མ་ཞིག་གཡོགས་ཤིག་ཅེས་གསུངས་སོ། དེ་ཚོས་ཁོང་གི་མགོ་ལ་ཐོད་རས་སྒྲོན་ནས་གཟུགས་པོར་གྱོན་གོས་གསར་པ་ཞིག་སྒྲོན་ནོ། ཡང་དེའི་རིང་དུ་གཙོ་བོ་དཀོན་མཆོག་གི་ཕོ་ཉ་དེ་ནི་གནས་དེ་རང་དུ་བཞེངས་ནས་བཞུགས་སོ།

⁶དེ་རྗེས་ཕོ་ཉ་དེས་ཡོ་ཤུ་ཨ་ལ།

⁷ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་གསལ། གལ་ཏེ་ཁྱོད་ཀྱིས་ངའི་བཀའ་ཁྲིམས་ལ་རྩིས་སྲུང་བྱས་ཏེ། ངས་མངགས་པའི་ལས་འགན་རྣམས་བསྒྲུབ་པ་ཡིན་ན། ཁྱོད་སྔར་བཞིན་མུ་མཐུད་དེ་ངའི་མཆོད་ཁང་དང་ཚོམས་སྐོར་གྱི་དོ་དམ་པ་བྱེད་རྒྱུ་ཡིན་པ་དང་། ངའི་སྤྱན་སྔར་ཕོ་ཉ་ཚོའི་ཞུ་བར་ཉན་པ་བཞིན། ངས་ཁྱོད་ཀྱི་ཞུ་བ་ཡང་ཉན་རྒྱུ་ཡིན་ནོ།

⁸ཀྱེ་བླ་ཆེན་ཡོ་ཤུ་ཨ་དང་བླ་མ་གཞན་རྣམས་ཚུར་ཉོན་དང་། ཁྱོད་ཚོ་ནི་མ་འོངས་པའི་རྟགས་མཚན་བཟང་པོ་དེ་ཡིན་ནོ། ངའི་ཞབས་ཏོག་པ་ཡལ་ག་ཞུ་བ་དེ་མངོན་པར་བྱེད་རྒྱུ་ཡིན་པ་དང་།

⁹ངས་ཡོ་ཤུ་ཨའི་མདུན་དུ་གདོང་པ་བདུན་བྱས་པའི་རྡོ་གཅིག་བཞག་སྟེ། དེའི་ཁར་ངས་རྐོས་རྒྱབ་ནས་བྲིས་རྒྱུ་ཡིན་པ་དང་། ཡང་ཡུལ་འདིའི་ཉེས་སྡིག་ནི་ངས་ཉིན་ཞག་གཅིག་གི་ནང་དུ་སེལ་བར་བྱེད་རྒྱུ་ཡིན།

¹⁰དེ་ཉིན་ཁྱོད་ཚོས་རང་རང་སོ་སོའི་ཁྱིམ་མཚེས་རྣམས་ལ་རྒུན་ཚལ་དང་སེ་ཡབ་ཤིང་གི་བསྐོར་བའི་བསྟི་གནས་དེར་དགའ་སྐྱིད་དང་ཞི་བདེའི་དཔལ་ལ་ལོངས་སྤྱོད་ཕྱིར་འབོད་པར་བྱའོ༎