Read Tibetan — པོད་སྐད་Tibetan Old Testament 2011 མ་ལ་ཀི 1 Bible Online

མ་ལ་ཀི 1 - Tibetan — པོད་སྐད་Tibetan Old Testament 2011 bible

མ་ལ་ཀི 1

¹ཨིསི་རཱཨེལ་མི་མང་རྣམས་ལ་བཀའ་བསྒོས་གནང་ཕྱིར་གཙོ་བོ་དཀོན་མཆོག་གིས་མ་ལ་ཀིའི་བརྒྱུད་ནས་གནང་བའི་གསུང་འཕྲིན་འདི་ཡིན་ནོ།

²གཙོ་བོ་དཀོན་མཆོག་གིས་ཉིད་ཀྱི་མི་མང་རྣམས་ལ་བཀའ་གནང་བ། ངས་ཁྱོད་ཚོར་རྒྱུན་དུ་བརྩེ་བ་བྱེད་ཡོད། འོན་ཀྱང་ཁོ་ཚོས། ཁྱེད་ཀྱིས་ང་ཚོར་ཐུགས་བརྩེ་ཇི་ལྟར་གནང་ཡོད་དམ་ཞེས་བཀའ་འདྲི་ཞུས་པར། གཙོ་བོ་དཀོན་མཆོག་གིས་བཀའ་ལན་དུ། ཨེ་སའོ་དང་ཡ་ཀོབ་གཉིས་སྤུན་ཡིན་རུང་། ངས་ཡ་ཀོབ་དང་ཁོའི་རིགས་བརྒྱུད་རྣམས་ལ་གཅེས་པར་བྱས་པ་ཡིན།

³ཨེ་སའོ་དང་ཁོའི་རིགས་བརྒྱུད་རྣམས་ལ་སྡང་བ་ཡིན། ཨེ་སའོའི་རི་བརྒྱུད་ཁག་གི་ཡུལ་སྟོངས་སྟེ་ཁྱི་སྤྱང་ཚོའི་ཕྱིར་དུ་སྤངས་ནས་ཡོད།

⁴གལ་ཏེ་ཨེ་སའོའི་རིགས་བརྒྱུད་ཨེ་དྷོམ་པ་ཚོས། ང་ཚོའི་གྲོང་ཁྱེར་རྣམས་སྟོར་ཞིག་ཏུ་ཕྱིན་རུང་། དེ་དག་སྐྱར་དུ་འཛུག་བསྐྲུན་བྱེད་རྒྱུ་ཡིན་ཞེས་སྨྲས་ན་ཡང་། གཙོ་བོ་དཀོན་མཆོག་གིས་ལན་དུ། དེ་ཚོས་འཛུག་བསྐྲུན་བྱས་རུང་ངས་ཡང་སྐྱར་བརྟིབས་རྒྱུ་ཡིན་པས། མི་ཚོས་དེ་ཚོར། ཡུལ་ངན་པ་དང་། གཙོ་བོ་དཀོན་མཆོག་དུས་གཏན་དུ་ཐུགས་ཁྲོ་བའི་མི་རིགས་ཞེས་བརྗོད་ནས་མིང་བཏགས་ཡོང་།

⁵གནས་ཚུལ་དེ་ནི་ཨིསི་རཱཨེལ་མི་མང་རྣམས་ཀྱི་རང་གི་མིག་གི་མཐོང་བར་འགྱུར། དེ་ཚོས་ཨིསི་རཱཨེལ་ཙམ་མ་ཟད་ཕྱི་རོལ་དུའང་གཙོ་བོ་དཀོན་མཆོག་ནི་མངའ་ཐང་ཆེའོ་ཞེས་བརྗོད་ཡོང་༎

⁶ཀུན་དབང་ལྡན་པའི་གཙོ་བོ་དཀོན་མཆོག་གིས་བླ་མ་རྣམས་ལ། བུས་རང་གི་ཕ་དང་གཡོག་པོས་རང་གི་སྦྱིན་བདག་ལ་གུས་བཀུར་ཞུས་ཤིང་། ང་ནི་ཁྱོད་ཚོའི་ཕ་དང་སྦྱིན་བདག་ཡིན་པས། ཁྱོད་ཚོས་ང་ལ་གུས་བཀུར་བྱེད་མི་འོས་སམ། ཁྱོད་ཚོས་ང་ལ་མཐོང་ཆུང་བྱེད་བཞིན་དུ། ད་དུང་ང་ཚོས་ཇི་ལྟར་མཐོང་ཆུང་བྱས་སམ་ཞེས་འདྲི་རྩད་བྱེད་ཀྱི་ཡོད།

⁷ཁྱོད་ཚོས་ང་ལ་དེ་ལྟར་མཐོང་ཆུང་བྱས་སོ། ངའི་མཆོད་ཁྲིའི་སྟེང་དུ་ཞལ་ཟས་མི་རུང་བ་དག་འབུལ་བའི་སྒོ་ནས་ཡིན་ནོ། ང་ཚོས་ཁྱེད་ལ་གུས་བཀུར་མ་ཞུས་པ་དེ་ཇི་ལྟར་ཡིན་ནམ་ཞེས་ཁྱོད་ཚོས་འདྲི་བ་བྱས་པས། དེ་ནི་ཁྱོད་ཚོས་ངའི་མཆོད་ཁྲིར་མཐོང་ཆུང་བྱས་ནས་ང་ལ་གུས་བཀུར་མ་བྱས་སོ།

