Read Tibetan — པོད་སྐད་Tibetan Old Testament 2011 ཛ་ཀར་ཡ 6 Bible Online

ཛ་ཀར་ཡ 6 - Tibetan — པོད་སྐད་Tibetan Old Testament 2011 bible

ཛ་ཀར་ཡ 6

¹ཞལ་གཟིགས་གཞན་ཞིག་གི་ནང་དུ་ངས་ལིའི་རི་བོ་གཉིས་ཀྱི་བར་ནས་ཤིང་རྟ་བཞི་ཡོང་བཞིན་པ་མཐོང་བྱུང་།

²ཤིང་རྟ་དང་པོ་དེ་རྟ་དམར་པོ་ཚོས་དང་། ཤིང་རྟ་གཉིས་པར་རྟ་ནག་པོ་ཚོས་དང་།

³ཤིང་རྟ་གསུམ་པར་རྟ་དཀར་པོ་ཚོས་དང་། ཤིང་རྟ་བཞི་པར་རྟ་ཁྲ་ཁྲ་ཚོས་འཐེན་ནས་ཡོད་དོ།

⁴ངས་ཕོ་ཉ་ལ། གཙོ་བོ། ཤིང་རྟ་འདི་ཚོའི་རྟགས་མཚན་གང་ཡིན་ནམ་ཞེས་ཞུས་པའི་ལན་དུ།

⁵ཁོང་གིས། འདི་ཚོ་ནི་ས་གཞི་ཀུན་གྱི་གཙོ་བོ་དཀོན་མཆོག་གི་སྤྱན་སྔ་ནས་ད་ལྟ་རང་ཐོན་པའི་རླུང་བཞི་པོ་དེ་ཡིན་ནོ་ཞེས་གསུངས་སོ།

⁶རྟ་ནག་པོ་རྣམས་ཀྱིས་འཐེན་པའི་ཤིང་རྟ་དེ་ནི་བྱང་ཕྱོགས་བྷེ་བྷི་ལོ་ནི་ཡ་དང་། རྟ་དཀར་པོ་རྣམས་ཀྱིས་འཐེན་པའི་ཤིང་རྟ་དེ་ནི་ནུབ་ཕྱོགས་དང་། དེ་བཞིན་རྟ་ཁྲ་ཁྲ་རྣམས་ཀྱིས་འཐེན་པའི་ཤིང་རྟ་དེ་ནི་ལྷོ་ཕྱོགས་ཀྱི་ཡུལ་དུ་འགྲོ་གི་ཡོད་པ་དང་།

⁷སྟོབས་ཤུགས་ལྡན་པའི་རྟ་རྣམས་ནི་ཕྱིར་ཐོན་ནས་དེ་ཚོ་ས་གཞིར་རྟོགས་ཞིབ་བྱེད་ཕྱིར་འགྲོ་བར་བྲལ་ཚུབ་བྱེད་བཞིན་ཡོད་དོ། ཕོ་ཉས་དེ་ཚོ་ལ་ ད་ཁྱོད་ཚོ་ས་གཞིར་བརྟག་ཞིབ་བྱེད་པར་སོང་ཞིག་ཅེས་གསུངས་པ་དང་། དེ་ཚོ་ཕྱིན་ནོ།

⁸དེ་རྗེས་ཕོ་ཉ་དེས་ང་ལ་སྐད་འབོད་ཆེན་པོས། བྱང་ཕྱོགས་བྷེ་བྷི་ལོ་ནི་ཡ་དུ་ཕྱིན་པའི་རྟ་རྣམས་ཀྱིས་གཙོ་བོ་དཀོན་མཆོག་གི་ཐུགས་ཁྲོ་དེ་ཞི་བར་བྱས་སོ་ཅེས་གསུངས་སོ༎