⁸ཁྱོད་ཚོས་ང་ལ་སེམས་ཅན་ལོང་བ་ཞིག་གམ། ནད་པའམ་ཞ་བོ་ཞིག་དམར་མཆོད་དུ་འབུལ་ན། དམར་མཆོད་དེར་སྐྱོན་གང་ཡང་མེད་ཅེས་བསམ་གྱི་འདུག་གམ། ཁྱོད་ཚོས་སེམས་ཅན་དེ་འདྲ་ཞིག་སྤྱི་ཁྱབ་ལ་ཕུལ་ན། ཁོ་དགའ་ཞིང་ཁྱོད་ལ་སྙིང་རྗེ་གནང་ཡོང་ངམ།

⁹ད་ཁྱོད་ཚོ་བླ་མ་རྣམས། ཁྱོད་ཚོས་དཀོན་མཆོག་ལ་ང་ཚོའི་ཐོག་ཏུ་བཟང་པོ་གནང་རོགས་གནང་ཞེས་ཞུ་བ་འབུལ་ནས་ལྟོས་ཤིག ཁྱོད་ཚོས་དེ་དང་འདྲ་བའི་འབུལ་བ་མི་གཙང་བ་འཁྱེར་ཡོང་བ་ཡིན་ན། ཁོང་གིས་ངོས་ལེན་གནང་ཡོང་ངམ།

¹⁰ཀུན་དབང་ལྡན་པའི་གཙོ་བོ་དཀོན་མཆོག་གིས། ཁྱོད་ཚོས་ངའི་མཆོད་ཁྲིའི་སྟེང་དུ་དོན་མེད་ཀྱི་མེ་དེ་འབར་མ་བཅུག་པའི་ཕྱིར། མཆོད་ཁང་གི་སྒོ་དེ་སུ་ཞིག་གིས་རྒྱབ་ནའང་ཡོང་ང་འདུག་། ང་ནི་ཁྱོད་ཚོར་མི་དགའོ། ཁྱོད་ཚོའི་འབུལ་བར་ངས་ངོས་ལེན་མི་བྱེད་དོ།

¹¹ས་གཞིའི་མཐའ་མཚམས་གཅིག་ནས་གཞན་བར་གྱི་མི་རིགས་ཚང་མས་ང་ལ་གུས་བཀུར་བྱེད་ཅིང་། ས་ཕྱོགས་ཀུན་ཏུ་དེ་ཚོས་ང་ལ་བདུག་སྤོས་བདུག་སྟེ། འབུལ་བ་རྣམས་འཁྱེར་ཡོང་བ་དང་། ཚང་མས་ང་ལ་གུས་བཀུར་བྱེད་དོ།

¹²འོན་ཀྱང་ཁྱོད་ཚོས་ངའི་མཆོད་ཁྲི་དེ་མི་འོས་པ་རེད་ཟེར་བ་དང་། དེའི་སྟེང་དུ་ཁྱོད་ཚོས་རང་ཉིད་ལ་མི་དགའ་བའི་ཞལ་ཟས་འབུལ་སྐབས་ང་ལ་དམའ་འབེབས་བྱེད་ཀྱི་ཡོད།

¹³ཁྱོད་ཚོས་ལབ་ཀྱི་ཡོད་དོ། དཀོན་མཆོག་ལ་ཞབས་ཏོག་ཞུ་རྒྱུ་ནི་ཧ་ཅང་ཁག་པོ་རེད་ཟེར་ནས་ཞེན་མེར་ལངས་ཀྱི་ཡོད་དོ། ཁྱོད་ཚོས་བརྐུས་པའི་སེམས་ཅན་ཞིག་གམ། ཡང་ན་ཞྭ་རིལ་ལམ་སེམས་ཅན་ནད་པ་ཞིག་ང་ལ་འབུལ་བར་ཕུལ་སྐབས། དེ་ལྟ་བུའི་འབུལ་བར་ངས་ངོས་ལེན་བྱེད་དམ།

¹⁴རང་གི་ཁྱུའི་ཁོངས་ནས་སེམས་ཅན་སྐྱོན་མེད་ཅིག་ང་ལ་འབུལ་བར་འཁྱེར་ཡོང་རྒྱུའི་དམ་བཅའ་བྱས་མོད། འོན་ཀྱང་དམ་བཅའ་གཞིར་བཟུང་མ་བྱས་པར་སེམས་ཅན་མཁོ་མེད་ཅིག་འབུལ་བའི་རྐྱེན་གྱིས་མགོ་བསྐོར་གཏོང་མཁན་དེའི་ཐོག་ཏུ་དམོད་པ་ཕོག་ངེས་སོ། ང་ནི་མངའ་ཐང་ཆེ་བའི་རྒྱལ་པོ་ཞིག་ཡིན་པས་མི་དང་རྒྱལ་ཁབ་ཚང་མས་ང་ལ་འཇིག་གི་ཡོད་དོ༎