⁹དེ་ནས་གཙོ་བོ་དཀོན་མཆོག་གིས་ང་ལ་གསུང་འཕྲིན་ཞིག་གནང་གསལ།

¹⁰ཁྱོད་ཀྱིས་བཙན་བྱོལ་པ་ཧེལ་དའི་དང་། ཏོ་བྷི་ཡཱ་དང་། ཡེ་དྷ་ཡཱ་བཅས་ནས་ཕུལ་བའི་འབུལ་བ་རྣམས་ལེན་ཏེ། ཛེ་ཕན་ཡཱའི་བུ་ཡོ་ཤི་ཡཱའི་ཁྱིམ་ལ་ད་ལྟ་ཉིད་དུ་སོང་ཞིག མི་འདི་ཚོ་ཚང་མ་བྷེ་བྷི་ལོ་ནི་ཡའི་བཙན་བྱོལ་ནས་ཕྱིར་ལོག་བྱས་ཡོད།

¹¹དེ་ཚོས་ཕུལ་བའི་གསེར་དང་དངུལ་ལས་ཅོད་པཎ་ཞིག་བཟོས་ནས་ཡེ་ཧོ་ཛ་དག་གི་བུ་བླ་ཆེན་ཡོ་ཤུ་ཨའི་མགོ་ལ་གཡོགས་ཤིག

¹²ཡང་ཁྱོད་ཀྱིས་དེ་ལ། ཀུན་དབང་ལྡན་པའི་གཙོ་བོ་དཀོན་མཆོག་གིས། ཡལ་ག་ཞེས་པའི་སྐྱེ་བོ་དེ་ནི་ཁོ་རང་ཡོད་སའི་གནས་དེར་གོང་དུ་འཕེལ་ཞིང་། ཁོང་གིས་གཙོ་བོ་དཀོན་མཆོག་གི་མཆོད་ཁང་དེ་སྐྱར་དུ་བཞེངས་རྒྱུ་ཡིན་པ་དང་།

¹³ཁོང་ནི་མཆོད་ཁང་བཞེངས་མཁན་འདི་ཡིན་པས་ཁོང་ལ་རྒྱལ་པོ་ལྟ་བུའི་བཀུར་སྟི་ཞུ་རྒྱུ་དང་། དེ་རྗེས་ཁོང་གིས་ཉིད་ཀྱི་མི་འབངས་རྣམས་ལ་སྲིད་སྐྱོང་གནང་ཞིང་། ཁོང་གི་བཞུགས་ཁྲིའི་དྲུང་དུ་བླ་མ་ཞིག་བཞུགས་ཏེ། ཁོང་གཉིས་ཞི་བདེ་དང་མཐུན་ལམ་གྱི་སྒོ་ནས་ལས་བྱས་པར་འགྱུར་ཞེས་གསུངས་བྱུང་ཞེས་ཞུས་ཤིག

¹⁴ཅོད་པཎ་དེ་ནི་གཙོ་བོ་དཀོན་མཆོག་གི་མཆོད་ཁང་ནང་དུ་ཧེལ་དའི་དང་། ཏོ་བྷི་ཡཱ་དང་། ཡེ་དྷ་ཡཱ་དང་། ཡོ་ཤི་ཡཱའི་དྲན་རྟེན་གྱི་ཆེད་དུ་འགྱུར་ཡོང་།

¹⁵ཡང་ཐག་རིང་ཡུལ་དུ་གནས་པའི་མི་རྣམས་ཡོང་ནས་གཙོ་བོ་དཀོན་མཆོག་གི་མཆོད་ཁང་གསར་བཞེངས་ཀྱི་ཨར་ལས་ལ་རོགས་བྱེད་རྒྱུ་ཡིན་པ་དང་། མཆོད་ཁང་གསར་བཞེངས་ཀྱི་ལས་འགུལ་དེ་འགྲུབ་པའི་སྒོ་ནས། ཀུན་དབང་ལྡན་པའི་གཙོ་བོ་དཀོན་མཆོག་གིས་ང་ལ་ཁྱོད་ཚོ་ཡོད་སར་བཏང་གནང་བ་ཡིན་པ་དེ་ཁྱོད་ཚོས་ཤེས་པར་འགྱུར། འོན་ཀྱང་དེ་བཞིན་འབྱུང་བ་ལ་ཁྱོད་ཚོས་གཙོ་བོ་དཀོན་མཆོག་རང་གི་དཀོན་མཆོག་གི་བཀའ་ཁྲིམས་ཆ་ཚང་བརྩིས་སྲུང་ཞུ་དགོས་སོ༎